TITUS
Alexanderroman (Wernigeroder Handschrift)
Part No. 105
Previous part

Chapter: 225  
Sonnen- und Mondbaum


Verse: 4777    Dar nach fürt sie der alt greiß
Verse: 4778    Ainen clain weg vil leiß.

Verse: 4779    Da sachent sie zwenn paumen stann,
Verse: 4780    Die warnd schön und wol getan

Verse: 4781    Gewachsen hoch zu mäl.
Verse: 4782    Der alt sprach: 'ich sal

Verse: 4783    Dir von yrer natür
Verse: 4784    Sagen und waz figür

Verse: 4785    Die paumen habent paid.
Verse: 4786    Der ain pey meinem ayd

Verse: 4787    Ist der sunnen paüm,
Verse: 4788    Der ander nach dem möun

Verse: 4789    Hat seinen namen. wez dü
Verse: 4790    Gerüchest ze wißen nü,

Verse: 4791    Dez kunden sie dir antbürt geben,
Verse: 4792    Daz wiß pey dem meinen leben.'

Verse: 4793    Ich sprach zu dem alten:
Verse: 4794    'Waz sprach künden sie walten ?'

Verse: 4795    'Der sunen paüm indisch
Verse: 4796    An hebt und dor noch krichisch.

Verse: 4797    Der paüm dez mans hebt an
Verse: 4798    Krichisch, und indisch began

Verse: 4799    Er sein antbürt geben.
Verse: 4800    Da von so merk eben:

Verse: 4801    Wez du fragen wild,
Verse: 4802    Ob dich dez nit bevilt,

Verse: 4803    Daz bedenk in hercze pört:
Verse: 4804    Du bedarft ez nit mit wört

Verse: 4805    Aüß sprechen.' ich daht also
Verse: 4806    Daz ich der werlt her jo

Verse: 4807    Wurd und daz allew land
Verse: 4808    Dienten gar meiner hant,

Verse: 4809    Und daz ich dan die müter mein
Verse: 4810    Und swester ansihtig sein

Verse: 4811    Würd. der paüm ze stünd also
Verse: 4812    Sprach: 'piz nit unfro,

Verse: 4813    Du wirst her allain
Verse: 4814    In der werlt gemain,

Verse: 4815    Dir aber nimer bekant
Verse: 4816    Wirt da haim noch leut noch land.

Verse: 4817    Müter, swester gesihst du nit me,
Verse: 4818    Wann du müst sterben e.

Verse: 4819    Ez ist umb dich also gewant,
Verse: 4820    Ez mag nit wenden dein hant.'

Verse: 4821    Ich erschrak zu möl ser
Verse: 4822    Und gedaht mir mer

Verse: 4823    Wann ich solt sterben
Verse: 4824    Und wie ich solt verderben.

Verse: 4825    Der paüm sprach: 'noch ain jar
Verse: 4826    Lebstu für war,

Verse: 4827    Aht monad dar zü
Verse: 4828    Und nit mer, wiß du.'

Verse: 4829    Ich gedaht aber wa
Verse: 4830    Ich sterben solt. da

Verse: 4831    Ward mir antbürt geben:
Verse: 4832    'In Allexandria dein leben

Verse: 4833    Hat genczlich ain end.
Verse: 4834    Dir werdent ains hend

Verse: 4835    Dem du getraüst hart wöl,
Verse: 4836    Geben in aim trank, ich söl

Verse: 4837    Dir sagen, gift, da mit er dich
Verse: 4838    Ertöten wirt sicherlich.

Verse: 4839    Daz geschiht zu Babilonia,
Verse: 4840    Und stirbst zu Allexandria.'

Verse: 4841    In meinem synn gedaht ich mir
Verse: 4842    Daz ich west in meiner gir

Verse: 4843    Von wem ich solt sterben. --
Verse: 4844    'Dez maht du nit erwerben

Verse: 4845    Daz dir daz werd künt getan,'
Verse: 4846    Sprach zu mir dez moünes paüm,

Verse: 4847    'Wann soltest du wißen in,
Verse: 4848    Er möht von dir nit hin

Verse: 4849    Komen, und het wir nit reht
Verse: 4850    Gesaget dir noch sleht.'

Verse: 4851    Da von gewann ich jamer größ,
Verse: 4852    Daz auz meinen augen döß

Verse: 4853    Ain pach von wainen und von clag.
Verse: 4854    Der alt man sprach: 'ich sag

Verse: 4855    Dir, ez zympt hie nicht
Verse: 4856    Wainen, clag noch solich geschiht.'




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.