TITUS
Gottfried von Strassburg, Tristan
Part No. 6
Previous part

Chapter: 6 
6: Der junge Künstler


Verse: 3379    Nu Tristan der ist ze hûse komen
Verse: 3380    unwizzende, alse ir habet vernomen,

Verse: 3381    und wânde doch ellende sîn.
Verse: 3382    der unverwânde vater sîn,

Verse: 3383    Marke der tugende rîche
Verse: 3384    der gewarp vil tugentlîche.

Verse: 3385    ouch was des dô vil michel nôt.
Verse: 3386    er bat besunder unde gebôt

Verse: 3387    al dem hovegesinde,
Verse: 3388    daz sî dem vremedem kinde

Verse: 3389    guot unde genaedic waeren
Verse: 3390    und daz s' im êre baeren

Verse: 3391    mit rede und mit gesellekeit.
Verse: 3392    des wâren s' alle samet bereit

Verse: 3393    mit willeclîchem muote.
Verse: 3394    sus was Tristan der guote

Verse: 3395    des küneges ingesinde dô.
Verse: 3396    der sach in gerne und was sîn vrô,

Verse: 3397    wan in truog ouch sîn herze dar
Verse: 3398    und nam sîn gerne und ofte war;

Verse: 3399    wan er was z' allen zîten
Verse: 3400    höfschlîche an sîner sîten

Verse: 3401    und truog in sînen dienest an
Verse: 3402    als ofte, als er sîn state gewan.

Verse: 3403    swâ Marke was oder swar er gie,
Verse: 3404    dâ was Tristan der ander ie

Verse: 3405    und nam daz Marke wol vür guot.
Verse: 3406    er truoc im harte holden muot

Verse: 3407    und tete im wol, swenne er in sach.
Verse: 3408    In den dingen ez geschach,

Verse: 3409    innerthalp den ahte tagen
Verse: 3410    reit Marke selbe mit im jagen

Verse: 3411    und hovegesindes vil dâ mite
Verse: 3412    schouwen sînen jagesite

Verse: 3413    und sîner künste nemen war.
Verse: 3414    nu hiez im Marke bringen dar

Verse: 3415    sîn jagephert und gab im daz.
Verse: 3416    Tristan wart nie geriten baz,

Verse: 3417    wan ez was starc, schoene unde snel.
Verse: 3418    ein hornelîn süeze unde hel

Verse: 3419    hiez er im geben an sîne hant.
Verse: 3420    'Tristan' sprach er 'nu wis gemant,

Verse: 3421    daz dû mîn jegermeister bist,
Verse: 3422    und zeige uns dînen jagelist.

Verse: 3423    nim dîne hunde unde var
Verse: 3424    und schicke dîne warte dar,

Verse: 3425    dâ sî dich rehte dunken stân.'
Verse: 3426    'nein hêrre, ezn mac sô nicht ergân '

Verse: 3427    sprach aber der höfsche Tristan
Verse: 3428    'heizet die jegere kêren dan,

Verse: 3429    die suln die warte sâzen
Verse: 3430    und suln von ruore lâzen.

Verse: 3431    die erkennent hie ze lande sich
Verse: 3432    und wizzent michel baz dan ich,

Verse: 3433    wâ der hirz hin ziuhet
Verse: 3434    und vor den hunden vliuhet.

Verse: 3435    die erkennent die gelegenheit.
Verse: 3436    sô bin ich, der hie nie gereit,

Verse: 3437    und bin mitalle ein vremede kneht.'
Verse: 3438    'daz weiz got, Tristan, dû hâst reht.

Verse: 3439    du enkanst dich hier an niht bewarn.
Verse: 3440    die jegere müezen selbe varn

Verse: 3441    und sich verrihten under in.'
Verse: 3442    hie mite kêrten die jegere hin

Verse: 3443    und koppelten ir hunde
Verse: 3444    und stalten an der stunde

Verse: 3445    ir warte, als sî wol wisten wâ,
Verse: 3446    und liezen z' einem hirze sâ

Verse: 3447    und jageten den ze strîte
Verse: 3448    unz gein der abentzîte.

