TITUS
Sachsenspiegel
Part No. 122
Previous part

Chapter: XXVI 
XXVI. Wenne (man) nuwe phenninge sal slan. Wer mit valschen phenningen kouft. Wie man markete, muntze erheben muze. Man en muz keine phenninge slan den anderen gelich. Wie lange man mit alden phenningen koufen muze.


Paragraph: 1.     Phenninge sal man vernuwen, alse nuwe herren komen.
Paragraph: 2.    
Butit der muntzer einen valschen phenning uz, daz her da mete koufen wil, ez get im an den hals. Wer sin recht verwrocht hat mit dube adir mit roube, vint man undir im virdehalben phenning, ez get im an de hant, her en moge ir geweren habin. - Wer an sime rechte vulkomen ist, vint man bi im einen schilling valscher phenninge, de phenninge hat her verloren unde nicht mer. Hat her abir mer, ez get im an de hant, her en habe ir denne gewere.
Paragraph: 3.    
Velschit der muntzer sine phenninge unde en helt her sie nicht nach irem rechte, die wile en mag her nimande valschez gezien, da her wandil umme ton dorfe. Phenninge sal der muntzer halden phundig, eben swere unde geliche wiz.
Paragraph: 4.    
Nimant en muz muntze noch markte erheben ane des richters willen, binnen des gerichte ez lit. Ouch sal der koning durch recht sinen hantschen dar zu senden zu einer bewisunge, daz ez sin wille si.
Paragraph: 5.    
Nimant muz ouch phenninge slan anderen phenningen gelich, se en haben sunderlich beschit.
Paragraph: 6.    
Wenne man phenninge verbut, vierzchenacht dar nach mag man wol mit den phenningen gelden unde phant losen. Wer da mite koufet boben rechte zeit, der muntere, der muz se im wol zubrechen, her sal se im abir wider geben.



Next part



This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.