TITUS
Alexanderroman (Wernigeroder Handschrift)
Part No. 95
Previous part

Chapter: 188  
Dindimus


Verse: 4082    Allexander begünd

Verse: 4083    Dannen ziehen, der güt,
Verse: 4084    Und kom an ainen flüt,

Verse: 4085    Der waz geheißen Gangen.
Verse: 4086    Da sach man enhalb dez waßers sten

Verse: 4087    Leüt, die hiez er fragen
Verse: 4088    Daz sie im one laügen

Verse: 4089    Sagten wie sie hiezzen.
Verse: 4090    'Wil dich sein nit verdrißen,

Verse: 4091    Brängamani haizzen wir.
Verse: 4092    Wiß auch daz wir sagen dir,

Verse: 4093    Ez kön nymmant zu uns komen,
Verse: 4094    Im werd daz leben benomen

Verse: 4095    Von wilden tyren,
Verse: 4096    Die in dem waßer fieren.'

Verse: 4097    Allexander sprach:
Verse: 4098    'Wer waiß ob ich mach

Verse: 4099    Ain scheff da mit man leiht
Verse: 4100    Vert uber disen teych.'

Verse: 4101    Ze hand ward ain schef gemacht
Verse: 4102    Und mit hüten wol bedacht:

Verse: 4103    Dar ein er siczen pat
Verse: 4104    Ainen ritter, der im drat

Verse: 4105    Breht dicz prieflein
Verse: 4106    Dem künig der Brangnein.

Verse: 4107    'Ich künig der künig uber all
Verse: 4108    Und her der hern on der zal

Verse: 4109    Enbewt dem künig Didimo
Verse: 4110    Der Brangamani also.

Verse: 4111    Ich hon zu mol vil vernomen
Verse: 4112    Von ewrem leben, seit wir komen

Verse: 4113    Sind in dise land,
Verse: 4114    Daz wir gern erkänd

Verse: 4115    Wern gar der ewren sitt,
Verse: 4116    Daz wir etwaz da mit

Verse: 4117    Mochten underweyset werden,
Verse: 4118    Da mit sich paz zu weishait kern

Verse: 4119    Möchten unser synne.
Verse: 4120    Wann wa ain weyser ynne

Verse: 4121    Wirt aines weisen rat,
Verse: 4122    Da von er zu stund enpfat

Verse: 4123    Mer weisheit dann er ee
Verse: 4124    Het, und briht disem nit me

Verse: 4125    Doch an seiner weisheit niht,
Verse: 4126    Reht als man on ainem lieht siht:

Verse: 4127    Da wirt manig lieht enprant
Verse: 4128    Von, und wirt doch dem lieht enprant

Verse: 4129    ---------------------
Verse: 4130    Zu gleicher möß alsam,

Verse: 4131    Wirt mir von euch weisheit künt,
Verse: 4132    Ir habt ir miner nit ze stünd.

Verse: 4133    Man sagt daz ewr leben sey
Verse: 4134    Ze mal nit unserm sitten pey:

Verse: 4135    Daz wolt gern wißen ich,
Verse: 4136    Daz tün ich kürczlich wißen dich.'

Verse: 4137    'Ich Didimus von Brangameney
Verse: 4138    Tün dich lob hie bey,

Verse: 4139    Daz du minst die weisheit:
Verse: 4140    Daz sol dir nit wesen leit.

Verse: 4141    Ez bringet schaden gar clein,
Verse: 4142    Der vil weiser main

Verse: 4143    Und rat hört gern.
Verse: 4144    Da mit mag sich meren

Verse: 4145    Sein weisheit und künst,
Verse: 4146    Da mit er lob und günst

Verse: 4147    Erwirbt der werlt, und dort
Verse: 4148    Wirt er ewiclich behört.

Verse: 4149    Doch zympt weisheit paz
Verse: 4150    Künigen, fürsten, sag ich daz

Verse: 4151    Dir, dann ander leuten vil.
Verse: 4152    Der küniges namen haben wil,

Verse: 4153    Der sol haben wicz und künst.
Verse: 4154    Hat er der nit, er wirt sünst

Verse: 4155    Zu ainem esel geczalt:
Verse: 4156    Ob dem ain kron auf gestalt

Verse: 4157    Wirt, dar umb er künig nit ist.
Verse: 4158    Nü wil ich sagen, als du pist,

Verse: 4159    Dir unser leben als ez stat:
Verse: 4160    Wir lebent gar in ainfalt.