Verse: 3449    dô erliefen in die hunde.
Verse: 3450    und an der selben stunde

Verse: 3451    kam Marke und sîn Tristan
Verse: 3452    und mit in zwein manc hoveman

Verse: 3453    gerant ze dem gevelle.
Verse: 3454    dô wart grôz horngeschelle

Verse: 3455    in maneger slahte dône.
Verse: 3456    si hürneten sô schône,

Verse: 3457    daz ez Marken sanfte tete
Verse: 3458    und mit im manegem an der stete.

Verse: 3459    Nu sî den hirz gevalten,
Verse: 3460    ir meister sî dar stalten,

Verse: 3461    Tristanden, den heinlîchen gast,
Verse: 3462    und bâten, daz er sî den bast

Verse: 3463    von ende z' ende lieze sehen.
Verse: 3464    Tristan der sprach: 'diz sol geschehen!'

Verse: 3465    und mit der rede bereite er sich.
Verse: 3466    nu waene ich wol und dunket mich,

Verse: 3467    daz ez undurften waere,
Verse: 3468    ob ich iu zwir ein maere

Verse: 3469    nâch ein ander vür leite.
Verse: 3470    rehte alse ich iu ê seite

Verse: 3471    von jenem hirze, rehte alsô
Verse: 3472    enbaste er aber disen dô.

Verse: 3473    den bast und die furkîe,
Verse: 3474    die kunst von der curîe,

Verse: 3475    dô si die begunden sehen,
Verse: 3476    si begunden eines mundes jehen,

Verse: 3477    daz nieman von dem liste
Verse: 3478    niht bezzers enwiste

Verse: 3479    noch niemer kunde ervinden.
Verse: 3480    der künec der hiez dô binden

Verse: 3481    den hirz ûf unde kêrte dan.
Verse: 3482    er und sîn jegere Tristan

Verse: 3483    und al sîn massenîe
Verse: 3484    mit gehürne und mit furkîe

Verse: 3485    riten sî dô ze hûse wider.
Verse: 3486    als was der guote Tristan sider

Verse: 3487    ein lieber hoveman under in.
Verse: 3488    künec unde gesinde haeten in

Verse: 3489    in guoter geselleschaft.
Verse: 3490    ouch was er alsô dienesthaft

Verse: 3491    dem armen unde dem rîchen.
Verse: 3492    möhte er ir iegelîchen

Verse: 3493    ûf sîner hant getragen hân,
Verse: 3494    daz haete er gerne getân.

Verse: 3495    die saelde haete im got gegeben:
Verse: 3496    er kunde und wolte in allen leben.

Verse: 3497    lachen, tanzen, singen,
Verse: 3498    rîten, loufen, springen,

Verse: 3499    zuhten unde schallen,
Verse: 3500    daz kunde er mit in allen.

Verse: 3501    er lebete, swie man wolte
Verse: 3502    und als diu jugent solte.

Verse: 3503    swes ir dekeiner began,
Verse: 3504    daz huob er iemer mit im an.

Verse: 3505    Nu gevuogete sich daz,
Verse: 3506    daz Marke an eime tage gesaz

Verse: 3507    ein lützel nâch der ezzenzît,
Verse: 3508    sô man doch kurzewîle pflît,

Verse: 3509    und losete sêre an einer stete
Verse: 3510    einem leiche, den ein harpfaere tete,

Verse: 3511    ein meister sîner liste,
Verse: 3512    der beste den man wiste.

Verse: 3513    der selbe der was ein Gâlois.
Verse: 3514    nu kam Tristan der Parmenois

Verse: 3515    und saz ze sînen vüezen dar
Verse: 3516    und nam sô vlîzeclîche war

Verse: 3517    des leiches unde der süezen noten.
Verse: 3518    waere ez im an den lîp geboten,

Verse: 3519    ern möhte ez niht verswigen hân:
Verse: 3520    sîn muot begunde im ûf gân,

Verse: 3521    sîn herze daz wart muotes vol.
Verse: 3522    'meister' sprach er 'ir harpfet wol.

Verse: 3523    die noten sint rehte vür brâht,
Verse: 3524    senelîche und alse ir wart gedâht.

Verse: 3525    die macheten Britûne
Verse: 3526    von mînem hêrn Gurûne

Verse: 3527    und von sîner vriundinne.'
Verse: 3528    diz nam in sîne sinne

Verse: 3529    der harpfaere und loste allez dar,
Verse: 3530    als er der rede niht naeme war,

Verse: 3531    unz er den leich volante.
Verse: 3532    gein dem kinde er sich dô wante:

Verse: 3533    'waz weistu' sprach er 'liebez kint,
Verse: 3534    von wannen dise noten sint?

