TITUS
Hartmann, Iwein
Part No. 54
Previous part

Verse group: (54) 
Verse: 5301    die juncvrouwen brinnen sehen.
Verse: 5302    er sprach 'desn sol niht geschehen.'

Verse: 5303    sus muose der lewe hôher stân:
Verse: 5304    dochn mohter des niht verlân

Verse: 5305    ern sæhe über den rücke dan
Verse: 5306    sînen herren wider an.

Verse: 5307    Sus sint diu wort hin geleit,
Verse: 5308    und wurden ze strîte gereit.

Verse: 5309    sî wâren alle viere
Verse: 5310    ze orse komen schiere

Verse: 5311    und liezen von ein ander gân,
Verse: 5312    dazs ir puneiz möhten hân,

Verse: 5313    und triben alle drî dan
Verse: 5314    wider ûf ten einen man,

Verse: 5315    swaz diu ors mohten gevarn.
Verse: 5316    dar under muoser sich bewarn

Verse: 5317    dar nâch als ein wîser man
Verse: 5318    der sîne rîterschaft wol kan

Verse: 5319    und sîne kraft mit listen
Verse: 5320    ze rehten staten vristen.

Verse: 5321    sî brâchen ûf im alle ir sper:
Verse: 5322    daz sîn behielt aber er

Verse: 5323    unde warf daz ors von in
Verse: 5324    unde leisierte hin

Verse: 5325    von in eines ackers lanc,
Verse: 5326    und tete schiere den widerwanc

Verse: 5327    unde lîmte vaste sîn sper
Verse: 5328    vor ûf sîne brust her,

Verse: 5329    als in diu gewonheit lêrte.
Verse: 5330    und dô er zuo in kêrte,

Verse: 5331    dô muot im mittem swerte
Verse: 5332    der truhsæze, als er gerte

Verse: 5333    von sînen bruodern zwein.
Verse: 5334    dô nam ern underz kinnebein,

Verse: 5335    rehte vliegent stach er in
Verse: 5336    enbor über den satel hin,

Verse: 5337    daz er ûf dem sande gelac
Verse: 5338    unde alles des verpflac

Verse: 5339    des im ze schaden mohte komen.
Verse: 5340    der trôst was den zwein benomen:

Verse: 5341    wand er lac lange âne sin.
Verse: 5342    nû riten wider ûf in

Verse: 5343    die zwêne die noch werten,
Verse: 5344    und pflâgens mitten swerten

Verse: 5345    als guote rîter solten.
Verse: 5346    daz wart in wol vergolten,

Verse: 5347    wande ie sîn eines slac
Verse: 5348    vaste wider ir zwein wac.

Verse: 5349    er bedorfte wol kraft unde wer:
Verse: 5350    wan zwên sint iemer eines her.

Verse: 5351    Die juncvrouwen bâten alle got
Verse: 5352    daz er sîn gnâde und sîn gebot

Verse: 5353    in ze helfe kêrte,
Verse: 5354    und ir kempfen êrte,

Verse: 5355    daz er in ze trôste
Verse: 5356    ir gespiln erlôste.

Verse: 5357    nu ist got sô gnædec und sô guot
Verse: 5358    und sô reine gemuot

Verse: 5359    daz er niemer enkunde
Verse: 5360    sô manegem süezen munde

Verse: 5361    betelîchiu dinc versagen
Verse: 5362    ouch enwâren sî niht zagen

Verse: 5363    die dâ mit im vâhten,
Verse: 5364    wande sî in brâhten

Verse: 5365    in vil angestlîche nôt.
Verse: 5366    und zewâre âne den tôt

Verse: 5367    bekumberten sî in sêre:
Verse: 5368    dochn mohten sî im dehein êre

Verse: 5369    vürnames an gewinnen.
Verse: 5370    nû kam ze sînen sinnen

Verse: 5371    der truhsæze widere
Verse: 5372    und enlac niht mê dâ nidere:

Verse: 5373    er bürte schilt unde swert
Verse: 5374    und gienc ze den bruodern wert.

Verse: 5375    Dô dûhte den lewen er hete zît
Verse: 5376    sich ze hebenne an den strît,

Verse: 5377    und lief ouch sâ den gânden man
Verse: 5378    vil unbarmeclîchen an

Verse: 5379    und zarte im daz îsen.
Verse: 5380    man sach die ringe rîsen

Verse: 5381    sam sî wæren von strô.
Verse: 5382    sus entworhter in dô,

Verse: 5383    wand er in gar zevuorte,
Verse: 5384    swaz er sîn beruorte.

Verse: 5385    vor im gewan vrou Lûnete
Verse: 5386    vride von des lewen bete.

Verse: 5387    diu bete was niuwan der tôt:
Verse: 5388    des vreut sî sich, des gie ir nôt.

Verse: 5389    Hie lac der truhsæze:
Verse: 5390    nû wart der lewe ræze

Verse: 5391    ze sînen kampfgenôzen,
Verse: 5392    die manegen slac grôzen

Verse: 5393    heten enpfangen und gegeben.
Verse: 5394    werten sî nû wol daz leben,

Verse: 5395    daz was in guot vür den tot
Verse: 5396    wand sî bestuont nû michel nôt

Verse: 5397    nû waren zwêne wider zwein:
Verse: 5398    wand ezn moht her Îwein

Verse: 5399    den lewen niht vertrîben:
Verse: 5400    dô liez erz ouch belîben

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.