TITUS
Gottfried von Strassburg, Tristan
Part No. 5
Previous part

Chapter: 5 
5: Die Jagd


Verse: 2759    Nu kam ez in kurzer stunde:
Verse: 2760    sînes oeheimes hunde,

Verse: 2761    Markes von Curnewâle,
Verse: 2762    die haeten zuo dem mâle,

Verse: 2763    als uns daz wâre maere saget,
Verse: 2764    einen zîtegen hirz gejaget

Verse: 2765    zuo der strâze nâhen.
Verse: 2766    dâ liez er sich ergâhen

Verse: 2767    und stuont aldâ ze bîle.
Verse: 2768    im haete vluht und île

Verse: 2769    alle sîne craft benomen.
Verse: 2770    nu wâren ouch die jegere komen

Verse: 2771    mit michelem geschelle
Verse: 2772    hürnende zuo gevelle.

Verse: 2773    Tristan dô er den bîl ersach,
Verse: 2774    wider die pilgerîne er sprach

Verse: 2775    wîslîche, als er wol kunde:
Verse: 2776    'ir hêrren, dise hunde,

Verse: 2777    disen hirz und dise liute,
Verse: 2778    die verlôs ich hiute.

Verse: 2779    nu hân ich s' aber vunden.
Verse: 2780    diz sint mîne kunden.

Verse: 2781    gebietet mir, ze den wil ich.'
Verse: 2782    'kint' sprâchen sî 'got segene dich.

Verse: 2783    ze saelden müezest dû gevarn!'
Verse: 2784    'genâde, und got müez iuch bewarn!'

Verse: 2785    sprach aber der guote Tristan.
Verse: 2786    sus neig er in und kêrte dan

Verse: 2787    gein dem hirze ûf sîne vart.
Verse: 2788    Nu daz der hirz gevellet wart,

Verse: 2789    der dâ jegermeister was,
Verse: 2790    der stracte in nider ûf daz gras

Verse: 2791    ûf alle viere alsam ein swîn:
Verse: 2792    'wie nû meister, waz sol diz sîn?'

Verse: 2793    sprach aber der höfsche Tristan:
Verse: 2794    'lât stân! durch got, waz gât ir an?

Verse: 2795    wer gesach ie hirz zewürken sô?'
Verse: 2796    der jeger stuont ûf hôher dô;

Verse: 2797    er sach in an und sprach im zuo:
Verse: 2798    'wie wiltu kint, daz ich im tuo?

Verse: 2799    hie ze lande enist kein ander list,
Verse: 2800    wan alse der hirz enthiutet ist,

Verse: 2801    sô spaltet man in über al
Verse: 2802    von dem houbete ze tal

Verse: 2803    und dâ nâch danne in viere,
Verse: 2804    sô daz der vier quartiere

Verse: 2805    dekeinez iht vil groezer sî
Verse: 2806    danne daz ander dâ bî.

Verse: 2807    diz ist in disem lande site.
Verse: 2808    kint, kanstu ihtes iht dâ mite?'

Verse: 2809    'Jâ meister' sprach er wider in
Verse: 2810    'daz lant, dâ ich gezogen bin,

Verse: 2811    dane ist der site niht alsô.'
Verse: 2812    'wie danne?' sprach der meister dô.

Verse: 2813    'man enbestet dâ den hirz.'
Verse: 2814    'entriuwen, vriunt, du enzeiges mir 'z,

Verse: 2815    sone weiz ich, waz enbesten ist.
Verse: 2816    ez enweiz nieman disen list

Verse: 2817    in disem künicrîche hie.
Verse: 2818    sone gehôrte in ouch genennen nie

Verse: 2819    von kunden noch von gesten.
Verse: 2820    trût kint, waz ist enbesten?

Verse: 2821    als guot du sîs, nu zeige mir 'z.
Verse: 2822    gâ her, enbeste disen hirz!'

Verse: 2823    Tristan sprach: 'lieber meister mîn,
Verse: 2824    sol ez mit iuwern hulden sîn

Verse: 2825    und mag iu liep dar an geschehen,
Verse: 2826    sô lâze ich iuch vil gerne sehen,

Verse: 2827    als verre als ichs gemerket hân,
Verse: 2828    wie mîn lantsite ist getân,

Verse: 2829    als ir dâ vrâget umbe den bast.'
Verse: 2830    der meister sach den jungen gast

Verse: 2831    vil guotlîche lachende an,
Verse: 2832    wan er was selbe ein höfscher man

Verse: 2833    und erkante al die vuoge wol,
Verse: 2834    die guot man erkennen sol.

