TITUS
Ulrich von Eschenbach, Alexander
Part No. 41
Previous part

Chapter: 43b  
3. Briefwechsel Darius-Alexander


Verse: 5481       Sich bedâhte alsô der Asiân,
Verse: 5482    Alexandrô dem jungen man

Verse: 5483    einen brief er schrîben hieʒ.
Verse: 5484    in zwei wahszeichen man in stieʒ.

Verse: 5485    den brief der keiser sande
Verse: 5486    dem fürsten von Kriechen lande.

Verse: 5487    die boten, den er bevolhen wart,
Verse: 5488    mit rîcheit sich huoben ûf die vart.

Verse: 5489    sie kâmen dâ Alexander lac.
Verse: 5490    der ie zagheit sich bewac,

Verse: 5491    den vunden sie mit heres kraft
Verse: 5492    und mit vrecher ritterschaft.

Verse: 5493    der fürste die boten alrêst ersach.
Verse: 5494    zuo den sînen er sprach

Verse: 5495    'der admirât uns enbiutet,
Verse: 5496    waʒ eʒ halt bediutet.'

Verse: 5497    die boten wârn erbeiʒet.
Verse: 5498    Alexander sprach, 'heiʒet

Verse: 5499    den marschalc ir nemen war.'
Verse: 5500    der schuof in guote phleger dar,

Verse: 5501    die dienst gegen in niht sparten
Verse: 5502    und ir mit vlîʒe warten.

Verse: 5503    als mir die âventiure jach,
Verse: 5504    an in man rîche cleider sach.

Verse: 5505    vür den fürsten sie gâhten.
Verse: 5506    swache cleinôt sie im brâhten.

Verse: 5507    die boten mit zühten er enphienc.
Verse: 5508    in kurzewîle er ûf dem velde gienc.

Verse: 5509    den brief gâben sie im in die hant.
Verse: 5510    dar an er geschriben vant:

Verse: 5511    'Darîus, aller künge vogt,
Verse: 5512    des gewalt in wirde sich hât gezogt

Verse: 5513    von sîner geburte rehte
Verse: 5514    der hœhsten gote geslehte:

Verse: 5515    ich schrîbe hie Alexandrô,
Verse: 5516    mînem diener, alsô:

Verse: 5517    wie getarst du mir haʒ erzeigen?
Verse: 5518    du bist mit dienst mîn eigen.

Verse: 5519    merke wa: dir der brief sage.
Verse: 5520    schône dîner jungen tage

Verse: 5521    und dîner wahsenden zît.
Verse: 5522    dîn herze dir tummen rât gît.

Verse: 5523    du bist ze strîte noch ein wiht,
Verse: 5524    vil leide dir von mir geschiht.

Verse: 5525    umb dîn frevel kindekeit
Verse: 5526    füege ich dînem herzen leit.

Verse: 5527    vil sûre du arnen muost
Verse: 5528    die unzuht, die du gegen mir tuost.

Verse: 5529    lege dich in dîner muoter schôʒ,
Verse: 5530    die êren und kiusche nie verdrôʒ:

Verse: 5531    dâ soldest du haben noch gemach.
Verse: 5532    (mit valschem munde er daʒ sprach,

Verse: 5533    der frowen untât er ruocte.)
Verse: 5534    dîner kintheit baʒ fuocte

Verse: 5535    cleinôt, daʒ mîn milde hant,
Verse: 5536    Alexander, dir hât gesant:

Verse: 5537    biutel, phenninge, geisel, den bal
Verse: 5538    dîn kintheit noch uoben sal.

Verse: 5539    daʒ dir die geisel bescheinet:
Verse: 5540    dîn jugent von mir beweinet,

Verse: 5541    dâ mit enphæst du grôʒe slege.
Verse: 5542    bringest du mich in zornes rege,

Verse: 5543    du kintlîcher affe,
Verse: 5544    in vinster ich dich schaffe,

Verse: 5545    die du mit grôʒen riuwen
Verse: 5546    unz an dîn end muost biuwen.'