Verse: 3535    kanstu ihtes iht hier an?'
Verse: 3536    'jâ schoener meister' sprach Tristan

Verse: 3537    'ich haete es hie vor meisterschaft.
Verse: 3538    nû hât ez aber sô cleine craft,

Verse: 3539    daz ich vor iu niht engetar.'
Verse: 3540    'nein vriunt, sê dise harpfen dar,

Verse: 3541    lâ hoeren, welher hande
Verse: 3542    kan man in dînem lande?'

Verse: 3543    'gebietet ir daz, meister mîn,
Verse: 3544    und sol ez mit iuwerm urloub sîn,

Verse: 3545    daz ich iu harpfe?' sprach Tristan.
Verse: 3546    'jâ trût geselle, sê harpfe an!'

Verse: 3547    Als er die harpfen dô genam,
Verse: 3548    sînen handen sî vil wol gezam.

Verse: 3549    die wâren, alse ich hân gelesen,
Verse: 3550    daz sî niht schoener kunden wesen:

Verse: 3551    weich unde linde, cleine, lanc
Verse: 3552    und rehte alsam ein harm blanc.

Verse: 3553    mit den sô ruorte er unde sluoc
Verse: 3554    ursuoche und notelîne genuoc

Verse: 3555    seltsaene, süeze, guote.
Verse: 3556    hie mite wart ime ze muote

Verse: 3557    umbe sîne leiche von Britûn.
Verse: 3558    sus nam er sînen plectrûn:

Verse: 3559    nagel unde seiten zôher,
Verse: 3560    dise niderer, jene hôher,

Verse: 3561    rehte als er si wolte hân.
Verse: 3562    nu diz was schiere getân.

Verse: 3563    Tristan, der niuwe spilman,
Verse: 3564    sîn niuwez ambet huob er an

Verse: 3565    mit vlîzeclîchem ruoche.
Verse: 3566    sîne noten und sîne ursuoche,

Verse: 3567    sîne seltsaene grüeze
Verse: 3568    die harpfete er sô süeze

Verse: 3569    und machete sî schoene
Verse: 3570    mit schoenem seitgedoene,

Verse: 3571    daz iegelîcher dâ zuo lief,
Verse: 3572    dirre jenem dar nâher rief.

Verse: 3573    vil schiere kam diu hoveschar
Verse: 3574    almeistic loufende dar

Verse: 3575    und wânde niemer komen ze vruo.
Verse: 3576    nu Marke der sach allez zuo

Verse: 3577    und saz allez trahtende,
Verse: 3578    sînen vriunt Tristanden ahtende

Verse: 3579    und wunderte in des sêre,
Verse: 3580    daz er sô höfsche lêre

Verse: 3581    und alsô guote liste,
Verse: 3582    die er an im selben wiste,

Verse: 3583    alsô verhelen kunde.
Verse: 3584    Nu Tristan der begunde

Verse: 3585    einen leich dô lâzen clingen în
Verse: 3586    von der vil stolzen vriundîn

Verse: 3587    Grâlandes des schoenen.
Verse: 3588    do begunde er suoze doenen

Verse: 3589    und harpfen sô ze prîse
Verse: 3590    in britûnischer wîse,

Verse: 3591    daz maneger dâ stuont unde saz,
Verse: 3592    der sîn selbes namen vergaz.

Verse: 3593    dâ begunden herze und ôren
Verse: 3594    tumben unde tôren

Verse: 3595    und ûz ir rehte wanken.
Verse: 3596    dâ wurden gedanken

Verse: 3597    in maneger wîse vür brâht.
Verse: 3598    dâ wart vil ofte gedâht:

Verse: 3599    'â saelic sî der koufman,
Verse: 3600    der ie sô höfschen sun gewan!'

Verse: 3601    jâ sîne vinger wîze
Verse: 3602    die giengen wol ze vlîze

Verse: 3603    walgende in den seiten.
Verse: 3604    si begunden doene breiten,

Verse: 3605    daz der palas voller wart.
Verse: 3606    dane wart ouch ougen niht gespart,

Verse: 3607    der kapfete vil manegez dar
Verse: 3608    und nâmen sîner hende war.

