TITUS
Gottfried von Strassburg, Tristan
Part No. 7
Previous part

Chapter: 7 
7: Wiedersehen


Verse: 3757    Dan Rûal li foitenant
Verse: 3758    der schifte über mer zehant

Verse: 3759    mit michelem guote,
Verse: 3760    wan ime was wol ze muote,

Verse: 3761    ern wolte niemer wider komen,
Verse: 3762    ern haete eteswaz vernomen

Verse: 3763    endeclîcher maere,
Verse: 3764    wâ sîn junchêrre waere,

Verse: 3765    und stiez ze Norwaege zuo.
Verse: 3766    dâ vorschete er spâte unde vruo

Verse: 3767    in allem dem lande
Verse: 3768    nâch sînem vriunt Tristande.

Verse: 3769    waz half daz? ern was dâ niht.
Verse: 3770    al sîn suochen was ein wiht.

Verse: 3771    und alse er sîn dô niht envant,
Verse: 3772    dô kêrte er wider Îlant.

Verse: 3773    seht, dâne kunde er ihte mê
Verse: 3774    von ime ervorschen danne als ê.

Verse: 3775    hie mite begunde er an der habe
Verse: 3776    sô swachen unde nemen abe,

Verse: 3777    daz er sich nider ze vuozen liez
Verse: 3778    und sîniu phert verkoufen hiez

Verse: 3779    und mit dem guote sande
Verse: 3780    sîne liute wider ze lande.

Verse: 3781    sich selben liez er in der nôt,
Verse: 3782    wan er gie beteln umbe brôt

Verse: 3783    und treip daz staeteclîche
Verse: 3784    von rîche ze rîche,

Verse: 3785    von lande ze lande,
Verse: 3786    vorschende nâch Tristande

Verse: 3787    wol driu jâr oder mêre,
Verse: 3788    biz daz er alsô sêre

Verse: 3789    von sînes lîbes schoene kam
Verse: 3790    und an der varwe als abe genam:

Verse: 3791    swer in dô haete gesehen,
Verse: 3792    dern haete niemer gejehen,

Verse: 3793    daz er ie hêrre würde.
Verse: 3794    die schamelîchen bürde

Verse: 3795    die truoc der werde dan Rûalt
Verse: 3796    gelîche alsam ein art ribalt,

Verse: 3797    daz ime dekein sîn armuot,
Verse: 3798    als ez doch weizgot manegem tuot,

Verse: 3799    sînen guoten willen nie benam.
Verse: 3800    Nu ez in daz vierde jâr dô kam,

Verse: 3801    dô was er ze Tenemarke
Verse: 3802    und vorschete ouch dâ starke

Verse: 3803    von stete ze stete, hin unde her:
Verse: 3804    von gotes genâden dô vant er

Verse: 3805    die zwêne wallende man,
Verse: 3806    die sîn junchêrre Tristan

Verse: 3807    ûf der waltstrâze vant.
Verse: 3808    die selben vrâgete er zehant.

Verse: 3809    die seiten ime ouch maere,
Verse: 3810    wenne und wie lange es waere,

Verse: 3811    daz s' einen knaben haeten gesehen,
Verse: 3812    rehte als si in dâ hôrten jehen

Verse: 3813    und wie s' in mit in liezen gân,
Verse: 3814    wie sîn dinc allez was getân

Verse: 3815    an antlütze unde an hâre,
Verse: 3816    an rede und an gebâre,

Verse: 3817    an lîbe und an gewande,
Verse: 3818    und wie maneger hande

Verse: 3819    sprâche und vuoge er kunde.
Verse: 3820    zehant und an der stunde

Verse: 3821    bekande er wol, im waere alsô.
Verse: 3822    die wallaere bat er dô,

Verse: 3823    daz si 'z durch got taeten,
Verse: 3824    swâ sî 'n gelâzen haeten,

Verse: 3825    ob sî die stat erkanden,
Verse: 3826    daz sî s' im rehte nanden.

Verse: 3827    sus seiten sî Rûâle,
Verse: 3828    ez waere in Curnewâle

Verse: 3829    ze Tintajêle in der stat.
Verse: 3830    die stat er ime dô nennen bat

Verse: 3831    aber und aber und sprach dô z' in:
Verse: 3832    'nu wâ lît Curnewâle hin?'

Verse: 3833    'ez stôzet' sprâchen jene zehant
Verse: 3834    'jensît Britanje an daz lant.'

Verse: 3835    'â!' dâhte er 'hêrre trehtîn,
Verse: 3836    diz mac wol dîn genâde sîn.

Verse: 3837    ist Tristan, als ich hân vernomen,
Verse: 3838    alsus ze Curnewâle komen,

Verse: 3839    sô ist er rehte komen hin heim;
Verse: 3840    wan Marke der ist sîn oeheim.

Verse: 3841    dâ wîse mich hin, süezer got!
Verse: 3842    â hêrre got, durch dîn gebot

Verse: 3843    du lâ mir noch sô wol geschehen,
Verse: 3844    daz ich Tristanden müeze sehen!

Verse: 3845    diz maere, daz ich hân vernomen,
Verse: 3846    daz müeze mir ze vröuden komen!

Verse: 3847    ez dunket mich und ist ouch guot.
Verse: 3848    ez hât mir mînen swaeren muot

Verse: 3849    erwecket unde gemachet vrô.
Verse: 3850    'saeligen liute' sprach er dô

Verse: 3851    'der megede sun müeze iuch bewarn!
Verse: 3852    ich wil ûf mîne strâze varn

Verse: 3853    und sehen, ob ich in vinde.'
Verse: 3854    'nu gewîse iuch nâch dem kinde,

Verse: 3855    der al der werlde hât gewalt!'
Verse: 3856    'genâde!' sprach aber dô Rûalt,

Verse: 3857    'gebietet mir, hiest bite nimê.'
Verse: 3858    'vriunt' sprâchen jene 'â dê, â dê!'

