TITUS
Ulrich von Eschenbach, Alexander
Part No. 48
Previous part

Chapter: 69  
Eroberung Anchirias


Verse: 5954       dô sîn wille alsô ergienc,

Verse: 5955    Alexander der êren vogt
Verse: 5956    gegen der stat Anchiria zogt

Verse: 5957    in daʒ lant Capadocôn.
Verse: 5958    die künge wâren des gewon

Verse: 5959    in der stat enphiengen sie crône.
Verse: 5960    Anchiria lac sô schône,

Verse: 5961    daʒ sie ir gelîche muosten jehen
Verse: 5962    sie heten nie schœner stat gesehen:

Verse: 5963    ir mûre hôch unde wît,
Verse: 5964    wol berihtet ûf strît

Verse: 5965    mit ûf geschoʒʒen türnen.
Verse: 5966    an die stat wolde zürnen

Verse: 5967    Alexander, der sich des bewac,
Verse: 5968    mit her die stat er al umbe lac.

Verse: 5969    die innern sich vaste werten.
Verse: 5970    sie wolden mit strîte beherten

Verse: 5971    daʒ sie im niht wurden diensthaft.
Verse: 5972    glücke im zeigte sælden kraft,

Verse: 5973    daʒ im mit helfe ie was mite.
Verse: 5974    eʒ lêrt in haben guote site.

Verse: 5975    dâ von dem hêrren wol gelanc.
Verse: 5976    die stat er des mit strîte twanc,

Verse: 5977    daʒ sie im dienstes muosten jehen,
Verse: 5978    als im ze Sardîn was geschehen.

Verse: 5979       Alexander die sînen sande.
Verse: 5980    daʒ lant man roubte und brande,

Verse: 5981    dem volc sie haʒ erzeigten,
Verse: 5982    tôt sie manegen neigten.

Verse: 5983    als in der junge hete geboten,
Verse: 5984    man sach die luft von viure roten:

Verse: 5985    lützel liute dâ genas.
Verse: 5986    der lande fürste bî Darîô was,

Verse: 5987    dem er sich ze helfe bôt,
Verse: 5988    die wîl sîn volc dâ heime leit nôt.

Verse: 5989    alsô der junge die lant betwanc,
Verse: 5990    des herze ie nâch prîse ranc.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.