TITUS
Sachsenspiegel
Part No. 167
Previous part

Chapter: LXXI 
LXXI. Wor zu man wafen vuren muze binnen geswornem vride. Wie unde wor man deme geruchte volgen sal. Wie man den vredebrecher winnen sal in eime anderen gerichte.


Paragraph: 1.     Wer den vride bricht, daz sal man richten alse hir vor gesaget iz.
Paragraph: 2.     Binnen gesworenem vride en sal man kein wafen vuren, wenne zu des riches dinste unde zu torneie sunder swert. Alle, de ander wafen vuren, obir de sal man richten, wen sie in des riches achte sin, ab se da mete gevangen werden. Man en muz ouch nicht swert tragen binnen borgen, binnen steten, noch binnen dorferen, alle, de da inne wonen adir herberge haben.
Paragraph: 3.     Wafen muz man ouch wol vuren, wenne man dem geruchte volget. Deme sollen zu rechte volgen alle, die zu iren iaren komen sin, also verne daz se swert vuren mogen, ez en beneme in echte not, sunder phaffen, wip, kirchener unde hirten.
Paragraph: 4.     Ab sie volgen vor ein huz, da sollen sie dri tage bliben, manlich mit sines selbes spise binnen deme gerichte, de wile iener vorget adir rit, der daz geruchte geschrigen hat. Ist abir der gewunt, daz her nicht gevolgen mag, so sollen de lute volgen bi phlicht, de wile se ienen sen, der den vride gebrochen hat, ab her zuhant in ein ander gerichte vlut. Mogen se in vahen uf dem velde, dar daz lantvolk nicht zu en kome, se sollen in wider furen.
Paragraph: 5.     Vlut abir her zu dorfe adir zu steten adir zu borgen in ein ander gerichte, man sal daz geruchte vernuwen unde laden dar zu den burmeister unde de gebure unde de guterhanden lute, de man zu der zit gehaben mag, unde heischen ienen uz zu rechtem gerichte. Den sal man in antwerten, ab her in der hanthaften tat bestetiget iz, daz se daz gezugen mogen mit seben mannen, daz sie im gevolget haben in der hanthaften tat von irme gerichte dar. Se sollen burgen setzen vor des mannes wergelt, ab sie nicht recht ubir in richten. So vuren se in wider unde thun recht da mete.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.