Verse: 3859    Rûal dô sîne strâze gie,
Verse: 3860    sô daz er sîme lîbe nie

Verse: 3861    ruowe einen halben tac genam,
Verse: 3862    unz daz er zuo dem mere kam.

Verse: 3863    dâ ruowete er, daz was im leit;
Verse: 3864    wan schif diu wâren umbereit.

Verse: 3865    und alse er dô schiffunge vant,
Verse: 3866    er vuor ze Britanje in daz lant.

Verse: 3867    durch Britanje streich er dô
Verse: 3868    sô strîteclîchen unde alsô,

Verse: 3869    daz nie kein tac sô langer wart,
Verse: 3870    daz des iht würde gespart,

Verse: 3871    ern striche in iemer in die naht.
Verse: 3872    dâ zuo gab ime muot unde maht

Verse: 3873    der gedinge, der im was geseit.
Verse: 3874    ez machete ime sîn arbeit

Verse: 3875    senfte und harte lîhtsam.
Verse: 3876    nû er ze Curnewâle kam,

Verse: 3877    zehant dô vrâgete er maere,
Verse: 3878    wâ Tintajêle waere.

Verse: 3879    vil schiere er des bewîset wart.
Verse: 3880    sus kêrte er aber ûf sîne vart

Verse: 3881    und kam ze Tintajêle zuo
Verse: 3882    eines sunnenâbendes vruo,

Verse: 3883    dô man ze messe solte gân.
Verse: 3884    sus gieng er vür daz münster stân.

Verse: 3885    dâ gie daz volc her unde dar
Verse: 3886    und er nam allenthalben war

Verse: 3887    und spehete wâ unde wâ,
Verse: 3888    ob er ieman vünde dâ,

Verse: 3889    der ime reht unde gebaere
Verse: 3890    ze sîner vrâge waere.

Verse: 3891    wan er dâhte allez wider sich:
Verse: 3892    'diz volc ist allez baz dan ich.

Verse: 3893    swen ich mit rede bevâhe,
Verse: 3894    ich vürhte, ez in versmâhe,

Verse: 3895    daz er mir gebe antwürte umbe in,
Verse: 3896    sît ich als armer vuore bin.

Verse: 3897    rât, hêrre got, waz ich getuo!'
Verse: 3898    Nu gie der künic Marke zuo

Verse: 3899    mit einer wunneclîchen schar.
Verse: 3900    der getriuwe der nam aber war

Verse: 3901    und ersach niht, des er wolte.
Verse: 3902    und alse der künec dô solte

Verse: 3903    von messe wider ze hove gân,
Verse: 3904    Rûal gie von dem wege stân

Verse: 3905    und nam sunder dort hin dan
Verse: 3906    einen getageten hoveman:

Verse: 3907    'â hêrre' sprach er 'saget mir
Verse: 3908    durch iuwer güete, wizzet ir,

Verse: 3909    ob ein kint hie ze hove sî.
Verse: 3910    man seit, ez wone dem künege bî

Verse: 3911    und ist daz Tristan genant.'
Verse: 3912    'ein kint?' sprach jener al zehant

Verse: 3913    'ine sage iu niht von kinde.
Verse: 3914    ein knappe ist hie gesinde,

Verse: 3915    der sol schiere nemen swert
Verse: 3916    und ist dem künege harte wert,

Verse: 3917    wan er kan kunst genuoge
Verse: 3918    und erkennet manege vuoge

Verse: 3919    und manege höfschlîchiu dinc.
Verse: 3920    der ist ein starker jungelinc

Verse: 3921    mit brûnreidem hâre,
Verse: 3922    mit schoenem gebâre

Verse: 3923    und ist ein ellender man:
Verse: 3924    den heize wir hie Tristan.'

Verse: 3925    'Nu hêrre' sprach Rûal iesâ
Verse: 3926    'sît ir hie hovegesinde?' 'jâ.'

Verse: 3927    'hêrre, durch iuwer êre
Verse: 3928    sô tuot ein lützel mêre,

Verse: 3929    wan ir tuot harte wol dar an:
Verse: 3930    saget ime, hie sî ein armer man,

Verse: 3931    der welle in sprechen unde sehen.
Verse: 3932    ouch muget ir ime des wol verjehen,

Verse: 3933    ich sî von sînem lande.'
Verse: 3934    sus seite jener Tristande,

Verse: 3935    ein sîn lantman waere dâ.
Verse: 3936    Tristan der kêrte dar iesâ,

Verse: 3937    und al dâ mite daz er 'n gesach,
Verse: 3938    mit herzen und mit munde er sprach:

Verse: 3939    'Nu müeze unser trehtîn
Verse: 3940    iemer gebenedîet sîn,

Verse: 3941    vater, daz ich dich sehen muoz!'
Verse: 3942    diz was sîn alrêrster gruoz.

Verse: 3943    dâ nâch lief er in lachende an
Verse: 3944    und kuste den getriuwen man,

Verse: 3945    als ein kint sînen vater sol.
Verse: 3946    daz was vil billîch unde wol.

