TITUS
Sachsenspiegel
Part No. 35
Previous part

Chapter: IX 
IX. Stirbit der man, deme man eigen geben ader len lasen sal, ader wert im de gewere gebrochen. Ab einer deme anderen lenunge erwerben sal.


Paragraph: 1.     Wer abir deme anderen lobit, ein eigen zu gebene vor gerichte unde iener sin silber adir ander sin gut dar uf gibit, sterbit iener denne er, den im de gabe bestetiget werde, man sal sime erben leisten alse man ieme solde, daz her ez ieme vergelde. Diz selbe sal man ouch tun umme itsliche varende habe.
Paragraph: 2.     Wer ouch deme anderen sin gut verdinget unde gelobit, ez im uf zu lazene vor sime herren, wenne her ez erwerbe' unde gilt ez ienir alliz ader ein teil, unde stirbit ienir, der ez gedinget had, er ez im gelegen wart, iener ist ez phlichtig zu lazene sinen lenerben, her si im ebenbortig adir nicht. Unde en iz da kein lenerbe, her iz phlichtig, zu lazene sime rechten erbin, wer her sie, alse her ez ieme lazen solde, daz her ez vergelde, adir her sal im wedir gebin, daz im dar uf gegebin waz.
Paragraph: 3.     Daz solbe sal ouch der herre ton, ab ein man ein gut kegen im bekostiget, daz her im lien unde ledig machen sal, unde ab der man er der liunge stirbit.
Paragraph: 4.     Gelobit abir der man, der gut lazin sal, daz her ieme die lenunge erwerbe, unde tut her daz unde kundiget her ez ieme mit gezuge, daz her dar nach rite unde ez entpha, unde weigert des iener ane echte noit , stirbit der herre ader weigeret her ez sider zu liene unde en mag her ez nicht erwerben alse e, her iz von im ledig des inritens unde nicht des lazenes, ab her ez ieneme dar nach erwerben mag.
Paragraph: 5.     Wer ouch deme anderen gut in sine were lezit, er herz im uflaze, her sal in di wile in der gewere voresten, de wile her ez im nicht ufgelazin had, wenne her siner werschaft bedarf. Wirt abir im adir ieme, deme her ez lazin sal, de were gebrochen mit rechte, her sal im sin gut wider gebin, daz im daruf gegeben waz.
Paragraph: 6.     Stirbit abir ienir, der ez lazen solde, sin son en ist nicht phlichtig, zu lazene, her en habe ez selber gelobit adir burgen da vor gesatzt.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.