TITUS
Heinrich von Meissen, Frauenlob
Part No. 7
Previous part

Text: 6 
VI. Flugton


Strophe: 1_[a] 
Verse: 1    David, lob dime stamme,
Verse: 2    von dir entsproz planeten stimel,
Verse: 3    im span der himel
Verse: 4    ein ummekleit, von siner formen fimel
Verse: 5    gut was die wat.

Verse: 6    Des höchsten sedels hame
Verse: 7    barc sich in siner laste gurt.
Verse: 8    durch die geburt
Verse: 9    gotheit tet gein der menscheit ein buhurt:
Verse: 10    wol uns der tat.

Verse: 11    Got mit des geistes tjüste
Verse: 12    den sun warf under ir brüste,
Verse: 13    ouwe, und sin gerüste
Verse: 14    starb von der lüste lüste.
Verse: 15    o, süze trucht,
Verse: 16    du vlür den sige und behielde doch den pris:
Verse: 17       hilf [ ], zarte vrucht.

Strophe: 2_[b] 
Verse: 1    Dri forme in einem wachse
Verse: 2    gedruct, daz wunder, daz ist bloz.
Verse: 3    wie sich vergoz
Verse: 4    planeten kraft, do sich zusamene sloz
Verse: 5    der gotes touc;

Verse: 6    Wa sich naturen achse
Verse: 7    verbarc, do got sin kint gebar;
Verse: 8    elementen schar,
Verse: 9    wie trucken, viuchte, warm, kalt quamen dar,
Verse: 10    got sie dar bouc:

Verse: 11    Der kunst mich da verdriuzet.
Verse: 12    sel wirt, wile sie got giuzet,
Verse: 13    sel, die zen dingen spriuzet,
Verse: 14    nature al da zervliuzet:
Verse: 15    got geist was ie.
Verse: 16    sus sluc ein kint ^in siner muter sin vater^
Verse: 17       zu tode hie.

Strophe: 3 
Verse: 1    Swa sich die tugent erbiutet,
Verse: 2    da komt sie mit vermezzenheit.
Verse: 3    der selden kleit
Verse: 4    treit sie mit ir vil gar an underscheit,
Verse: 5    diz wizze, diet.

Verse: 6    Unprislich tat sie riutet
Verse: 7    uz triuwen herzen mit ir rat;
Verse: 8    ir hohe phat
Verse: 9    mit melde an richer und an armer wat
Verse: 10    sich nie verschriet.

Verse: 11    Der tugent ist als dem viure,
Verse: 12    dem ofte were tiure
Verse: 13    sin melden ungehiure,
Verse: 14    niur daz der rouch sin stiure
Verse: 15    tut offenbar.
Verse: 16    sus tut die tugent mit meldericher tat
Verse: 17       ir melden klar.

Strophe: 4 
Verse: 1    Swelch man in sinem munde
Verse: 2    kein bitter nie nicht hat geliden,
Verse: 3    wie wil er smiden
Verse: 4    der süze kraft? der kan nicht wol bevriden
Verse: 5    ir werden hort.

Verse: 6    Dabi swes lib kein stunde
Verse: 7    quam uz, der quam ouch nie hin heim.
Verse: 8    sin erenseim,
Verse: 9    ob sich der mischet zu des wandels feim,
Verse: 10    ja trage die wort

Verse: 11    - Man sicht ein korn von talken
Verse: 12    in mines ougen valken -
Verse: 13    und la sich einen balken
Verse: 14    in dinen ougen walken.
Verse: 15    wiltuz nicht sehen?
Verse: 16    iu drin verkoufet sin horn anderhalb boc,
Verse: 17       des muz ich jehen.

Strophe: 5 
Verse: 1    Swelch man ein gut beginne
Verse: 2    der eren unde des prises habe,
Verse: 3    der la nicht abe,
Verse: 4    er vüre ez also, daz sin ende icht snabe
Verse: 5    gein werdicheit.

Verse: 6    Mir were ouch nach gewinne
Verse: 7    vil lieber ein swacher anevanc:
Verse: 8    des endes ganc
Verse: 9    gein werdicheit gebe siner erste schranc
Verse: 10    uf lob gekleit.

Verse: 11    Ein prislich anegenge
Verse: 12    mit swacher afterlenge
Verse: 13    den selden ist zu strenge.
Verse: 14    swach an-, gut nachgehenge
Verse: 15    in gote sich zert.
Verse: 16    ein prislich name mit werdicheit bestet,
Verse: 17       so schaz ververt.

Strophe: 6 
Verse: 1    Ich prüfe uf miner straze
Verse: 2    dri vinde, die mir nacht unde tac
Verse: 3    tun widerslac.
Verse: 4    swie sie mich brechten in der helle sac,
Verse: 5    daz were ir hort.

Verse: 6    Daz erste ist, werlt, din saze;
Verse: 7    daz ander ist der tiuvel starc,
Verse: 8    sin list ist arc;
Verse: 9    daz dritte ist mines selbes vleisches sarc:
Verse: 10    die tun mir mort.

Verse: 11    Min vleisch mich machet bröde,
Verse: 12    die werlt in tugenden snöde,
Verse: 13    der tiuvel gein gote [ ] blöde,
Verse: 14    gein sünden zageheit öde.
Verse: 15    wa nu, her sin?
Verse: 16    bit got, daz er iu sine helfe gebe:
Verse: 17       [ ] sie zien iuch hin.