Verse: 3947    er was sîn vater und er sîn kint.
Verse: 3948    alle die vetere, die nu sint

Verse: 3949    oder die vor uns wurden ie,
Verse: 3950    dien getâten alle ir kinde nie

Verse: 3951    vaterlîcher danne ouch er im tete.
Verse: 3952    jâ Tristan der haete an der stete

Verse: 3953    vater, muoter, mâge, man,
Verse: 3954    alle die vriunt, die er ie gewan,

Verse: 3955    zwischen sînen handen dâ.
Verse: 3956    vil inneclîche sprach er:' â,

Verse: 3957    getriuwer vater guoter,
Verse: 3958    sag an, mîn süeziu muoter

Verse: 3959    und mîne bruoder lebent die noch?'
Verse: 3960    'ine weiz' sprach er 'trût sun, jedoch

Verse: 3961    lebeten si, dô ich si nâhest sach,
Verse: 3962    wan daz si michel ungemach

Verse: 3963    von dînen schulden haeten.
Verse: 3964    wie s' aber sît her getaeten,

Verse: 3965    desn kan ich dir niht gesagen,
Verse: 3966    wan ine gesach in manegen tagen

Verse: 3967    nieman, den ich erkande.
Verse: 3968    sone kam ich ouch ze lande

Verse: 3969    sît der veigen stunde nie,
Verse: 3970    daz mir an dir sô missegie.'

Verse: 3971    'Â' sprach er 'trût vater mîn,
Verse: 3972    waz sol dirre maere sîn?

Verse: 3973    dîn schoener lîp war ist der komen?'
Verse: 3974    'sun, dâ hâstu mir 'n genomen.'

Verse: 3975    'sô wil ich dir 'n wider geben.'
Verse: 3976    'sun, daz müge wir ouch geleben!'

Verse: 3977    'nu vater, gâ dan ze hove mit mir!'
Verse: 3978    'nein sun, dar engân ich niht mit dir.

Verse: 3979    du sihest doch wol, ich waere
Verse: 3980    alsus niht hovebaere.'

Verse: 3981    'nein vater' sprach er 'diz muoz geschehen.
Verse: 3982    der künec, mîn hêrre, sol dich sehen.'

Verse: 3983    Rûal der höfsche guote
Verse: 3984    der gedâhte in sînem muote:

Verse: 3985    'mîn nacketage enwirret niht,
Verse: 3986    swie mich der künec nu varnde siht,

Verse: 3987    er wirt mich gerne sehende
Verse: 3988    und wirde ich ime verjehende

Verse: 3989    umbe sînen neven, der hie stât.
Verse: 3990    swenne ich im alle mîne tât

Verse: 3991    von anegenge her gesage,
Verse: 3992    ez wirt vil schoene, daz ich trage.'

Verse: 3993    Tristan der nam in an die hant.
Verse: 3994    sîn bereitschaft unde sîn gewant

Verse: 3995    daz was, als ez dô mohte sîn:
Verse: 3996    ein vil armez rockelîn

Verse: 3997    beschaben und verslizzen,
Verse: 3998    wâ unde wâ zerizzen,

Verse: 3999    daz truog er âne mantel an.
Verse: 4000    diu cleider, diu der guote man

Verse: 4001    under sînem rocke truoc,
Verse: 4002    diu wâren armeclîch genuoc,

Verse: 4003    vernozzen und verselwet gâr.
Verse: 4004    von unruoche was sîn hâr

Verse: 4005    an houbete unde an barte
Verse: 4006    verwalken alsô harte,

Verse: 4007    als ob er wilde waere.
Verse: 4008    ouch gie der sagebaere

Verse: 4009    an vüezen unde an beinen bar.
Verse: 4010    dar zuo was er sô wetervar,

Verse: 4011    als alle die von rehte sint,
Verse: 4012    den hunger, vrost, sunne unde wint

Verse: 4013    ir varwe und ir lîch hât benomen.
Verse: 4014    alsus was er vür Marken komen,

Verse: 4015    daz er im under ougen sach.
Verse: 4016    Marke ze Tristande sprach:

Verse: 4017    'sag an, Tristan, wer ist der man?'
Verse: 4018    'mîn vater, hêrre' sprach Tristan.

Verse: 4019    'hâstu wâr?' 'jâ hêrre mîn.'
Verse: 4020    'der sol uns willekomen sîn!'

Verse: 4021    sprach aber der tugende rîche.
Verse: 4022    Rûal neig im hovelîche.

Verse: 4023    hie mite sô kam diu ritterschaft
Verse: 4024    zuo geloufen herhaft

Verse: 4025    und dâ mit al diu hoveschar,
Verse: 4026    und riefen alle sunder dar:

Verse: 4027    'sire, sire, dêu sal!'
Verse: 4028    nu wizzet doch daz, daz Rûal,

Verse: 4029    swie unhovebaere
Verse: 4030    gewandeshalp er waere,

Verse: 4031    er was iedoch zewâre
Verse: 4032    an lîbe und an gebâre

Verse: 4033    vollekomen unde rîch.
Verse: 4034    er was des lîbes edelîch,

Verse: 4035    an geliden und an geliune
Verse: 4036    gewahsen alse ein hiune.

Verse: 4037    sîn arme und sîniu bein wol lanc,
Verse: 4038    schoene unde hêrlîch was sîn ganc,

Verse: 4039    sîn lîp was aller wol gestalt.
Verse: 4040    ern was weder ze junc noch z' alt,

Verse: 4041    wan in der aller besten tugent,
Verse: 4042    dâ daz alter und diu jugent

Verse: 4043    dem lebene gebent die besten craft.
Verse: 4044    er was an rehter hêrschaft

Verse: 4045    aller keiser genôz.
Verse: 4046    sîn stimme alsam ein horn dôz,

Verse: 4047    sîn rede diu was vil wol besniten.
Verse: 4048    man sach in mit hêrlîchen siten

Verse: 4049    vor aller der hêrschefte stân.
Verse: 4050    er haete ouch ê alsam getân.