Verse: 4161    Die göter er wir niht,
Verse: 4162    Kain opffer in von uns beschiht:

Verse: 4163    Wir glaubent on den höhsten Got
Verse: 4164    Und pitten den on allen spöt

Verse: 4165    Daz er uns für ewig pein
Verse: 4166    Helf kumen in sein

Verse: 4167    Ewig reich zu im.
Verse: 4168    Noch mer du vernym.

Verse: 4169    Wir begern nit mer
Verse: 4170    Lüst noch kainer er

Verse: 4171    Noch speys zu unserm leib,
Verse: 4172    Dann waz natür treib

Verse: 4173    Auz der erd mit süht:
Verse: 4174    So leb wir der selben früht.

Verse: 4175    Die erd darf man nit pawen
Verse: 4176    Mit rüten noch mit hawen

Verse: 4177    Umb wein noch umb korn,
Verse: 4178    Ez wer ain arbait verlorn.

Verse: 4179    Wir eßent daz Got geit
Verse: 4180    Aüz der erd on allen streit

Verse: 4181    On aller leut arbait.
Verse: 4182    Sicher uns wer auch laid

Verse: 4183    Daz wir ymmer er solten,
Verse: 4184    Da von wir dölten

Verse: 4185    Ungemach an dem leib.
Verse: 4186    Ain gut waßer uns vertreibt

Verse: 4187    Vil hart wöl den dürst,
Verse: 4188    Daz auz ainem frischen hürst

Verse: 4189    Rint, dar umb sey wir gesünt
Verse: 4190    Und bedurffent ze kainer stünt

Verse: 4191    Der arczat. yeder hat sein zeit
Verse: 4192    An der er sioher töd leit.

Verse: 4193    Wir habent winter noch summer
Verse: 4194    Nit, dar wir kummer

Verse: 4195    Habent auf die claider:
Verse: 4196    Wir gand nackent paider

Verse: 4197    Seit weib und man.
Verse: 4198    Unsern veinden gesig wir an,

Verse: 4199    Ich main die in dem menschen sind,
Verse: 4200    Wollust: die pözz gedencke plind

Verse: 4201    Machent uns die sel,
Verse: 4202    Da wir solich quel

Verse: 4203    Hand, daz wir dez achten nit.
Verse: 4204    Kain neyd noch haz pey uns beschiht,

Verse: 4205    Wann wir all gleich
Verse: 4206    Sind paide arm und reich.

Verse: 4207    Kainer den andern drucken
Verse: 4208    Tut noch nider zücken.

Verse: 4209    Wir sind sicher all gleich,
Verse: 4210    Weder arm noch reich.

Verse: 4211    Wir tund nymwant ungemach.
Verse: 4212    Ez stirbt nymmant on acht

Verse: 4213    In unserm land noch snëll,
Verse: 4214    Uncz sich die natür quëll.

Verse: 4215    Daz macht der gesunt lüft,
Verse: 4216    Der in unserm land guft

Verse: 4217    Und alczeit in trachen.
Verse: 4218    Die weib sich nit wachen

Verse: 4219    Bedürffent durch der man gelüst,
Verse: 4220    Wann sie zu in koment sünst

Verse: 4221    Nymmer dann dürch kindez örden.
Verse: 4222    Wann sie dez swanger worden

Verse: 4223    Ist, so gert sie nit mer
Verse: 4224    Und hat nit nach unkeusch ger.

