TITUS
Hartmann, Iwein
Part No. 48
Previous part

Verse group: (48) 
Verse: 4701    Segremors erreit in dô:
Verse: 4702    dem geschach rehte alsô.

Verse: 4703    der nâch erreit in Hênete,
Verse: 4704    dem er alsam tete.

Verse: 4705    Plîopleherîn und Millemargot
Verse: 4706    die wurden beide ir selber spot

Verse: 4707    mit selhem ungevelle
Verse: 4708    und Îdêrs ir geselle.

Verse: 4709    daz ich sî alle nenne
Verse: 4710    die ich dâ erkenne,

Verse: 4711    daz ist alsô guot vermiten:
Verse: 4712    wan alle die im nâch riten

Verse: 4713    die streuter nâch ein ander.
Verse: 4714    nieman envander

Verse: 4715    der die vrouwen lôste.
Verse: 4716    ir wære komen ze trôste

Verse: 4717    mîn herre Gâwein,
Verse: 4718    der ie in rîters êren schein:

Verse: 4719    done was er leider niender dâ.
Verse: 4720    er kam aber sa

Verse: 4721    morgen an dem næhsten tage,
Verse: 4722    unde durch des küneges clage

Verse: 4723    sô ist er nâch gestrichen
Verse: 4724    und wil im nämelichen

Verse: 4725    wider gewinnen sîn wîp
Verse: 4726    ode verliesen den lip.

Verse: 4727    ich suocht in in den selben tagen,
Verse: 4728    als ich ez gote wil clagen,

Verse: 4729    daz ich sîn dâ niht envant.
Verse: 4730    ez ist im sô um mich gewant

Verse: 4731    daz er mir müese gestân
Verse: 4732    ze mînem kumber den ich hân:

Verse: 4733    mîn wîp ist sîn swester.
Verse: 4734    ich kam alrêst gester:

Verse: 4735    und sît ich sîn âne komen bin,
Verse: 4736    so ist aller mîn trôst dâ hin.

Verse: 4737    enmuoz ich niht wol sorgen?
Verse: 4738    wan nû verlius ich morgen

Verse: 4739    alle mîn ere'
Verse: 4740    nû erbarmet diz sêre

Verse: 4741    den rîter der des lewen pflac.
Verse: 4742    er sprach 'ich sol um mitten tac

Verse: 4743    morgen komen an eine stat
Verse: 4744    dar mich ein vrouwe komen bat

Verse: 4745    diu mir vil gedienet hât,
Verse: 4746    und der ez an den lîp gât,

Verse: 4747    enkum ich dar niht enzît.
Verse: 4748    ob ir des gewis sît

Verse: 4749    daz uns der rise kume sô vruo,
Verse: 4750    swenn ich mîn reht getuo

Verse: 4751    daz ich im an gesige,
Verse: 4752    ob ich vor im niht tôt gelige,

Verse: 4753    daz ich umbe mitten tac
Verse: 4754    dannoch hin komen mac

Verse: 4755    dar ich mich gelobet hân,
Verse: 4756    sô wil ich in durch iuch bestân

Verse: 4757    und durch iuwer edel wîp:
Verse: 4758    wan mir ist mîn selbes lîp

Verse: 4759    niht lieber danne ir bruoder ist.'
Verse: 4760    nû kam gegangen an der vrist

Verse: 4761    des wirtes tohter und sîn wîp.
Verse: 4762    nu gesach er nie kindes lîp

Verse: 4763    schœner dan diu selbe maget,
Verse: 4764    enhete sî sich niht verclaget.

Verse: 4765    nu enpfiengen sî in beide wol,
Verse: 4766    als man lieben gast sol.

Verse: 4767    Dô sprach der wirt 'mich dunket guot
Verse: 4768    daz ir vil dienesthaften muot

Verse: 4769    traget iuwerm gaste.
Verse: 4770    er hât sich alsô vaste

Verse: 4771    unser swære an genomen,
Verse: 4772    wir suln sî mit im überkomen,

Verse: 4773    geruochet sîn unser trehten.
Verse: 4774    er sprichet er welle vehten:

Verse: 4775    dô ich im mîne clage tete,
Verse: 4776    dô gelobt er mir âne bete

Verse: 4777    er welle durch uns tôt geligen
Verse: 4778    ode dem risen an gesigen,

Verse: 4779    dem ich sô vil vertragen muoz.
Verse: 4780    nû gnâdet im ûf sînen vuoz:

Verse: 4781    daz ist mîn bete und mîn gebot.'
Verse: 4782    her Îwein sprach 'nu enwelle got

Verse: 4783    daz mir diu unzuht geschehe
Verse: 4784    daz ich ze mînen vüezen sehe

Verse: 4785    diu mîns hern Gâweins swester ist.
Verse: 4786    jâ wære des, wizze Krist,

Verse: 4787    dem künege Artûs ze vil.
Verse: 4788    ich sol unde wil

Verse: 4789    gedienen immer mêre
Verse: 4790    daz sî der grôzen êre

Verse: 4791    mich armen man erlâze:
Verse: 4792    mich gnüeget rehter mâze.

Verse: 4793    ich sag iu wie ich in bestê.
Verse: 4794    als ich iu gelobete ê,

Verse: 4795    kumt er uns vruo ze selher zît,
Verse: 4796    swenne sich endet der strît,

Verse: 4797    daz ich umbe mitten tac
Verse: 4798    ir ze helfe komen mac

Verse: 4799    der ichz ê gelobet hân,
Verse: 4800    sô wil ich in durch iuch bestân,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.