Verse: 4051    Hie huop sich michel rûnen
Verse: 4052    von rittern und barûnen.

Verse: 4053    si redeten hin, si redeten her:
Verse: 4054    'jâ' sprâchen s' alle 'und ist daz der?

Verse: 4055    ist daz der höfsche koufman,
Verse: 4056    von dem uns sîn sun Tristan

Verse: 4057    sô manege tugende hât geseit?
Verse: 4058    wir haben von sîner vrümekeit

Verse: 4059    maere unde maere vil vernomen.
Verse: 4060    wie ist er alsus ze hove komen?'

Verse: 4061    und spelleten sus unde sô.
Verse: 4062    der rîche künec der hiez in dô

Verse: 4063    vüeren ze kemenâten
Verse: 4064    und hiez in dâ berâten

Verse: 4065    mit rîlîcher waete.
Verse: 4066    Tristan in schiere haete

Verse: 4067    schône gebadet unde gecleit.
Verse: 4068    ein hüetelîn was dâ bereit.

Verse: 4069    ûf sîn houbet sazte er daz
Verse: 4070    und gestuont ouch daz nie manne baz,

Verse: 4071    wan er was under ougen rîch.
Verse: 4072    sîn geschepfede was hêrlîch.

Verse: 4073    Tristan der nam in an die hant
Verse: 4074    lieplîche, als ez im was gewant,

Verse: 4075    und vuorte in wider ze Marke.
Verse: 4076    nu begunde er in dô starke

Verse: 4077    und sêre wol gevallen.
Verse: 4078    si sprâchen under in allen:

Verse: 4079    'nu kieset, wie schiere edeliu wât
Verse: 4080    den man ze lobe gestellet hât!

Verse: 4081    diu cleider stânt dem koufman
Verse: 4082    wol unde lobelîchen an.

Verse: 4083    ouch ist er selbe hêrlîch.
Verse: 4084    wer weiz, ern sî vil tugende rîch.

Verse: 4085    er gebâret diu gelîche wol,
Verse: 4086    ob man der wârheit jehen sol.

Verse: 4087    nu seht, wie hêrlîche er gât,
Verse: 4088    wie schoene gebaerde er hât

Verse: 4089    in edelem gewande,
Verse: 4090    und niuwan an Tristande

Verse: 4091    dâ kieset sîne tugende an.
Verse: 4092    wie kunde ein werbender man

Verse: 4093    sîn kint sô schône erzogen hân,
Verse: 4094    ezn müeze ûz edelem herzen gân?'

Verse: 4095    Nu haete man wazzer genomen
Verse: 4096    und was der künec ze tische komen.

Verse: 4097    sînen gast Rûâlen sazte er sâ
Verse: 4098    ze sînem tische und hiez im dâ

Verse: 4099    höfschlîche dienen unde wol,
Verse: 4100    als man dem höfschen dienen sol.

Verse: 4101    'Tristan' sprach er 'gâ balde dar,
Verse: 4102    nim selbe dînes vater war!'

Verse: 4103    deiswâr ich weiz wol, daz geschach.
Verse: 4104    elliu diu êre und daz gemach,

Verse: 4105    daz er 'm erbieten kunde,
Verse: 4106    daz tete er, als er im gunde.

Verse: 4107    ouch az Rûal der guote
Verse: 4108    mit willeclîchem muote,

Verse: 4109    wan Tristan tete in vröudehaft.
Verse: 4110    Tristan der was sîn wirtschaft.

Verse: 4111    daz er Tristanden an sach,
Verse: 4112    daz was sîn meiste gemach.

Verse: 4113    und als man dô von tische gie,
Verse: 4114    der künec den gast mit rede bevie

Verse: 4115    und vrâgete in aller hande
Verse: 4116    beidiu von sînem lande

Verse: 4117    unde ouch umbe sîne vart.
Verse: 4118    und alse er in vrâgende wart,

Verse: 4119    diu ritterschaft losete elliu dar
Verse: 4120    und nam Rûâles maere war.

Verse: 4121    'Hêrre' sprach er 'es ist vür wâr
Verse: 4122    vil nâch wol vierdehalp jâr

Verse: 4123    sît des, daz ich von lande schiet.
Verse: 4124    und swar ich sider hin geriet,

Verse: 4125    dane gevrâgte ich keines maeres nie
Verse: 4126    wan des, dâ mite ich umbe gie

Verse: 4127    und daz mich her geleitet hât.'
Verse: 4128    'waz was daz?' 'Tristan, der hie stât.

Verse: 4129    und zwâre, hêrre, ich hân noch kint,
Verse: 4130    diu mîn von gotes halben sint,

Verse: 4131    und gan den guotes alse wol,
Verse: 4132    als kein man sînen kinden sol.

Verse: 4133    drî süne, waere ich gewesen bî in,
Verse: 4134    daz eteslîcher under in drin

Verse: 4135    iezuo wol ritter waere.
Verse: 4136    haete ich die halben swaere

Verse: 4137    erliten durch si alle drî,
Verse: 4138    swie vremede sô mir Tristan sî,

Verse: 4139    die ich durch in erliten hân,
Verse: 4140    es waere vil und vil getân.'

Verse: 4141    'vremede?' sprach der künic dô
Verse: 4142    'saget an, wie ist dem maere sô?

Verse: 4143    er ist iuwer sun doch, alse er giht?'
Verse: 4144    'nein hêrre, ern bestât mich niht,

Verse: 4145    wan alse vil: ich bin sîn man.'
Verse: 4146    Tristan erschrac und sach in an.