Verse: 2835    'jâ' sprach er 'lieber vriunt, nû tuo!
Verse: 2836    wol her, bistû ze cranc derzuo,

Verse: 2837    trût geselle, liebez kint,
Verse: 2838    ich selbe und die hie mit mir sint,

Verse: 2839    wir helfen dir 'n mit henden
Verse: 2840    legen und umbe wenden,

Verse: 2841    swie sô du vor gebiutest
Verse: 2842    und mit dem vinger tiutest.'

Verse: 2843    Tristan der ellende knabe
Verse: 2844    sînen mantel zôch er abe

Verse: 2845    und leite den ûf einen stoc.
Verse: 2846    er zôch hôher sînen roc;

Verse: 2847    sîn ermel vielt er vorne wider.
Verse: 2848    sîn schoene hâr daz streich er nider,

Verse: 2849    ûf sîn ôre leite er daz.
Verse: 2850    nu besâhen si 'n baz unde baz,

Verse: 2851    die dâ zem baste wâren.
Verse: 2852    sîn gelâz und sîn gebâren

Verse: 2853    daz nâmen s' alle in ir muot
Verse: 2854    und dûhte sî daz also guot,

Verse: 2855    daz sî 'z vil gerne sâhen
Verse: 2856    und in ir herzen jâhen,

Verse: 2857    sîn dinc waere allez edelîch,
Verse: 2858    sîniu cleider vremede unde rîch,

Verse: 2859    sîn lîp ze wunsche getân.
Verse: 2860    sî begunden alle zuo z' im gân

Verse: 2861    und sîner dinge nemen war.
Verse: 2862    nu gie der ellende dar,

Verse: 2863    der junge meister Tristan.
Verse: 2864    er greif den hirz mit handen an

Verse: 2865    und wolte in ûf den rucke legen.
Verse: 2866    done kunde er in nie dar gewegen,

Verse: 2867    wan er was ime ze swaere.
Verse: 2868    dô bat der hovebaere,

Verse: 2869    daz sî 'n im rehte leiten
Verse: 2870    und ûf den bast bereiten.

Verse: 2871    nu daz was schiere getân.
Verse: 2872    zem hirze gieng er obene stân.

Verse: 2873    dâ begunde er in entwaeten,
Verse: 2874    er sneit in unde entnaeten

Verse: 2875    unden von dem mûle nider.
Verse: 2876    ze den buocbeinen kêrte er wider,

Verse: 2877    diu entrante er beide nâch ir zît,
Verse: 2878    daz rehte vor, daz linke sît.

Verse: 2879    diu zwei hufbein er dô nam
Verse: 2880    unde beschelte diu alsam.

Verse: 2881    dô begunde er die hût scheiden
Verse: 2882    von den sîten beiden,

Verse: 2883    dô von den heften über al,
Verse: 2884    al von obene hin ze tal

Verse: 2885    und breite sîne hût dô nider.
Verse: 2886    ze sînen büegen kêrte er wider.

Verse: 2887    von der brust enbaste er die,
Verse: 2888    daz er die brust dô ganze lie.

Verse: 2889    die büege leite er dort hin dan.
Verse: 2890    sîne brust er dô began

Verse: 2891    ûz dem rucke scheiden
Verse: 2892    und von den sîten beiden

Verse: 2893    ietwederhalp driu rippe dermite.
Verse: 2894    daz ist der rehte bastsite.

Verse: 2895    diu lât er iemer dar an,
Verse: 2896    der die brust geloesen kan.

Verse: 2897    und al zehant sô kêrte er her,
Verse: 2898    vil kündeclîche enbaste er

Verse: 2899    beidiu sîniu hufbein,
Verse: 2900    besunder niht wan beide in ein.

Verse: 2901    ir reht er ouch den beiden liez,
Verse: 2902    den brâten, dâ der rucke stiez

Verse: 2903    über lanken gein dem ende
Verse: 2904    wol anderhalber hende,

Verse: 2905    daz die dâ cimbre nennent,
Verse: 2906    die den bastlist erkennent.

Verse: 2907    die rieben er dô beide schiet,
Verse: 2908    beide er si von dem rucke schriet,

Verse: 2909    dar nâch den panzen ûf den pas.
Verse: 2910    und wan daz ungebaere was

Verse: 2911    sînen schoenen handen, dô sprach er:
Verse: 2912    'wol balde zwêne knehte her!

