TITUS
Gottfried von Strassburg, Tristan
Part No. 8
Previous part

Chapter: 8 
8: Tristans Schwertleite


Verse: 4547    Sus greif Rûal und Tristan
Verse: 4548    ir dinc bescheidenlîchen an,

Verse: 4549    als ez in beiden was gewant.
Verse: 4550    si gewunnen harnasch unde gewant

Verse: 4551    innerhalp den drîzec tagen,
Verse: 4552    daz drîzec ritter solten tragen,

Verse: 4553    die sich der höfsche Tristan
Verse: 4554    ze gesellen wolte nemen an.

Verse: 4555    Swer mich nu vrâget umbe ir cleit
Verse: 4556    und umbe ir cleider rîcheit,

Verse: 4557    wie diu zesamene wurden brâht,
Verse: 4558    des bin ich kurze bedâht,

Verse: 4559    dem sage ich, als daz maere giht.
Verse: 4560    sage ich im anders iht,

Verse: 4561    sô widertrîbe er mich dar an
Verse: 4562    und sage er selbe baz dâ van.

Verse: 4563    ir cleider wâren ûf geleit
Verse: 4564    mit vierhande rîcheit

Verse: 4565    und was der vierer iegelîch
Verse: 4566    in ir ambete rîch.

Verse: 4567    daz eine daz was hôher muot;
Verse: 4568    daz ander daz was vollez guot;

Verse: 4569    daz dritte was bescheidenheit,
Verse: 4570    diu disiu zwei zesamene sneit;

Verse: 4571    daz vierde daz was höfscher sin,
Verse: 4572    der naete disen allen drin.

Verse: 4573    si worhten alle viere
Verse: 4574    vil rehte in ir maniere.

Verse: 4575    der hôhe muot der gerte,
Verse: 4576    daz volle guot gewerte,

Verse: 4577    bescheidenheit schuof unde sneit,
Verse: 4578    der sin der naete ir aller cleit

Verse: 4579    und ander ir feitiure,
Verse: 4580    baniere und covertiure

Verse: 4581    und anderen der ritter rât,
Verse: 4582    der den ritter bestât.

Verse: 4583    swaz sô daz ros und ouch den man
Verse: 4584    ze rittere geprüeven kan,

Verse: 4585    der geziuc was aller sêre rîch
Verse: 4586    und alsô rîch, daz iegelîch

Verse: 4587    einem künege wol gezaeme,
Verse: 4588    daz er swert dar inne naeme.

Verse: 4589    Sît die gesellen sint bereit
Verse: 4590    mit bescheidenlîcher rîcheit,

Verse: 4591    wie gevâhe ich nû mîn sprechen an,
Verse: 4592    daz ich den werden houbetman

Verse: 4593    Tristanden sô bereite
Verse: 4594    ze sîner swertleite,

Verse: 4595    daz man ez gerne verneme
Verse: 4596    und an dem maere wol gezeme?

Verse: 4597    ine weiz, waz ich dâ von gesage,
Verse: 4598    daz iu gelîche und iu behage

Verse: 4599    und schône an disem maere stê.
Verse: 4600    wan bî mînen tagen und ê

Verse: 4601    hât man sô rehte wol geseit
Verse: 4602    von werltlîcher zierheit,

Verse: 4603    von rîchem geraete:
Verse: 4604    ob ich der sinne haete

Verse: 4605    zwelve, der ich einen hân,
Verse: 4606    mit den ich umbe solte gân,

Verse: 4607    und waere daz gevüege,
Verse: 4608    daz ich zwelf zungen trüege

Verse: 4609    in mîn eines munde,
Verse: 4610    der iegelîchiu kunde

Verse: 4611    sprechen, alse ich sprechen kan,
Verse: 4612    ine wiste wie gevâhen an,

Verse: 4613    daz ich von rîcheite
Verse: 4614    sô guotes iht geseite,

Verse: 4615    mane haete baz dâ von geseit.
Verse: 4616    jâ ritterlîchiu zierheit

Verse: 4617    diu ist sô manege wîs beschriben
Verse: 4618    und ist mit rede alsô zetriben,

Verse: 4619    daz ich niht kan gereden dar abe,
Verse: 4620    da von kein herze vröude habe.

