TITUS
Hartmann, Iwein
Part No. 30
Previous part

Verse group: (30) 
Verse: 2901    nâch êren als ein guot kneht:
Verse: 2902    nû hât ir des êrste reht

Verse: 2903    daz sich iuwer êre
Verse: 2904    breite unde mêre.

Verse: 2905    irte iuch etewenne daz guot
Verse: 2906    michels harter dan der muot,

Verse: 2907    nû muget ir mit dem guote
Verse: 2908    volziehen dem muote.

Verse: 2909    nû sît biderbe und wol gemuot:
Verse: 2910    sô wirt diu rîterschaft noch guot

Verse: 2911    in manegem lande von uns zwein.
Verse: 2912    des volget mir, her Îwein.'

Verse: 2913    Nû versuochter zehant
Verse: 2914    an die vrouwen daz er vant:

Verse: 2915    wan dô sîn bete was getân,
Verse: 2916    done hete sî des deheinen wân

Verse: 2917    daz er sî ihtes bæte
Verse: 2918    wan daz sî gerne tæte.

Verse: 2919    daz geweren rou sî dâ ze stat,
Verse: 2920    dô er sî urloubes bat

Verse: 2921    daz er turnieren müese varn.
Verse: 2922    sî sprach 'daz sold ich ê bewarn':

Verse: 2923    done mohte sis niht wider komen.
Verse: 2924    sus wart dâ urloup genomen

Verse: 2925    zeinem ganzen jâre.
Verse: 2926    Ouch swuor sî des, zewâre,

Verse: 2927    und beliber iht vürbaz,
Verse: 2928    ez wære iemer ir haz.

Verse: 2929    ouch swuor er, des in diu liebe twanc,
Verse: 2930    in dûht daz eine jâr ze lanc,

Verse: 2931    unde em sûmde sich niht mê,
Verse: 2932    er kæme wider, möhter, ê,

Verse: 2933    esn latzte in êhaftiu nôt,
Verse: 2934    siechtuom vancnüsse ode der tôt.

Verse: 2935    Sî sprach 'iu ist daz wol erkant
Verse: 2936    daz unser êre und unser lant

Verse: 2937    vil gar ûf der wâge lît,
Verse: 2938    ir enkumt uns wider enzît,

Verse: 2939    daz ez uns wol geschaden mac.
Verse: 2940    hiute ist der ahte tac

Verse: 2941    nâch den sunewenden:
Verse: 2942    dâ sol daz jârzil enden.

Verse: 2943    sô kumt benamen ode ê,
Verse: 2944    ode ichn warte iuwer niht mê.

Verse: 2945    unde lât diz vingerlîn
Verse: 2946    einen geziuc der rede sîn.

Verse: 2947    ichn wart nie manne sô holt
Verse: 2948    dem ich diz selbc golt

Verse: 2949    wolde lîhen ode geben.
Verse: 2950    er muoz wol deste baz leben

Verse: 2951    der ez treit und an siht.
Verse: 2952    her Îwein, nûne verliesetz niht.

Verse: 2953    sînes steines kraft ist guot:
Verse: 2954    er gît gelücke und senften muot:

Verse: 2955    er ist sælec der in treit.'
Verse: 2956    nû was der künec Artûs gereit:

Verse: 2957    der schiet mit urloube dan.
Verse: 2958    nû reit diu vrouwe mit ir man

Verse: 2959    wol drî mîle ode mê.
Verse: 2960    daz scheiden tete ir herzen wê,

Verse: 2961    als wol an ir gebærden schein.
Verse: 2962    daz senen bedahte her Îwein

Verse: 2963    als er dô beste kunde:
Verse: 2964    mit lachendem munde

Verse: 2965    truobeten im diu ougen.
Verse: 2966    der rede ist unlougen,

Verse: 2967    er hete geweinet benamen,
Verse: 2968    wan daz er sich muose schamen.

Verse: 2969    ze lande vuor der künec Artûs,
Verse: 2970    diu vrouwe widere ze hûs.

Verse: 2971    Dô vrâgte mich vrou Minne
Verse: 2972    des ich von mînem sinne

Verse: 2973    niht geantwurten kan.
Verse: 2974    sî sprach 'sage an, Hartman,

Verse: 2975    s gihstû daz der künec Artûs
Verse: 2976    hern Îweinen vuort ze hûs

Verse: 2977    und liez sîn wîp wider varn?'
Verse: 2978    done kund ich mich niht baz bewarn,

Verse: 2979    wan ich sagt irz vür die wârheit:
Verse: 2980    O wan ez was ouch mir vür wâr geseit.

Verse: 2981    sî sprach, und sach mich twerhes an,
Verse: 2982    'dune hâst niht wâr, Hartman.'

Verse: 2983    'vrouwe, ich hân entriuwen.' sî sprach 'nein.'
Verse: 2984    der strît was lanc under uns zwein,

Verse: 2985    unz sî mich brâhte ûf die vart
Verse: 2986    daz ich ir nâch jehende wart.

Verse: 2987    er vuorte dez wîp und den man,
Verse: 2988    und volget im doch dewederz dan,

Verse: 2989    als ich iu nû bescheide.
Verse: 2990    sî wehselten beide

Verse: 2991    der herzen under in zwein,
Verse: 2992    diu vrouwe und der Îwein:

Verse: 2993    im volget ir herze und sîn lîp,
Verse: 2994    und beleip sîn herze und daz wîp.

Verse: 2995    Dô sprach ich 'mîn vrou Minne,
Verse: 2996    nu bedunket mîne sinne

Verse: 2997    daz mîn her Îwein sî verlorn,
Verse: 2998    sît er sîn herze hât verkorn:

Verse: 2999    wan daz gap im ellen unde kraft.
Verse: 3000    waz touc er nû ze rîterschaft?

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.