TITUS
Hartmann, Iwein
Part No. 51
Previous part

Verse group: (51) 
Verse: 5001    vil wol an iu gerochen hân
Verse: 5002    swaz ir im leides habt getân,

Verse: 5003    und hât sich ouch gerochen wol,
Verse: 5004    wand ich daz schiere schaffen sol

Verse: 5005    daz ir im niemer mê getuot
Verse: 5006    deweder übel noch guot.'

Verse: 5007    Des antwurt im her Îwein sô
Verse: 5008    'rîter, waz touc disiu drô?

Verse: 5009    lât bœse rede und tuot diu werc:
Verse: 5010    ode ich entsitze ein getwerc

Verse: 5011    harter dan iuwern grôzen lîp.
Verse: 5012    lât schelten ungezogeniu wîp:

Verse: 5013    dien mugen niht gevehten.
Verse: 5014    und wil sîn unser trehten

Verse: 5015    nâch rehtem gerihte pflegen,
Verse: 5016    sô sît ir schiere gelegen.'

Verse: 5017    Nû hâte dem risen geseit
Verse: 5018    sîn sterke und sîn manheit

Verse: 5019    waz im gewæfen töhte
Verse: 5020    und wer im geschaden möhte:

Verse: 5021    in dûhte er hete gewæfens gnuoc
Verse: 5022    an einer stange die er truoc.

Verse: 5023    nû vreute sich her Îwein
Verse: 5024    daz er als ungewâfent schein.

Verse: 5025    under den arm sluoc er
Verse: 5026    mit guotem willen daz sper

Verse: 5027    und nam daz ors mitten sporn,
Verse: 5028    und het in ûf die brust erkorn

Verse: 5029    und stach im einen selhen stich
Verse: 5030    daz daz îsensper sich

Verse: 5031    lôste von dem schafte
Verse: 5032    und im in dem lîbe hafte.

Verse: 5033    ouch sluoc im der rise einen slac,
Verse: 5034    daz ich daz wol sagen mac,

Verse: 5035    enhet in daz ors niht vür getragen,
Verse: 5036    daz er im hæte geslagen

Verse: 5037    noch einen slac als er dô sluoc,
Verse: 5038    es wær ze dem tôde genuoc:

Verse: 5039    dô truoc in daz ors dan
Verse: 5040    unz daz er daz swert gewan.

Verse: 5041    sâ kêrter wider ûf in,
Verse: 5042    unde gestiurt in des sîn sin

Verse: 5043    sîn kraft und sîn manheit,
Verse: 5044    dô er wider ûf in reit,

Verse: 5045    daz er im eine wunden sluoc.
Verse: 5046    dô in daz ors vür truoc,

Verse: 5047    dô sluoc im der rise einen slac,
Verse: 5048    daz er dâ gar gestrahter lac

Verse: 5049    vor ûf dem orse vür tôt.
Verse: 5050    dô ersach der lewe sîne nôt

Verse: 5051    und lief den ungevüegen man
Verse: 5052    vil unsitelîchen an

Verse: 5053    und zart im cleit unde brât
Verse: 5054    als lanc sô der rücke gât

Verse: 5055    von den ahseln her abe,
Verse: 5056    unz daz der michel knabe

Verse: 5057    als ein ohse erluote,
Verse: 5058    und wante die ruote

Verse: 5059    die er dâ ze wer truoc.
Verse: 5060    und dô er nâch dem lewen sluoc,

Verse: 5061    dô entweich im der lewe dan,
Verse: 5062    und entraf den lewen noch den man

Verse: 5063    im wart zuo dem slage sô gâch
Verse: 5064    daz er sich neiste darnâch

Verse: 5065    und ouch vil nâch dernider lac:
Verse: 5066    ê er erzüge den andern slac,

Verse: 5067    dô hete sich her Îwein
Verse: 5068    mit vil grôzen wunden zwein

Verse: 5069    an im vil wol gerochen
Verse: 5070    und daz swert durch in gestochen

Verse: 5071    dâ vor dâ daz herze lît.
Verse: 5072    dô was verendet der strît,

Verse: 5073    und viel von der swære
Verse: 5074    als ez ein boum wære.

Verse: 5075    Von des risen valle
Verse: 5076    vreuten sî sich alle,

Verse: 5077    den wol dar an was geschehen.
Verse: 5078    sî heten heiles gesehen

Verse: 5079    den rîter der des lewen pflac:
Verse: 5080    wand sî lebeten vür den tac

Verse: 5081    âne angest unde ân nôt,
Verse: 5082    dô der rise gelac tôt:

Verse: 5083    des gnâdeten sî im genuoc,
Verse: 5084    dem hern Îweine der in sluoc.

Verse: 5085    ouch gerter urloubes sâ:
Verse: 5086    wander enhete sich dâ

Verse: 5087    niht ze sûmen mêre,
Verse: 5088    ob er sîne êre

Verse: 5089    an ir bestæten wolde
Verse: 5090    der er dâ komen solde

Verse: 5091    ze helfe umbe mitten tac,
Verse: 5092    diu dâ durch in gevangen lac.

Verse: 5093    der wirt begund in starke biten
Verse: 5094    (daz wær also guot vermiten)

Verse: 5095    daz er dâ ruowen wolde:
Verse: 5096    ern mohte noch cnsolde.

Verse: 5097    dô antwurt er und sîn wîp
Verse: 5098    beidiu guot unde lîp

Verse: 5099    vil gar in sîne gewalt.
Verse: 5100    daz gnâden wart vil manecvalt,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.