Strophe: 7 
Verse: 1    Swa man dem schalke ein spanne
Verse: 2    gewaltes lat, da wil er dri.
Verse: 3    man mac dabi
Verse: 4    den gouch so lange phewen, daz er vri
Verse: 5    wil guckens sin.

Verse: 6    Swer mit sin selbes kanne
Verse: 7    sins lobes brunnen schepfet uz,
Verse: 8    der schanden struz
Verse: 9    im selbe schenket argen tranc vür gruz.
Verse: 10    glich stet ir schin.

Verse: 11    Die schande ie ummespennet
Verse: 12    den, der sie nicht erkennet.
Verse: 13    vrou Ere den verbennet,
Verse: 14    swer sime lobe entrinnet.
Verse: 15    vul, trege und laz,
Verse: 16    die dri, die han der schanden beckelin
Verse: 17       gemachet naz.

Strophe: 8 
Verse: 1    Ich prüve, daz die milte
Verse: 2    ein kranz ist rechter tugende gar.
Verse: 3    swer nimt ir war,
Verse: 4    sie machet manigen sinnes richer var,
Verse: 5    der sus were laz.

Verse: 6    Dem argen ist sie wilde,
Verse: 7    sie welzet vor im als ein twalm:
Verse: 8    swenn er ir galm
Verse: 9    hört, so verlischet siner vreuden salm.
Verse: 10    sus klage ich daz:

Verse: 11    Der gerne milte were,
Verse: 12    der ist ir soldes lere;
Verse: 13    swer sin hat über die gere,
Verse: 14    dem ist der mut zu swere.
Verse: 15    ich vluche der hant,
Verse: 16    die dan der kramph ziut, swenn sie ^lösen sol^
Verse: 17       der tugent ir phant.

Strophe: 9 
Verse: 1    Ez went ein narre unwise,
Verse: 2    spricht im ein wib gutliche zu,
Verse: 3    der minnen dru,
Verse: 4    der si zuhant uf siner wise gru.
Verse: 5    der ist ein diet.

Verse: 6    Zuchtlicher worte spise,
Verse: 7    die sol ein wib zu rechte zern.
Verse: 8    wib, wiltu nern
Verse: 9    die minne, du must dich der sprenze erwern,
Verse: 10    vrou Minne riet.

Verse: 11    Wib, vliuch den glanzen sprenzel,
Verse: 12    der treit der höne krenzel
Verse: 13    in sines herzen swenzel.
Verse: 14    bringt er dich zu dem tenzel
Verse: 15    mit siner list,
Verse: 16    swenn er getanzet hat, du bist versmat
Verse: 17       von siner genist.

Strophe: 10 
Verse: 1    Solte ich eins wunsches bitten,
Verse: 2    ich wunschte, swa zwei lieblich gern
Verse: 3    der minnen stern,
Verse: 4    ir beider herze einander offen wern,
Verse: 5    uf al ir tat

Verse: 6    Sie trugen liebe sitten:
Verse: 7    die liebe ist [ ] ein kummernagel.
Verse: 8    daz ist ein hagel,
Verse: 9    swa lieb uf habeche vürt der swalwen zagel,
Verse: 10    valsch ist ir phat.

Verse: 11    Vil maniger zucker rifet,
Verse: 12    der doch mit senefe slifet.
Verse: 13    der vogeler suze phifet,
Verse: 14    e er den vogel begrifet.
Verse: 15    wib, sich dich vür!
Verse: 16    er zeiget dir daz schaf unde helt den wolf
Verse: 17       hinder der tür.

Strophe: 11 
Verse: 1    Swer minnen schilt wil vüren,
Verse: 2    da von sin art den twalm entfa,
Verse: 3    der jage na
Verse: 4    und prüfe, daz sin eigen schilt si da
Verse: 5    und keiner me.

Verse: 6    Kein stich darf er mich rüren:
Verse: 7    er warte, daz sins schildes boum
Verse: 8    kein wandels soum
Verse: 9    icht habe gedacht, davon ein valscher troum
Verse: 10    vil lichte entste,

Verse: 11    So daz sins herzen bilde
Verse: 12    spilt wider gein ir schilde.
Verse: 13    der schilt si ouch nicht wilde,
Verse: 14    so wirt die liebe milde.
Verse: 15    er vlie den spranz,
Verse: 16    so liebet sich die liebe ir beider kraft
Verse: 17       und blibet ganz.

Strophe: 12 
Verse: 1    Ez jehen die sehenes blinden,
Verse: 2    die höchsten meister sin gewesen
Verse: 3    an kunst, an lesen,
Verse: 4    nieman müge in ir sinnes wirze jesen:
Verse: 5    die sint betrogen.

Verse: 6    Prüft regen mit den winden:
Verse: 7    die han hiute also groze kraft
Verse: 8    von gotes haft
Verse: 9    als über zwei tusent jare. meisterschaft
Verse: 10    si dar gebogen.

Verse: 11    Der hohen wisheit spriezen
Verse: 12    kan nimmer me voldiezen:
Verse: 13    ie me man schepfet ir vliezen,
Verse: 14    ie me mac mans geniezen.
Verse: 15    swem nature gibet,
Verse: 16    der schepfet hiure als vil als einer vert.
Verse: 17       gotes wille daz wibet.



Next part


This text is part of the TITUS edition of Heinrich von Meissen, Frauenlob.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.