Verse: 4225    Ez ist zu möl süntlich
Verse: 4226    Wa ain mensch wil machen sich

Verse: 4227    Andars, dann im die natür
Verse: 4228    Geit und Got sein figür

Verse: 4229    Anders entstellen tüt.
Verse: 4230    Wir schickent auch unsern müt

Verse: 4231    Nit ze waschen unsern leib:
Verse: 4232    Ez kömpt vom himel vil kleib

Verse: 4233    Daz taw, da mit wir
Verse: 4234    Waschen tund nach unser gir

Verse: 4235    Leib, haubt und fuzz.
Verse: 4236    Daz ist so auzz der moßen süzz

Verse: 4237    Daz ez vil untugent werdt
Verse: 4238    Und vor siechtagen nertt

Verse: 4239    Uns. auch hab wir nit
Verse: 4240    Heuser, pürg, stet, da mit

Verse: 4241    Ainer uber den andern sey.
Verse: 4242    Allez kriegs dez sey wir frey.

Verse: 4243    Wir habent auch kainen sitt
Verse: 4244    Daz wir ze schul farn nit

Verse: 4245    Durch leren, daz wir behendiclich
Verse: 4246    Underred und saczlich

Verse: 4247    Kunden zu feld bringen.
Verse: 4248    Nach kainen solhen dingen

Verse: 4249    Secz wir nit unsern müt:
Verse: 4250    Uns dunkt die red vil güt

Verse: 4251    Die uns geit die natür.
Verse: 4252    Wir habent auch kain figür

Verse: 4253    Von der künst astronomey,
Verse: 4254    Wann do wönt felens bey.

Verse: 4255    Ez ist ze mal zweyfelich
Verse: 4256    Daz ainer nach dem gestyrn sich

Verse: 4257    Richten müg und sein leben
Verse: 4258    Wiß, daz sein sterben eben:

Verse: 4259    Daz waiz newr Got allain.
Verse: 4260    In unserm land ist nit nain:

Verse: 4261    Yder man die warhait spricht
Verse: 4262    Und kain falscheit nymmer niht.

Verse: 4263    Kain spil daz uppig ist,
Verse: 4264    Tü wir nit. so uns geprist

Verse: 4265    An dem müt, so lese wir
Verse: 4266    Von den vettern, sag ich dir:

Verse: 4267    Daz uns doch nit freüd pirt,
Verse: 4268    Wann so uns da von künt wirt

Verse: 4269    Daz sie all sind töt,
Verse: 4270    So müß wir dencken daz die nöt

Verse: 4271    Uns zu dem leczsten auch nympt
Verse: 4272    Daz leben, da von dan sind

Verse: 4273    Wir da von nit freud haben.
Verse: 4274    Waz sol ich dir mer sagen?

Verse: 4275    Daz ist daz leben daz wir
Verse: 4276    Hand, und waiz daz ez dir

Verse: 4277    Nit gefallent ist,
Verse: 4278    Wann du synn und list

Verse: 4279    Stelst nach großem gewalt
Verse: 4280    Und pist doch tötlich geczalt

Verse: 4281    Als wol und wir sind.
Verse: 4282    War umb hastu nit under wind

Verse: 4283    Daz du mainst her allain
Verse: 4284    Sein in der werlt gemain?

Verse: 4285    Daz mag Got nit vertragen wöl.
Verse: 4286    Ains ich dir sagen sol:

Verse: 4287    Waz swer ist und hoch steigt,
Verse: 4288    Snelliclich ez nider seigt.

Verse: 4289    Gedenk daz du pist
Verse: 4290    Erd und asch und mist

Verse: 4291    Als der minst der da lebt,
Verse: 4292    Den Got als wol geczëpt

Verse: 4293    Hat als dich. war umb
Verse: 4294    Pistu als törraht und tüm

Verse: 4295    Daz du nicht zu Macedon
Verse: 4296    Beleibst und pey der krön

Verse: 4297    Die du ererbet hast,
Verse: 4298    Und andern fursten nit last

Verse: 4299    Ir leut und ir land?
Verse: 4300    Du maht wol geschand

Verse: 4301    Werden an dem end
Verse: 4302    Und auch als gar ellend

Verse: 4303    Daz du vil leiht kein stat maht haben
Verse: 4304    Da man dich müg begraben,

Verse: 4305    Und wilt kain benügen han:
Verse: 4306    Dich betreugt dein törlich wann.

Verse: 4307    Da von ist uns verr paz
Verse: 4308    Dann dir, sag ich dir daz.