Verse: 5547       Dô Alexander gesach
Verse: 5548    die schrift, der im der brief verjach,

Verse: 5549    der drô er lützel erkam.
Verse: 5550    guot gemüete er im des nam,

Verse: 5551    doch was er niht zornes vrî:
Verse: 5552    der wonet im verborgen bî

Verse: 5553    in sîn herze er heimlich las
Verse: 5554    die rede, als im enboten was.

Verse: 5555    den Kriechen zuht niht vermeit.
Verse: 5556    dem keiser er genâde seit

Verse: 5557    der cleinôt, die im wâren brâht.
Verse: 5558    mit der rede was er bedâht

Verse: 5559    gegen den wolgezogen boten:
Verse: 5560    'ich danke Darîô (alrêst den goten)

Verse: 5561    dirre hêrlîchen cleinôt habe
Verse: 5562    und sîner hêrlîchen gâbe,

Verse: 5563    dâ mite er mich kan bedenken.
Verse: 5564    triuwe lât niht wenken

Verse: 5565    den man dô nennet admirât
Verse: 5566    gegen mir der mâʒe, als er die hât.'

Verse: 5567    dâ mite die rede alsô bleip.
Verse: 5568    einen brief er hin wider schreip,

Verse: 5569    als er wider wolde enpieten
Verse: 5570    und im sîn hêrren rieten.

Verse: 5571    'Die geisel, die du mir hâst gesant,
Verse: 5572    Darîus, mich des ermant,

Verse: 5573    du maht des niht vrî blîben,
Verse: 5574    ich enwelle dich umb trîben

Verse: 5575    als die kint den tophen tuont.
Verse: 5576    du hâst bewîst mir sælden vunt

Verse: 5577    mit dem sinewellen balle:
Verse: 5578    der sinewellen werlt alle

Verse: 5579    sol ich gewaldic werden,
Verse: 5580    liute, waʒʒers und der erden,

Verse: 5581    daʒ sich alleʒ ze dienst mir neiget.
Verse: 5582    daʒ phenninggeld erzeiget,

Verse: 5583    als ich dich bescheiden wil,
Verse: 5584    ich sol mit strîteclîchem spil,

Verse: 5585    Darîus, dir an gesigen
Verse: 5586    und mit gewalt dir obe ligen:

Verse: 5587    wann mir dîn hôchvart siges giht,
Verse: 5588    dar nâch man mich gewaltic siht

Verse: 5589    alles dînes hordes,
Verse: 5590    den du dâ ze Kordes

Verse: 5591    und anderswâ gesammet hâst:
Verse: 5592    rîcher habe überlast,

Verse: 5593    der du hâst gehordet vil,
Verse: 5594    ist mir gezogen erbezil.

Verse: 5595    von mîner hant eʒ wirt zerströut;
Verse: 5596    den die eʒ nâch kummer fröut,

Verse: 5597    den ich eʒ mache wol veile
Verse: 5598    mit milder gâbe teile.'

Verse: 5599       die boten wurden wider gesant.
Verse: 5600    die âventiure mê mich mant,

Verse: 5601    wie sîn künelich wahszeichen,
Verse: 5602    des hant kunde prîs erreichen,

Verse: 5603    an den brief versigelt wart.
Verse: 5604    dâ was vlîz angekart,

Verse: 5605    sîn bilde mit kunst dar an ergraben:
Verse: 5606    in harnasche ûf eime orse haben

Verse: 5607    sach man in in dem wahse streben,
Verse: 5608    als ob er strît wolde geben.

Verse: 5609    Die boten brâhten Darîô mære
Verse: 5610    welich craft des fürsten wære,

Verse: 5611    des brief dem keiser was gesant.
Verse: 5612    die schrift nam er in die hant,

Verse: 5613    die im die rede brâhte,
Verse: 5614    die im sêre versmâhte.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.