TITUS
Hartmann, Iwein
Part No. 53
Previous part

Verse group: (53) 
Verse: 5201    die ir gesindes wâren:
Verse: 5202    die hôrter gebâren

Verse: 5203    harte clägelîchen.
Verse: 5204    sî baten got den rîchen,

Verse: 5205    sî sprâchen 'got herre,
Verse: 5206    wir biten dich vil verre

Verse: 5207    daz dû uns rechest an deme
Verse: 5208    der uns unser gespilen neme.

Verse: 5209    wir heten ir vrume und êre:
Verse: 5210    nune habe wir nieman mêre

Verse: 5211    der dâ ze kemenâten
Verse: 5212    umb uns getürre râten

Verse: 5213    daz uns mîn vrouwe iht guotes tuo,
Verse: 5214    als beide spâte unde vruo

Verse: 5215    diu vil getriuwe Lûnete
Verse: 5216    unser liebiu gespile tete.'

Verse: 5217    Diz machet im sînen muot
Verse: 5218    ze vehten starc unde guot,

Verse: 5219    und reit dar dâ er sî sach.
Verse: 5220    er hiez sî ûf stân unde sprach

Verse: 5221    'vrouwe, zeiget mir die
Verse: 5222    die iuch dâ kumbernt, sint sî hie:

Verse: 5223    und heizet iuch drâte ledec lân,
Verse: 5224    ode sî müezcn von mir hân

Verse: 5225    den strît den ich geleisten mac.'
Verse: 5226    und sîn lewe, der sîn dâ pflac,

Verse: 5227    der gesach vil schiere sînen haz
Verse: 5228    und gestuont hin nâher baz.

Verse: 5229    Nû was diu reine guote maget
Verse: 5230    von vorhten alsô gar verzaget

Verse: 5231    daz sî vil kûme ûf gesach:
Verse: 5232    dô gevienc sî kraft unde sprach

Verse: 5233    'herre, daz vergelt iu got:
Verse: 5234    der weiz wol daz ich disen spot

Verse: 5235    und dise schande dulde
Verse: 5236    ân alle mîne schulde;

Verse: 5237    und bite des unsern herren
Verse: 5238    daz sî iu müezen werren

Verse: 5239    niuwan als ich schuldec sî',
Verse: 5240    und zeicte sî im alle drî.

Verse: 5241    Dô sprach der truhsæze
Verse: 5242    'er ist gnuoc tumpræze

Verse: 5243    der her kumt sterben durch dich.
Verse: 5244    nû ist ez gnuoc billich,

Verse: 5245    swer selbe des tôdes ger,
Verse: 5246    daz mans ouch den gewer,

Verse: 5247    und der ouch danne vehte
Verse: 5248    sô gar wider dem rehte.

Verse: 5249    wan ez hât allez diz lant
Verse: 5250    ir untriuwe wol erkant,

Verse: 5251    wie sî ir vrouwen verriet
Verse: 5252    daz sî von ir êren schiet.

Verse: 5253    deiswâr, herre, ich râte iu daz
Verse: 5254    daz ir iuch bedenket baz.

Verse: 5255    ich erban iu des vil sêre
Verse: 5256    daz wir iu iuwer êre

Verse: 5257    müezen nemen untten lîp
Verse: 5258    umb ein sô ungetriuwez wîp.

Verse: 5259    nû seht daz unser drî sint:
Verse: 5260    und wæret ir niht ein kint,

Verse: 5261    ir möhtet wol die rede lân
Verse: 5262    diu iu an den lîp muoz gân.'

Verse: 5263    Dô sprach der rîter mittem leun
Verse: 5264    'ir muget mir harte vil gedreun:

Verse: 5265    ir müezet mich bestân
Verse: 5266    ode die juncvrouwen lân.

Verse: 5267    mir hât diu unschuldige maget
Verse: 5268    bî dem eide gesaget

Verse: 5269    daz sî wider ir vrouwen sî
Verse: 5270    aller untriuwen vrî

Verse: 5271    und daz sî ir nie getæte
Verse: 5272    deheine misseræte.

Verse: 5273    waz von diu, sint iuwer drî?
Verse: 5274    wænet ir daz ich eine sî?

Verse: 5275    got gestuont der wârheit ie:
Verse: 5276    mit ten beiden bin ich hie.

Verse: 5277    ich weiz wol, sî gestânt mir:
Verse: 5278    sus bin ich selbe dritte als ir.

Verse: 5279    dar an lît, wæn ich, grœzer kraft
Verse: 5280    danne an iuwer geselleschaft.'

Verse: 5281    dô sprach der truhsæze
Verse: 5282    'swes ich mich vermæze

Verse: 5283    wider unsern herren got,
Verse: 5284    des gevieng ich schaden unde spot.

Verse: 5285    herre, zuo dem drôt ir mir:
Verse: 5286    ich getrûw im helfe baz dan ir.

Verse: 5287    ich sihe iuch ein geverten hân,
Verse: 5288    den sult ir hôher heizen gân,

Verse: 5289    iuwern lewen der hie stât:
Verse: 5290    der andern wirdet guot rât.

Verse: 5291    hien vihtet niemen mit iu zwein.'
Verse: 5292    dô sprach mîn her Îwein

Verse: 5293    'der lewe vert mit mir alle zît:
Verse: 5294    ichn vüere in durch deheinen strît,

Verse: 5295    ich entrîb in ouch von mir niht:
Verse: 5296    werent iuch, tuot er iu iht.'

Verse: 5297    dô riefens alle under in,
Verse: 5298    ern tæte sînen lewen hin,

Verse: 5299    mit im envæhte niemen dâ,
Verse: 5300    und zewâre er müese ouch sâ

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.