TITUS
Hartmann, Iwein
Part No. 45
Previous part

Verse group: (45) 
Verse: 4401    ze dienste gekêret
Verse: 4402    und über state gêret.

Verse: 4403    sî wurden vil vaste
Verse: 4404    ze liebe dem gaste

Verse: 4405    alle wider ir willen vrô:
Verse: 4406    wand ir herze meindez niender sô.

Verse: 4407    in hete ein tägelich herzeleit
Verse: 4408    vil gar ir vreude hin geleit;

Verse: 4409    da er niht umbe enweste,
Verse: 4410    er als ander geste.

Verse: 4411    ouch enhet ir vreude unde ir schimpf
Verse: 4412    deheiner slahte gelimpf.

Verse: 4413    diu trügevreude ist ein niht,
Verse: 4414    diu sô mit listen geschiht,

Verse: 4415    sô der munt lachet
Verse: 4416    und daz herze krachet

Verse: 4417    voll leide und von sorgen.
Verse: 4418    ouch ist ez unverborgen,

Verse: 4419    ezn kiese listvreude ein man
Verse: 4420    der sich iht versinnen kan,

Verse: 4421    und welch vreude niht des herzen ist.
Verse: 4422    ouch half sî unlange ir list:

Verse: 4423    diu vorhte und die sorgen
Verse: 4424    die ûf ten tac morgen

Verse: 4425    hete wîp unde man,
Verse: 4426    die gesigeten ir vreuden an.

Verse: 4427    daz trûren behabte den strît,
Verse: 4428    und verkêrte sich sô in kurzer zît

Verse: 4429    daz iu daz nieman kan gesagen,
Verse: 4430    in ein weinen und in ein clagen

Verse: 4431    diu vreude der man dâ jach.
Verse: 4432    als daz her Îwein ersach,

Verse: 4433    dô vrâgte er den wirt mære,
Verse: 4434    waz im geschehen wære.

Verse: 4435    Er sprach 'saget mir, herre,
Verse: 4436    durch got waz iu werre,

Verse: 4437    und waz dirre wehsel diute:
Verse: 4438    daz ir und iuwer liute

Verse: 4439    sô niuwelîchen wâret vrô,
Verse: 4440    wie hât sich daz verkêret sô?'

Verse: 4441    dô sprach des hûses herre
Verse: 4442    'waz uns arges wære,

Verse: 4443    der mære endurfet ir niht gern.
Verse: 4444    iedoch enwelt irs niht enbern,

Verse: 4445    sô sage ich iu unser arbeit:
Verse: 4446    so beswært ez iuch: daz ist mir leit.

Verse: 4447    ez ist iuch nützer verswigen,
Verse: 4448    und vreut iuch mitten sæligen.

Verse: 4449    ich bin der Unsælden kint:
Verse: 4450    mit ten die unsælec sint

Verse: 4451    muoz ich leider sîn unvrô:
Verse: 4452    wan ez geziuhet mir alsô'

Verse: 4453    Dô bat der gast unz an die stunt
Verse: 4454    daz im der wirt tete kund

Verse: 4455    alle sîne swære.
Verse: 4456    er sprach 'mir ist unmære

Verse: 4457    der lîp immer mêre:
Verse: 4458    wand ich alte ân êre,

Verse: 4459    mir wære bezzer der tôt.
Verse: 4460    ich lîde laster unde nôt

Verse: 4461    von einem sô gewanten man
Verse: 4462    daz ich mich gerechen niene kan.

Verse: 4463    mir hât gemachet ein rise
Verse: 4464    mîne huobe zeiner wise

Verse: 4465    und hât mich âne getân
Verse: 4466    alles des ich solde hân,

Verse: 4467    unz an die burc eine;
Verse: 4468    und sag iu doch wie cleine

Verse: 4469    alle mîne schulde sint.
Verse: 4470    ich hân ein tohter, ein kint:

Verse: 4471    daz ist ein harte schœniu maget:
Verse: 4472    daz ich im die hân versaget,

Verse: 4473    dar umbe wüestet er mich.
Verse: 4474    zewâre ê verlius ich

Verse: 4475    daz guot und wâge den lîp,
Verse: 4476    ê sî immer werde sîn wîp.

Verse: 4477    da zuo hân ich sehs kint,
Verse: 4478    die alle ritter sint:

Verse: 4479    die hât er gar gevangen,
Verse: 4480    und hât ir zwêne erhangen

Verse: 4481    daz ichz ane muose sehen.
Verse: 4482    wem möhte leider geschehen?

Verse: 4483    er hât ir noch viere:
Verse: 4484    die verlius ich aber schiere.

Verse: 4485    wan die selben vüeret er
Verse: 4486    vür die burc morgen her:

Verse: 4487    die wil er vor mir tœten
Verse: 4488    und mich dâ mite nœten

Verse: 4489    daz ich im ir swester gebe.
Verse: 4490    got welle niht daz ichz gelebe

Verse: 4491    und sende mir hînaht den tôt.
Verse: 4492    er giht (daz ist mîn meistiu nôt),

Verse: 4493    swenn er mirs an beherte
Verse: 4494    mit selhem ungeverte,

Verse: 4495    sô weller ir ze wîbe haben rât,
Verse: 4496    und dem bœsten garzûn den er hât

Verse: 4497    deme welle er sî geben.
Verse: 4498    mac mir danne mîn leben

Verse: 4499    niht wol unmære sîn?
Verse: 4500    der rise heizet Harpîn.

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.