TITUS
Alexanderroman (Wernigeroder Handschrift)
Part No. 107
Previous part

Chapter: 184  
Königin Candacis


Verse: 4880    Dar nach gepot er pald

Verse: 4881    Daz allez volk wer berait
Verse: 4882    So man die pfeyffen auf dreit.

Verse: 4883    Von dannen zoch der künig reich
Verse: 4884    Zu ainem berg herleich,

Verse: 4885    Dar auf ain stat erbawen waz,
Verse: 4886    Als ich an dem püch laz,

Verse: 4887    Von gutem edelm gestain
Verse: 4888    Und golt, daz dor aüz schain.

Verse: 4889    Ain fraw waz da gesezzen
Verse: 4890    Und het drei sün vermeßen,

Verse: 4891    Der ain hiez Candolus,
Verse: 4892    Der ander hiez Masippus,

Verse: 4893    Der drit der hiez Carexcis:
Verse: 4894    Da hiez die fraw Candacis.

Verse: 4895    Allexander schraib ir also:
Verse: 4896    'Philippen kind von Macedo,

Verse: 4897    Kunig der künig und her
Verse: 4898    Der herren weit und ferr

Verse: 4899    Ich enbewt, fräw, dir
Verse: 4900    Willig dinst und gir,

Verse: 4901    Dar zu present reich,
Verse: 4902    Und pit dich fleißicleich,

Verse: 4903    Dürch den willen mein
Verse: 4904    Auf ainen tag pey mir sein

Verse: 4905    Gerüchst, da wir opfer schon
Verse: 4906    Bringen dem got Amon

Verse: 4907    Ze lob und ze eren,
Verse: 4908    Daz sich müß meren

Verse: 4909    Unser gewalt und maht.
Verse: 4910    Dez hab wir uns wol bedaht.'

Verse: 4911    Die fraw schraib im hin wider:
Verse: 4912    'Her, seit dir her und nider

Verse: 4913    Dienet manig land,
Verse: 4914    Die dein manlichew hand

Verse: 4915    Hat ritterlich erstritten,
Verse: 4916    So wil ich, her, piten

Verse: 4917    Dich daz du gerüchest mich
Verse: 4918    In dein genad genediclich

Verse: 4919    Nemen, so wil ich sein
Verse: 4920    Gern nach dem willen dein.

Verse: 4921    Du schreibst daz ich dem got Amön
Verse: 4922    Opffer bringen schüll vil schon.

Verse: 4923    Ez ist nit gewonhait pei uns
Verse: 4924    Daz wir opffer bringen sünß

Verse: 4925    Den gottern. wir habent sitt
Verse: 4926    Got ze eren da mit

Verse: 4927    Daz wir lauter und rain
Verse: 4928    Behalten unser sel ain.

Verse: 4929    Doch seit dir der werlt kreiß
Verse: 4930    Dient, als ich wol weiß,

Verse: 4931    So schik ich dem got dein
Verse: 4932    Reylich present und fein:

Verse: 4933    Daz ist ain kron von gestain,
Verse: 4934    Die aller pest, als ich main,

Verse: 4935    So man sie ymmer vinden mag,
Verse: 4936    Dar ynn manig smarag,

Verse: 4937    Karfunckel und rübein,
Verse: 4938    Die geben mangen liehten schein.

Verse: 4939    Auch schik ich zu eren dir
Verse: 4940    Daz. du haben solt von mir

Verse: 4941    Hundert kethen guldein,
Verse: 4942    Vil edler stain dar ein

Verse: 4943    Verwurcket gar maisterlich.
Verse: 4944    Da pey so send auch ich

Verse: 4945    Dir hundert elephant,
Verse: 4946    Die pesten in dem land,

Verse: 4947    Auf yglichem ain knebellein,
Verse: 4948    Daz nit stolczer mag gesein,