Verse: 2913    tuot diz dort hin danne baz
Verse: 2914    unde bereitet uns daz!'

Verse: 2915    sus was der hirz enbestet,
Verse: 2916    diu hût billîche entlestet.

Verse: 2917    die brust, die büege, sîten, bein,
Verse: 2918    daz haete er allez über ein

Verse: 2919    vil schône dort hin dan geleit.
Verse: 2920    hie mite sô was der bast bereit.

Verse: 2921    Tristan der ellende gast
Verse: 2922    'seht' sprach er 'meister, deist der bast

Verse: 2923    und alse ist disiu kunst getan.
Verse: 2924    nu geruochet ir her nâher gân

Verse: 2925    ir unde iur massenîe
Verse: 2926    und machet die furkîe!'

Verse: 2927    'furkîe? trût kint, waz ist daz?
Verse: 2928    du nennenst mir vor, ine weiz waz.

Verse: 2929    du hâst uns disen jagelist,
Verse: 2930    der vremede und guot ze lobene ist,

Verse: 2931    wol meisterlîchen her getân.
Verse: 2932    nu lâz in ouch noch vür sich gân.

Verse: 2933    volvüere dîne meisterschaft!
Verse: 2934    wir sîn dir iemer dienesthaft.'

Verse: 2935    Tristan spranc enwec zehant.
Verse: 2936    eine zwisele hiu er an die hant,

Verse: 2937    daz die dâ furke nennent,
Verse: 2938    die die furkîe erkennent.

Verse: 2939    doch enist niht sunders an den zwein:
Verse: 2940    furke und zwisele deist al ein.

Verse: 2941    sus kam er wider mit sînem stabe.
Verse: 2942    die lebere sneit er sunder abe,

Verse: 2943    netze unde lumbele schiet er dan.
Verse: 2944    die cimberen er abe gewan

Verse: 2945    von dem lide, an dem si was.
Verse: 2946    sus saz er nider ûf daz gras,

Verse: 2947    diu stucke nam er elliu driu.
Verse: 2948    an sîne furken bant er diu

Verse: 2949    mit sînem netze vaste.
Verse: 2950    mit einem grüenen baste

Verse: 2951    verstricte er 'z sus unde sô.
Verse: 2952    'nu seht, ir hêrren' sprach er dô

Verse: 2953    'diz heizent sî furkîe
Verse: 2954    in unser jegerîe.

Verse: 2955    und wan ez an der furken ist,
Verse: 2956    durch daz sô heizet dirre list

Verse: 2957    furkîe und vüeget ouch daz wol,
Verse: 2958    sît ez an der furken wesen sol.

Verse: 2959    diz neme ein kneht an sîne hant!
Verse: 2960    nu tâlanc weset ir gemant

Verse: 2961    umbe iuwer curîe.'
Verse: 2962    'curîe? dê benîe!'

Verse: 2963    sprâchen s' alle 'waz ist daz?
Verse: 2964    wir vernaemen sarrazênesch baz!

Verse: 2965    waz ist curîe, lieber man?
Verse: 2966    swîc unde sage uns niht hie van.

Verse: 2967    swaz ez sî, daz lâ geschehen,
Verse: 2968    daz wir 'z mit ougen ane sehen.

Verse: 2969    diz tuo durch dîne hövescheit!'
Verse: 2970    Nu Tristan der was aber bereit.

Verse: 2971    den herzeric er dô gevienc
Verse: 2972    ( ich meine, an dem daz herze hienc)

Verse: 2973    und enblôzte in aller sîner habe.
Verse: 2974    daz herze sneit er halbez abe

Verse: 2975    hin gegen dem spitzen ende
Verse: 2976    und nam ez in sîne hende.

Verse: 2977    er begunde ez teilieren,
Verse: 2978    in criuzewîs zevieren

Verse: 2979    und warf daz ûf die hût nider.
Verse: 2980    ze sîme ricke kêrte er wider.

Verse: 2981    milz unde lungen lôste er abe.
Verse: 2982    dô was si hin des rickes habe.

Verse: 2983    nu daz lac ûf der hiute dâ,
Verse: 2984    ric unde gorgen sneit er sâ

Verse: 2985    obene, dâ diu brust da want.
Verse: 2986    daz houbet lôste er al zehant

Verse: 2987    mit dem gehürne von dem cragen
Verse: 2988    und hiez daz zuo der brüste tragen.