Verse: 4621    Hartman der Ouwaere,
Verse: 4622    âhî, wie der diu maere

Verse: 4623    beide ûzen unde innen
Verse: 4624    mit worten und mit sinnen

Verse: 4625    durchverwet und durchzieret!
Verse: 4626    wie er mit rede figieret

Verse: 4627    der âventiure meine!
Verse: 4628    wie lûter und wie reine

Verse: 4629    sîniu cristallînen wortelîn
Verse: 4630    beidiu sint und iemer müezen sîn!

Verse: 4631    si koment den man mit siten an,
Verse: 4632    si tuont sich nâhen zuo dem man

Verse: 4633    und liebent rehtem muote.
Verse: 4634    swer guote rede ze guote

Verse: 4635    und ouch ze rehte kan verstân,
Verse: 4636    der muoz dem Ouwaere lân

Verse: 4637    sîn schapel und sîn lôrzwî.
Verse: 4638    swer nû des hasen geselle sî

Verse: 4639    und ûf der wortheide
Verse: 4640    hôchsprünge und wîtweide

Verse: 4641    mit bickelworten welle sîn
Verse: 4642    und ûf daz lôrschapelekîn

Verse: 4643    wân âne volge welle hân,
Verse: 4644    der lâze uns bî dem wâne stân.

Verse: 4645    wir wellen an der kür ouch wesen.
Verse: 4646    wir, die die bluomen helfen lesen,

Verse: 4647    mit den daz selbe loberîs
Verse: 4648    undervlohten ist in bluomen wîs,

Verse: 4649    wir wellen wizzen, wes er ger.
Verse: 4650    wan swer es ger, der springe her

Verse: 4651    und stecke sîne bluomen dar.
Verse: 4652    sô nemen wir an den bluomen war,

Verse: 4653    ob sî sô wol dar an gezemen,
Verse: 4654    daz wirz dem Ouwaere nemen

Verse: 4655    und geben ime daz lôrzwî.
Verse: 4656    sît aber noch nieman komen sî,

Verse: 4657    der ez billîcher süle hân,
Verse: 4658    sô helfe iu got, sô lâzen 'z stân.

Verse: 4659    wir ensuln ez nieman lâzen tragen,
Verse: 4660    sîniu wort ensîn vil wol getwagen,

Verse: 4661    sîn rede ensî ebene unde sleht,
Verse: 4662    ob ieman schône und ûfreht

Verse: 4663    mit ebenen sinnen dar getrabe,
Verse: 4664    daz er dar über iht besnabe.

Verse: 4665    vindaere wilder maere,
Verse: 4666    der maere wildenaere,

Verse: 4667    die mit den ketenen liegent
Verse: 4668    und stumpfe sinne triegent,

Verse: 4669    die golt von swachen sachen
Verse: 4670    den kinden kunnen machen

Verse: 4671    und ûz der bühsen giezen
Verse: 4672    stoubîne mergriezen:

Verse: 4673    die bernt uns mit dem stocke schate,
Verse: 4674    niht mit dem grüenem meienblate,

Verse: 4675    mit zwîgen noch mit esten.
Verse: 4676    ir schate der tuot den gesten

Verse: 4677    vil selten in den ougen wol.
Verse: 4678    ob man der wârheit jehen sol,

Verse: 4679    dâne gât niht guotes muotes van,
Verse: 4680    dâne lît niht herzelustes an.

Verse: 4681    ir rede ist niht alsô gevar,
Verse: 4682    daz edele herze iht lache dar.

Verse: 4683    die selben wildenaere
Verse: 4684    si müezen tiutaere

Verse: 4685    mit ir maeren lâzen gân.
Verse: 4686    wirn mugen ir dâ nâch niht verstân,

Verse: 4687    als man si hoeret unde siht.
Verse: 4688    sône hân wir ouch der muoze niht,

Verse: 4689    daz wir die glôse suochen
Verse: 4690    in den swarzen buochen.