Verse: 4949    Swarcz als ain köl,
Verse: 4950    Als von reht sein söl

Verse: 4951    Ain Mör in yrem land,
Verse: 4952    Sent dir mein trewe hand,

Verse: 4953    Und hab ez für güt
Verse: 4954    Von mir, wan ichs mit höhem müt

Verse: 4955    Dir schik zu eren.'
Verse: 4956    Die fraw hiez pald keren

Verse: 4957    Mit der present ain maler fein,
Verse: 4958    Der auf ain mambrein

Verse: 4959    Ir sein antlucz entwürf,
Verse: 4960    Daz sie ez stecz mit gegenbürf

Verse: 4961    Möht lieplich one schawͤen:
Verse: 4962    So wol waz der frawͤen

Verse: 4963    Gefallen Allexander.
Verse: 4964    Daz ir daz braht der mäller,

Verse: 4965    Dez ward sie von herczen frö,
Verse: 4966    Und liebet ir ye paz do,

Verse: 4967    Da sie sein angesicht ersach.
Verse: 4968    Yn yrem herczen sie da jach:

Verse: 4969    'Moht ich ymmer gefügen
Verse: 4970    Mit meinen synnen clügen

Verse: 4971    Daz er kom her zu mir
Verse: 4972    Und ich meins herczen gir

Verse: 4973    Mit im erfullen möht,
Verse: 4974    Wer mir dor zu gedoht,

Verse: 4975    Den wolt ich ymmer reichen,
Verse: 4976    Daz aremüt nü weichen

Verse: 4977    Müst ymmer hinnan für.
Verse: 4978    An mir selber ich spür,

Verse: 4979    Ob ich nit zu im kumen mag,
Verse: 4980    Daz ez müß sein mein leczster tag.'

Verse: 4981    Nu kom ez alsus
Verse: 4982    Daz ir sun Canderlus

Verse: 4983    Ains tags durch lüst auf ainen wald
Verse: 4984    Zoch, mit im sein weib pald.

Verse: 4985    Nü waz nachent da pey
Verse: 4986    Ain künig von Bebricey,

Verse: 4987    Der trüg der selben frawen min
Verse: 4988    Gar vesteclich in seinem synn.

Verse: 4989    Und da er ward gewär
Verse: 4990    Daz Candolus dar

Verse: 4991    Komen waz und sein weib,
Verse: 4992    Die im waz lieb als sein leib,

Verse: 4993    Der künig kom verhöln dar
Verse: 4994    Und nam da der frawen war

Verse: 4995    Und fürt sie mit gewalt dan,
Verse: 4996    Wann Candolus luczel man

Verse: 4997    Het pey im alda.
Verse: 4998    Vil traürig kom er sa

Verse: 4999    Zu der lieben müter sein.
Verse: 5000    Sie sprach: 'vil lieber sün mein,

Verse: 5001    Waz ist zu laid beschehen dir?
Verse: 5002    Liebes kint, daz sag mir.' --

Verse: 5003    'Von Bebircorus der künig reich
Verse: 5004    Hat genomen gewalticleich

Verse: 5005    Mir mein liebes weib.'
Verse: 5006    Sie sprach: 'samer mein leib,

Verse: 5007    Ich wil dir geben guten rat.
Verse: 5008    Du solt snelliclichen drat

Verse: 5009    Zu Allexander eyllen
Verse: 5010    Und dez nit bequeillen,

Verse: 5011    Bit in dürch die lieb mein
Verse: 5012    Daz er dir tu trew schein.'

Verse: 5013    Er tet als im die müter riet.
Verse: 5014    Dez nachtes er dannen schied

Verse: 5015    Zu Allexandro, da er lag.
Verse: 5016    Ainer, der der waht pflag,

Verse: 5017    Finge den jungelinch Candeolo
Verse: 5018    Und furt in zu Pertholomeo,

Verse: 5019    Der dez volks haubt man waz.
Verse: 5020    Der sprach zu im daz

Verse: 5021    Er wer, in deuht, ain speher
Verse: 5022    Und sie verraten wolt. er

Verse: 5023    Sprach: 'nain, ich pin Candiacis
Verse: 5024    Sün, die hat mich mit fleiß