Verse: 2989    'nu wol her balde!' sprach er z' in
Verse: 2990    'nemt balde disen rucke hin!

Verse: 2991    kome ieman armer liute her,
Verse: 2992    der es geruoche oder ger,

Verse: 2993    dem teilet disen rucke mite
Verse: 2994    oder tuot dermite nâch iuwerm site.

Verse: 2995    sô mache ich die curîe.'
Verse: 2996    dar gie diu cumpanîe

Verse: 2997    und nâmen sîner künste war.
Verse: 2998    Tristan hiez im bringen dar,

Verse: 2999    daz er im ê bereiten bat.
Verse: 3000    nu daz lac allez an der stat

Verse: 3001    wol gemachet unde bereit,
Verse: 3002    als er in haete vor geseit.

Verse: 3003    nû wâren der quartiere
Verse: 3004    von dem herzen viere

Verse: 3005    vier halben ûf die hût geleit
Verse: 3006    nâch jegelîcher gewonheit

Verse: 3007    und lâgen ûf der hiute alsô.
Verse: 3008    milz unde lungen sneit er dô,

Verse: 3009    dar nâch den panzen unde den pas
Verse: 3010    und swaz der hunde spîse was,

Verse: 3011    in alsô cleiniu stuckelîn,
Verse: 3012    als ez ein vuoge mohte sîn,

Verse: 3013    und spreite ez allez ûf die hût.
Verse: 3014    hie mite begunde er überlût

Verse: 3015    den hunden ruofen: 'zâ zâ zâ!'
Verse: 3016    vil schiere wâren s' alle dâ

Verse: 3017    und stuonden ob ir spîse.
Verse: 3018    'seht' sprach der wortwîse

Verse: 3019    'diz heizent sî curîe
Verse: 3020    dâ heime in Parmenîe

Verse: 3021    und wil iu sagen umbe waz.
Verse: 3022    ez heizet curîe umbe daz,

Verse: 3023    durch daz ez ûf der cuire lît,
Verse: 3024    swaz man den hunden danne gît.

Verse: 3025    als hât diu jegerîe
Verse: 3026    den selben namen curîe

Verse: 3027    von cuire vunden unde genomen.
Verse: 3028    von cuire sô ist curîe komen.

Verse: 3029    und zwâre ez wart den hunden
Verse: 3030    ze guoten dingen vunden

Verse: 3031    und ist ein guot gewonheit,
Verse: 3032    wan swaz man in dar ûf geleit,

Verse: 3033    daz ist in süeze durch daz bluot
Verse: 3034    und machet ouch die hunde guot.

Verse: 3035    nu sehet an disen bastsite,
Verse: 3036    da enist kein ander spaehe mite.

Verse: 3037    nemt war, wie er iu gevalle.'
Verse: 3038    'â hêrre!' sprâchen s' alle

Verse: 3039    'waz seistu, saeligez kint?
Verse: 3040    wir sehen wol, dise liste sint

Verse: 3041    bracken unde hunden
Verse: 3042    ze grôzen vrumen vunden.'

Verse: 3043    Aber sprach der guote Tristan:
Verse: 3044    'nu nemet iuwer hût hin dan,

Verse: 3045    wan ine kan hie mite niht baz.
Verse: 3046    und wizzet waerlîche daz,

Verse: 3047    kund ich iu baz gedienet hân,
Verse: 3048    daz haete ich gerne getân.

Verse: 3049    der man der houwe sîne wit
Verse: 3050    und widet ûf sunder iuriu lit.

Verse: 3051    daz houbet vüeret an der hant
Verse: 3052    und bringet iuwern prîsant

Verse: 3053    ze hove nâch hovelîchem site.
Verse: 3054    dâ hovet ir iuch selben mite.

Verse: 3055    sô wizzet ouch ir selbe wol,
Verse: 3056    wie man den hirz prîsanten sol.

Verse: 3057    prîsantet in ze rehte!'
Verse: 3058    den meister und die knehte

Verse: 3059    die nam aber dô wunder,
Verse: 3060    daz in daz kint besunder

Verse: 3061    und mit bescheidenheite
Verse: 3062    sô manc jagereht vür leite

Verse: 3063    und daz ez sô vil wiste
Verse: 3064    von sus getânem liste.