Verse: 4147    Aber sprach der künec: 'nu saget uns daz,
Verse: 4148    durch welhe schulde und umbe waz

Verse: 4149    habet ir die nôt durch in erliten,
Verse: 4150    iuwer wîp und iuwer kint vermiten,

Verse: 4151    als ir dâ jehet, sô lange vrist,
Verse: 4152    sît daz er iuwer sun niht ist?'

Verse: 4153    'hêrre, daz weiz got und ich.'
Verse: 4154    'nû vriunt, bewîset ouch mich!'

Verse: 4155    sprach aber der guote Marke
Verse: 4156    'es wundert mich starke.'

Verse: 4157    'wist ich' sprach der getriuwe
Verse: 4158    'ob ez mich niht geriuwe

Verse: 4159    und ob ez mir hie waere
Verse: 4160    ze sagene gebaere,

Verse: 4161    hêrre, ich möhte iu wunder sagen,
Verse: 4162    wie sich diz dinc hât her getragen

Verse: 4163    und wie ez sich gevüeget hât
Verse: 4164    umbe Tristanden, der hie stât.'

Verse: 4165    und al diu massenîe,
Verse: 4166    Marke und sîn barûnîe

Verse: 4167    die bâten an der stunde
Verse: 4168    alle alse ûz einem munde:

Verse: 4169    'saget an, saeliger man,
Verse: 4170    getriuwer man, wer ist Tristan?'

Verse: 4171    Der guote Rûal der sprach dô:
Verse: 4172    'hêrre, ez kam hie vor alsô,

Verse: 4173    als ir wol wizzet unde die,
Verse: 4174    die bî den zîten wâren hie,

Verse: 4175    daz mîn hêrre Riwalîn,
Verse: 4176    des man ich was und solte sîn,

Verse: 4177    ob ez got alsô wolte,
Verse: 4178    daz er noch leben solte,

Verse: 4179    dem wart von iuwer vrümekeit
Verse: 4180    sô vil und alsô vil geseit,

Verse: 4181    daz er mir sîn liut und sîn lant
Verse: 4182    allez bevalch in mîne hant.

Verse: 4183    sus kam er her ze lande,
Verse: 4184    wan er iuch gerne erkande,

Verse: 4185    und wart ingesinde hie.
Verse: 4186    sô wizzet ir wol, wie ez ergie

Verse: 4187    umbe die âventiure
Verse: 4188    der schoenen Blanschefliure,

Verse: 4189    wie er die ze vriunt gewan
Verse: 4190    und sî mit ime von hinne entran.

Verse: 4191    nu sî dô heim kâmen,
Verse: 4192    ein ander ze ê genâmen,

Verse: 4193    ( in mînem hûse daz geschach,
Verse: 4194    daz ichz und manic man sach)

Verse: 4195    dô bevalch er mir s' in mîne pflege.
Verse: 4196    sît her pflag ich ir alle wege,

Verse: 4197    sô ich iemer beste kunde.
Verse: 4198    zehant und an der stunde

Verse: 4199    warb er unde besande
Verse: 4200    eine reise in sînem lande

Verse: 4201    mit mâgen und mit mannen
Verse: 4202    und vuor ouch iesâ dannen

Verse: 4203    und wart in eime strîte erslagen,
Verse: 4204    als ir wol habet gehoeret sagen.

Verse: 4205    und als daz maere vür kam
Verse: 4206    und diu vil schoene vernam

Verse: 4207    wie ez gevaren waere,
Verse: 4208    diu tôtlîche swaere

Verse: 4209    sô sêre ir in ir herze sluoc,
Verse: 4210    Tristan hie stât, den sî dô truoc,

Verse: 4211    daz sî den von der nôt gewan
Verse: 4212    und lac sî selbe tôt dervan.'

Verse: 4213    Hie mite gie den getriuwen man
Verse: 4214    als inneclîcher jâmer an,

Verse: 4215    als er ez wol bescheinete,
Verse: 4216    wan er saz unde weinete,

Verse: 4217    als er ein kint waere.
Verse: 4218    ouch begunde von dem maere

Verse: 4219    den anderen allen
Verse: 4220    ir ougen über wallen.

Verse: 4221    der guote künic Marke
Verse: 4222    dem gieng ez alsô starke

Verse: 4223    mit jâmer in sîn herze,
Verse: 4224    daz ime der herzesmerze

Verse: 4225    mit trehenen ûz den ougen vlôz
Verse: 4226    und ime wange unde wât begôz.

Verse: 4227    Tristande was daz maere
Verse: 4228    vil inneclîche swaere

Verse: 4229    von anders nihte wan von dan,
Verse: 4230    daz er an dem getriuwen man

Verse: 4231    vater unde vaterwân
Verse: 4232    alsô verlorn solte hân.

Verse: 4233    Sus saz Rûal der guote
Verse: 4234    mit trûreclîchem muote

Verse: 4235    und seite dem gesinde
Verse: 4236    von dem vil armen kinde,

Verse: 4237    wie starke er des hiez nemen war,
Verse: 4238    dô ez diu muoter gebar;

Verse: 4239    wie er 'z an tougenlîcher stat
Verse: 4240    verbergen und verheln bat;

Verse: 4241    wie er ze maere werden liez,
Verse: 4242    den lantliuten sagen hiez,

Verse: 4243    ez waere in sîner muoter tôt;
Verse: 4244    wie er sînem wîbe gebôt,

Verse: 4245    als ich iu ê seite,
Verse: 4246    daz sî sich în leite,

Verse: 4247    als ein wîp kindes inne lît,
Verse: 4248    und daz sî nâch der selben zît

