TITUS
Hartmann, Iwein
Part No. 34
Previous part

Verse group: (34) 
Verse: 3301    'ich wil im mînes brôtes geben:
Verse: 3302    sô lât er mich vil lîhte leben.'

Verse: 3303    hie gienc ein venster durch die want:
Verse: 3304    dâ durch rahter die hant

Verse: 3305    und leit im ûf ein bret ein brôt:
Verse: 3306    daz suozt im diu hungers nôt;

Verse: 3307    wand er dâ vor, daz got wol weiz,
Verse: 3308    sô jæmerlîches nie enbeiz.

Verse: 3309    waz welt ir daz der tôre tuo?
Verse: 3310    er âz daz brôt und tranc dâ zuo

Verse: 3311    eines wazzers daz er vant
Verse: 3312    in einem einber an der want,

Verse: 3313    unde rûmdez im ouch sâ.
Verse: 3314    der einsidel sach im nâ

Verse: 3315    und vlêget got vil sêre
Verse: 3316    daz er in iemer mêre

Verse: 3317    erlieze selher geste:
Verse: 3318    wand er vil lützel weste

Verse: 3319    wie ez umbe in was gewant.
Verse: 3320    nu erzeicte der tôre zehant

Verse: 3321    daz der tôre und diu kint
Verse: 3322    vil lîhte ze wenenne sint.

Verse: 3323    er was dâ zuo gnuoc wîse
Verse: 3324    daz er nâch der spîse

Verse: 3325    dar wider kam in zwein tagen,
Verse: 3326    und brâhte ein tier ûf im getragen

Verse: 3327    und warf im daz an die tür.
Verse: 3328    daz machte daz er im her vür

Verse: 3329    deste willeclîcher bôt
Verse: 3330    sîn wazzer unde sîn brôt:

Verse: 3331    erne vorht in dô niht mê
Verse: 3332    und was im bezzer danne ê,

Verse: 3333    unt vant ie diz dâ gereit.
Verse: 3334    ouch galt er im die arbeit

Verse: 3335    mit sînem wiltpræte.
Verse: 3336    daz wart mit ungeræte

Verse: 3337    gegerwet bî dem viure.
Verse: 3338    im was der pfeffer tiure,

Verse: 3339    daz salz, unde der ezzich.
Verse: 3340    ze jungest wenet er sich

Verse: 3341    daz er die hiute veile truoc,
Verse: 3342    unde kouft in beiden gnuoc

Verse: 3343    des in zem lîbe was nôt,
Verse: 3344    salz unde bezzer brôt.

Verse: 3345    Sus twelte der unwîse
Verse: 3346    ze walde mit der spîse,

Verse: 3347    unz daz der edele tôre
Verse: 3348    wart gelîch einem môre

Verse: 3349    an allem sînem lîbe.
Verse: 3350    ob im von guotem wîbe

Verse: 3351    ie dehein guot geschach,
Verse: 3352    ob er ie hundert sper zebrach,

Verse: 3353    gesluoc er viur ûz helme ie,
Verse: 3354    ob er mit manheit ie begie

Verse: 3355    deheinen lobelîchen prîs,
Verse: 3356    wart er ie hövesch unde wîs,

Verse: 3357    wart er ie edel unde rîch,
Verse: 3358    dem ist er nû vil ungelîch.

Verse: 3359    er lief nû nacket beider,
Verse: 3360    der sinne unde der cleider,

Verse: 3361    unz daz in zeinen stunden
Verse: 3362    slâfende vunden

Verse: 3363    drî vrouwen dâ er lac,
Verse: 3364    wol umb einen mitten tac,

Verse: 3365    nâ ze guoter mâze
Verse: 3366    bî der lantstrâze

Verse: 3367    diu in ze rîten geschach.
Verse: 3368    und alsô schiere dô in ersach

Verse: 3369    diu eine vrouwe von den drin,
Verse: 3370    dô kêrte sî über in

Verse: 3371    und sach in vlîzeclîchen an.
Verse: 3372    nû jach des ein ieglich man

Verse: 3373    wie er verloren wære:
Verse: 3374    daz was ein gengez mære

Verse: 3375    in allem dem lande:
Verse: 3376    und daz sî in erkande,

Verse: 3377    daz was des schult; und doch niht gar
Verse: 3378    sî nam an im war

Verse: 3379    einer der wunden
Verse: 3380    diu ze manegen stunden

Verse: 3381    an im was wol erkant,
Verse: 3382    unde nande in zehant.

Verse: 3383    sî sprach her wider zuo den zwein
Verse: 3384    'vrouwe, lebet her Îwein,

Verse: 3385    sô lît er âne zwîvel hie,
Verse: 3386    ode ichn gesach in nie.'

Verse: 3387    ir höfscheit unde ir güete
Verse: 3388    beswârten ir gemüete,

Verse: 3389    daz sî von grôzer riuwe
Verse: 3390    und durch ir reine triuwe

Verse: 3391    vil sêre weinen began,
Verse: 3392    daz einem alsô vrumen man

Verse: 3393    diu swacheit solde geschehen
Verse: 3394    daz er in den schanden wart gesehen.

Verse: 3395    Ez was diu eine von den drin
Verse: 3396    der zweier vrouwe under in:

Verse: 3397    nû sprach sî zuo ir vrouwen
Verse: 3398    'vrouwe, ir muget wol schouwen

Verse: 3399    daz er den sin hât verlorn.
Verse: 3400    von bezzern zühten wart geborn

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.