Verse: 3065    'sich' sprâchen sî 'saeligez kint!
Verse: 3066    diu wunderlîchen underbint,

Verse: 3067    diu du uns vür zelst und hâst gezalt,
Verse: 3068    diu dunkent uns sô manicvalt:

Verse: 3069    wirn sehen sî noch baz z' ende gân,
Verse: 3070    swaz dû biz dâ her hâst getân,

Verse: 3071    daz ahte wir ze nihte.'
Verse: 3072    sus zugen s' ime enrihte

Verse: 3073    ein pferit dar und bâten in,
Verse: 3074    daz er durch sîne tugent mit in

Verse: 3075    nâch sîner kunst ze hove rite
Verse: 3076    und er si sînen lantsite

Verse: 3077    unz an ein ende lieze sehen.
Verse: 3078    Tristan sprach: 'daz mac wol geschehen.

Verse: 3079    nemet den hirz ûf und wol hin!'
Verse: 3080    sus saz er ûf und reit mit in.

Verse: 3081    Nu s' also mit ein ander riten,
Verse: 3082    nu haeten jene vil kûme erbiten

Verse: 3083    der state unde der stunde.
Verse: 3084    ir iegelîch begunde

Verse: 3085    entwerfen sîniu maere,
Verse: 3086    von welhem lande er waere

Verse: 3087    und wie er dâ hin waere komen.
Verse: 3088    sî haeten gerne vernomen

Verse: 3089    sîn dinc und sîn ahte.
Verse: 3090    diz nam in sîne trahte

Verse: 3091    der sinnesame Tristan.
Verse: 3092    vil sinneclîche er aber began

Verse: 3093    sîn âventiure vinden.
Verse: 3094    sîn rede diu enwas kinden

Verse: 3095    niht gelîch noch sus noch sô.
Verse: 3096    vil sinneclîche sprach er dô:

Verse: 3097    'jensît Britanje lît ein lant,
Verse: 3098    deist Parmenîe genant.

Verse: 3099    dâ ist mîn vater ein koufman,
Verse: 3100    der wol nâch sîner ahte kan

Verse: 3101    der werlde leben schône unde wol,
Verse: 3102    ich meine aber, alse ein koufman sol.

Verse: 3103    und wizzet endeclîche:
Verse: 3104    ern ist doch niht sô rîche

Verse: 3105    der habe unde des guotes
Verse: 3106    sô tugentlîches muotes.

Verse: 3107    der hiez mich lêren, daz ich kan.
Verse: 3108    nû kâmen dicke koufman

Verse: 3109    von vremeden künicrîchen dar.
Verse: 3110    der dinges nam ich sô vil war

Verse: 3111    beide an ir sprâche und an ir siten,
Verse: 3112    unz mich mîn muot begunde biten

Verse: 3113    und schünden staeteclîche
Verse: 3114    in vremediu künicrîche.

Verse: 3115    und wan ich gerne haete erkant
Verse: 3116    unkunde liute und vremediu lant,

Verse: 3117    dô was ich spâte unde vruo
Verse: 3118    alsô betrahtic dar zuo,

Verse: 3119    biz daz ich mînem vater entran
Verse: 3120    und vuor mit koufliuten dan.

Verse: 3121    als bin ich her ze lande komen.
Verse: 3122    Nu habet ir al mîn dinc vernomen.

Verse: 3123    ine weiz, wie 'z iu gevalle.'
Verse: 3124    'â trût kint' sprâchen s' alle

Verse: 3125    'ez was an dir ein edeler muot.
Verse: 3126    unkünde ist manegem herzen guot

Verse: 3127    und lêret maneger hande tugent.
Verse: 3128    trût geselle, süeziu jugent,

Verse: 3129    gebenedîet sî daz lant
Verse: 3130    von gote, dâ ie kein marschant

Verse: 3131    erzôch sô tugentlîchez kint!
Verse: 3132    alle die künege, die nu sint,

Verse: 3133    dien erzügen alle ein kint niht baz.
Verse: 3134    nu liebez kint, nu sage uns daz:

Verse: 3135    dîn höfscher vater wie nante er dich?'
Verse: 3136    'Tristan' sprach er 'Tristan heiz ich.'

Verse: 3137    'dêus adjût' sprach einer dô
Verse: 3138    'durch got, wie nante er dich dô sô?

