TITUS
Alexanderroman (Wernigeroder Handschrift)
Part No. 50
Previous part

Chapter: 80  
Schlacht am Tigris


Verse: 1921    Nu het der künig Darius
Verse: 1922    Sein volk alles alsus

Verse: 1923    Besant und sprach zu in:
Verse: 1924    'Ich wil euch meinen synn

Verse: 1925    Sagen alhie.
Verse: 1926    Wißt daz ich ye

Verse: 1927    Zu fechten hann müt
Verse: 1928    Mit Allexandro: dar zu tüt

Verse: 1929    Ewr maht ritterlich.
Verse: 1930    Ir sult all manlich

Verse: 1931    Sein, daz uns ain claines her
Verse: 1932    Nit so gar on all wër

Verse: 1933    Betwing und oblieg.
Verse: 1934    Ich hof daz wir den sig

Verse: 1935    Sullen also nemen
Verse: 1936    Daz er sich müß schemen

Verse: 1937    Fürpaz daz er ye gedaht
Verse: 1938    Als höch: dar zu wirt er pracht

Verse: 1939    Von uns, wolt ir helffen mir.'--
Verse: 1940    'Ez ist wol unser gir,'

Verse: 1941    Sprachent sie alle gleich.
Verse: 1942    Do zoch der tügentreich

Verse: 1943    An daz waßer Teygirs.
Verse: 1944    Da pait sein vil gewiß

Verse: 1945    Allexander der degen.
Verse: 1946    Da wolten sie streytes pflegen.

Verse: 1947    Die hauffen zu samen zügen,
Verse: 1948    Die panyer die flügent.

Verse: 1949    Allexander der waz der erst,
Verse: 1950    Vor den andern der herst.

Verse: 1951    Da ward ain groß dringen
Verse: 1952    Von der swert klingen,

Verse: 1953    Ain slahen und ain dösen,
Verse: 1954    Da von die güten und pösen

Verse: 1955    Viellen nider an zall,
Verse: 1956    Daz ez in dem luft erhäll

Verse: 1957    Von dem großen krachen
Verse: 1958    Daz von der spicz spachen

Verse: 1959    All da geschach.
Verse: 1960    Darius volk mann sach

Verse: 1961    Nider vallen als der snee.
Verse: 1962    Sie möhten nit me

Verse: 1963    Dulden die Kriechen
Verse: 1964    Und müsten da fliehen

Verse: 1965    Gar mit luczel mann.
Verse: 1966    Darius kaum entrann.




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.