TITUS
Ulrich von Eschenbach, Alexander
Part No. 54
Previous part

Chapter: 74b  
Alexander erkrankt beim Baden


Verse: 6313       Permêniô mit den burgern kam
Verse: 6314    vür Alexandrum, der sie nam

Verse: 6315    an sîn gnâde: sîn zuht was grôʒ.
Verse: 6316    in Tharsis ein waʒʒer vlôʒ,

Verse: 6317    Cignus ist eʒ noch genant.
Verse: 6318    Alexander hete sêre gerant

Verse: 6319    und in dem harnasch was im heiʒ.
Verse: 6320    der sant durch daʒ waʒʒer gleiʒ,

Verse: 6321    eʒ waʒ kalt und lûter gar.
Verse: 6322    Alexander nam des war.

Verse: 6323    der sant und steine sich drungen:
Verse: 6324    dô luste den fürsten jungen

Verse: 6325    daʒ er dar inne wolde baden.
Verse: 6326    dâ von enphienc der hêrre schaden,

Verse: 6327    guot gelücke er dâ verlôs.
Verse: 6328    an dem werden man wol kôs

Verse: 6329    daʒ gelück bî nieman stæte ist:
Verse: 6330    eʒ wandelt sich in kurzer frist.

Verse: 6331    an einer heimelîchen stat
Verse: 6332    spranc der fürste in daʒ bat,

Verse: 6333    dâ in kraft inne vlôch,
Verse: 6334    dar ûʒ man in vür tôten zôch.

Verse: 6335    von hitze, die in ê bevienc,
Verse: 6336    dar nâch kelde in durchgienc,

Verse: 6337    dâ von der wol getâne
Verse: 6338    wart lebender witze âne.

Verse: 6339    in der stat wart grôʒ geschrei.
Verse: 6340    den sînen was wâre fröide enzwei.

Verse: 6341    von den hôrt man überal
Verse: 6342    von clage jæmerlîchen schal.

Verse: 6343    sie schrîten al gemeine
Verse: 6344    dise wort grôʒ und cleine:

Verse: 6345    'ô Macedô, der werlt ein bluome,
Verse: 6346    nâch prîʒlîchem ruome

Verse: 6347    dîn herze kunde ringen.
Verse: 6348    ô wê, nû wil dich twingen

Verse: 6349    in fremden landen der tôt.
Verse: 6350    leit und immer wernde nôt

Verse: 6351    müeʒen herze durch dich lîden,
Verse: 6352    die dîn tugent nû wellen mîden.

Verse: 6353    waʒ wirde an dir vertirbet
Verse: 6354    und zuht mit dir erstirbet!

Verse: 6355    ô du süeʒer Macedô,
Verse: 6356    vil herze die ê truogen hô,

Verse: 6357    die müeʒen an fröiden wenken
Verse: 6358    und in jâmers tiefe sich senken.

Verse: 6359    mit swære werden sie beladen.
Verse: 6360    jâ nimt dîn al die werlt schaden.

Verse: 6361    dem dîne süeʒe junge tage
Verse: 6362    ê brâhten fröide, dem gîstu clage.

Verse: 6363    waʒ du die dînen sorgen manst'
Verse: 6364    Fortûna, wie du wenken kanst,

Verse: 6365    wie man dich unfuogen siht !
Verse: 6366    eʒ ist wâr des man dir giht,

Verse: 6367    du wurdest nie stæte halben tac.
Verse: 6368    wol man dich gelîchen mac

Verse: 6369    grüenem loube an dem zwî,
Verse: 6370    dem ouch niht stæte wonet bî:

Verse: 6371    hiute grüene, morgen val,
Verse: 6372    unstæte vellet eʒ ze tal.

Verse: 6373    vür daʒ tier tigris bist du sûr.
Verse: 6374    du kanst sîn der werden schûr.

Verse: 6375    waʒ slangen sint und thesiphôn
Verse: 6376    die geben als du niht sûren lôn.

Verse: 6377    kein tier sint doch sô scharf.
Verse: 6378    dîn unstæte sich ê wol entwarf

Verse: 6379    gegen dem, den du hie vellest
Verse: 6380    und dem tôde gesellest.

Verse: 6381    war umbe kürzest du des jâr,
Verse: 6382    der ie nam rehter wirde war?

Verse: 6383    durch menschlîche zuht solt er genesen.
Verse: 6384    du bist sîn muoter unz her gewesen,

Verse: 6385    den du nû übel lâʒen wilt.
Verse: 6386    er het mit wirde der sælden schilt.

Verse: 6387    im waʒ die werlt doch bezalt
Verse: 6388    daʒ er der solde haben gewalt,

Verse: 6389    an dem der tôt nû wil gesigen.
Verse: 6390    dar umb uns fröide wirt verzigen.

Verse: 6391    eiâ, junger süeʒer künic,
Verse: 6392    des jugent mit zühten ie was frümic,

Verse: 6393    dîn tugende wâren ninder murc,
Verse: 6394    des wirdest du manegen ougen kurc.

Verse: 6395    die du von lande brâhtest her,
Verse: 6396    den ist dîn tôt nû jâmers wer.

Verse: 6397    du wilt uns trûren mêren.
Verse: 6398    sol wir ân dich ze lande kêren?

Verse: 6399    daʒ uns, hêrre, niht enzimt.
Verse: 6400    der tôt mit gewalt uns den benimt,

Verse: 6401    der uns bôt menlich stiure.
Verse: 6402    nû lît hie der gehiure

Verse: 6403    vor an in jâmers blicke.
Verse: 6404    manec herze mit riuwen stricke

Verse: 6405    wirt bevangen und mit nôt,
Verse: 6406    süeʒer fürste, umb dînen tôt.

Verse: 6407    waʒ werde wîp schaden kiesen
Verse: 6408    und an dir fröide verliesen,

Verse: 6409    dar zuo der minne süeʒen lôn,
Verse: 6410    des sie von dir wârn gewon.

Verse: 6411    wenn die dînen tôt vernemen,
Verse: 6412    sô muoʒ riuwe ir herze zemen.

Verse: 6413    ob wir dîn, hêrre, müeʒen enbern,
Verse: 6414    muge wir die vînde strîtes wern,

Verse: 6415    ân dich daʒ müelich mac geschehen.
Verse: 6416    wem mac man solicher wirde jehen,

Verse: 6417    als dîn jugent konde bejagen?
Verse: 6418    jâ muoʒ dich al die werlt clagen,

Verse: 6419    ob du alsô erstirbest
Verse: 6420    und ellendiclich vertirbest.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.