Verse: 3609    Nu dirre leich der was getân:
Verse: 3610    nu hiez der guote künec dar gân

Verse: 3611    und sprach, daz man in baete,
Verse: 3612    daz er noch einen taete.

Verse: 3613    'mû voluntiers!' sprach Tristan.
Verse: 3614    rîlîche huob er aber an

Verse: 3615    einen senelîchen leich als ê
Verse: 3616    de la cûrtoise Tispê

Verse: 3617    von der alten Bâbilône.
Verse: 3618    den harpfete er sô schône

Verse: 3619    und gie den noten sô rehte mite
Verse: 3620    nâch rehte meisterlîchem site,

Verse: 3621    daz es den harpfaer wunder nam.
Verse: 3622    und alse ez ie ze staten kam,

Verse: 3623    sô lie der tugende rîche
Verse: 3624    suoze unde wunneclîche

Verse: 3625    sîne schanzûne vliegen în.
Verse: 3626    er sanc diu leichnotelîn

Verse: 3627    britûnsche und gâloise,
Verse: 3628    latînsche und franzoise

Verse: 3629    sô suoze mit dem munde,
Verse: 3630    daz nieman wizzen kunde,

Verse: 3631    wederez süezer waere
Verse: 3632    oder baz lobebaere,

Verse: 3633    sîn harpfen oder sîn singen.
Verse: 3634    sich huop von sînen dingen

Verse: 3635    und von sîner vuoge
Verse: 3636    rede unde zal genuoge.

Verse: 3637    si jâhen al gelîche,
Verse: 3638    sine vernaemen in dem rîche

Verse: 3639    an einem man die vuoge nie.
Verse: 3640    der sprach dort und dirre hie:

Verse: 3641    'â waz ist diz von kinde?
Verse: 3642    waz hân wir zuo gesinde?

Verse: 3643    ez ist allez umbe den wint,
Verse: 3644    elliu diu kint, diu nu sint,

Verse: 3645    wider unserm Tristande!'
Verse: 3646    Tristan dô der verande

Verse: 3647    sînen leich nâch sîner ger,
Verse: 3648    Marke sprach: 'Tristan, gâ her.

Verse: 3649    der dich dâ hât gelêret,
Verse: 3650    der sî vor gote gêret

Verse: 3651    und dû mit ime! daz ist vil wol.
Verse: 3652    dîne leiche ich gerne hoeren sol

Verse: 3653    underwîlen wider naht,
Verse: 3654    sô dû doch niht geslâfen maht.

Verse: 3655    diz tuostu wol mir unde dir.'
Verse: 3656    'jâ hêrre, wol.' 'nu sage mir,

Verse: 3657    kanstû kein ander seitspil noch?'
Verse: 3658    'nein hêrre' sprach er. 'nû iedoch?

Verse: 3659    rehte als lieb als ich dir sî,
Verse: 3660    Tristan, dâ vrâge ich dich es bî.'

Verse: 3661    'hêrre' sprach Tristan al zehant
Verse: 3662    'irn dörftet mich niht hân gemant

Verse: 3663    sô verre, ich seite ez iu doch wol,
Verse: 3664    sît ich 'z iu doch sagen sol

Verse: 3665    und ir ez wellet wizzen.
Verse: 3666    hêrre, ich hân gevlizzen

Verse: 3667    an iegelîchem seitspil
Verse: 3668    und enkan doch keines alsô vil,

Verse: 3669    ine kunde es gerne mêre.
Verse: 3670    ouch hân ich dise lêre

Verse: 3671    niht vil manegen tac getriben
Verse: 3672    und zwâre ich bin derbî beliben

Verse: 3673    under mâlen kûme siben jâr
Verse: 3674    oder lützel mêre, daz ist wâr.

Verse: 3675    mich lêrten Parmenîen
Verse: 3676    videln und symphonîen.

Verse: 3677    harpfen unde rotten
Verse: 3678    daz lêrten mich Galotten,

Verse: 3679    zwêne meister Gâloise.
Verse: 3680    mich lêrten Britûnoise,

Verse: 3681    die wâren ûz der stat von Lût,
Verse: 3682    rehte lîren und sambjût.'

Verse: 3683    'sambjût, waz ist daz, lieber man?'
Verse: 3684    'daz beste seitspil, daz ich kan.'