Verse: 5025    Geschickt zu dem Macedon,
Verse: 5026    Daz er mir helf dürch sein krön

Verse: 5027    Und dürch die lieb der müter mein,
Verse: 5028    Die ym dar umb ymmer sein

Verse: 5029    Wil dinstlich hold,
Verse: 5030    Daz ich werden müg erhöld

Verse: 5031    An dem künig Bebrico,
Verse: 5032    Der mit gewalt so

Verse: 5033    Mir genomen hat mein weip.'
Verse: 5034    Pertholomeus sprach: 'so belaib,

Verse: 5035    Ich wil zu Allexandern gann
Verse: 5036    Und wil dich dann wißen lan

Verse: 5037    Waz er wöl tün: dor umb so peit,
Verse: 5038    Ich sag dirs in kürczer zeit.'

Verse: 5039    Da Allexander die mer
Verse: 5040    Vernam, er ward freüdenber,

Verse: 5041    Wann er trüg der frawen min
Verse: 5042    Und lieb vast in seinem synn

Verse: 5043    Und wer mit fügen gern bei ir
Verse: 5044    Gewesen oft nach seiner gir.

Verse: 5045    Er sprach: 'nü wol mich der stünd,
Verse: 5046    Wann ich vor nÿ künd

Verse: 5047    Mit gelympf zu Candicis
Verse: 5048    Der frawen komen. nü vil gewiß

Verse: 5049    Wil ich ez wol gefügen
Verse: 5050    Mit meinen synnen clugen.

Verse: 5051    Haiß mir den fürsten wol gebörn:
Verse: 5052    Komen, den ich auß erkorn

Verse: 5053    Han, ich main Anthiochen,
Verse: 5054    Der mir nücz und früm

Verse: 5055    Wirt zu disen sachen,
Verse: 5056    So kan mir trawren swachen.'

Verse: 5057    Ze stund so kom Antiochus
Verse: 5058    Zu im, und sprach Allexandrüs

Verse: 5059    'Nym hin die krön mein,
Verse: 5060    So will ich der gesell dein

Verse: 5061    Sein, und ker mit mir.
Verse: 5062    Pertholome, ich sag dir

Verse: 5063    Daz du dem Candeolus
Verse: 5064    Sagen solt alsus,

Verse: 5065    Ich wol selber mit im dar
Verse: 5066    Und dem künig sagen für war,

Verse: 5067    Geb er im nit sein weib,
Verse: 5068    Ich nem im gut und leib,

Verse: 5069    Daz müg er nit er wenden.'
Verse: 5070    Dannen die ellenden

Verse: 5071    Schieden zu Candëlo:
Verse: 5072    Da er ez vernam, er ward frö.

Verse: 5073    Von dannen kerten sie sa.
Verse: 5074    In sagt der jungelinch wa

Verse: 5075    Man den künig fünd.
Verse: 5076    Dar komen sie ze stünd.

Verse: 5077    Allexander sprach alsüs,
Verse: 5078    Als er wer Antyochus:

Verse: 5079    'Ich wil zu dem künig hin ein,
Verse: 5080    Ym sagen von dem hern mein,

Verse: 5081    Als mir von im enpfolhen ist.'
Verse: 5082    Für den künig an der frist

Verse: 5083    Er gieng, als er Antyochus
Verse: 5084    Wer, und sprach alsüs:

Verse: 5085    'Der künig aller künig gar
Verse: 5086    Und her der herren öne var

Verse: 5087    Allexander enpeut dir also
Verse: 5088    Daz du dem Candeolo

Verse: 5089    Wider gebst sein weib,
Verse: 5090    Wilt du gut und leib

Verse: 5091    Behalten und dein länt.
Verse: 5092    Daz tün ich von im bekant

Verse: 5093    Dir: wa du dez nit tüst,
Verse: 5094    So fürht ich daz du haben müst

Verse: 5095    Sein unhuld vil ser.
Verse: 5096    Ich sag dir auch mer:

Verse: 5097    Geist du mir sie nit ze stünd,
Verse: 5098    E dir der tag morgen künd

Verse: 5099    Wirt, er ist dir in dem land
Verse: 5100    Bayde mit raüb und brand.'

