TITUS
Hartmann, Iwein
Part No. 31
Previous part

Verse group: (31) 
Verse: 3001    er muoz verzagen als ein wîp,
Verse: 3002    sît wîbes herze hât sîn lip

Verse: 3003    und sî mannes herze hât:
Verse: 3004    sô üebet sî manlîche tât

Verse: 3005    und solde wol turnieren varn
Verse: 3006    und er dâ heime daz hûs bewarn.

Verse: 3007    mir ist zewâre starke leit
Verse: 3008    daz sich ir beider gewonheit

Verse: 3009    mit wehsel sô verkêret hât:
Verse: 3010    wan nûne wirt ir deweders rât.'

Verse: 3011    dô zêch mich vrou Minne,
Verse: 3012    ich wære kranker sinne.

Verse: 3013    sî sprach 'tuo zuo dînen munt:
Verse: 3014    dir ist diu beste vuore unkunt.

Verse: 3015    dich geruorte nie mîn meisterschaft:
Verse: 3016    ich bin ez Minne und gibe die kraft

Verse: 3017    daz ofte man unde wîp
Verse: 3018    habent herzelôsen lîp

Verse: 3019    und hânt ir kraft doch deste baz.'
Verse: 3020    dô engetorst ich vrâgen vürbaz:

Verse: 3021    wan swâ wîp unde man
Verse: 3022    âne herze leben kan,

Verse: 3023    daz wunder daz gesach ich nie
Verse: 3024    doch ergienc ez nâch ir rede hie.

Verse: 3025    ichn weiz ir zweier wehsel niht:
Verse: 3026    wan als diu âventiure giht,

Verse: 3027    sô was her Îwein âne strît
Verse: 3028    ein degen vordes und baz sît.

Verse: 3029    Her Gâwein sîn geselle
Verse: 3030    der wart sîn ungevelle.

Verse: 3031    durch nôt bescheid ich iu wâ von:
Verse: 3032    wan diu werlt ist des ungewon,

Verse: 3033    swer vrumen gesellen kiese,
Verse: 3034    daz er dar an verliese.

Verse: 3035    zewâre geschach ez ê nie,
Verse: 3036    ez geschach doch im, und sage iu wie.

Verse: 3037    her Gâwein was der höfschste man
Verse: 3038    der rîters namen ie gewan:

Verse: 3039    engalt er sîn, daz was im leit;
Verse: 3040    wan er alle sîn arbeit

Verse: 3041    im ze dienste kêrte,
Verse: 3042    wier im sînen prîs gemêrte.

Verse: 3043    swâ sî turnierens pflâgen,
Verse: 3044    des sî niht verlâgen,

Verse: 3045    dâ muose selch rîterschaft geschehen
Verse: 3046    die got mit êren möhte sehen:

Verse: 3047    dâ vürdert er in in allen wîs
Verse: 3048    und alsô gar daz im der prîs

Verse: 3049    aller oftest beleip;
Verse: 3050    unz er der tage ze vil vertreip.

Verse: 3051    im gie diu zît mit vreuden hin.
Verse: 3052    man saget daz mîn her Gâwein in

Verse: 3053    mit guoter handelunge
Verse: 3054    behabte unde betwunge

Verse: 3055    daz er der jârzal vergaz
Verse: 3056    und sîn gelübede versaz,

Verse: 3057    unz daz ander jâr gevienc
Verse: 3058    und vaste in den ougest gienc.

Verse: 3059    Nû wâren sî beide
Verse: 3060    mit vreuden sunder leide

Verse: 3061    von einem turneie komen
Verse: 3062    und hete her Îwein genomen

Verse: 3063    den prîs ze beiden sîten.
Verse: 3064    nû was mit hôchzîten

Verse: 3065    ir herre der künec Artûs
Verse: 3066    ze Karidôl in sînem hûs.

Verse: 3067    dô sluogens ûf ir gezelt
Verse: 3068    vür die burc an daz velt.

Verse: 3069    dâ lâgen sî durch ir gemach,
Verse: 3070    unz sî der künec dâ gesach

Verse: 3071    und sîne besten alle
Verse: 3072    mit vrœlîchem schalle:

Verse: 3073    wand im was komen mære
Verse: 3074    wie in gelungen wære:

Verse: 3075    er saget in gnâde unde danc,
Verse: 3076    daz in sô ofte wol gelanc

Verse: 3077    swer gerne vrümeclîchen tuot,
Verse: 3078    der dem gnâdet, daz ist guot:

Verse: 3079    in gezimt der arbeit deste baz.
Verse: 3080    swâ man mit worten hie gesaz,

Verse: 3081    diu rede was wan von in zwein.
Verse: 3082    nû kam mîn her Îwein

Verse: 3083    in einen seneden gedanc:
Verse: 3084    er gedâhte, daz twelen wær ze lanc,

Verse: 3085    daz er von sînem wîbe tete:
Verse: 3086    ir gebot unde ir bete

Verse: 3087    diu heter übergangen.
Verse: 3088    sîn herze wart bevangen

Verse: 3089    mit senlîcher triuwe:
Verse: 3090    in begreif ein selch riuwe

Verse: 3091    daz er sîn selbes vergaz
Verse: 3092    und allez swîgende saz.

Verse: 3093    er überhôrte und übersach
Verse: 3094    swaz man dâ tete unde sprach,

Verse: 3095    als er ein tôre wære.
Verse: 3096    ouch nâhten im bœsiu mære.

Verse: 3097    im wîssagete sîn muot,
Verse: 3098    als er mir selbem ofte tuot:

Verse: 3099    ich siufte, sô ich vrô bin,
Verse: 3100    mînen künftegen ungewin:

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.