Verse: 3139    du waerest zwâre baz genant
Verse: 3140    juvente bêle et la riant,

Verse: 3141    diu schoene jugent, diu lachende.'
Verse: 3142    sus riten s' ir maere machende,

Verse: 3143    dirre sus und jener sô.
Verse: 3144    ir kurzewîle diu was dô

Verse: 3145    niwan mit disem kinde.
Verse: 3146    sus vrâgete daz gesinde,

Verse: 3147    swes iegelîchen dô gezam.
Verse: 3148    In kurzen zîten ez dô kam,

Verse: 3149    Tristan daz er die burc gesach.
Verse: 3150    von einer linden er dô brach

Verse: 3151    zwei schapel wol geloubet:
Verse: 3152    eines sazte er ûf sîn houbet,

Verse: 3153    daz ander er dô wîter maz;
Verse: 3154    dem jegermeister bôt er daz:

Verse: 3155    'ei' sprach er 'lieber meister mîn,
Verse: 3156    saget waz bürge mag diz sîn?

Verse: 3157    diz ist ein küniclîch castêl.'
Verse: 3158    der meister sprach: 'deist Tintajêl.'

Verse: 3159    'Tintajêl? â welh ein castêl!
Verse: 3160    dê te saut, Tintajêl

Verse: 3161    und allez dîn gesinde!'
Verse: 3162    'â wol dir süezem kinde!'

Verse: 3163    sprâchen sîne geverten dô
Verse: 3164    'wis iemer saelic unde vrô

Verse: 3165    und dir müez alse wol geschehen,
Verse: 3166    als vil gerne wir 'z gesehen!'

Verse: 3167    Sus kâmen sî zem bürgetor.
Verse: 3168    Tristan gehabete dô dâ vor.

Verse: 3169    'ir hêrren' sprach er aber dô z' in
Verse: 3170    'ine weiz, wan ich iu vremede bin,

Verse: 3171    wie iuwer keiner ist genamet.
Verse: 3172    wan varn ie zwêne und zwêne samet

Verse: 3173    und rîtet rehte ein ander bî,
Verse: 3174    alse der hirz geschaffen sî.

Verse: 3175    daz gehürne daz gê vor,
Verse: 3176    diu brust dâ nâch in sînem spor,

Verse: 3177    die rieben nâch den büegen.
Verse: 3178    dâ nâch sô sult ir vüegen,

Verse: 3179    daz daz jungeste lit
Verse: 3180    iesâ den rieben volge mit.

Verse: 3181    dâ nâch sô sult ir nemen war,
Verse: 3182    daz allerjungeste var

Verse: 3183    diu cuire und diu furkîe.
Verse: 3184    deist rehtiu jegerîe.

Verse: 3185    und lâzet iu niht sîn ze gâch,
Verse: 3186    rîtet schône ein ander nâch.

Verse: 3187    mîn meister hie und ich sîn kneht
Verse: 3188    wir rîten samet, dunk ez iuch reht

Verse: 3189    und ob ez iu gevalle.'
Verse: 3190    'jâ trût kint' sprâchen s' alle

Verse: 3191    'swie sô du wilt, als wellen wir.'
Verse: 3192    'diz sî!' sprach er 'nu lîhet mir

Verse: 3193    ein horn, daz mir ze mâze sî,
Verse: 3194    und sît ouch des gemant dâ bî,

Verse: 3195    swenn ich an hebe, sô hoeret mir,
Verse: 3196    und alse ich hürne, als hürnet ir!'

Verse: 3197    der meister der sprach ime dô zuo:
Verse: 3198    'vil lieber vriunt, hürne unde tuo

Verse: 3199    rehte als dir gevalle.
Verse: 3200    des volge wir dir alle,

Verse: 3201    ich und die hie mit mir sint.'
Verse: 3202    'â bon eure' sprach daz kint

Verse: 3203    'mit guote, daz lât alsô sîn.'
Verse: 3204    ein cleine hellez hornelîn

Verse: 3205    daz gâben s' ime an sîne hant.
Verse: 3206    'nû hin!' sprach er 'allez avant!'

Verse: 3207    Sus riten si gerottieret în,
Verse: 3208    zwêne unde zwêne: als solte ez sîn.

Verse: 3209    und als diu rotte gar în kam,
Verse: 3210    Tristan sîn hornelîn dô nam

Verse: 3211    und hürnete alsô rîche
Verse: 3212    und alsô wunneclîche,

Verse: 3213    jene alle, die dâ mit im riten,
Verse: 3214    daz die vor vröuden kûme erbiten,

Verse: 3215    daz s' ime ze helfe kâmen
Verse: 3216    und alle ir horn nâmen

Verse: 3217    und hürneten vil schône
Verse: 3218    mit ime in sîme dône.

Verse: 3219    er vuor in vor ze prîse,
Verse: 3220    si nâch in sîner wîse

Verse: 3221    bescheidenlîchen unde wol.
Verse: 3222    diu burc diu wart gedoenes vol.