Verse: 5101    Der her vil ser dez erschrak,
Verse: 5102    Nit lenger er daz verlaß:

Verse: 5103    Er hiez die frawen her für gan
Verse: 5104    Und törst dez nit enlan

Verse: 5105    Er gab sie im. er west nit
Verse: 5106    Daz ez Allexander weriht,

Verse: 5107    Wann er sein nicht der kant:
Verse: 5108    Do er sich genant

Verse: 5109    Antiochus, er gelaubt ez wöl.
Verse: 5110    Dez wart der pot frëuden vol

Verse: 5111    Und schied mit der frawen dann
Verse: 5112    Und köm da er sein mann

Verse: 5113    Gelazzen het und Candeolüm.
Verse: 5114    Er sprach zu in: 'ich küm

Verse: 5115    Und hab dir dein weib wider.'
Verse: 5116    Der jüng sprach: 'daz kan ich syeder

Verse: 5117    Nymmer vol diennen gar:
Verse: 5118    Her, ir müst mit mir zwär

Verse: 5119    Haim zu der müter mein.'
Verse: 5120    Mit in rait daz frëulein.

Verse: 5121    Da Candiacis vernam
Verse: 5122    Daz ir sün und weib chöm,

Verse: 5123    Dez ward sie von herczen frö.
Verse: 5124    Engegen löf sie in do,

Verse: 5125    Vil frölich sie sie enpfing.
Verse: 5126    Der sün sprach: 'nym hie

Verse: 5127    Disen ritter, von dem ich
Verse: 5128    Mein weib han vil sicherlich:

Verse: 5129    Allexander schikt in
Verse: 5130    Mit mir gen Bebricin.'

Verse: 5131    Die fraw enpfieng in hart wöl,
Verse: 5132    Als man gest tün sol.

Verse: 5133    Sie nam den ritter pey der hänt
Verse: 5134    Und fürt in all zu hant

Verse: 5135    Mit ir in den palast.
Verse: 5136    Da ward freud ain uberlast

Verse: 5137    Von allem dem gesind.
Verse: 5138    Die fraw vil geswind

Verse: 5139    Begund den ritter blicken an:
Verse: 5140    'Ez ist nit Antyochen,'

Verse: 5141    Daubt sie in yrem müt.
Verse: 5142    Der künig höch gemüt

Verse: 5143    Ward, da er die frawen ersach:
Verse: 5144    In seinem herczen er do jach

Verse: 5145    Daz er gesech nÿ schoner weib
Verse: 5146    Geporn von frawen leib.

Verse: 5147    Im waz nöch ir mynn we
Verse: 5148    Und gedoht vil oft: 'awe,

Verse: 5149    Solt mir dein rotes mündlein
Verse: 5150    Zu ainer stund ain kusselein

Verse: 5151    Gend, so würd ich gesünt.'
Verse: 5152    Die fraw stund auf ze stünd

Verse: 5153    Und pat den ritter nit belangen,
Verse: 5154    Sie wolt gar unlange

Verse: 5155    Komen wider zu im dar.
Verse: 5156    In ir kamer gien sie zwar

Verse: 5157    Und slözz auf den yren schrein,
Verse: 5158    Da sie het verporgen ein

Verse: 5159    Daz antlucz daz gemalet waz
Verse: 5160    Nach Allexander, als ich daz

Verse: 5161    Vor han beschaiden.
Verse: 5162    Sie sprach: 'pei meinen ayden,

Verse: 5163    Dicz ist Allexandrüs
Verse: 5164    Und nennet sich Anthiochus.'