Verse: 4691    Noch ist der verwaere mêr:
Verse: 4692    von Steinahe Blikêr,

Verse: 4693    diu sînen wort sint lussam.
Verse: 4694    si worhten vrouwen an der ram

Verse: 4695    von golde und ouch von sîden.
Verse: 4696    man möhte s' undersnîden

Verse: 4697    mit criecheschen borten.
Verse: 4698    er hât den wunsch von worten.

Verse: 4699    sînen sin den reinen
Verse: 4700    ich waene daz in feinen

Verse: 4701    ze wundere haben gespunnen
Verse: 4702    und haben in in ir brunnen

Verse: 4703    geliutert unde gereinet.
Verse: 4704    er ist binamen gefeinet.

Verse: 4705    sîn zunge, diu die harpfen treit,
Verse: 4706    diu hât zwô volle saelekeit:

Verse: 4707    daz sint diu wort, daz ist der sin.
Verse: 4708    diu zwei diu harpfent under in

Verse: 4709    ir maere in vremedem prîse.
Verse: 4710    der selbe wortwîse,

Verse: 4711    nemt war, wie der hier under
Verse: 4712    an dem umbehange wunder

Verse: 4713    mit spaeher rede entwirfet;
Verse: 4714    wie er diu mezzer wirfet

Verse: 4715    mit behendeclîchen rîmen!
Verse: 4716    wie kan er rîme lîmen,

Verse: 4717    als ob si dâ gewahsen sîn!
Verse: 4718    ez ist noch der geloube mîn,

Verse: 4719    daz er buoch unde buochstabe
Verse: 4720    vür vedern an gebunden habe;

Verse: 4721    wan wellet ir sîn nemen war,
Verse: 4722    sîniu wort diu sweiment alse der ar.

Verse: 4723    Wen mag ich nû mêr ûz gelesen?
Verse: 4724    ir ist und ist genuoc gewesen

Verse: 4725    vil sinnic und vil rederîch.
Verse: 4726    von Veldeken Heinrîch

Verse: 4727    der sprach ûz vollen sinnen.
Verse: 4728    wie wol sang er von minnen!

Verse: 4729    wie schône er sînen sin besneit!
Verse: 4730    ich waene, er sîne wîsheit

Verse: 4731    ûz Pegases urspringe nam,
Verse: 4732    von dem diu wîsheit elliu kam.

Verse: 4733    ine hân sîn selbe niht gesehen;
Verse: 4734    nu hoere ich aber die besten jehen

Verse: 4735    die, die bî sînen jâren
Verse: 4736    und sît her meister wâren,

Verse: 4737    die selben gebent im einen prîs:
Verse: 4738    er inpfete daz erste rîs

Verse: 4739    in tiutischer zungen.
Verse: 4740    dâ von sît este ersprungen,

Verse: 4741    von den die bluomen kâmen,
Verse: 4742    dâ sî die spaehe ûz nâmen

Verse: 4743    der meisterlîchen vünde.
Verse: 4744    und ist diu selbe künde

Verse: 4745    sô wîten gebreitet,
Verse: 4746    sô manege wîs zeleitet,

Verse: 4747    daz alle, die nu sprechent,
Verse: 4748    daz die den wunsch dâ brechent

Verse: 4749    von bluomen und von rîsen
Verse: 4750    an worten unde an wîsen.

Verse: 4751    Der nahtegalen der ist vil,
Verse: 4752    von den ich nû niht sprechen wil:

Verse: 4753    si enhoerent niht ze dirre schar.
Verse: 4754    durch daz sprich ich niht anders dar,

Verse: 4755    wan daz ich iemer sprechen sol:
Verse: 4756    sî kunnen alle ir ambet wol

Verse: 4757    und singent wol ze prîse
Verse: 4758    ir süeze sumerwîse.

Verse: 4759    ir stimme ist lûter unde guot,
Verse: 4760    si gebent der werlde hôhen muot

Verse: 4761    und tuont rehte in dem herzen wol.
Verse: 4762    diu werlt diu waere unruoches vol

Verse: 4763    und lebete rehte als âne ir danc
Verse: 4764    wan der vil liebe vogelsanc.