Verse: 4309    Waz hilft dich golt und gestain,
Verse: 4310    Waz hilft dich gewalt, er, ich main,

Verse: 4311    Bürg, stet, land und leüt
Verse: 4312    Und allez daz die sün heüt

Verse: 4313    Uberscheint und beren ist,
Verse: 4314    Waz hilft dich kunst und list?

Verse: 4315    Sag mir, waz hilfet dich
Verse: 4316    Daz du haist, hör ich,

Verse: 4317    Vil der seul auf richten
Verse: 4318    Und die gottern tychten,

Verse: 4319    Die doch sind creatür
Verse: 4320    Dez der schüf alle figür?

Verse: 4321    Die müß daz volk peten an
Verse: 4322    Und in doch nichcz helfen kan.

Verse: 4323    Ir stecht in pök und gaizz,
Verse: 4324    Dar zu kelber, der swaizz

Verse: 4325    Sol den göttern gefellig sein.
Verse: 4326    Ez hilft nit für ewig pein.

Verse: 4327    Der höchste Got in dem trön
Verse: 4328    Wil von dem menschen hon ze lon

Verse: 4329    Ain dultig und ain fridlich hërcz
Verse: 4330    Und dar zu on allen schercz

Verse: 4331    Daz wir an rüffen daz wört
Verse: 4332    Daz alle dink hat behört

Verse: 4333    Und hat end noch angeng,
Verse: 4334    Weder kürcz noch leng.

Verse: 4335    Daz ist der ewig Got,
Verse: 4336    Der uns nach disem töd

Verse: 4337    Geit daz ewig leben,
Verse: 4338    Daz ewr gotter geben

Verse: 4339    Nit kunden, wann ez ist nit ir.
Verse: 4340    Da von so pin ich raten dir

Verse: 4341    Daz du bedenckest eben dich,
Verse: 4342    Wann du do pist tötlich:

Verse: 4343    Ker dich zu dem rechten Got
Verse: 4344    Und laz die götter! ez ist spöt

Verse: 4345    Daz man in erpëut:
Verse: 4346    Zwar ez ist für neüt,

Verse: 4347    Ez hilfet dich hart clain:
Verse: 4348    Wann dich der töd sain

Verse: 4349    Begreiffet, so vindest dü
Verse: 4350    Dann wie du getan hast nü.'

Verse: 4351    Da Allexander vernam
Verse: 4352    Die potschaft die im chöm

Verse: 4353    Von dem künig Didimo,
Verse: 4354    In zorn schraib er im do:

Verse: 4355    'Sol ez als die warheit sein
Verse: 4356    Daz da sagt dicz prieflein,

Verse: 4357    Daz glaub ich hart clain.
Verse: 4358    Ez ist ain posew main

Verse: 4359    Daz ir so von den göttern köst,
Verse: 4360    Die uns oft erlöst

Verse: 4361    Hand auz sorgen grözz.
Verse: 4362    Ir maint daz ewr genöß

Verse: 4363    Nit in der werlt sey
Verse: 4364    An gerehtickait: do pey

Verse: 4365    Brüff ich ewr grözz hoffart.
Verse: 4366    Ez ist euch nit von ärt

Verse: 4367    Angebörn daz ir so lebt
Verse: 4368    Und wider die natür strëbt,

Verse: 4369    Mer ist umb daz
Verse: 4370    Daz ewr land unfürtbär waz

Verse: 4371    Und ist auch allczeit.
Verse: 4372    Dor umb müst ir widerstreit

Verse: 4373    Euch benügen lann.
Verse: 4374    Möht ir anders gehann,

Verse: 4375    Als wir in unsern landen.
Verse: 4376    Golt, silber, gesmeyd, euch anden

Verse: 4377    Würd nach der gezierd.
Verse: 4378    Seit aber euch daz gefierd

Verse: 4379    Und brist, so sprecht ir
Verse: 4380    Ez sey also ewr gir.

Verse: 4381    Du schreibst daz die frawen sich
Verse: 4382    Nit dürffent ziehen zierlich,

Verse: 4383    Und daz ir nit unkeusch pflegt,
Verse: 4384    Daz ir daz so höch wegt.

Verse: 4385    Da ist ewr armüt so grözz
Verse: 4386    Daz ir gann müßent plözz.

