TITUS
Sachsenspiegel
Part No. 266
Previous part

Chapter: VII 
VII. Von gedinges lenunge. We der herre were behelt an sines mannes gute. Ab zwene man ein gut ansprechen, die beide der gewere darben. Ab der man daz (lehen) versmet. Welche zwene an einer sache nicht gezug wesen mugen.


Paragraph: 1.     Welch herre ein gut liet sinem manne, »wo ez im erst ledic werde, ez si wenig oder vil«, unde dar nach einem anderen manne liet ein benomet gedinge, mit deme ersten lene en mac iener diseme sin benumete gedinge nicht gebrechin, wenne ienner sterbit, der ez in geweren hat, wen ez deme herren nicht ledic en wart, ez en si, daz man daz gedinge zu einer vluchtzale lie bi iennes suchebette, der ez in geweren hat.
Paragraph: 2.     Ienner muz aber sin gedinge gezugen nach gedinges rechte vor deme herren, kegen den man, der sin gut an spricht, al bekenne der herre in beiden der lenunge. Mit des herren bekenntnisse behelt der man sin gut kegen deme herren ane gezug unde nicht kegen sinen husgenozen.
Paragraph: 3.     Welch herre ein gut sinem manne liet, da mete en ist eme de gewere nicht gefernnet kegen sinem herren, ob ein der herre des gutes nicht bekente, so doch sin man von sinenthalben daz gut in geweren hatte.
Paragraph: 4.     Ab zwene man ein gut ansprechen, de beide der gewere darben, beide sullen se benennen de zit der lenunge. Welch ir de ersten lenunge gezugen mac, der sal ez mit rechte behalden.
Paragraph: 5.     Swenne ein herre sinem manne liet gut, wor ez im erst ledic wert von sines mannes tode, unde anders nicht dar an bescheidet, der man sal haben daz erste gut, daz deme herrn ledic wert, ez si ledic oder vurlegen.
Paragraph: 6.     Itlich unbewiset gut, daz deme manne gelegen wirt, sal her behalden mit gezuge, nach deme alz ez im gelegen wart, dar ane her der gewere darbet.
Paragraph: 7.     Ein gut, daz erst ledic wirt, des sal sich der man underwinden, al si sin mer oder minre, den em gelegen si, wenne her siner lenunge de volge habe.
Paragraph: 8.     Ab der man versmet daz len, daz deme herren ledic wirt, unde herz im nicht zu en zut binnen iar unde tage, von deme si der herre ledic, her en tu sine unschult dar zu, daz herz nicht en wuste, daz ez sime herrn ledic were.
Paragraph: 9.     In einer sache von eineme lene en mogen se zwene nicht gezuk sin, de wile se an deme lene nicht beteilet en sint.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.