Verse: 3223    Der künic und al diu hovediet,
Verse: 3224    dô sî daz vremede jageliet

Verse: 3225    gehôrten und vernâmen,
Verse: 3226    si erschrâken unde erkâmen

Verse: 3227    vil inneclîche sêre,
Verse: 3228    wan ez dâ vor nie mêre

Verse: 3229    dâ ze hove wart vernomen.
Verse: 3230    nu was diu rotte iezuo komen

Verse: 3231    vür den palas an die tür.
Verse: 3232    dâ was vil ingesindes vür

Verse: 3233    geloufen durch den hornschal.
Verse: 3234    si nam grôz wunder über al,

Verse: 3235    waz des geschelles waere.
Verse: 3236    ouch was der lobebaere

Verse: 3237    Marke selbe komen dar
Verse: 3238    nemen dirre maere war

Verse: 3239    und mit im manic cûrtois man.
Verse: 3240    nu Tristan den künic sehen began,

Verse: 3241    er begunde im wol gevallen
Verse: 3242    vor den andern allen.

Verse: 3243    sîn herze in sunder ûz erlas,
Verse: 3244    wan er von sînem bluote was.

Verse: 3245    diu natiure zôch in dar.
Verse: 3246    er nam sîn mit den ougen war

Verse: 3247    und begunde in grüezen schône.
Verse: 3248    in vremedem horndône

Verse: 3249    ein ander wîse huob er an.
Verse: 3250    sô lûte er hürnen began,

Verse: 3251    daz im nieman an der stunde
Verse: 3252    wol gevolgen kunde.

Verse: 3253    nu des was schiere ein ende.
Verse: 3254    der wol gezogen ellende

Verse: 3255    der lie sîn hürnen unde sweic.
Verse: 3256    vil schône er gein dem künege neic

Verse: 3257    und sprach mit süezem munde
Verse: 3258    vil suoze, als er wol kunde:

Verse: 3259    'dêu sal le roi et sa mehnîe.
Verse: 3260    künec und sîne massenîe

Verse: 3261    die gehalte got der guote!'
Verse: 3262    Marke der wol gemuote

Verse: 3263    und al sîn ingesinde
Verse: 3264    die danketen dem kinde

Verse: 3265    vil tugentlîchen unde wol,
Verse: 3266    als man dem tugenthaften sol.

Verse: 3267    'â!' sprâchen s' al gemeine
Verse: 3268    grôze unde cleine,

Verse: 3269    'dê duin dûze âventûre
Verse: 3270    si dûze crêatûre:

Verse: 3271    got gebe süeze âventiure
Verse: 3272    sô süezer crêatiure!'

Verse: 3273    Der künec der nam des kindes war.
Verse: 3274    den jeger den besande er dar:

Verse: 3275    'sag an' sprach er 'wer ist diz kint,
Verse: 3276    des wort sô wol besniten sind?'

Verse: 3277    'â hêrre, ez ist ein Parmenois
Verse: 3278    sô wunderlîchen cûrtois

Verse: 3279    und alsô rehte tugentsam,
Verse: 3280    daz ich 'z an kinde nie vernam,

Verse: 3281    und giht, er heize Tristan
Verse: 3282    und sî sîn vater ein koufman.

Verse: 3283    in geloube ez aber niemer.
Verse: 3284    wie haete ein koufman iemer

Verse: 3285    in sîner unmüezekeit
Verse: 3286    sô grôze muoze an in geleit?

Verse: 3287    solt er die muoze mit im hân,
Verse: 3288    der sich unmuoze sol begân?

Verse: 3289    Â hêrre, er ist sô tugenthaft.
Verse: 3290    seht, dise niuwe meisterschaft,

Verse: 3291    als wir nû ze hove sîn komen,
Verse: 3292    die habe wir gar von ime genomen.

Verse: 3293    und hoeret wunderlîchen list:
Verse: 3294    rehte alse der hirz geschaffen ist,

Verse: 3295    als ist er her ze hove brâht.
Verse: 3296    wâ wart ie list sô wol bedâht?

