TITUS
Hartmann, Iwein
Part No. 26
Previous part

Verse group: (26) 
Verse: 2501    der sîne bôsheit prîse.
Verse: 2502    her Îwein ist niht wîse:

Verse: 2503    er möhte swîgen als ich.'
Verse: 2504    diu rede dûhte sî gemelich,

Verse: 2505    daz er sich dûhte alsô guot:
Verse: 2506    wan alsô schalclîchen muot

Verse: 2507    gewan nie rîter dehein.
Verse: 2508    dô sprach mîn her Gâwein

Verse: 2509    'wie nû, mîn her Keiî?
Verse: 2510    nû sprechent ir doch, ir sît vrî

Verse: 2511    valscher rede: wie schînet daz?
Verse: 2512    ir erzeiget doch iezuo grôzen haz

Verse: 2513    disem guoten knehte.
Verse: 2514    nû tuot ir im unrehte.

Verse: 2515    ern gedâhte iuwer nie wan wol,
Verse: 2516    als ein rîter des andern sol:

Verse: 2517    und daz er nû niht komen ist,
Verse: 2518    daz hât im lîhte an dirre vrist

Verse: 2519    ein selch unmuoze benomen
Verse: 2520    daz er niht enmohte komen.

Verse: 2521    durch got ir sult die rede lân.'
Verse: 2522    her Keiî sprach 'daz sî getân:

Verse: 2523    ich wând ich redte rehte dran.
Verse: 2524    alsô gerne mac ein man

Verse: 2525    übel tuon alsô wol
Verse: 2526    sît ez nieman reden sol.

Verse: 2527    ichn gewähenes niemer mêre,
Verse: 2528    nû daz sîn iuwer êre.'

Verse: 2529    Der künec Artûs nam in die hant
Verse: 2530    daz becke daz er dâ hangen vant,

Verse: 2531    und schuof ez vollez brunnen,
Verse: 2532    und wolde rehte erkunnen

Verse: 2533    ob daz selbe mære
Verse: 2534    war ode gelogen wære

Verse: 2535    durch daz er was komen dar,
Verse: 2536    unde begôz den stein gar.

Verse: 2537    dô wart daz weter alsô grôz
Verse: 2538    daz alle die dâ verdrôz

Verse: 2539    die dar komen wâren:
Verse: 2540    und daz sî genâren,

Verse: 2541    des heten sî verzwîvelt nâch.
Verse: 2542    dô wart dem hern Îwein gach

Verse: 2543    gewâfent von der veste;
Verse: 2544    wander sâ wol weste,

Verse: 2545    ern beschirmte sînen brunnen
Verse: 2546    er wurd im an gewunnen

Verse: 2547    ouch habete her Keiî
Verse: 2548    also gewafent da bî.

Verse: 2549    der hote der êrsten tjost gegert:
Verse: 2550    der hete ouch in der künec gewert.

Verse: 2551    nû kam her Îwein balde
Verse: 2552    dort ûz jenem walde

Verse: 2553    ze velde gewalopieret,
Verse: 2554    in engels wîs gezieret.

Verse: 2555    in enirte ros noch der muot:
Verse: 2556    wan diu wâren beidiu guot.

Verse: 2557    sînem herzen liebe geschach,
Verse: 2558    dô er jenen halten sach

Verse: 2559    der allez guot verkêrte,
Verse: 2560    dô in got sô gêrte

Verse: 2561    daz er im solte gelten
Verse: 2562    sîn ungevüegez schelten

Verse: 2563    und sînen tägelîchen spot.
Verse: 2564    des lobete er got.

Verse: 2565    ouch sag ich iu ein mære:
Verse: 2566    swie schalkhaft Keiî wære,

Verse: 2567    er was iedoch vil unervorht.
Verse: 2568    enheten sîn zunge niht verworht,

Verse: 2569    son gewan der hof nie tiurern helt.
Verse: 2570    daz mugent ir kiesen, ob ir welt,

Verse: 2571    bî sînem ampte des er pflac:
Verse: 2572    sîn hete anders niht einen tac

Verse: 2573    geruochet der künec Artûs
Verse: 2574    ze truhsæzen in sînem hûs.

Verse: 2575    Nû wârens under in beiden
Verse: 2576    des willen ungescheiden:

Verse: 2577    ir ietweder gedâhte sêre
Verse: 2578    ûf des andern êre:

Verse: 2579    ir gelinge was ab mislîch.
Verse: 2580    diu tjost wart guot unde rîch,

Verse: 2581    und der herre Keiî,
Verse: 2582    swie bœse ir wænet daz er sî,

Verse: 2583    er zestach sîn sper unz an die hant.
Verse: 2584    dâ mite wart ouch er gesant

Verse: 2585    ûz dem satel als ein sac,
Verse: 2586    daz ern weste wâ er lac.

Verse: 2587    done wolder im niht mêre
Verse: 2588    tuon dehein unêre,

Verse: 2589    wan daz er schimpflichen sprach,
Verse: 2590    dô er in vor im ligen sach

Verse: 2591    'war umbe liget ir dâ durch got?
Verse: 2592    nû wârn sî doch ie iuwer spot

Verse: 2593    den âne ir schulde misselanc.
Verse: 2594    vielet ir sunder iuwern danc?

Verse: 2595    michn triege danne mîn wân,
Verse: 2596    ir habet ez gerne getân:

Verse: 2597    ezn mohte iu anders niht geschehen.
Verse: 2598    ir woldet niuwan gerne sehen

Verse: 2599    welch vallen wære.
Verse: 2600    ez ist doch lasterbære.'

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.