TITUS
Hartmann, Iwein
Part No. 56
Previous part

Verse group: (56) 
Verse: 5501    ich wil mich niemer gevreun.
Verse: 5502    îch heize der rîter mittem leun:

Verse: 5503    und swer iu vür dise tage
Verse: 5504    iht von einem rîter sage

Verse: 5505    des geverte ein lewe sî,
Verse: 5506    dâ erkennet mich bî.'

Verse: 5507    Diu vrouwe sprach 'wie mac daz komen
Verse: 5508    daz ich von iu niht hân vernomen

Verse: 5509    und daz ich iuch nie me gesach?'
Verse: 5510    der rîter mittem lewen sprach

Verse: 5511    'daz iu von mir niht ist geseit,
Verse: 5512    daz machet mîn unwerdekheit.

Verse: 5513    ich möhte mittem muote
Verse: 5514    mit lîbe und mit guote

Verse: 5515    gevrumet hân diu mære
Verse: 5516    daz ich erkander wære.

Verse: 5517    wirt mîn gelücke alsô guot
Verse: 5518    sô mîn herze unt der muot,

Verse: 5519    ich weiz wol, sô gedien ich daz
Verse: 5520    daz ir mich erkennet baz.'

Verse: 5521    sî sprach 'irn sît ein bœser man
Verse: 5522    danne ich an iu gesehen han,

Verse: 5523    sô sît ir aller êren wert:
Verse: 5524    und des ich ê hân gegert,

Verse: 5525    des bæt ich aber, hulfez iht
Verse: 5526    mich dunkt, ichn überwinde niht

Verse: 5527    daz laster unt tie schande,
Verse: 5528    swer iuch ûz mînem lande

Verse: 5529    alsô wunden siht varn.'
Verse: 5530    er sprach 'got müeze iuch bewarn

Verse: 5531    und gebe iu sælde und êre:
Verse: 5532    ichn belîbe hie niht mêre.'

Verse: 5533    Diu vrouwe aber dô sprach
Verse: 5534    'sît ir versprechet mîn gemach,

Verse: 5535    so ergib ich iuch in gotes segen:
Verse: 5536    der kan iuwer baz gepflegen

Verse: 5537    und ruoche iu durch sîne güote
Verse: 5538    iuwer swærez ungemüete

Verse: 5539    vil schiere verkêren
Verse: 5540    ze vreuden unde ze êren.'

Verse: 5541    Von danne schiet er trûrec dô
Verse: 5542    und sprach wider sich selben sô

Verse: 5543    'vrouwe, wie lützel dû nû weist
Verse: 5544    daz tû den slüzzel selbe treist!

Verse: 5545    dû bist daz sloz und daz schrîn
Verse: 5546    dâ êre unt tiu vreude mîn

Verse: 5547    inne beslozzen lît'
Verse: 5548    nû heter rîtennes zît:

Verse: 5549    im envolgete von dan
Verse: 5550    weder wîp noch man,

Verse: 5551    niuwan eine vrou Lûnete
Verse: 5552    diu im geselleschaft tete

Verse: 5553    einen guoten wec hin.
Verse: 5554    dâ gelobet sî wider in

Verse: 5555    daz sî sît allez wâr liez:
Verse: 5556    mit ir triuwen sî im gehiez

Verse: 5557    daz sî sîn wol gedæhte
Verse: 5558    und ez ze rede bræhte

Verse: 5559    umbe sîne swære.
Verse: 5560    getriuwe und sô gewære

Verse: 5561    was diu guote vrou Lûnete
Verse: 5562    daz sî daz willeclîchen tete.

Verse: 5563    des gnâdet er ir tûsentstunt.
Verse: 5564    nû was der lewe sô starke wunt

Verse: 5565    daz er michel arbeit
Verse: 5566    ûf dem wege mit im leit.

Verse: 5567    dô er niht mêre mohte gân,
Verse: 5568    dô muoser von dem orse stân,

Verse: 5569    und las zesamne mit der hant
Verse: 5570    mies und swaz er lindes vant:

Verse: 5571    daz leiter allez under in
Verse: 5572    in sînen schilt und huop in hin

Verse: 5573    ûf daz ors vür sich.
Verse: 5574    daz leben was gnuoc kumberlich.

Verse: 5575    sus leit er arbeit genuoc,
Verse: 5576    unz daz in der wec truoc

Verse: 5577    dâ er eine burc sach.
Verse: 5578    dar kêrt er dô durch sîn gemach,

Verse: 5579    und vant beslozzen daz tor,
Verse: 5580    und einen knappen dâ vor.

Verse: 5581    der erkande wol sîns herren muot:
Verse: 5582    sîn herre was biderbe unde guot,

Verse: 5583    daz wart wol an dem knappen schîn:
Verse: 5584    er hiez in willekomen sîn

Verse: 5585    ze guoter handelunge.
Verse: 5586    ouch wæn ich in betwunge

Verse: 5587    diu vil wegemüede nôt
Verse: 5588    daz er nam daz man im bôt.

Verse: 5589    man mac den gast lîhte vil
Verse: 5590    geladen der belîben wil

Verse: 5591    im wart daz tor ûf getân:
Verse: 5592    dô sach er engegen im gân

Verse: 5593    rîter unde knehte,
Verse: 5594    die in nâch sînem rehte

Verse: 5595    enpfiengen unde gruozten
Verse: 5596    und im vil gerne buozten

Verse: 5597    kumber unde sîne nôt,
Verse: 5598    als in ir herre gebôt,

Verse: 5599    der selbe engegen ime gienc
Verse: 5600    und in vrœlîch enpfienc

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.