TITUS
Hartmann, Iwein
Part No. 49
Previous part

Verse group: (49) 
Verse: 4801    durch mîner vrouwen hulde,
Verse: 4802    und durch iuwer unschulde.'

Verse: 4803    Des trôstes wurden sî vrô
Verse: 4804    unde machten im dô

Verse: 4805    beide vreude unde spil,
Verse: 4806    und sîne dûhte niht ze vil

Verse: 4807    deheiner der êren
Verse: 4808    die sî mohten kêren

Verse: 4809    im ze sînen hulden:
Verse: 4810    sî dûhte ez wære von schulden.

Verse: 4811    sî prîsten sêre sînen muot:
Verse: 4812    er dûhtes biderbe unde guot,

Verse: 4813    in allen wîs ein hövesch man.
Verse: 4814    daz kuren sî dar an

Verse: 4815    daz der lewe bî im lac
Verse: 4816    und anders sites niene pflac

Verse: 4817    niuwan als ein ander schâf.
Verse: 4818    guot spîse und dar nâch senfter slâf

Verse: 4819    diu wâren im bereit hie,
Verse: 4820    und erwachte dô der tac ûf gie,

Verse: 4821    und hôrte eine messe vruo
Verse: 4822    und bereite sich darzuo

Verse: 4823    als er kempfen wolde
Verse: 4824    den der dâ komen solde.

Verse: 4825    Als er dô niemen komen sach,
Verse: 4826    daz was im leit, unde sprach

Verse: 4827    'herre, nu wær ich iu gereit:
Verse: 4828    iu ist der lîp unverseit:

Verse: 4829    wâ ist der dâ komen sol?
Verse: 4830    mîn tweln enkumt mir niht wol:

Verse: 4831    ich sûme mich vil sêre.
Verse: 4832    ez gat an alle mîn êre

Verse: 4833    swaz ich nû hie gebîte:
Verse: 4834    ez ist zît daz ich rîte.'

Verse: 4835    Diu drô tete in wê,
Verse: 4836    und wurden trûrec als ê.

Verse: 4837    vil müelîch was in ein dinc:
Verse: 4838    sîne westen welch gerinc

Verse: 4839    in aller beste êrte
Verse: 4840    der im den muot bekêrte.

Verse: 4841    wan der wirt bôt im sîn guot:
Verse: 4842    er sprach 'sône stât niht mîn muot

Verse: 4843    daz ich ûf guotes miete
Verse: 4844    den lîp iht veile biete',

Verse: 4845    und widersaget imz dô gar.
Verse: 4846    des wurden harte riuwovar

Verse: 4847    der wirt und daz gesinde,
Verse: 4848    diu vrouwe mit ir kinde.

Verse: 4849    ez wart vil dicke von in zwein
Verse: 4850    sîn bester vriunt her Gâwein

Verse: 4851    an der bete genant
Verse: 4852    unde er bî im gemant;

Verse: 4853    und manten in sô verre,
Verse: 4854    daz got unser herre

Verse: 4855    im sælde und êre bære
Verse: 4856    der erbarmherze wære:

Verse: 4857    erbarmet er sich über sî,
Verse: 4858    dâ stüende gotes lôn bî.

Verse: 4859    Daz beweget im den muot:
Verse: 4860    wan er was biderbe unde guot.

Verse: 4861    man saget daz in betwunge
Verse: 4862    diu tiure manunge,

Verse: 4863    dô er ir dürfte rehte ervant
Verse: 4864    und im sô ofte wart genant

Verse: 4865    got und her Gâwein:
Verse: 4866    wan swederm er under den zwein

Verse: 4867    grœzern unwillen truoc,
Verse: 4868    dem dienter gerne genuoc.

Verse: 4869    Des wart sîn muot zwîvelhaft.
Verse: 4870    er gedâhte 'ich bedarf wol meisterschaft,

Verse: 4871    sol ich daz wægest ersehen.
Verse: 4872    mir ist ze spilne geschehen

Verse: 4873    ein gâch geteiltez spil:
Verse: 4874    ezn giltet lützel noch vil,

Verse: 4875    niuwan al mîn êre.
Verse: 4876    ich bedarf wol guoter lêre.

Verse: 4877    ich weiz wol, swederz ich kiuse,
Verse: 4878    daz ich an dem verliuse,

Verse: 4879    ich enmöht ir beider gepflegen,
Verse: 4880    ode beidiu lâzen under wegen,

Verse: 4881    ode doch daz eine:
Verse: 4882    sô wær mîn angest cleine.

Verse: 4883    sus enweiz ich mîn deheinen rât.
Verse: 4884    ich bin, als ez mir nû stât,

Verse: 4885    gunêret ob ich rîte
Verse: 4886    und geschendet ob ich bîte.

Verse: 4887    nune mag ichs beidiu niht bestân
Verse: 4888    und getar doch ir dewederz lân.

Verse: 4889    nû gebe mir got guoten rât,
Verse: 4890    der mich unz her geleitet hât,

Verse: 4891    daz ich mich beidenthalp bewar
Verse: 4892    sô daz ich rehte gevar.

Verse: 4893    ichn wil benamen die niht lân
Verse: 4894    der ich mich ê geheizen hân

Verse: 4895    und diu ir angest und ir leit
Verse: 4896    niuwan von mînen schulden treit:

Verse: 4897    wan liez ich die danne,
Verse: 4898    wie zæme daz guotem manne?

Verse: 4899    doch wære diu eine maget
Verse: 4900    dâ wider schiere verclaget,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.