Verse: 4249    der werlde jehende waere,
Verse: 4250    daz sî daz kint gebaere;

Verse: 4251    wie sî mit ime ze kirchen gie,
Verse: 4252    und wie er dâ die toufe enpfie;

Verse: 4253    war umbe er Tristan wart genant;
Verse: 4254    wie er in sante in vremediu lant,

Verse: 4255    und swaz er vuoge kunde
Verse: 4256    mit handen und mit munde,

Verse: 4257    wie er in daz lêren hiez;
Verse: 4258    wie er in in dem schiffe liez

Verse: 4259    und wie er ime dâ wart genomen,
Verse: 4260    wie er nâch ime dar was komen

Verse: 4261    mit maneger arbeite.
Verse: 4262    Sus saz er unde seite

Verse: 4263    diz maere gar von ende her.
Verse: 4264    daz weinde Marke, daz weinde er,

Verse: 4265    daz weinden s' al gemeine.
Verse: 4266    niwan Tristan al eine,

Verse: 4267    der enmohte es niht beclagen,
Verse: 4268    swes er dâ gehôrte sagen.

Verse: 4269    in kam diu rede ze gâhes an.
Verse: 4270    swaz aber Rûal der guote man

Verse: 4271    dem gesinde erbermekeite
Verse: 4272    von den gelieben seite,

Verse: 4273    Canêle und Blanschefliure:
Verse: 4274    elliu diu âventiure

Verse: 4275    diu was hie wider cleine
Verse: 4276    niwan diu triuwe al eine,

Verse: 4277    die er nâch tôde an ime begie,
Verse: 4278    als ir wol habet gehoeret wie,

Verse: 4279    an ir beider kinde.
Verse: 4280    daz was dem ingesinde

Verse: 4281    diu meiste triuwe, die kein man
Verse: 4282    ze sîner hêrschefte ie gewan.

Verse: 4283    Nu disiu rede alsus geschach,
Verse: 4284    Marke zuo dem gaste sprach:

Verse: 4285    'nu hêrre, ist diser rede alsô?'
Verse: 4286    Rûal der guote bôt im dô

Verse: 4287    ein vingerlîn an sîne hant:
Verse: 4288    'nu hêrre' sprach er 'sît gemant

Verse: 4289    mîner rede und mîner maere.'
Verse: 4290    der guote und der gewaere

Verse: 4291    Marke der nam ez und sach ez an.
Verse: 4292    der jâmer, den er dô gewan,

Verse: 4293    der wart aber dô vester.
Verse: 4294    'â' sprach er 'süeziu swester,

Verse: 4295    diz vingerlîn daz gab ich dir,
Verse: 4296    und mîn vater der gab ez mir,

Verse: 4297    dô er an sînem tode lac.
Verse: 4298    disem maere ich wol gelouben mac.

Verse: 4299    Tristan, gâ her und küsse mich!
Verse: 4300    und zwâre, soltu leben und ich,

Verse: 4301    ich wil dîn erbevater sîn.
Verse: 4302    Blanschefliure, der muoter dîn,

Verse: 4303    und dînem vater Canêle,
Verse: 4304    den genâde got zer sêle

Verse: 4305    und geruoche in beiden samet geben
Verse: 4306    daz êweclîche lebende leben!

Verse: 4307    sît ez alsus gevaren ist,
Verse: 4308    daz doch dû mir worden bist

Verse: 4309    von der vil lieben swester mîn,
Verse: 4310    geruochet es mîn trehtîn,

Verse: 4311    sô wil ich iemer wesen vrô.'
Verse: 4312    Zem gaste sprach er aber dô:

Verse: 4313    'nû lieber vriunt, nû saget mir,
Verse: 4314    wer sît ir und wie heizet ir?'

Verse: 4315    'Rûal, hêrre.' 'Rûal?' 'jâ!'
Verse: 4316    hie mite versan sich Marke sâ,

Verse: 4317    wan er ouch ê in sînen tagen
Verse: 4318    von ime vil haete gehoeret sagen,

Verse: 4319    wie wîse und wie êrbaere
Verse: 4320    und wie getriuwe er waere,

Verse: 4321    und sprach: 'Rûal li foitenant?'
Verse: 4322    'jâ hêrre, alsô bin ich genant.'

Verse: 4323    unde der guote Marke hin
Verse: 4324    und kuste in unde enpfieng in

Verse: 4325    hêrlîche und alse im wol gezam.
Verse: 4326    diu hêrschaft al zehant dô kam

Verse: 4327    und kusten in besunder.
Verse: 4328    si begunden in ze wunder

Verse: 4329    mit armen enbrazieren,
Verse: 4330    höfschlîche salûieren:

Verse: 4331    'willekomen Rûal der werde,
Verse: 4332    ein wunder ûf der erde!'

Verse: 4333    Rûal was dâ willekomen.
Verse: 4334    nu haete ouch in der künec genomen

Verse: 4335    an sîne hant und leite in hin.
Verse: 4336    vil lieplîche sazte er in

Verse: 4337    ze sich an sîne sîten nider
Verse: 4338    und griffen an ir maere wider

Verse: 4339    und redeten aller hande
Verse: 4340    beidiu von Tristande

Verse: 4341    und ouch von Blanschefliure,
Verse: 4342    alle die âventiure,

Verse: 4343    waz Canêl unde Morgân
Verse: 4344    ein ander haeten getân

Verse: 4345    und wie daz ouch ein ende nam.
Verse: 4346    vil schiere ez an daz maere kam,

Verse: 4347    daz der künec Rûâle seite,
Verse: 4348    mit welher kündekeite

Verse: 4349    Tristan dar komen waere
Verse: 4350    und wie er seite maere,

Verse: 4351    sîn vater der waere ein koufman.
Verse: 4352    Rûal der sach Tristanden an:

Verse: 4353    'vriunt' sprach er 'ich hân lange
Verse: 4354    vil anclîch und vil ange

Verse: 4355    mîne marschandîse
Verse: 4356    in armeclîcher wîse

Verse: 4357    durch dînen willen her getriben.
Verse: 4358    deist aber allez nû beliben

Verse: 4359    an einem guoten ende.
Verse: 4360    dar umbe ich mîne hende

Verse: 4361    iemer ze gote bieten sol.'
Verse: 4362    Tristan der sprach: 'ich hoere wol:

Verse: 4363    sich machent disiu maere alsô,
Verse: 4364    daz ich ir spâte wirde vrô.

