TITUS
Hartmann, Iwein
Part No. 47
Previous part

Verse group: (47) 
Verse: 4601    die mir durch sî rîtent nâch.
Verse: 4602    ouch ensol mir niht wesen gâch,

Verse: 4603    niuwan als alle mîne tage;
Verse: 4604    und wizze wol swer mich jage

Verse: 4605    daz ich sîn wol erbîte
Verse: 4606    und niemer gerîte

Verse: 4607    deste drâter umb ein hâr.'
Verse: 4608    nû muose der künec lâzen wâr

Verse: 4609    daz er gelobete wider in:
Verse: 4610    er vuorte die küneginne hin.

Verse: 4611    unde dô sî schiet von dan,
Verse: 4612    dô sach sî jæmerlîchen an

Verse: 4613    alle die dâ wâren,
Verse: 4614    und begunde gebâren

Verse: 4615    als ein wîp diu sêre
Verse: 4616    sorget umb ir êre,

Verse: 4617    unde mantes als sî kunde
Verse: 4618    mit gebærde und mit munde,

Verse: 4619    daz man sî ledeget enzît.
Verse: 4620    der hof enwart vor des noch sît

Verse: 4621    so harte nie beswæret:
Verse: 4622    doch wârens unerværet

Verse: 4623    die sî dâ vüeren sâhen.
Verse: 4624    dâ wart michel gâhen:

Verse: 4625    ez rief dirre und rief der
Verse: 4626    'harnasch unde ors her':

Verse: 4627    und swer ie gereit wart,
Verse: 4628    der jagte nâch ûf die vart.

Verse: 4629    sî sprâchen 'es wirt guot rât,
Verse: 4630    sît erz uns sô geteilet hât:

Verse: 4631    er vüeret sî unverre,
Verse: 4632    ezn sî daz unser herre

Verse: 4633    mit im wider uns sî.'
Verse: 4634    dô sprach der herre Keiî

Verse: 4635    'in beschirmt der tiuvel noch got,
Verse: 4636    der uns disen grôzen spot

Verse: 4637    an mîner vrouwen hât getan,
Verse: 4638    ezn müez im an sîn êre gân

Verse: 4639    ich bin truhsæze hie ze hûs,
Verse: 4640    unde ez hât der künec Artûs

Verse: 4641    verschuldet um mich harte wol
Verse: 4642    daz ich gerne ledegen sol

Verse: 4643    mîne vrouwen sîn wîp.
Verse: 4644    deiswâr ez gât im an den lîp:

Verse: 4645    ern vüert sî sunder mînen danc
Verse: 4646    nimmer eines ackers lanc.

Verse: 4647    weizgot, wester mich hie,
Verse: 4648    ern wære her ze hove nie

Verse: 4649    ûf sus getâne rede komen:
Verse: 4650    ich sol sîm schiere hân benomen.

Verse: 4651    iu solde versmâhen
Verse: 4652    daz gemeine nâch gâhen.

Verse: 4653    waz sol dirr ungevüege schal,
Verse: 4654    daz dirre hof über al

Verse: 4655    durch einen man wil rîten?
Verse: 4656    ich getrûw im wol gestrîten:

Verse: 4657    ich eine bin im ein her.
Verse: 4658    ern gesetzet sich nimmer ze wer,

Verse: 4659    swenn er siht daz ich ez bin:
Verse: 4660    unde waz hulfez in?

Verse: 4661    ir muget wol alle hie bestân,
Verse: 4662    sît ich michz an genomen hân:

Verse: 4663    ich erlâze iuch aller arbeit.'
Verse: 4664    hie mite was ouch er gereit

Verse: 4665    unde was der êrste an in:
Verse: 4666    ouch geriet der êrste ungewin

Verse: 4667    ze sînen unêren,
Verse: 4668    als er den gast bat kêren.

Verse: 4669    daz was in einem walde.
Verse: 4670    ouch kêrter alsô balde:

Verse: 4671    mit grôzen kreften stach er in
Verse: 4672    enbor ûz dem satel hin,

Verse: 4673    daz im ein ast den helm gevienc
Verse: 4674    und bî der gurgeln gehienc.

Verse: 4675    und wan daz in sîn geverte
Verse: 4676    der übele tiuvel nerte,

Verse: 4677    sô wær er dâ benamen tôt:
Verse: 4678    doch leit er hangende nôt.

Verse: 4679    er wart doch leider ledec sît:
Verse: 4680    doch hienc er dâ unz an die zît

Verse: 4681    daz er vor in allen leit
Verse: 4682    laster unde arbeit.

Verse: 4683    der næhste was Kâlogrenant
Verse: 4684    der in dâ hangende vant

Verse: 4685    niht anders wan als einen diep:
Verse: 4686    dern lôst in niht, ez was im liep.

Verse: 4687    der gâhte ouch an den gast:
Verse: 4688    vil lützel doch des gebrast

Verse: 4689    daz im niht sam geschach,
Verse: 4690    wandern ouch dernider stach.

Verse: 4691    Die in sît hangen sâhen,
Verse: 4692    den benam daz gâhen,

Verse: 4693    der unwille, und sîn schalkheit,
Verse: 4694    daz dâ männeclich vür reit.

Verse: 4695    in erreit ûf einem gevilde
Verse: 4696    Dodines der wilde

Verse: 4697    unde brach ûf im sîn sper:
Verse: 4698    dâ mite wart ouch er

Verse: 4699    gesetzet ûf daz gras
Verse: 4700    als lanc sô daz sper was.

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.