TITUS
Alexanderroman (Wernigeroder Handschrift)
Part No. 104
Previous part

Chapter: 247  
Der Vogel Fenix


Verse: 4744    In dem wald sich auf zoch

Verse: 4745    Ain paüm uber die andern gar.
Verse: 4746    Der alt sprach: 'du nym war,

Verse: 4747    Dirr paum der dünket dich
Verse: 4748    Daz er niht sey frühticlich,' --

Verse: 4749    Wann er gar on laub waz. --
Verse: 4750    'Aber ich sag dir daz:

Verse: 4751    Sich auf dez paumen höch,
Verse: 4752    Da sihst du wunder späch.'

Verse: 4753    Auf dem er siczen sach,
Verse: 4754    Als mir die abenteür verjach,

Verse: 4755    Ain vogel, der gab solhen schein,
Verse: 4756    Reht als die clar sünne fein,

Verse: 4757    So glast sein gefider
Verse: 4758    Auf und auch nider,

Verse: 4759    Daz ez kainn menschen aüg
Verse: 4760    Gesehen möht one laüg.

Verse: 4761    Fenix waz er genant.
Verse: 4762    Ir wirt nymmer erkant

Verse: 4763    In der werlt dan ainer allain.
Verse: 4764    Wann er von alter wirt so sain

Verse: 4765    Daz im wil engan die kraft,
Verse: 4766    So hat er solich maisterschaft

Verse: 4767    Daz er auf ainen höhen perg
Verse: 4768    Fleugt, da er sich erferg,

Verse: 4769    Und macht da von holcz ain fewͤr,
Verse: 4770    Als in lert sein natür:

Verse: 4771    Dar in er sich verprennen tüt.
Verse: 4772    So dan erlescht der flamen glüt,

Verse: 4773    Da wechset dan ain würmlein,
Verse: 4774    Daz wirt zu ainem fogellein,

Verse: 4775    Dar aüz ein ander fenix wirt,
Verse: 4776    Der nymmer ander vogel pirt.




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.