TITUS
Alexanderroman (Wernigeroder Handschrift)
Part No. 46
Previous part

Chapter: 42  
Beratung in Achon (Athen)


Verse: 1615    Dar nach uber kürcz zeit
Verse: 1616    Allexander der gewann neyd

Verse: 1617    Wider Strandagaro.
Verse: 1618    Auzz der stat für er do

Verse: 1619    Und kom ze Achon der stat.
Verse: 1620    Die pürger er do pat

Verse: 1621    Daz sie im hilf bërn
Verse: 1622    Wider Allexandern:

Verse: 1623    Daz ward im verhaißen.
Verse: 1624    Die pürger er do rayczen

Verse: 1625    Tet daz sie schribend geswind
Verse: 1626    Olimpladis kind:

Verse: 1627    'Künig, wir pitten dich
Verse: 1628    Daz du tugentlich

Verse: 1629    Wider kerest Strandigaro
Verse: 1630    Daz du im genomen host.' do

Verse: 1631    Ward Allexander
Verse: 1632    Der grozz betrübt ser

Verse: 1633    Wider die von Achon
Verse: 1634    Und hiez in schreiben

Verse: 1635    Ainen brief der also
Verse: 1636    Stund: 'ich künig von Macedon,

Verse: 1637    Künig Philippen barn,
Verse: 1638    Nach meins vaters jarn

Verse: 1639    Hann ich besezzen sein reich.
Verse: 1640    Dar nach gar erleich

Verse: 1641    Würden uns undertann
Verse: 1642    Römer: und on allen wann

Verse: 1643    Dar zu dient unser hant
Verse: 1644    Manig mehtig land:

Verse: 1645    Von orient gen occident
Verse: 1646    Ist unser maht erkent.

Verse: 1647    Nu schik wir milticleich
Verse: 1648    Zu euch und haißen pitten euch,

Verse: 1649    Ob ir in frid mit uns leben
Verse: 1650    Wend: so wol wir nit streben

Verse: 1651    Wider euch mit kainem streit.
Verse: 1652    Und schickent mir an diser zeit

Verse: 1653    Zwelf maister in philosophie,
Verse: 1654    Mit den ich ain clain weil

Verse: 1655    Müg reden von der künst,
Verse: 1656    Und tüt mir anders sünst

Verse: 1657    Dann, daz ir habet mich
Verse: 1658    Für ewren künig, so wil ich

Verse: 1659    Tün daz euch lieb ist.'
Verse: 1660    Den brief an der selben frist

Verse: 1661    Hiezz mann dem volk lesen.
Verse: 1662    Under dem volk wesen

Verse: 1663    Ward ain mürmël grözz:
Verse: 1664    Etlich ez verdrözz,

Verse: 1665    Etleich dauht ez gut süzz.
Verse: 1666    Do sprach ein philosophüs,

Verse: 1667    Eschilus sein nam wazz:
Verse: 1668    'Nü vernempt all daz.

Verse: 1669    Ir schult Allexanders rëd
Verse: 1670    Nit gelauben stët.

Verse: 1671    Wist er ist wanckelich.'
Verse: 1672    Da sprach ainer sicherlich,

Verse: 1673    Der hiez Demostinis:
Verse: 1674    'Daz kint Olimpiadis

Verse: 1675    Kan red vil süzz,
Verse: 1676    Mit der er euch grüzz.

Verse: 1677    Ains daz rat ich:
Verse: 1678    Mügt ir sein als manlich

Verse: 1679    Daz ir im wider stann
Verse: 1680    Mügt, so denkt dor an,

Verse: 1681    Und lat in hin an keren,
Verse: 1682    So daz ir in zu herren

Verse: 1683    Nymmer genempt
Verse: 1684    Und im nit zins gent.

Verse: 1685    Deuht aber in ewrem synn
Verse: 1686    Euch daz ir wider in

Verse: 1687    Mit streit möhten gestann
Verse: 1688    Nicht, so sullent ir in hann

Verse: 1689    Zu künig und zu herren.
Verse: 1690    Ir seht wol daz sich meren

Verse: 1691    Sein breiß und sein löb
Verse: 1692    Und wie manlich er ob

Verse: 1693    Ist grozzen steten gelegen.
Verse: 1694    Da von sult ir under wegen

Verse: 1695    Lazzen den ubermüt,
Verse: 1696    Der kurczleich nit ze güt

Verse: 1697    Hat getan Planthea
Verse: 1698    Der stat, die ich nannt da

Verse: 1699    Da vor, dez nit lang ist.'
Verse: 1700    Daz volk sprach on der frist:

Verse: 1701    'Wir sullen dem loblichen
Verse: 1702    Künig presencz reichen

Verse: 1703    Schicken, und daz man im sag
Verse: 1704    Daz wir von heut dem tag

Verse: 1705    Im den zins geben wend.'
Verse: 1706    Daz beschach do behend.

Verse: 1707    Die poten wurden berait
Verse: 1708    Zu dem künig gemait.

Verse: 1709    Schön er sie enpfieng.
Verse: 1710    Sie gehiezzen im hie

Verse: 1711    Den zins on all schüld:
Verse: 1712    Da nam er sie zu hüld.




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.