Verse: 5165    Die fraw köm da wider,
Verse: 5166    Zu dem ritter nider

Verse: 5167    Sie begünd siczen.
Verse: 5168    Ir hercz ward ir swiczen

Verse: 5169    Mit jamer nach der min.
Verse: 5170    All ir müt und synn

Verse: 5171    Waz wie er ir pey
Verse: 5172    Möht gesein. da hiez sey

Verse: 5173    Daz man dakt die tysch.
Verse: 5174    Wilpret und visch

Verse: 5175    Wart dar getragen genung
Verse: 5176    In reylich assach clüg.

Verse: 5177    Ez waz allez von gestain
Verse: 5178    Und golt fein und rain.

Verse: 5179    Die fraw hiez den werden gast
Verse: 5180    Ezzen und trincken vast,

Verse: 5181    Dez er lüczel nam war:
Verse: 5182    Er blickt alczeit dar

Verse: 5183    Die frawen an, wann im nÿ paz
Verse: 5184    Frawͤ gefiel on allen hazz.

Verse: 5185    Da daz möl ain end nam
Verse: 5186    Und die nacht nachen began,

Verse: 5187    Daz ez slaffens waz zeit,
Verse: 5188    In aine kamer schon und weit

Verse: 5189    Fürt in gar geczogenleich
Verse: 5190    Die fraw gar tugentreich.

Verse: 5191    Die kamer alle licht erschain
Verse: 5192    Von gold und von dem gestain

Verse: 5193    Daz dar ynn verwürcket waz,
Verse: 5194    Sapheir, smaragd und adamas,

Verse: 5195    Rübein röt und amatist
Verse: 5196    Sach man vil mit höchem list

Verse: 5197    Verbürcket in der kämer stan,
Verse: 5198    Da er ynn solt slaffen gan.

Verse: 5199    Daz pet waz reylich und clüg,
Verse: 5200    Der ört yglichen trüg

Verse: 5201    Ain helfant, der gemaht
Verse: 5202    Waz mit zauberlicher aht.

Verse: 5203    Wann ez wölt die künigein,
Verse: 5204    So müst daz pet in wegüng sein

Verse: 5205    Und lof umb, als der wind
Verse: 5206    Lat mit kainem under bind

Verse: 5207    Den staub auf der erd.
Verse: 5208    Die fraw sprach: 'nü kerd,

Verse: 5209    Ritter, an daz pett hin.'
Verse: 5210    Sie gieng auz und liez in

Verse: 5211    An dem pet allain
Verse: 5212    Und sprach: 'her, ir solt kain

Verse: 5213    Sorg haben alhie.'
Verse: 5214    Da mit sie von im gieng,

Verse: 5215    Yeder man an sein gemach.
Verse: 5216    Die fraw zu ir selber sprach:

Verse: 5217    'Ich müß versuchen süzz
Verse: 5218    Ob ez sey Allexandrüs.'

Verse: 5219    Sie begund uben ir künst:
Verse: 5220    Daz pet umb loff sünß

Verse: 5221    Reht als tüt ain mülrad.
Verse: 5222    Die fraw in die kamer trat.

Verse: 5223    Da lag er in sorgen grözz
Verse: 5224    Daz der swaizz von im gözz.

Verse: 5225    Sie sprach: 'Allexander, wie tust dü?
Verse: 5226    Wa ist alle dein kraft nü,

Verse: 5227    Herschaft, reichtum und maht?
Verse: 5228    Dir hie nit hilft dein ritterschaft,

Verse: 5229    Du müst mein gefanger sein.'
Verse: 5230    Er sprach: 'liebew fraw mein,

Verse: 5231    Ir nennt mich Allexander:
Verse: 5232    Der nam wer mir gar zu her,

Verse: 5233    Wann ich pin sein dinstman
Verse: 5234    Und wil im gern undertann

Verse: 5235    Sein. und gedenkt wie ich
Verse: 5236    Dürch ewren sün gearbait mich

Verse: 5237    Hann, als mir mein her geböt,
Verse: 5238    Und helft mir, fraw, auz diser nöt !'