Verse: 3685    'seht' sprach daz gesinde
Verse: 3686    'got der hât disem kinde

Verse: 3687    ûf rehte wunneclîchez leben
Verse: 3688    sîner genâden vil gegeben!'

Verse: 3689    Marke der vrâgte in aber dô mê:
Verse: 3690    'Tristan, ich hôrte dich doch ê

Verse: 3691    britûnsch singen und gâlois,
Verse: 3692    guot latîne und franzois.

Verse: 3693    kanstû die sprâche?' 'hêrre, jâ,
Verse: 3694    billîche wol.' nu kam iesâ

Verse: 3695    der hûfe dar gedrungen.
Verse: 3696    und swer iht vremeder zungen

Verse: 3697    von den bîlanden kunde,
Verse: 3698    der versuohte in sâ zestunde:

Verse: 3699    dirre sus und jener sô.
Verse: 3700    hier under antwurte er dô

Verse: 3701    höfschlîche ir aller maeren:
Verse: 3702    Norwaegen, Îrlandaeren,

Verse: 3703    Almânjen, Schotten unde Tenen.
Verse: 3704    dâ begunde sich manc herze senen

Verse: 3705    nâch Tristandes vuoge.
Verse: 3706    dâ wolten genuoge

Verse: 3707    vil gerne sîn gewesen als er.
Verse: 3708    im sprach vil maneges herzen ger

Verse: 3709    suoze und inneclîche zuo:
Verse: 3710    'â Tristan, waere ich alse duo!

Verse: 3711    Tristan, dû maht gerne leben!
Verse: 3712    Tristan, dir ist der wunsch gegeben

Verse: 3713    aller der vuoge, die kein man
Verse: 3714    ze dirre werlde gehaben kan.'

Verse: 3715    ouch macheten sî hier under
Verse: 3716    mit rede michel wunder:

Verse: 3717    'hôrâ!' sprach diser, 'hôrâ!' sprach der
Verse: 3718    'elliu diu werlt diu hoere her!

Verse: 3719    ein vierzehenjaerec kint
Verse: 3720    kan al die liste, die nu sint!'

Verse: 3721    Der künec sprach: 'Tristan, hoere her:
Verse: 3722    an dir ist allez, des ich ger.

Verse: 3723    dû kanst allez, daz ich wil:
Verse: 3724    jagen, sprâche, seitspil.

Verse: 3725    nu suln ouch wir gesellen sîn,
Verse: 3726    dû der mîn und ich der dîn.

Verse: 3727    tages sô sul wir rîten jagen,
Verse: 3728    des nahtes uns hie heime tragen

Verse: 3729    mit höfschlîchen dingen:
Verse: 3730    harpfen, videlen, singen,

Verse: 3731    daz kanstu wol, daz tuo du mir.
Verse: 3732    sô kan ich spil, daz tuon ich dir,

Verse: 3733    des ouch dîn herze lîhte gert:
Verse: 3734    schoeniu cleider unde pfert,

Verse: 3735    der gibe ich dir swie vil du wilt.
Verse: 3736    dâ mite hân ich dir wol gespilt.

Verse: 3737    sich, mîn swert und mîne sporn,
Verse: 3738    mîn armbrust und mîn guldîn horn,

Verse: 3739    geselle, daz bevilhe ich dir.
Verse: 3740    des underwint dich, des pflic mir

Verse: 3741    und wistu höfsch unde vrô!'
Verse: 3742    sus was der ellende dô

Verse: 3743    dâ ze hove ein trût gesinde.
Verse: 3744    ezn gesach nie man von kinde

Verse: 3745    die saelde, die man an im sach.
Verse: 3746    swaz er getete, swaz er gesprach,

Verse: 3747    daz dûhte und was ouch alse guot,
Verse: 3748    daz ime diu werlt holden muot

Verse: 3749    und inneclîchez herze truoc.
Verse: 3750    hie mite sî der rede genuoc.

Verse: 3751    wir suln diz maere legen nider
Verse: 3752    und grîfen aber an jenez wider,

Verse: 3753    sîn vater, der marschalc dan Rûal
Verse: 3754    li foitenant et li lêal,

Verse: 3755    waz der nâch ime getaete,
Verse: 3756    dô er 'n verloren haete.





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.