Verse: 4765    der ermant vil dicke den man,
Verse: 4766    der ie ze liebe muot gewan,

Verse: 4767    beidiu liebes unde guotes
Verse: 4768    und maneger hande muotes,

Verse: 4769    der edelem herzen sanfte tuot.
Verse: 4770    ez wecket vriuntlîchen muot,

Verse: 4771    hie von kumt inneclîch gedanc,
Verse: 4772    sô der vil liebe vogelsanc

Verse: 4773    der werlde ir lieb beginnet zalen.
Verse: 4774    'nu sprechet umb die nahtegalen!'

Verse: 4775    die sint ir dinges wol bereit
Verse: 4776    und kunnen alle ir senede leit

Verse: 4777    sô wol besingen unde besagen.
Verse: 4778    welhiu sol ir baniere tragen,

Verse: 4779    sît diu von Hagenouwe,
Verse: 4780    ir aller leitevrouwe

Verse: 4781    der werlde alsus geswigen ist,
Verse: 4782    diu aller doene houbetlist

Verse: 4783    versigelt in ir zungen truoc?
Verse: 4784    von der denk ich vil unde genuoc,

Verse: 4785    ( ich meine aber von ir doenen
Verse: 4786    den süezen, den schoenen),

Verse: 4787    wâ sî der sô vil naeme,
Verse: 4788    wannen ir daz wunder kaeme

Verse: 4789    sô maneger wandelunge.
Verse: 4790    ich waene, Orphêes zunge,

Verse: 4791    diu alle doene kunde,
Verse: 4792    diu doenete ûz ir munde.

Verse: 4793    Sît daz man der nû niht enhât,
Verse: 4794    sô gebet uns eteslîchen rât!

Verse: 4795    ein saelic man der spreche dar:
Verse: 4796    wer leitet nû die lieben schar?

Verse: 4797    wer wîset diz gesinde?
Verse: 4798    ich waene, ich sî wol vinde,

Verse: 4799    diu die baniere vüeren sol.
Verse: 4800    ir meisterinne kan ez wol,

Verse: 4801    diu von der Vogelweide.
Verse: 4802    hî wie diu über heide

Verse: 4803    mit hôher stimme schellet!
Verse: 4804    waz wunders sî stellet!

Verse: 4805    wie spaehe s' organieret!
Verse: 4806    wie s' ir sanc wandelieret E

Verse: 4807    ich meine aber in dem dône
Verse: 4808    dâ her von Zythêrône,

Verse: 4809    dâ diu gotinne Minne
Verse: 4810    gebiutet ûf und inne!

Verse: 4811    diust dâ ze hove kameraerîn.
Verse: 4812    diu sol ir leitaerinne sîn!

Verse: 4813    diu wîset sî ze wunsche wol,
Verse: 4814    diu weiz wol, wâ si suochen sol

Verse: 4815    der minnen melodîe.
Verse: 4816    si unde ir cumpanîe

Verse: 4817    die müezen sô gesingen,
Verse: 4818    daz sî ze vröuden bringen

Verse: 4819    ir trûren unde ir senedez clagen.
Verse: 4820    und daz geschehe bî mînen tagen!

Verse: 4821    Nû hân ich rede genuoge
Verse: 4822    von guoter liute vuoge

Verse: 4823    gevüegen liuten vür geleit.
Verse: 4824    ie noch ist Tristan umbereit

Verse: 4825    ze sîner swertleite.
Verse: 4826    ine weiz, wie in bereite.

Verse: 4827    der sin wil niender dar zuo.
Verse: 4828    sone weiz diu zunge, waz si tuo

Verse: 4829    al eine und âne des sinnes rât,
Verse: 4830    von dem s' ir ambet allez hât.

Verse: 4831    waz aber in werre, in beiden,
Verse: 4832    des wil ich iuch bescheiden:

Verse: 4833    si zwei hât daz verirret,
Verse: 4834    daz tûsenden wirret.

Verse: 4835    dem man, der niht wol reden kan,
Verse: 4836    kumt dem ein rederîcher man,

Verse: 4837    im erlischet in dem munde
Verse: 4838    daz selbe, daz er kunde.

Verse: 4839    ich waene, mir ist alsam geschehen.
Verse: 4840    ich sihe und hân biz her gesehen

Verse: 4841    sô manegen schône redenden man,
Verse: 4842    daz ich des niht gereden kan,

Verse: 4843    ezn dunke mich dâ wider ein wint,
Verse: 4844    als nû die liute redende sint.