Verse: 5239    Die fraw lachen begann
Verse: 5240    Und sach in tugentlichen an:

Verse: 5241    Sie sprach: 'du darft dich nit schamen
Verse: 5242    Daz ich dich pey deinem namen

Verse: 5243    Hann genant: ez sol dir
Verse: 5244    Nit schaden, daz gelaub mir,

Verse: 5245    Umb daz du dem sün mein
Verse: 5246    Hast wider braht daz weip sein.

Verse: 5247    Und wer daz man dich kant hie,
Verse: 5248    Du müßest sicher sterben ye

Verse: 5249    Dar umb daz du höst erslagen
Verse: 5250    Porüm, den ymmer clagen

Verse: 5251    Mußen barbarische land.
Verse: 5252    Mein trew müß gen dir gewand

Verse: 5253    Sein, tust du daz ich beger.'
Verse: 5254    'Vil gern ich gewer

Verse: 5255    Euch alles dez ir pittent mich,'
Verse: 5256    Sprach Allexander sicherlich.

Verse: 5257    Da mit die fraw hiez still stan
Verse: 5258    Daz pet und fürpaz nit mer gan.

Verse: 5259    Er begund sie lieplich
Verse: 5260    Zu im smücken und freüntlich

Verse: 5261    Und sprach: 'fraw, daz leben mein
Verse: 5262    Stat gar in der hende dein.

Verse: 5263    Gerüch mir dürch dein güt
Verse: 5264    Trösten hie mein sendez gemüt:

Verse: 5265    Wann wiß daz ich dürch dich
Verse: 5266    Her kömen pin sicherlich.'

Verse: 5267    Die fraw gar tügentlichen sprach:
Verse: 5268    'Durch dich han ich ungemach

Verse: 5269    Gelieden, e daz du pist kömen.
Verse: 5270    Nu ist mir allez lait benömen,

Verse: 5271    Seit daz ich dich haben sol.'
Verse: 5272    In ward da paiden also wöl

Verse: 5273    Daz ich da von bedarf nit
Verse: 5274    Sagen: nach der mine sitt

Verse: 5275    Vertriben sie die weil da
Verse: 5276    Biz gen dem tag. sie sprach sa:

Verse: 5277    'Her, ich wil dir verjechen,
Verse: 5278    Daz dir an dem pett beschehen

Verse: 5279    Ist, daz ist umb daz,
Verse: 5280    Daz du wißest dester paz

Verse: 5281    Dich ze wisen dar nach.
Verse: 5282    Laz dir nit wesen ze gach

Verse: 5283    Daz all die werlt under dich
Verse: 5284    Köm als gar snelliclich.

Verse: 5285    Du host betrübt India,
Verse: 5286    Von dir so clagt Persia,

Verse: 5287    Media betrübt ist ser,
Verse: 5288    Parthia clagt noch mër,

Verse: 5289    Egipten und Babilon,
Verse: 5290    Ethiopüm, Panphilion,

Verse: 5291    Dar zu vil manig mehtig land,
Verse: 5292    Die mir alle niht erkant

Verse: 5293    Sind, die sind beswert von dir.
Verse: 5294    Daz solt du sicher glauben mir,

Verse: 5295    Du hast in herren, freund erslagen,
Verse: 5296    Veter, kind, daz müßend sie clagen,

Verse: 5297    Sie sind dir dester hölder nit.
Verse: 5298    Du hast ain clain zuversiht:

Verse: 5299    Der töd wirt döch gewaltig dein,
Verse: 5300    Daz brüf dor an daz du mein

Verse: 5301    Gefanger werd in kürczer frist,
Verse: 5302    Wie gewaltig du ymmer pist.

Verse: 5303    Dar umb so wil ich raten dir,
Verse: 5304    Zeüch da von dein begier!

Verse: 5305    Laz ainem daz dein nit sey,
Verse: 5306    Künig, land, leut da bey.

Verse: 5307    Du maht ez nit ymmer mer
Verse: 5308    Behaben leiht. wann du die ker

Verse: 5309    Tust von disem land,
Verse: 5310    Wiß daz sie deiner hand

Verse: 5311    Diennent nymmer me.
Verse: 5312    Waz sol ich sprechen mer?