Verse: 4365    ich bin, alse ich hân vernomen,
Verse: 4366    ze wunderlîchen maeren komen.

Verse: 4367    ich hoere mînen vater sagen,
Verse: 4368    mîn vater der sî lange erslagen.

Verse: 4369    hie mite verzîhet er sich mîn.
Verse: 4370    sus muoz ich âne vater sîn,

Verse: 4371    zweier vetere, die ich gewunnen hân.
Verse: 4372    â vater unde vaterwân,

Verse: 4373    wie sît ir mir alsus benomen!
Verse: 4374    an den ich jach, mir waere komen

Verse: 4375    ein vater, an dem selben man
Verse: 4376    dâ verliuse ich zwêne veter an:

Verse: 4377    in unde den ich nie gesach.'
Verse: 4378    der guote marschalc aber dô sprach:

Verse: 4379    'wie nû, geselle Tristan,
Verse: 4380    lâ dise rede, dân ist niht an.

Verse: 4381    jâ bistu von der künfte mîn
Verse: 4382    werder, dan du wândest sîn,

Verse: 4383    und bist ir gêret iemer mê
Verse: 4384    und hâst doch zwêne veter als ê,

Verse: 4385    hie mînen hêrren unde mich.
Verse: 4386    er ist dîn vater, alsô bin ich,

Verse: 4387    volge et mîner lêre
Verse: 4388    und wis iemer mêre

Verse: 4389    allen künegen ebenhêr.
Verse: 4390    lâz alle rede und tuo nimêr:

Verse: 4391    mînen hêrren dînen oeheim
Verse: 4392    den bite, daz er dir helfe heim

Verse: 4393    und dich hie ritter mache.
Verse: 4394    wan dû maht dîner sache

Verse: 4395    sus hin wol selbe nemen war.
Verse: 4396    ir hêrren, sprechet alle dar,

Verse: 4397    daz ez mîn hêrre gerne tuo!'
Verse: 4398    sus sprâchen s' alle samet derzuo:

Verse: 4399    'hêrre, ez hât guote vuoge.
Verse: 4400    Tristan hât craft genuoge

Verse: 4401    und ist ein wol gewahsen man.'
Verse: 4402    der künec sprach: 'neve Tristan,

Verse: 4403    sag an, wie stât dîn muot hie zuo?
Verse: 4404    ist ez dir liep, daz ich ez tuo?'

Verse: 4405    'trût hêrre, ich sage iu mînen muot.
Verse: 4406    haete ich sô rîlîchez guot,

Verse: 4407    daz ich wol nâch dem willen mîn
Verse: 4408    und alsô ritter möhte sîn,

Verse: 4409    daz ich mich ritterlîches namen
Verse: 4410    noch er sich mîn niht dörfte schamen

Verse: 4411    und ritterlîchiu werdekeit
Verse: 4412    an mir niht würde nider geleit,

Verse: 4413    sô wolte ich gerne ritter sîn,
Verse: 4414    die müezige jugende mîn

Verse: 4415    üeben unde kêren
Verse: 4416    ze werltlîchen êren.

Verse: 4417    wan ritterschaft, alsô man seit,
Verse: 4418    diu muoz ie von der kintheit

Verse: 4419    nemen ir anegenge
Verse: 4420    oder sî wirt selten strenge.

Verse: 4421    daz ich mîn unversuochte jugent
Verse: 4422    ûf werdekeit unde ûf tugent

Verse: 4423    sô rehte selten güebet hân,
Verse: 4424    daz ist vil sêre missetân

Verse: 4425    und hân es an mich selben haz.
Verse: 4426    nu weiz ich doch nu lange daz:

Verse: 4427    senfte und ritterlîcher prîs
Verse: 4428    diu missehellent alle wîs

Verse: 4429    und mugen vil übele samet wesen.
Verse: 4430    ouch hân ich selbe wol gelesen,

Verse: 4431    daz êre wil des lîbes nôt.
Verse: 4432    gemach daz ist der êren tôt,

Verse: 4433    dâ man 's ze lange und ouch ze vil
Verse: 4434    in der kintheite pflegen wil.

Verse: 4435    und wizzet wol zewâre,
Verse: 4436    haete ich vor einem jâre

Verse: 4437    oder ê mîn dinc sô wol gewist,
Verse: 4438    als ez mir hie gesaget ist,

Verse: 4439    ez enwaere niht biz her gespart.
Verse: 4440    sît ez aber dô gesûmet wart,

Verse: 4441    so ist reht, daz ich mich noch erhol,
Verse: 4442    wan mîn dinc stât billîche wol

Verse: 4443    an lîbe und an dem muote.
Verse: 4444    got râte mir zem guote,

Verse: 4445    daz ich dem muote vollevar!'
Verse: 4446    Marke sprach: 'neve, nim selbe war,

Verse: 4447    sich, wie du werben woltest,
Verse: 4448    ob du künic wesen soltest

Verse: 4449    und hêrre über allez Curnewal.
Verse: 4450    sô sitzet hie dîn vater Rûal,

Verse: 4451    der ganze triuwe zuo dir hât,
Verse: 4452    der sî dîn râtgebe und dîn rât,

Verse: 4453    daz dîn dinc alsô vollegê,
Verse: 4454    daz ez nâch dînem willen stê.