Verse: 4845    man sprichet nû sô rehte wol,
Verse: 4846    daz ich von grôzem rehte sol

Verse: 4847    mîner worte nemen war
Verse: 4848    und sehen, daz s' alsô sîn gevar,

Verse: 4849    als ich wolte, daz si waeren
Verse: 4850    an vremeder liute maeren

Verse: 4851    und alse ich rede geprüeven kan
Verse: 4852    an einem anderen man.

Verse: 4853    nune weiz ich, wie 's beginne.
Verse: 4854    mîn zunge und mîne sinne

Verse: 4855    die enmugen mir niht ze helfe komen.
Verse: 4856    mir ist von worten genomen

Verse: 4857    enmitten ûz dem munde
Verse: 4858    daz selbe, daz ich kunde.

Verse: 4859    Hie zuo enweiz ich, waz getuo,
Verse: 4860    ich entuo daz eine dar zuo,

Verse: 4861    deiswâr daz ich noch nie getete:
Verse: 4862    mîne vlêhe und mîne bete

Verse: 4863    die wil ich êrste senden
Verse: 4864    mit herzen und mit henden

Verse: 4865    hin wider Elicône
Verse: 4866    ze dem niunvalten trône,

Verse: 4867    von dem die brunnen diezent,
Verse: 4868    ûz den die gâbe vliezent

Verse: 4869    der worte unde der sinne.
Verse: 4870    der wirt, die niun wirtinne,

Verse: 4871    Apolle und die Camênen,
Verse: 4872    der ôren niun Sirênen,

Verse: 4873    die dâ ze hove der gâben pflegent,
Verse: 4874    ir genâde teilent unde wegent,

Verse: 4875    als s' ir der werlde gunnen,
Verse: 4876    die gebent ir sinne brunnen

Verse: 4877    sô volleclîche manegem man,
Verse: 4878    daz sî mir einen trahen dâ van

Verse: 4879    mit êren niemer mugen versagen.
Verse: 4880    und mag ouch ich den dâ bejagen,

Verse: 4881    so behalte ich mîne stat dâ wol,
Verse: 4882    da man sî mit rede behalten sol.

Verse: 4883    der selbe trahen der eine
Verse: 4884    der ist ouch nie sô cleine,

Verse: 4885    er enmüeze mir verrihten,
Verse: 4886    verrihtende beslihten

Verse: 4887    beidiu zungen unde sin,
Verse: 4888    an den ich sus entrihtet bin.

Verse: 4889    diu mînen wort muoz er mir lân
Verse: 4890    durch den vil liehten tegel gân

Verse: 4891    der camênischen sinne
Verse: 4892    und muoz mir diu dar inne

Verse: 4893    ze vremedem wunder eiten,
Verse: 4894    dem wunsche bereiten

Verse: 4895    als golt von Arâbe.
Verse: 4896    die selben gotes gâbe

Verse: 4897    des wâren Elicônes,
Verse: 4898    des oberesten trônes,

Verse: 4899    von dem diu wort enspringent,
Verse: 4900    diu durch daz ôre clingent

Verse: 4901    und in daz herze lachent,
Verse: 4902    die rede durchliuhtec machent

Verse: 4903    als eine erwelte gimme,
Verse: 4904    die geruochen mîne stimme

Verse: 4905    und mîne bete erhoeren
Verse: 4906    oben in ir himelkoeren

Verse: 4907    und rehte als ich gebeten hân!
Verse: 4908    Nu diz lât allez sîn getân,

Verse: 4909    daz ich des alles sî gewert,
Verse: 4910    des ich von worten hân gegert,

Verse: 4911    und habe des alles vollen hort,
Verse: 4912    senfte allen ôren mîniu wort,

Verse: 4913    ber iegelîchem herzen schate
Verse: 4914    mit dem ingrüenen lindenblate,

Verse: 4915    gê mîner rede als ebene mite,
Verse: 4916    daz ich ir an iegelîchem trite

