TITUS
Hartmann, Iwein
Part No. 28
Previous part

Verse group: (28) 
Verse: 2701    hern Îwein sînem gesellen;
Verse: 2702    als ouch die wîsen wellen,

Verse: 2703    ezn habe deheiniu grsozer kraft
Verse: 2704    danne unsippiu geselleschaft,

Verse: 2705    gerâte sî ze guote;
Verse: 2706    und sint sî in ir muote

Verse: 2707    getriuwe under in beiden,
Verse: 2708    sô sich gebruoder scheiden.

Verse: 2709    sus was ez under in zwein:
Verse: 2710    der wirt und her Gâwein

Verse: 2711    wârn ein ander liep genuoc,
Verse: 2712    sô daz ir ietweder truoc

Verse: 2713    des andern liep unde leit.
Verse: 2714    hie erzeicte sîne hövescheit

Verse: 2715    her Gâwein der bescheiden man,
Verse: 2716    unde ich sage iu war an.

Verse: 2717    Diu maget hiez Lûnete,
Verse: 2718    diu sô bescheidenlîchen tete

Verse: 2719    daz sî sô grôzer herte
Verse: 2720    hern Îweinen nerte

Verse: 2721    mit ir vil guoten witzen.
Verse: 2722    zuo der gienc er sitzen

Verse: 2723    und gnâdet ir vil sêre,
Verse: 2724    daz sî sô manege êre

Verse: 2725    dem hern Îwein sînem gesellen bôt:
Verse: 2726    wan daz er mislîcher nôt

Verse: 2727    âne kumber genas
Verse: 2728    und dâ ze lande herre was,

Verse: 2729    daz ergienc von ir schulden.
Verse: 2730    des gnâdet er ir hulden.

Verse: 2731    wan zewâre ez ist guot,
Verse: 2732    swer gerne vrümeclîchen tuot,

Verse: 2733    daz mans im genâde sage,
Verse: 2734    daz er dar an iht verzage

Verse: 2735    (wan dâ hœrt doch arbeit zuo);
Verse: 2736    und swer ouch dankes missetuo,

Verse: 2737    daz man dem erbolgen sî:
Verse: 2738    der ziuhet sich ouch lîhte derbî.

Verse: 2739    Her Gâwein sprach 'min vrou Lûnete
Verse: 2740    iuwer rât und iuwer bete

Verse: 2741    hât mir liebes vil getân
Verse: 2742    an dem besten vriunde den ich hân.

Verse: 2743    er hât mirz allez wol geseit,
Verse: 2744    wie im iuwer hövescheit

Verse: 2745    dise êre hât gevüeget,
Verse: 2746    der in durch reht genüeget.

Verse: 2747    er hât von iu ein schœne wîp
Verse: 2748    ein rîchez lant und den lîp

Verse: 2749    und swes ein man zer werlte gert.
Verse: 2750    wær ich sô biderbe und sô wert

Verse: 2751    daz mîn gêret wære ein wîp,
Verse: 2752    ich hân niht liebers danne den lîp:

Verse: 2753    ichn gæbe ich iu ze lône
Verse: 2754    umb mîns gesellen krône,

Verse: 2755    die er von iuwern schulden treit.'
Verse: 2756    hie wart mit stæter sicherheit

Verse: 2757    ein geselleschaft under in zwein.
Verse: 2758    vrou Laudîne und her Îwein

Verse: 2759    die buten in ir hûse
Verse: 2760    dem künige Artûse

Verse: 2761    selch êre diu in allen
Verse: 2762    wol muose gevallen.

Verse: 2763    Dô sî dâ siben naht gebiten,
Verse: 2764    dô was ouch zît daz sî riten.

Verse: 2765    dô sî urloup nemen wolden,
Verse: 2766    die dâ rîten solden,

Verse: 2767    her Gâwein der getriuwe man
Verse: 2768    vuorte hern Îweinen dan

Verse: 2769    von den liuten sunder.
Verse: 2770    er sprach 'ezn ist niht wunder

Verse: 2771    umb einen sæligen man
Verse: 2772    der dar nâch gewerben kan

Verse: 2773    und dem vrümekheit ist beschert,
Verse: 2774    ob im vil êren widervert

Verse: 2775    doch ringet dar nâch allen tac
Verse: 2776    manec man sô er meiste mac,

Verse: 2777    dem doch dehein êre geschiht:
Verse: 2778    der enhât der sælden niht.

Verse: 2779    nû ist iuwer arbeit
Verse: 2780    sæleclîchen an geleit:

Verse: 2781    iu hât erworben iuwer hant
Verse: 2782    ein schœne wîp unde ein lant.

Verse: 2783    sît iu nû wol geschehen sî,
Verse: 2784    sô bewaret daz dâ bî

Verse: 2785    daz iuch îht gehœne
Verse: 2786    iuwers wîbes schœne.

Verse: 2787    geselle, behüotet daz enzît
Verse: 2788    daz ir iht in ir schulden sît

Verse: 2789    die des werdent gezigen
Verse: 2790    daz sî sich durch ir wîp verligen.

Verse: 2791    kêrt ez niht allez an gemach;
Verse: 2792    als dem hern Êrecke geschach,

Verse: 2793    der sich ouch alsô manegen tac
Verse: 2794    durch vrouwen Ênîten verlac.

Verse: 2795    wan daz er sichs erholte
Verse: 2796    sît als ein rîter solte,

Verse: 2797    sô wære vervarn sîn êre.
Verse: 2798    der minnete ze sêre.

Verse: 2799    Ir hat des iuch genüegen sol:
Verse: 2800    dar under lêr ich iuch wol

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.