TITUS
Hartmann, Iwein
Part No. 29
Previous part

Verse group: (29) 
Verse: 2801    iuwer êre bewarn.
Verse: 2802    ir sult mit uns von hinnen varn:

Verse: 2803    wir suln turnieren als ê.
Verse: 2804    mir tuot anders iemer wê

Verse: 2805    daz ich iuwer künde hân,
Verse: 2806    sol iuwer rîterschaft zergân.

Verse: 2807    vil maneger beschirmet sich dâ mite:
Verse: 2808    er giht ez sî des hûses site,

Verse: 2809    ist er êIîche gehît,
Verse: 2810    daz er danne vür die zît

Verse: 2811    sül weder rîten noch geben:
Verse: 2812    er giht er sül dem hûse leben.

Verse: 2813    er geloubet sich der beider,
Verse: 2814    vreuden unde cleider

Verse: 2815    die nâch rîterlîchen siten
Verse: 2816    sint gestalt und gesniten:

Verse: 2817    und swaz er warmes an geleit,
Verse: 2818    daz giht er ez sîn wirtes cleit.

Verse: 2819    er treit den lip swâre,
Verse: 2820    mit strûbendem hâre,

Verse: 2821    barschenkel unde barvuoz.
Verse: 2822    und daz ist ie der ander gruoz

Verse: 2823    den er sînem gaste gît:
Verse: 2824    er sprichet 'sit der zît

Verse: 2825    daz ich êrste hûs gewan
Verse: 2826    (daz geloubet mir lützel ieman)

Verse: 2827    sone wart ich nie zewâre
Verse: 2828    des über ze halbem jâre

Verse: 2829    ichn müese koufen daz korn.
Verse: 2830    hiure bin ich gar verlorn

Verse: 2831    (mich müet daz ichz iu muoz clagen):
Verse: 2832    mir hât der schûr erslagen

Verse: 2833    den besten bû den ich hân.
Verse: 2834    ich vürhte ich müeze daz hûs lân.

Verse: 2835    etewie ernert ich den lîp,
Verse: 2836    wan daz ich sorge um mîn wîp:

Verse: 2837    diene weiz ich war ich tuo.
Verse: 2838    dâ hœret grôz kumber zuo,

Verse: 2839    swer daz hûs haben sol:
Verse: 2840    jane mac nieman wizzen wol

Verse: 2841    waz ez muoz kosten.
Verse: 2842    ich wære wol enbrosten

Verse: 2843    der werlt an andern dingen,
Verse: 2844    möht ich dem hûse geringen.'

Verse: 2845    Sus beginnet er trûren unde clagen
Verse: 2846    unde sînem gaste sagen

Verse: 2847    sô manec armez mære
Verse: 2848    daz im lieber wære

Verse: 2849    wærer nie komen dar.
Verse: 2850    der wirt hât wâr, und doch niht gar.

Verse: 2851    daz hûs muoz kosten harte vil:
Verse: 2852    swer êre ze rehte haben wil,

Verse: 2853    der muoz deste dicker heime sîn:
Verse: 2854    sô tuo ouch under wîlen schîn

Verse: 2855    ob er noch rîters muot habe,
Verse: 2856    unde entuo sich des niht abe

Verse: 2857    ern sî der rîterschefte bî
Verse: 2858    diu im ze suochenne sî.

Verse: 2859    ich rede als ichz erkennen kan.
Verse: 2860    nû durch wen möhte ein vrumer man

Verse: 2861    gerner wirden sînen lîp
Verse: 2862    danne durch sîn biderbez wîp?

Verse: 2863    hât er sich êren verzigen
Verse: 2864    und wil sich bî ir verligen,

Verse: 2865    unde giht des danne,
Verse: 2866    gelîch einem bœsen manne,

Verse: 2867    daz erz ir ze liebe tuo,
Verse: 2868    dâne geziehe sî niemer zuo:

Verse: 2869    wan ir ist von herzen leit
Verse: 2870    sîn unwirde und sîn verlegenheit.

Verse: 2871    swie rehte liep er ir sî,
Verse: 2872    sî müet, ist er ir ze dicke bî.

Verse: 2873    manegiu ziuhet sich daz an,
Verse: 2874    durch die vorhte des man,

Verse: 2875    daz sîs niht verdritze:
Verse: 2876    swaz aber ers genieze

Verse: 2877    ober sich bî ir verlît,
Verse: 2878    daz haber eine âne nît.

Verse: 2879    Iu hât verdienet iuwer hant
Verse: 2880    eine künegîn unde ein lant:

Verse: 2881    sult ir nû dâ verderben bî,
Verse: 2882    so wæn ich daz noch rîcher sî

Verse: 2883    âne huobe ein werder man.
Verse: 2884    her Îwein, dâ gedenket an,

Verse: 2885    und vart mit uns von hinnen,
Verse: 2886    und gewinnet mit minnen

Verse: 2887    der küneginne ein urloup abe
Verse: 2888    zeinem tage der vuoge habe,

Verse: 2889    und bevelhet ir liut unde lant.
Verse: 2890    ein wîp die man hât erkant

Verse: 2891    in alsô stætem muote,
Verse: 2892    diun bedarf niht mêre huote

Verse: 2893    niuwan ir selber êren.
Verse: 2894    man sol die huote kêren

Verse: 2895    an irriu wîp und an kint,
Verse: 2896    diu sô einvaltec sint

Verse: 2897    daz sî eins alten wîbes rât
Verse: 2898    bringen mac ze missetât.

Verse: 2899    Ir hât alsô gelebet unz her
Verse: 2900    daz ichs an iu niht wandel ger,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.