Verse: 4917    rûme unde reine ir strâze
Verse: 4918    noch an ir strâze enlâze

Verse: 4919    dekeiner slahte stoubelîn,
Verse: 4920    ezn müeze dan gescheiden sîn,

Verse: 4921    und daz si niuwan ûfe clê
Verse: 4922    unde ûf liehten bluomen gê;

Verse: 4923    dannoch gewende ich mînen sin,
Verse: 4924    sô cleine als ich gesinnet bin,

Verse: 4925    kûme oder niemer dar an,
Verse: 4926    dar an sich alsô manic man

Verse: 4927    versuochet und verpirset hât.
Verse: 4928    deiswâr ich sol es haben rât.

Verse: 4929    Wan kêrte ich alle mîne craft
Verse: 4930    ze ritters bereitschaft,

Verse: 4931    als weizgot maneger hât getân,
Verse: 4932    und seite iu daz, wie Vulkân

Verse: 4933    der wîse, der maere,
Verse: 4934    der guote listmachaere

Verse: 4935    Tristande sînen halsperc,
Verse: 4936    swert unde hosen und ander werc,

Verse: 4937    daz den ritter sol bestân,
Verse: 4938    durch sîne hende lieze gân

Verse: 4939    schône und nâch meisterlîchem site;
Verse: 4940    wie er 'm entwürfe unde snite,

Verse: 4941    den kuonheit nie bevilte,
Verse: 4942    den eber an dem schilte;

Verse: 4943    wie er 'm den helm betihte
Verse: 4944    und oben dar ûf rihte

Verse: 4945    al nâch der minnen quâle
Verse: 4946    die viurîne strâle;

Verse: 4947    wie er im al besunder
Verse: 4948    ze wunsche und ze wunder

Verse: 4949    bereite ein und ander
Verse: 4950    und wie mîn vrou Cassander,

Verse: 4951    diu wîse Troiaerinne,
Verse: 4952    ir liste und alle ir sinne

Verse: 4953    dar zuo haete gewant,
Verse: 4954    daz sî Tristande sîn gewant

Verse: 4955    berihte und bereite
Verse: 4956    nâch solher wîsheite,

Verse: 4957    sô si 'z aller beste
Verse: 4958    von ir sinnen weste,

Verse: 4959    der geist ze himele, als ich 'z las,
Verse: 4960    von den goten gefeinet was:

Verse: 4961    waz haete daz iht ander craft
Verse: 4962    dan alse ich die geselleschaft

Verse: 4963    Tristandes ê bereite
Verse: 4964    ze sîner swertleite?

Verse: 4965    mag ich die volge von iu hân,
Verse: 4966    sô ist mîn wân alsô getân,

Verse: 4967    und weiz daz wol: muot unde guot,
Verse: 4968    swer zuo den zwein gerâten tuot

Verse: 4969    bescheidenheit und höfschen sin,
Verse: 4970    diu vieriu würkent under in

Verse: 4971    als wol als ieman ander.
Verse: 4972    jâ Vulkân und Cassander

Verse: 4973    diu zwei bereiten ritter nie
Verse: 4974    baz ze prîse danne ouch die.

Verse: 4975    Sît nû die vier rîcheite
Verse: 4976    rîlîche swertleite

Verse: 4977    sus kunnen gesprûvieren,
Verse: 4978    so bevelhen wir in vieren

Verse: 4979    unsern vriunt Tristanden.
Verse: 4980    die nemen in ze handen,

Verse: 4981    bereiten uns den werden man,
Verse: 4982    sît ez niht bezzer werden kan,

Verse: 4983    mit dem geziuge und mit dem snite,
Verse: 4984    dâ sîne reitgesellen mite

Verse: 4985    sô schône sint bereitet.
Verse: 4986    sus sî Tristan geleitet

Verse: 4987    ze hove und ouch ze ringe,
Verse: 4988    mit allem sînem dinge

Verse: 4989    sînen gesellen ebengelîch,
Verse: 4990    ebenziere und ebenrîch.

