TITUS
Hartmann, Iwein
Part No. 32
Previous part

Verse group: (32) 
Verse: 3101    sus nâhte im sîn leit.
Verse: 3102    nû seht wâ dort her reit

Verse: 3103    sîns wîbes bote, vrou Lûnete,
Verse: 3104    von der râte und von der bete

Verse: 3105    daz von êrste was komen
Verse: 3106    daz sî in hâte genomen.

Verse: 3107    sî gâhte über jenez velt
Verse: 3108    unde erbeizt vür diu gezelt.

Verse: 3109    als schiere sî den künec sach,
Verse: 3110    dô kam sî vür in unde sprach

Verse: 3111    'Künec Artûs, mich hât gesant
Verse: 3112    mîn vrouwe her in iuwer lant:

Verse: 3113    unde daz gebôt sî mir
Verse: 3114    daz ich iuch gruozte von ir,

Verse: 3115    und iuwer gesellen über al;
Verse: 3116    wan einen: der ist ûz der zal:

Verse: 3117    der sol iu sîn unmære
Verse: 3118    als ein verrâtære.

Verse: 3119    daz ist hie der her Îwein,
Verse: 3120    der niender in den siten schein,

Verse: 3121    dô ich in von êrste sach,
Verse: 3122    daz untriuwe ode ungemach

Verse: 3123    ieman von im geschæhe
Verse: 3124    dem er triuwen verjæhe.

Verse: 3125    sîniu wort diu sint guot:
Verse: 3126    von den scheidet sich der muot.

Verse: 3127    ez schînet wol, wizze Krist,
Verse: 3128    daz mîn vrouwe ein wîp ist,

Verse: 3129    und daz sî sich niht gerechen mac.
Verse: 3130    und vorht er den widerslac,

Verse: 3131    sô heter sîs vil wol erlân
Verse: 3132    daz er ir lasters hât getân.

Verse: 3133    in dûht des schaden niht genuoc
Verse: 3134    daz er ir den man sluoc,

Verse: 3135    erne tæte ir leides mêre
Verse: 3136    und benæme ir lîp und êre.

Verse: 3137    Her Îwein, sît mîn vrouwe ir jugent,
Verse: 3138    schœne, rîcheit, unde ir tugent,

Verse: 3139    wider iuch niht geniezen kan,
Verse: 3140    wan gedâhtet ir doch dar an

Verse: 3141    waz ich iu gedienet hân?
Verse: 3142    und het sî mîn genozzen lân:

Verse: 3143    ze welhen staten ich iu kam,
Verse: 3144    dô ich iuch von dem tôde nam.

Verse: 3145    ez wære umb iuch ergangen,
Verse: 3146    het ichz niht undervangen.

Verse: 3147    daz ich ez ie undervienc,
Verse: 3148    daz iuwer ende niht ergienc,

Verse: 3149    des wil ich iemer riuwec sîn:
Verse: 3150    wan diu schult ist älliu mîn;

Verse: 3151    wan daz ichz durch triuwe tete.
Verse: 3152    ez vuocte mîn rât und mîn bete

Verse: 3153    daz sî leit und ungemach
Verse: 3154    verkôs der ir von iu geschach:

Verse: 3155    wand ich het ir ze vil geseit
Verse: 3156    von iuwer vrümekheit;

Verse: 3157    unz daz sî iu mit vrîer hant
Verse: 3158    gap ir lîp unde ir lant,

Verse: 3159    daz ir daz soldet bewarn.
Verse: 3160    nû hânt ir sô mit ir gevarn

Verse: 3161    daz sich ein wîp wider die man
Verse: 3162    niemer ze wol behüeten kan.

Verse: 3163    deiswâr uns was mit iu ze gâch.
Verse: 3164    dâ stüende bezzer lôn nâch

Verse: 3165    dan der uns von iu geschiht:
Verse: 3166    ouch gehiezet irs uns niht.

Verse: 3167    Mîner vrouwen wirt wol rât,
Verse: 3168    wan daz ez lasterlîchen stât,

Verse: 3169    deiswâr unde ist unbillîch:
Verse: 3170    sî ist iu ze edel und ze rîch

Verse: 3171    daz ir sî kebsen soldet,
Verse: 3172    ob ir erkennen woldet

Verse: 3173    waz rîters triuwe wære.
Verse: 3174    nû ist iu triuwe unmære.

Verse: 3175    doch sulent ir in allen
Verse: 3176    deste wirs gevallen

Verse: 3177    die triuwe und êre minnent
Verse: 3178    und sich des versinnent

Verse: 3179    daz nimmer ein wol vrumer man
Verse: 3180    âne triuwe werden kan.

Verse: 3181    Nû tuon ich disen herren kunt
Verse: 3182    daz sî iuch haben vür dise stunt

Verse: 3183    vür einen triuwelôsen man
Verse: 3184    (dâ ir wurdet, da was ich an

Verse: 3185    ensament meineide
Verse: 3186    und triuwelôs beide);

Verse: 3187    und mac sich der künec iemer schamen,
Verse: 3188    hât er iuch mêre in rîters namen,

Verse: 3189    sô liep im triuwe und êre ist.
Verse: 3190    ouch sulnt ir vür dise vrist

Verse: 3191    mîner vrouwen entwesen:
Verse: 3192    sî wil ouch âne iuch genesen.

Verse: 3193    und sendet ir wider ir vingerlîn:
Verse: 3194    daz ensol niht langer sîn

Verse: 3195    an einer ungetriuwen hant:
Verse: 3196    sî hât mich her darnâch gesant.'

Verse: 3197    von herzeleide geschach im daz
Verse: 3198    daz erz verdulte und versaz

Verse: 3199    daz sîz im ab der hant gewan.
Verse: 3200    sî neic dem künege und schiet von dan.

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.