TITUS
Hartmann, Iwein
Part No. 52
Previous part

Verse group: (52) 
Verse: 5101    daz er dâ hôrte von in zwein.
Verse: 5102    dô sprach mîn her Îwein

Verse: 5103    'welt ir mich des geniezen lân
Verse: 5104    ob ich iu iht gedienet hân,

Verse: 5105    sô tuot ein dinc des ich bite:
Verse: 5106    dâ ist mir wol gelônet mite.

Verse: 5107    mînen hern Gâwein minn ich:
Verse: 5108    ich weiz wol, alsô tuot er mich:

Verse: 5109    ist unser minne âne kraft,
Verse: 5110    sone wart nie guot geselleschaft.

Verse: 5111    den ernest sol ich im niuwen
Verse: 5112    swâ ich mac entriuwen.

Verse: 5113    herre, zuo dem rîtent ir
Verse: 5114    unde grüezent in von mir

Verse: 5115    und vüerent mit iu iuweriu kint
Verse: 5116    diu dâ hie erledeget sint,

Verse: 5117    und daz ir swester mit in var,
Verse: 5118    und vüeret ouch daz getwerc dar,

Verse: 5119    des herre dâ hie lît erslagen,
Verse: 5120    und sult im des genâde sagen

Verse: 5121    swes ich iu hie gedienet hân:
Verse: 5122    wan daz hân ich durch in getân.

Verse: 5123    vrâger iuch wiech sî genant,
Verse: 5124    sô tuot im daz erkant

Verse: 5125    daz ein lewe mit mir sî:
Verse: 5126    dâ erkennet er mich bî.'

Verse: 5127    Daz gelobet der herre,
Verse: 5128    und bat in des vil verre,

Verse: 5129    swenn er zuo dem brunnen gestrite,
Verse: 5130    daz er dar wider rite:

Verse: 5131    er schüef im guoten gemach.
Verse: 5132    mîn her Îwein dô sprach

Verse: 5133    'min rîten daz ist mislich.
Verse: 5134    ich kume iu gerne, lânt sî mich

Verse: 5135    mit ten ich dâ strîten sol:
Verse: 5136    ich getrûwe abe in des wol,

Verse: 5137    mugen sî mirz an erstrîten,
Verse: 5138    sine lânt mich niender rîten.'

Verse: 5139    dô bat dâ man unde wîp
Verse: 5140    daz got sîn êre und sînen lîp

Verse: 5141    vriste und behuote:
Verse: 5142    mit lîbe und mit guote

Verse: 5143    stüenden sî im ze gebote.
Verse: 5144    alsus bevalch er sî gote.

Verse: 5145    Im wârn die wege wol kunt,
Verse: 5146    und was ouch deste kurzer stunt

Verse: 5147    zuo der kapellen komen.
Verse: 5148    dô was diu juncvrouwe genomen

Verse: 5149    her ûz dâ sî gevangen lac
Verse: 5150    (wand ez was wol um mitten tac),

Verse: 5151    und wâren ir in den stunden
Verse: 5152    die hende gebunden,

Verse: 5153    ir cleider von ir getân
Verse: 5154    und niuwan ir hemde an verlân,

Verse: 5155    und diu hurt was bereit
Verse: 5156    und daz viur dar under geleit,

Verse: 5157    unde stuont vrou Lûnete
Verse: 5158    ûf ir knien an ir gebete

Verse: 5159    und bat got der sêle pflegen,
Verse: 5160    wan sî hete sich des lîbes bewegen.

Verse: 5161    Dô sî sich missetrôste
Verse: 5162    daz sî nû nieman lôste,

Verse: 5163    dô kam ir helfære,
Verse: 5164    und was im vil swære

Verse: 5165    ir laster unde ir arbeit,
Verse: 5166    die sî von sînen schulden leit.

Verse: 5167    ouch hete mîn her Îwein
Verse: 5168    grôzen trôst zuo den zwein,

Verse: 5169    daz got und ir unschulde
Verse: 5170    den gewalt niene dulde

Verse: 5171    daz im iht missegienge,
Verse: 5172    und daz in ouch vervienge

Verse: 5173    der lewe sîn geverte
Verse: 5174    daz er die maget ernerte.

Verse: 5175    Nû gâhte er sêre mitten sporn:
Verse: 5176    wand sî wære verlorn,

Verse: 5177    wær er iht langer gewesen.
Verse: 5178    er rief und sprach 'lât genesen,

Verse: 5179    übeliu diet, dise maget.
Verse: 5180    swaz man über sî hie claget,

Verse: 5181    des wil ich in ir schulden stân:
Verse: 5182    und sol sî dâ zuo kempfen hân,

Verse: 5183    sô wil ich vehten vür sî.'
Verse: 5184    dô daz gehôrten dise drî,

Verse: 5185    daz versmâhet in vaste:
Verse: 5186    doch entwichen sî dem gaste

Verse: 5187    und macheten im wec dar.
Verse: 5188    nû nam er umbe sich war,

Verse: 5189    und suochtes mitten ougen,
Verse: 5190    die sîn herze tougen

Verse: 5191    zallen zîten an sach
Verse: 5192    unde ir ouch ze vrouwen jach.

Verse: 5193    schiere sach er sî sitzen,
Verse: 5194    und was von sînen witzen

Verse: 5195    vil nach komen als ê:
Verse: 5196    wand sî sagent, ez tuo wê,

Verse: 5197    swer sînem herzenliebe sî
Verse: 5198    alsô gastlichen bî.

Verse: 5199    Nu begunder umbe schouwen
Verse: 5200    und sach vil juncvrouwen,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.