TITUS
Hartmann, Iwein
Part No. 55
Previous part

Verse group: (55) 
Verse: 5401    er hete sîner helfe wol enborn,
Verse: 5402    und lie ez ouch ân grôzen zorn

Verse: 5403    daz er in sîne helfe spranc:
Verse: 5404    ern sagtes im danc noch undanc.

Verse: 5405    sî vâhtens bêdenthalben an,
Verse: 5406    hie der lewe, dort der man

Verse: 5407    ouch ensparten sî lîp noch den muot:
Verse: 5408    soldens da von sin behuot,

Verse: 5409    sî waren werhaft genuoc:
Verse: 5410    unde irietweder sluoc

Verse: 5411    dem lewen ene wunden
Verse: 5412    dô er der hete enpfunden,

Verse: 5413    dô wart er ræzer vil dan ê.
Verse: 5414    ouch tete dem hern lwein wê

Verse: 5415    daz er den lewen wunden sach
Verse: 5416    daz bescheinder wol: wander brach

Verse: 5417    sîne senfte gebærde,
Verse: 5418    von des lewen beswærde

Verse: 5419    gewan er zornes alsô vil
Verse: 5420    daz er sî brâhte ûf daz zil

Verse: 5421    daz sî gar verlurn ir kraft
Verse: 5422    und gehabeten vor im zagehaft

Verse: 5423    Sus wârens überwunden
Verse: 5424    iedoch mit vier wunden

Verse: 5425    die sî im heten geslagen
Verse: 5426    dochn hôrt in dâ nieman clagen

Verse: 5427    deheinen der im geschach,
Verse: 5428    niuwan des lewen ungemach.

Verse: 5429    Nû was ez ze den zîten site
Verse: 5430    daz der schuldegære lite

Verse: 5431    den selben tôt den der man
Verse: 5432    solde lîden den er an

Verse: 5433    mit kampfe vor gerihte sprach,
Verse: 5434    ob ez alsô geschach

Verse: 5435    daz er mit kampfe unschuldec wart.
Verse: 5436    dazn wart ouch hie niht gespart:

Verse: 5437    sî wurden ûf den rôst geleit.
Verse: 5438    vroun Lûneten wâren gereit

Verse: 5439    die juncvrouwen alle,
Verse: 5440    mit manegem vuozvalle

Verse: 5441    gnâdeten si im sêre
Verse: 5442    und buten im alle die êre

Verse: 5443    der er von in geruochte
Verse: 5444    und vürbaz danne er suochte.

Verse: 5445    Vrou Lûnete was vil vrô:
Verse: 5446    wand ez gezôch ir alsô.

Verse: 5447    si gewan ir vrouwen hulde
Verse: 5448    und hete âne schulde

Verse: 5449    erliten kumber unde nôt:
Verse: 5450    des ergazte sîs unz an ir tôt.

Verse: 5451    Noch erkand in dâ wîp noch man,
Verse: 5452    und schiet ouch alsô Iîhte dan;

Verse: 5453    niuwan eine vrou Lûnete,
Verse: 5454    diu daz durch sîn gebot tete

Verse: 5455    daz sî in niemen ennande.
Verse: 5456    daz in diu niht erkande

Verse: 5457    diu doch sîn herze bî ir truoc,
Verse: 5458    daz was wunders genuoc.

Verse: 5459    doch bat sî in vil verre,
Verse: 5460    sî sprach 'lieber herre,

Verse: 5461    durch got belîbet hie mit mir:
Verse: 5462    wand ich weiz wol daz ir

Verse: 5463    und iuwer lewe sît starke wunt:
Verse: 5464    lât mich iuch machen gesunt.'

Verse: 5465    Sus sprach der namelôse dô
Verse: 5466    'ichn gewinne gemach nochn wirde vrô

Verse: 5467    niemer mê unz ûf ten tac
Verse: 5468    daz ich wider haben mac

Verse: 5469    mîner vrouwen hulde:
Verse: 5470    der mangel ich ân schulde.'

Verse: 5471    sî sprach 'wie selten ich daz wîp,
Verse: 5472    beide ir muot und ir lîp,

Verse: 5473    iemer geprîse
Verse: 5474    (wand sî enist niht wîse)

Verse: 5475    diu einem alsô vrumen man
Verse: 5476    als iu noch hie schînet an

Verse: 5477    ir hulde iemer widerseit,
Verse: 5478    ob sî niht grôz herzeleit

Verse: 5479    ûf in ze sprechenne hât.'
Verse: 5480    er sprach 'niemer werde mîn rât,

Verse: 5481    ir wille enwære ie mîn gebot:
Verse: 5482    und gebiete ir unser herre got

Verse: 5483    daz sî mich bedenke enzît
Verse: 5484    der kumber der mir nâhen lît,

Verse: 5485    den sag ich niemen, wizze Krist,
Verse: 5486    wan dem er doch gewizzen ist,

Verse: 5487    swie nâ er mîmen herzen gê.'
Verse: 5488    sî sprach 'ist er dan iemen mê

Verse: 5489    gewizzen wan iu zwein?'
Verse: 5490    'nein ez, vrouwe', sprach her Îwein.

Verse: 5491    sî sprach 'wan nennet ir sî doch?'
Verse: 5492    er sprach 'vrouwe,nein ich noch:

Verse: 5493    ich muoz ir hulde ê haben baz.'
Verse: 5494    sî sprach 'nû saget mir doch daz,

Verse: 5495    wie sît ir selbe genant?'
Verse: 5496    er sprach 'ich wil sîn erkant

Verse: 5497    bî mînem lewen der mit mir vert.
Verse: 5498    mirn werde ir gnâde baz beschert,

Verse: 5499    sô wil ich mich iemer schamen
Verse: 5500    mîns lebens und mîns rehten namen:

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.