Verse: 4455    vil lieber neve Tristan,
Verse: 4456    nim dich niht armuotes an.

Verse: 4457    wan Parmenîe daz ist dîn
Verse: 4458    und muoz dîn eigen iemer sîn,

Verse: 4459    sol ich und dîn vater Rûal leben.
Verse: 4460    dar zuo wil ich dir stiure geben.

Verse: 4461    mîn lant, mîn liut und swaz ich hân,
Verse: 4462    trût neve, daz sî dir ûf getân.

Verse: 4463    wiltû dîn herze kêren
Verse: 4464    ze vorderlîchen êren

Verse: 4465    und ist dîn wille alsô getân,
Verse: 4466    als ich von dir vernomen hân,

Verse: 4467    sone spar des mînen niht dervor.
Verse: 4468    Curnwal daz sî dîn urbor,

Verse: 4469    mîn crône sî dîn zinsaerîn.
Verse: 4470    wiltû zer werlde gewerdet sîn,

Verse: 4471    sô schaffe et umbe rîchen muot.
Verse: 4472    ich gibe dir rîlîchez guot.

Verse: 4473    sich, dû hâst keiserlîche habe,
Verse: 4474    nun ganc dir selber nihtes abe,

Verse: 4475    bistû dir selbem alsô holt
Verse: 4476    und hâstu muot, als du solt

Verse: 4477    unde als dû mir hâst verjehen,
Verse: 4478    daz hân ich schiere an dir gesehen.

Verse: 4479    sich, vinde ich hêrren muot an dir,
Verse: 4480    du vindest iemer mêre an mir

Verse: 4481    dînes willen vollen schrîn.
Verse: 4482    Tintajêl muoz iemer sîn

Verse: 4483    dîn triskamere und dîn trisor.
Verse: 4484    gesprengestû mir rehte vor

Verse: 4485    mit rîlîchem muote,
Verse: 4486    volge ich dir niht mit guote,

Verse: 4487    sô muoz mir allez daz zegân,
Verse: 4488    daz ich ze Curnewâle hân.'

Verse: 4489    Hie wart genigen rîche.
Verse: 4490    si nigen al gelîche,

Verse: 4491    die bî dem maere wâren.
Verse: 4492    si buten im unde bâren

Verse: 4493    êre unde lop mit schalle.
Verse: 4494    'künec Marke' sprachen s' alle,

Verse: 4495    'du sprichest, als der höfsche sol.
Verse: 4496    diu wort gezement der crône wol.

Verse: 4497    dîn zunge, dîn herze und dîn hant
Verse: 4498    die gebieten iemer über diz lant!

Verse: 4499    wis iemer künic über Curnwal!'
Verse: 4500    der getriuwe marschalc dan Rûal

Verse: 4501    und sîn junchêrre Tristan
Verse: 4502    die griffen ir gescheffede an

Verse: 4503    nâch solher rîcheite,
Verse: 4504    als in der künec vür leite

Verse: 4505    und in diu mâze was gegeben.
Verse: 4506    Nu strîte ich umbe ir beider leben

Verse: 4507    beidiu des vater unde des suns.
Verse: 4508    wan eteswer der vrâget uns

Verse: 4509    durch daz, daz alter unde jugent
Verse: 4510    selten gehellent einer tugent

Verse: 4511    und jugent daz guot unruochet,
Verse: 4512    dâ ez daz alter suochet,

Verse: 4513    wie sî sich under in beiden
Verse: 4514    ie kunden sô bescheiden,

Verse: 4515    daz ietwederre besunder
Verse: 4516    sîner ger hier under

Verse: 4517    und sînes rehtes wielte,
Verse: 4518    sô daz Rûal behielte

Verse: 4519    die mâze an dem guote
Verse: 4520    und Tristan sînem muote

Verse: 4521    mit vollem guote vollezüge?
Verse: 4522    diz prüeve ich schiere sunder lüge.

Verse: 4523    Rûal unde Tristan
Verse: 4524    die truogen beide ein ander an

Verse: 4525    als ebenwillegen muot,
Verse: 4526    daz ir dewederer übel noch guot

Verse: 4527    weder riet noch râten solte,
Verse: 4528    wan alse der ander wolte.

Verse: 4529    Rûal der tugende erkande
Verse: 4530    der geloubete Tristande

Verse: 4531    und sach die jugende an im an.
Verse: 4532    sô entweich aber Tristan

Verse: 4533    den tugenden an Rûâle.
Verse: 4534    diz truoc si z' einem mâle

Verse: 4535    und z' einem zil gemeiner ger,
Verse: 4536    daz dirre gerte alse der.

Verse: 4537    alsus sô wâren s' under in zwein
Verse: 4538    mit willen und mit muote al ein.

Verse: 4539    hie von wart alter unde jugent
Verse: 4540    gehellesam an einer tugent.

Verse: 4541    alhie viel hôher muot in sin.
Verse: 4542    hie mite behielten si under in

Verse: 4543    Tristan sîn reht an muote,
Verse: 4544    Rûal die mâze an guote,

Verse: 4545    daz ir ietwederer an der stete
Verse: 4546    niht wider sînem rehte tete.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.