Verse: 4387    Grazz, kraüt und auch würcz
Verse: 4388    Gebent kainer freude hürcz

Verse: 4389    Zu der mynne weyß:
Verse: 4390    Ez bedarf ander speizz,

Verse: 4391    Die den gelidern kunden geben
Verse: 4392    Natürlich hicz, die kan geben

Verse: 4393    Lüst zu der mynn.
Verse: 4394    Ich prüff on ewrem synn

Verse: 4395    Daz ir mer tyer dan menschen sind
Verse: 4396    Und vil törlicher dan die kind

Verse: 4397    Hie in unsern landen.
Verse: 4398    Möcht man zu euch gewanden

Verse: 4399    Und ir zu ander leuten,
Verse: 4400    Ir würdet leiht beleuhten

Verse: 4401    Ewr synn auf reht wicz.
Verse: 4402    So wist ir gens noch dicz

Verse: 4403    Und lebt als die wilden künder.'
Verse: 4404    Didimus nam wünder

Verse: 4405    Der potschaft Allexanders
Verse: 4406    Und schraib im wider solich vers:

Verse: 4407    'Allexander, Philippen kind,
Verse: 4408    Deinen worten, die uppig sind,

Verse: 4409    Schreib ich wider umb also.
Verse: 4410    Wie möht wir ymmer wesen frö

Verse: 4411    Hie in diser zeit?
Verse: 4412    Der töd uns alweg leit

Verse: 4413    Vor der tür und lat uns hie
Verse: 4414    Nit gar lang. wiß, wie

Verse: 4415    Wir dann hie habent gelebt,
Verse: 4416    Dar nach werd wir begëbt.

Verse: 4417    Dar umb dyenne wir gemain
Verse: 4418    Dem der alle werlt allain

Verse: 4419    Riht und geit all früht
Verse: 4420    Uns allen aüz der erden süht,

Verse: 4421    Der geit auch nach töd daz leben
Verse: 4422    Daz ewig ist, daz nit geben

Verse: 4423    Maht du noch die göter dein.
Verse: 4424    Dich hilft golt noch stain fein

Verse: 4425    Für die angstlichen nöt,
Verse: 4426    Du müst döch ye liegen töt.'

Verse: 4427    Allexander schraib im wider:
Verse: 4428    'Seit ez also ist syeder

Verse: 4429    Daz nymmant zu euch komen mag,
Verse: 4430    Dar umb lebt ir, als ich sag,

Verse: 4431    In also großer aremüt,
Verse: 4432    Daz für nihte ist gut.

Verse: 4433    Ich sag dir auf die trewe mein,
Verse: 4434    Möht ich zu dir hin ein

Verse: 4435    Komen in dein land,
Verse: 4436    Ich tet dir sicher bekand

Verse: 4437    Meiner ritterlich getat,
Verse: 4438    Als mein hand oft hat

Verse: 4439    Begangen in der lande vil.
Verse: 4440    Ains ich dich pitten wil

Verse: 4441    Daz du zu gedehtnüß mein
Verse: 4442    Nempst die seul guldein

Verse: 4443    Und haiß die auf rihten.'
Verse: 4444    Dar ein waz vil slihte

Verse: 4445    Gegraben mit manger sprach,
Verse: 4446    Indisch, krichysch, latenisch auch:

Verse: 4447    ʽEn ego rex Macedum genitus de rege Philipo
Verse: 4448    llost Darii mortem victor in orbe manens

Verse: 4449    Multos devici veniens huc usque triumphans,
Verse: 4450    Ex quo fit testis ista columpna michi.'

Verse: 4451    In teutsch sprechent sie also:
Verse: 4452    'Ich künig von Macedo,

Verse: 4453    Künig Philippen barn,
Verse: 4454    Seit Darius von meinen scharn

Verse: 4455    Ist töd und vertriben,
Verse: 4456    Seit pin ich allain beliben

Verse: 4457    Ain her in der werlte weit
Verse: 4458    Und han mit großem streit

Verse: 4459    Vil land gesiget an
Verse: 4460    Bizz her, daz siht man dor an

Verse: 4461    Wol, als ez geschriben ist
Verse: 4462    An diser seul zu aller frist.'




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.