TITUS
Hartmann, Iwein
Part No. 33
Previous part

Verse group: (33) 
Verse: 3201    Daz smæhen daz vrou Lûnete
Verse: 3202    den herren Îweinen tete,

Verse: 3203    daz gæhe wider kêren,
Verse: 3204    der slac sîner êren,

Verse: 3205    daz sî sô von im schiet
Verse: 3206    daz sî in entrôste noch enriet,

Verse: 3207    daz smæhlîche ungemach,
Verse: 3208    dazs im an die triuwe sprach,

Verse: 3209    diu versûmde riuwe
Verse: 3210    und sîn grôziu triuwe

Verse: 3211    sînes stæten muotes,
Verse: 3212    diu verlust des guotes,

Verse: 3213    der jâmer nâch dem wîbe,
Verse: 3214    die ben1amen sînem lîbe

Verse: 3215    vil gar vreude und den sin.
Verse: 3216    nâch einem dinge jâmert in,

Verse: 3217    daz er wære etewâ
Verse: 3218    daz man noch wîp enweste wâ

Verse: 3219    und niemer gehôrte mre
Verse: 3220    war er komen wære.

Verse: 3221    Er verlôs sîn selbes hulde:
Verse: 3222    wan ern mohte die schulde

Verse: 3223    ûf niemen anders gesagen:
Verse: 3224    in hete sîn selbes swert erslagen.

Verse: 3225    ern ahte weder man noch wîp,
Verse: 3226    niuwan ûf sîn selbes lîp.

Verse: 3227    er stal sich swîgende dan
Verse: 3228    (daz ersach dâ nieman)

Verse: 3229    unz daz er kam vür diu gezelt
Verse: 3230    ûz ir gesihte an daz velt.

Verse: 3231    dô wart sîn riuwe alsô grôz
Verse: 3232    daz im in daz hirne schôz

Verse: 3233    ein zorn unde ein tobesuht,
Verse: 3234    er brach sîne site und sîne zuht

Verse: 3235    und zarte abe sîn gewant,
Verse: 3236    daz er wart blôz sam ein hant.

Verse: 3237    sus lief er über gevilde
Verse: 3238    nacket nâch der wilde.

Verse: 3239    Dô diu juncvrouwe gereit,
Verse: 3240    nû was dem künege starke leit

Verse: 3241    hern Îweines swære,
Verse: 3242    und vrâgte wâ er wære.

Verse: 3243    er wold in getrœstet hân
Verse: 3244    unde bat nâch im gân.

Verse: 3245    und als in nieman envant,
Verse: 3246    nû was daz vil unbewant

Verse: 3247    swaz man im dâ gerief,
Verse: 3248    wander gegen walde lief.

Verse: 3249    er was ein degen bewæret
Verse: 3250    und ein helt unerværet:

Verse: 3251    swie manhaft er doch wære
Verse: 3252    und swie unwandelbære

Verse: 3253    an lîbe unde an sinne,
Verse: 3254    doch meistert vrou Minne

Verse: 3255    daz im ein krankez wîp
Verse: 3256    verkêrte sinne unde lîp.

Verse: 3257    der ie ein rehter adamas
Verse: 3258    rîterlîcher tugende was,

Verse: 3259    der lief nû harte balde
Verse: 3260    ein tôre in dem walde.

Verse: 3261    Nû gap im got der guote,
Verse: 3262    der in ûz sîner huote

Verse: 3263    dannoch niht volleclîchen liez,
Verse: 3264    daz im ein garzûn widerstiez,

Verse: 3265    der einen guoten bogen truoc:
Verse: 3266    den nam er im und strâlen gnuoc.

Verse: 3267    als in der hunger bestuont,
Verse: 3268    sô teter sam die tôren tuont:

Verse: 3269    in ist niht mêre witze kunt
Verse: 3270    niuwan diu eine umbe den munt.

Verse: 3271    er schôz prîslichen wol:
Verse: 3272    ouch gie der walt wildes vol:

Verse: 3273    swâ daz gestuont an sîn zil,
Verse: 3274    des schôz er ûz der mâze vil.

Verse: 3275    ouch muose erz selbe vâhen,
Verse: 3276    âne bracken ergâhen.

Verse: 3277    sone heter kezzel noch smalz,
Verse: 3278    weder pfeffer noch salz:

Verse: 3279    sîn salse was diu hungers nôt,
Verse: 3280    diuz im briet unde sôt

Verse: 3281    daz ez ein süeziu spîse was,
Verse: 3282    und wol vor hunger genas.

Verse: 3283    Dô er des lange gepflac,
Verse: 3284    er lief umb einen mitten tac

Verse: 3285    an ein niuweriute.
Verse: 3286    dane vander niht mê liute

Verse: 3287    niuwan einen einigen man:
Verse: 3288    der selbe sach im daz wol an

Verse: 3289    daz er niht rehtes sinnes was.
Verse: 3290    der vlôch in, daz er genas,

Verse: 3291    dâ bî in sîn hiuselîn.
Verse: 3292    dane wânder doch niht sicher sîn

Verse: 3293    unde verrigelte vaste die tür:
Verse: 3294    dâ stuont im der tôre vür.

Verse: 3295    der tôre dûht in alze grôz:
Verse: 3296    er gedâhte 'tuot er einen stôz,

Verse: 3297    diu tür vert ûz dem angen,
Verse: 3298    und ist um mich ergangen.

Verse: 3299    ich arme wie genise ich?'
Verse: 3300    ze jungest dô bedâhter sich

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.