TITUS
Sachsenspiegel
Part No. 168
Previous part

Chapter: LXXII 
LXXII. Wor umme man ein hus verwesten sal. Wer vor ein hus antwerten solle. Wie ein burg unschuldig blibet, ab da schade von geschit.


Paragraph: 1.     Uffe welchem huz man den vridebrecher helt wider recht, wenne der richter mit geruchte da vor geladen wirt, unde man in abe heischit, alse recht iz, daz manz gehoren moge uf dem huse, unde en geben se in nicht uz zu rechte, man vervest de burg unde alle de dar ufe sint. Lezit man abir dar uf des richters boten sechse unde den kleger, die da suchen den vridebrecher unde den roub, so en sal man se nicht verwesten.
Paragraph: 2.     Beschuldiget man daz huz umme den roup, daz her dar abe unde dar uf geschen sie, daz muz wol entschuldigen des huses herre adir ein sin burger uf den heiligen. Wer selben zu dem ungerichte beklaget wirt, der en darf des huses nicht entschuldigen, her en habe sich selbir allir erst entschuldiget. Wil man abir daz huz bereden mit kamphe, daz muz wol entreden sin herre ader sin burger wider sinen genoz, ader man vervest ez unde richtet da ubir.
Paragraph: 3.     Wen man verklaget, daz her von eime huse geroubit habe, den muz des huses herre vor brengen, daz herz bessere adir daz huz entrede. En tot herz nicht, her muz da solbin vor antwerten.
Paragraph: 4.     Klaget abir ein man ubir eine burg, daz her dar abe geroubit si, unde weiz herz nicht, wer ez getan hat, da sal der burg herre vor antwerten von deme tage ubir sechz wochen unde sal de burg entschuldigen mit sime eide adir den schaden gelden uf recht, ab her rates unde tat unschuldig iz.
Paragraph: 5.     Riten lute von einer burg unde ton se schaden unde komen se weder dar uf binnen tage unde nacht, unde en kumt der roub da nicht uf noch da vore zu behaldene, so ist se an der tat unschuldig. Komen ouch de roubere wider uf daz huz unde der roub dar uf adir da vor, so ist de burg schuldig an der tat.




Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.