TITUS
Hartmann, Iwein
Part No. 46
Previous part

Verse group: (46) 
Verse: 4501    hân ich den lasterlîchen spot
Verse: 4502    gedienet iender umbe got,

Verse: 4503    wold er daz rihten über mich
Verse: 4504    unde lieze den gerich

Verse: 4505    über mîniu unschuldigen kint,
Verse: 4506    diu biderbe unde guot sint!'

Verse: 4507    Dô der gast sîn ungemach
Verse: 4508    beidiu gehôrte unde gesach,

Verse: 4509    daz begund im an sîn herze gân.
Verse: 4510    er sprach 'wie habt ir daz verlân

Verse: 4511    irn suochtet helfe unde rât
Verse: 4512    dâ er iu ze suochen stât,

Verse: 4513    in des künec Artûses lande?
Verse: 4514    ir habet dise schande

Verse: 4515    âne nôt sô lange erliten.
Verse: 4516    ir soldet dar sîn geriten:

Verse: 4517    er hât gesellen, under den
Verse: 4518    ir hetet vunden etewen

Verse: 4519    der iuch des risen belôste.'
Verse: 4520    er sprach 'der mir ze trôste

Verse: 4521    dâ wære der beste
Verse: 4522    und kæme, oberz weste,

Verse: 4523    und hete ich in dâ vunden,
Verse: 4524    dern ist ze disen stunden

Verse: 4525    niht dâ ze lande.
Verse: 4526    der künec treit ouch die schande

Verse: 4527    der er vil gerne enbære.
Verse: 4528    welt ir ein vremde mære

Verse: 4529    hœren, daz wil ich iu sagen.
Verse: 4530    ez kam in disen siben tagen

Verse: 4531    ein rîter geriten dar
Verse: 4532    und nam des vil rehte war

Verse: 4533    daz er zen selben stunden
Verse: 4534    die von der tavelrunden

Verse: 4535    umbe den künec sitzen sach.
Verse: 4536    er erbeizte vür in unde sprach

Verse: 4537    'ich bin ûf gnâde her komen.
Verse: 4538    herre, ich hân von iu vernomen

Verse: 4539    die milte und die vrümekheit,
Verse: 4540    ich gedinge mir sî unverseit

Verse: 4541    ein gâbe der ich von iu ger:
Verse: 4542    nâch der bin ich komen her.'

Verse: 4543    dô sprach der künec Artûs
Verse: 4544    'swaz ir gebietet hie ze hûs,

Verse: 4545    des sît ir alles gewert,
Verse: 4546    ist daz ir betelîchen gert.'

Verse: 4547    Er sprach 'daz sult ir an mich lân.
Verse: 4548    als ich von iu vernomen hân,

Verse: 4549    sô müese iu daz missezemen,
Verse: 4550    woldet ir iht ûz nemen.

Verse: 4551    swaz ez nû sî des ich bite,
Verse: 4552    dâ êret mich mite

Verse: 4553    und lât die bete her ze mir,
Verse: 4554    wand ich ir anders gar enbir.'

Verse: 4555    Daz widerredte der künec Artus.
Verse: 4556    sus schiet er ûz sînem hûs

Verse: 4557    vil harte zomlichen dan.
Verse: 4558    er sprach 'ez ist vil manec man

Verse: 4559    an disem künige betrogen:
Verse: 4560    diu werlt hât vil von im gelogen.

Verse: 4561    man saget von sîner miltekheit,
Verse: 4562    ezn wurde rîter nie verseit

Verse: 4563    swes er in ie gebæte.
Verse: 4564    sîn êre sîn unstæte.

Verse: 4565    dem er wol gevalle.'
Verse: 4566    diz bâgen hôrten alle

Verse: 4567    die von der tavelrunde.
Verse: 4568    sî sprâchen mit einem munde

Verse: 4569    'herre, ir habet missetân,
Verse: 4570    welt ir den rîter alsus lân.

Verse: 4571    wem habt ir ouch iht verseit?
Verse: 4572    Iât ez an sîne hövescheit.

Verse: 4573    er gelîchet sich wol einem man
Verse: 4574    der betelîchen biten kan.

Verse: 4575    scheidet er von hinnen
Verse: 4576    mit selhen unminnen,

Verse: 4577    ern gesprichet nimmer mêre
Verse: 4578    dehein iuwer êre.'

Verse: 4579    Der künec sich dô bedâhte
Verse: 4580    und schuof daz man in brâhte,

Verse: 4581    und gelobet im des stæte,
Verse: 4582    ze leistenne swes er bæte.

Verse: 4583    Ouchn bedorfter mêre sicherheit:
Verse: 4584    wan sîn wort daz was ein eit.

Verse: 4585    dô bat er als ein vrävel man
Verse: 4586    daz er müese vüeren dan

Verse: 4587    sîn wîp die küneginne.
Verse: 4588    daz hæte die sinne

Verse: 4589    dem künege vil nâch benomen.
Verse: 4590    er sprach 'wie bin ich überkomen!

Verse: 4591    die disen rât tâten,
Verse: 4592    die hânt mich verrâten.'

Verse: 4593    Dô in der rîter zürnen sach,
Verse: 4594    dô trôster in unde sprach

Verse: 4595    'herre, habent guote site,
Verse: 4596    wand ich ir anders niene bite

Verse: 4597    niuwan mit dem gedingc,
Verse: 4598    ob ich sî hinnen bringe;

Verse: 4599    ir habet der besten ein her:
Verse: 4600    ob ich sî allen den erwer

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.