TITUS
Hartmann, Iwein
Part No. 50
Previous part

Verse group: (50) 
Verse: 4901    wider dem schaden der hie geschiht,
Verse: 4902    gieng ez mir an die triuwe niht.

Verse: 4903    sô wære ouch dirre wirt wol wert,
Verse: 4904    der ouch miner helfe gert,

Verse: 4905    und hern Gâweins swester und ir kint,
Verse: 4906    diu mir ze herzen gânde sint

Verse: 4907    durch sî selben und durch in
Verse: 4908    dem ich wol schuldec bin

Verse: 4909    daz ich im niht des abe gê
Verse: 4910    daz im ze dienste gestê.

Verse: 4911    muoz ich sî under wegen lân,
Verse: 4912    sô habent sî des immer wân

Verse: 4913    daz ich des lîbes sî ein zage.'
Verse: 4914    nû schiet den zwîvel und die clage

Verse: 4915    der grôze rise des sî dâ biten:
Verse: 4916    der kam dort zuo in geriten

Verse: 4917    und vuorte sîne gevangen.
Verse: 4918    an den het er begangen

Verse: 4919    grôze unhövescheit.
Verse: 4920    in wâren aller hande cleit

Verse: 4921    ze den zîten vremde,
Verse: 4922    niuwan diu bœsten hemde

Verse: 4923    diu ie küchenkneht getruoc.
Verse: 4924    sî treip ein getwerc, daz sî sluoc

Verse: 4925    mit sîner geiselruoten
Verse: 4926    daz sî über al bluoten.

Verse: 4927    die herren riten ungeschuoch:
Verse: 4928    ir hemde was ein sactuoch,

Verse: 4929    gezerret, swarz, unde grôz:
Verse: 4930    die edelen rîter wâren blôz

Verse: 4931    an beinen unde an armen.
Verse: 4932    den gast begunde erbarmen

Verse: 4933    diu grôze nôt die sî liten.
Verse: 4934    ir pfarit wâren, diu sî riten,

Verse: 4935    tôtmager und vil kranc:
Verse: 4936    ir ietwederz strûchte und hanc.

Verse: 4937    die vüeze wâren in unden
Verse: 4938    zesamene gebunden

Verse: 4939    und die hende vaste
Verse: 4940    ze rücke mit baste.

Verse: 4941    den gurren die sî truogen hin,
Verse: 4942    den wâren die zagele under in

Verse: 4943    zesamene gevlohten,
Verse: 4944    daz sî niene mohten

Verse: 4945    ein ander entwîchen.
Verse: 4946    dô sî sô jæmerlichen

Verse: 4947    ir edel vater rîten sach,
Verse: 4948    daz im sin herze niene brach

Verse: 4949    von jâmer, des wundert mich:
Verse: 4950    wandez was wol jæmerlich.

Verse: 4951    Sus vuorters vür daz bürgetor:
Verse: 4952    dâ hôrten sî in ruofen vor,

Verse: 4953    er hienges alle viere,
Verse: 4954    ob man sî niht vil schiere

Verse: 4955    mit ir swester lôste
Verse: 4956    dô sprach der sî dâ trôste,

Verse: 4957    der rîter der des lewen pflac
Verse: 4958    'deiswâr, herre, ob ich mac,

Verse: 4959    ich ledige unser gesellen.
Verse: 4960    got sol disen vellen:

Verse: 4961    er ist ein unbescheiden man.
Verse: 4962    mich sterket vaste dar an

Verse: 4963    iuwer reht und sîn hôchvart,
Verse: 4964    daz diu ie sô grôz wart.

Verse: 4965    ern kan sich lasters niht schamen,
Verse: 4966    daz ers ir geburt unde ir namen

Verse: 4967    niht enkan geniezen lân,
Verse: 4968    swaz sî im joch hæten getân.

Verse: 4969    ichn sol kein rîter schelten:
Verse: 4970    iedoch muoz er engelten

Verse: 4971    sîner ungewizzenheit.
Verse: 4972    deiswâr, mac ich, ez wirt im leit'

Verse: 4973    Er hete in kurzen stunden
Verse: 4974    den helm ûf gebunden

Verse: 4975    und was vil schiere gereit:
Verse: 4976    daz lêrt in diu gewonheit.

Verse: 4977    sîn ors sach er bî im stân,
Verse: 4978    er hiez die brücke nider lân.

Verse: 4979    er sprach 'diz sol sich scheiden
Verse: 4980    unser einem ode uns beiden

Verse: 4981    nâch schaden und nâch schanden.
Verse: 4982    ich getrûwes mînen handen

Verse: 4983    daz ich sîn drô genidere.
Verse: 4984    deiswâr er muoz iu widere

Verse: 4985    iuwer süne gesunde geben,
Verse: 4986    ode er nimt ouch mir daz leben:

Verse: 4987    und swederz der sol geschohen,
Verse: 4988    daz hât man schiere gesehen.'

Verse: 4989    sus was im an den risen gâch:
Verse: 4990    sin lewe volget im allez nâch.

Verse: 4991    Dô in der rise komen sach,
Verse: 4992    daz was sîn spot, unde sprach

Verse: 4993    'ouwe, ir vil tumber man,
Verse: 4994    waz nemet ir iuch an

Verse: 4995    daz ir sô ungerne lebet
Verse: 4996    und sus nâch tem tôde strebet?

Verse: 4997    daz ist ein unwîser rât:
Verse: 4998    und swer iu daz gerâten hât,

Verse: 4999    dem ist iuwer leben leit,
Verse: 5000    und wil sich mit der wârheit

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.