Verse: 4991    ich meine aber an der waete,
Verse: 4992    die mannes hant dâ naete,

Verse: 4993    niht an der an gebornen wât,
Verse: 4994    diu von des herzen kamere gât,

Verse: 4995    die sî dâ heizent edelen muot,
Verse: 4996    diu den man wolgemuoten tuot

Verse: 4997    und werdet lîp unde leben.
Verse: 4998    diu wât wart den gesellen geben

Verse: 4999    dem hêrren ungelîche.
Verse: 5000    jâ weizgot der muotrîche,

Verse: 5001    der êregire Tristan
Verse: 5002    truoc sunderlîchiu cleider an

Verse: 5003    von gebâre und von gelâze
Verse: 5004    gezieret ûz der mâze.

Verse: 5005    er haete s' alle an schoenen siten
Verse: 5006    unde an tugenden übersniten.

Verse: 5007    und iedoch an der waete,
Verse: 5008    die mannes hant dâ naete,

Verse: 5009    da enwas niht underscheidunge an.
Verse: 5010    des truoc der werde houbetman

Verse: 5011    in allen gelîche.
Verse: 5012    Sus was der muotrîche,

Verse: 5013    der voget von Parmenîe
Verse: 5014    und al sîn massenîe

Verse: 5015    ze münster mit ein ander komen
Verse: 5016    und haeten messe vernomen

Verse: 5017    und ouch enpfangen den segen,
Verse: 5018    des man in dâ solte pflegen.

Verse: 5019    Marke nam dô Tristanden
Verse: 5020    sînen neven ze handen,

Verse: 5021    swert unde sporn stricte er im an.
Verse: 5022    'sich' sprach er 'neve Tristan,

Verse: 5023    sît dir nû swert gesegenet ist
Verse: 5024    und sît dû ritter worden bist,

Verse: 5025    nû bedenke ritterlîchen prîs
Verse: 5026    und ouch dich selben, wer dû sîs.

Verse: 5027    dîn geburt und dîn edelkeit
Verse: 5028    sî dînen ougen vür geleit.

Verse: 5029    wis diemüete und wis unbetrogen,
Verse: 5030    wis wârhaft und wis wolgezogen;

Verse: 5031    den armen den wis iemer guot,
Verse: 5032    den rîchen iemer hochgemuot;

Verse: 5033    ziere unde werde dînen lîp,
Verse: 5034    êre unde minne elliu wîp;

Verse: 5035    wis milte unde getriuwe
Verse: 5036    und iemer dar an niuwe!

Verse: 5037    wan ûf mîn êre nim ich daz,
Verse: 5038    daz golt noch zobel gestuont nie baz

Verse: 5039    dem sper unde dem schilte
Verse: 5040    dan triuwe unde milte.'

Verse: 5041    Hie mite bôt er im den schilt dar.
Verse: 5042    er kuste in und sprach: 'neve, nû var

Verse: 5043    und gebe dir got durch sîne craft
Verse: 5044    heil ze dîner ritterschaft!

Verse: 5045    wis iemer höfsch, wis iemer vrô!'
Verse: 5046    Tristan verrihte aber dô

Verse: 5047    sîne gesellen an der stete,
Verse: 5048    rehte als in sîn oeheim tete,

Verse: 5049    an swerte, an sporn, an schilte.
Verse: 5050    diemüete, triuwe, milte

Verse: 5051    die leite er iegelîches kür
Verse: 5052    mit bescheidenlîcher lêre vür.

Verse: 5053    und enwart ouch dâ nimê gebiten.
Verse: 5054    gebuhurdieret unde geriten

Verse: 5055    wart dâ, zewâre deist mîn wân.
Verse: 5056    wie s' aber von ringe liezen gân,

Verse: 5057    wie sî mit scheften staechen,
Verse: 5058    wie vil sî der zebraechen E

Verse: 5059    daz suln die garzûne sagen:
Verse: 5060    die hulfen ez zesamene tragen.

Verse: 5061    ine mag ir buhurdieren
Verse: 5062    niht allez becrôieren,

Verse: 5063    wan einen dienest biute ich in,
Verse: 5064    des ich in sêre willic bin:

Verse: 5065    daz sich ir aller êre
Verse: 5066    an allen dingen mêre

Verse: 5067    und in got ritterlîchez leben
Verse: 5068    z' ir ritterschefte müeze geben!





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.