Verse: 5313    Ez ist mir laid umb daz
Verse: 5314    Daz du nit bedenckest paz

Verse: 5315    Dich.' er sprach: 'ich laz nit ab
Verse: 5316    Die weil und ich daz leben hab,

Verse: 5317    Mir dyen dann die werlt gemain
Verse: 5318    Und ich her sey allain:

Verse: 5319    Wann daz ist der got gepot.' --
Verse: 5320    'Daz ist allez gar ain spöt,'

Verse: 5321    Sprach daz weib wol getann:
Verse: 5322    'Hie mit wil ich hynnan gan,

Verse: 5323    Daz ez nymmant nem war:
Verse: 5324    Wann sicher, würd man gewar

Verse: 5325    Daz du Allexander pist,
Verse: 5326    Du lebst luczel kain frist.'--

Verse: 5327    'Fraw mein, so tü als ich
Verse: 5328    Dir getraw sicherlich.'

Verse: 5329    Da mit schied die frawͤ dann.
Verse: 5330    Dez morgens, do ez tagen began,

Verse: 5331    Der werd gast gemait
Verse: 5332    Stünd auf und clagt kain laid

Verse: 5333    Daz im wider farn wer,
Verse: 5334    Und sprach zu der frawen mër:

Verse: 5335    'Ich wil mit ewren hulden kërn
Verse: 5336    Wider hin zu meinem hern

Verse: 5337    Und wil im sagen williclich
Verse: 5338    Die großen er die ir an mich

Verse: 5339    Habt gelegt und getan.'
Verse: 5340    Die fraw sprach: 'ir sult stan

Verse: 5341    Ain clainew weil,' und hiez ir tragen dar
Verse: 5342    Ain krön köstlich sicher zwar

Verse: 5343    Von edeln gestain und gold
Verse: 5344    Und sprach: 'her, die solt

Verse: 5345    Ir ewͤrem hern bringen hin.
Verse: 5346    Sagt im willigen sin

Verse: 5347    Von mir auf die trewe mein.
Verse: 5348    ' Er sprach: 'fraw, daz sol sein

Verse: 5349    Mit ewren hulden one hazz.'
Verse: 5350    Sie sprach: 'so wil ich daz

Verse: 5351    Euch von mir nit versmach
Verse: 5352    Diese presencz her nach.'

Verse: 5353    Daz waz ain künikleich gewänt,
Verse: 5354    Der man keins hie zu land

Verse: 5355    Nit hat gesehen
Verse: 5356    So schönes noch so wechen,

Verse: 5357    Daz ich ez nit mit worten mag
Verse: 5358    Aussprechen auf disen tag.

Verse: 5359    Dez sagt ir der ritter dank.
Verse: 5360    Dar nach nit unlank

Verse: 5361    Köm ir sün Candeolus:
Verse: 5362    Zu dem sprach sie alsus:

Verse: 5363    'Sün, mich dünckt daz pilleich sey
Verse: 5364    Der ritter allez leidez frei

Verse: 5365    Der dir so vil lieb getan
Verse: 5366    Hat daz du von im hann

Verse: 5367    Müst wider dein schönes weib.'
Verse: 5368    'Fraw, ich wolt an meinem leib

Verse: 5369    E leiden not und arbait
Verse: 5370    E im beschech halt ymmer lait,'

Verse: 5371    Sprach zu ir Candeolus. --
Verse: 5372    'So ist er Allexandrus,

Verse: 5373    Der ritter selb alhie.' --
Verse: 5374    'Als liebew müter, wie

Verse: 5375    Kan ich daz ymmer dancken im?'
Verse: 5376    Die fraw sprach: 'sün, vernym:

Verse: 5377    Der künig edel und tewͤr
Verse: 5378    Sicht gern abentewͤr,

Verse: 5379    Die solt du in lan schawͤen.'



Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.