Verse: 3297    nu seht, daz houbet daz gât vor,
Verse: 3298    diu brust dâ nâch in sînem spor,

Verse: 3299    büege unde bein, diz unde daz,
Verse: 3300    daz wart schôner unde baz

Verse: 3301    ze hove geprîsantet nie.
Verse: 3302    seht dort, gesâhet ir ie

Verse: 3303    sus gemachete furkîe?
Verse: 3304    ine vernam von jegerîe

Verse: 3305    solher liste nie niht mê.
Verse: 3306    dâ zuo liez er uns sehen ê,

Verse: 3307    wie man den hirz enbesten sol.
Verse: 3308    diu kunst gevellet mir sô wol,

Verse: 3309    daz ich niemer hirz noch tier
Verse: 3310    gehouwen wil in vier quartier,

Verse: 3311    und solte ich iemer mêre jagen.'
Verse: 3312    sus begunde er sînem hêrren sagen

Verse: 3313    von ende sîniu maere,
Verse: 3314    wie vollekomen er waere

Verse: 3315    an höfscher jegerîe
Verse: 3316    und wie er die curîe

Verse: 3317    den hunden vür leite.
Verse: 3318    und swaz der jeger seite,

Verse: 3319    des nam der künec vil guote war
Verse: 3320    und hiez dem kinde ruofen dar,

Verse: 3321    die jegere ze herbergen varn,
Verse: 3322    ir ambet unde ir dinc bewarn.

Verse: 3323    die kêrten umbe und riten dan.
Verse: 3324    der jegermeister Tristan

Verse: 3325    der gap sîn hornelîn dâ wider
Verse: 3326    und erbeizete zuo der erde nider.

Verse: 3327    Daz junge hovegesinde
Verse: 3328    daz lief engegen dem kinde

Verse: 3329    und condewierte ez schône
Verse: 3330    under armen vür die crône.

Verse: 3331    ouch kunde er selbe schône gân.
Verse: 3332    dar zuo was ime der lîp getân,

Verse: 3333    als ez diu Minne gebôt.
Verse: 3334    sîn munt was rehte rôsenrôt,

Verse: 3335    sîn varwe lieht, sîn ougen clâr.
Verse: 3336    brûnreideloht was ime daz hâr,

Verse: 3337    gecrûspet bî dem ende.
Verse: 3338    sîn arme und sîne hende

Verse: 3339    wol gestellet unde blanc.
Verse: 3340    sîn lîp ze guoter mâze lanc.

Verse: 3341    sîne vüeze und sîniu bein,
Verse: 3342    dar an sîne schoene almeistic schein,

Verse: 3343    diu stuonden sô ze prîse wol,
Verse: 3344    als man 'z an manne prisen sol.

Verse: 3345    sîn gewant, als ich iu hân geseit,
Verse: 3346    daz was mit grôzer höfscheit

Verse: 3347    nâch sînem lîbe gesniten.
Verse: 3348    an gebaerde unde an schoenen siten

Verse: 3349    was ime sô rehte wol geschehen,
Verse: 3350    daz man in gerne mohte sehen.

Verse: 3351    Marke sach Tristanden an:
Verse: 3352    'vriunt' sprach er 'heizestû Tristan?'

Verse: 3353    'jâ hêrre, Tristan; dêu sal!'
Verse: 3354    'dêu sal, bêâs vassal!'

Verse: 3355    'mercî' sprach er 'gentil rois,
Verse: 3356    edeler künic curnewalois,

Verse: 3357    ir und iur gesinde
Verse: 3358    ir sît von gotes kinde

Verse: 3359    iemer gebenedîet!'
Verse: 3360    dô wart gemerzîet

Verse: 3361    wunder von der hovediet.
Verse: 3362    si triben niwan daz eine liet:

Verse: 3363    'Tristan, Tristan li Parmenois
Verse: 3364    cum est bêâs et cum cûrtois!'

Verse: 3365    Marke sprach aber Tristande zuo:
Verse: 3366    'ich sage dir, Tristan, waz du tuo.

Verse: 3367    du solt mich einer bete gewern,
Verse: 3368    der enwil ich niht von dir enbern.'

Verse: 3369    'swaz ir gebietet, hêrre mîn.'
Verse: 3370    'dû solt mîn jegermeister sîn!'

Verse: 3371    hie wart ein michel lahter van.
Verse: 3372    hier under sprach dô Tristan:

Verse: 3373    'hêrre, gebietet über mich.
Verse: 3374    swaz ir gebietet, daz bin ich.

Verse: 3375    iuwer jeger und iuwer dienestman
Verse: 3376    daz bin ich, alse ich beste kan.'

Verse: 3377    'mit guote, vriunt' sprach Marke dô
Verse: 3378    'diz ist gelobet, nu sî alsô!'




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.