TITUS
Gottfried von Strassburg, Tristan
Part No. 9
Previous part

Chapter: 9 
9: Heimfahrt und Rache


Verse: 5069    Truoc ieman lebender staete leit
Verse: 5070    bî staeteclîcher saelekeit,

Verse: 5071    sô truoc Tristan ie staete leit
Verse: 5072    bî staeteclîcher saelekeit.

Verse: 5073    Als ich ez iu bescheiden wil:
Verse: 5074    im was ein endeclîchez zil

Verse: 5075    gegeben der zweier dinge,
Verse: 5076    leides unde linge.

Verse: 5077    wan allez daz, des er began,
Verse: 5078    dâ lang im allerdickest an

Verse: 5079    und was ie leit der linge bî,
Verse: 5080    swie ungelîch diz jenem sî.

Verse: 5081    sus wâren diu zwei conterfeit,
Verse: 5082    staetiu linge und wernde leit,

Verse: 5083    gesellet an dem einen man.
Verse: 5084    'sô helfe iu got, nu sprechet an:

Verse: 5085    Tristan der hât nû swert genomen
Verse: 5086    und ist ze rîcher linge komen

Verse: 5087    mit ritterlîcher werdekeit.
Verse: 5088    lât hoeren, welher hande leit

Verse: 5089    haete er bî dirre linge?'
Verse: 5090    weiz got an einem dinge,

Verse: 5091    daz iegelîchem herzen ie
Verse: 5092    und ouch dem sînen nâhe gie:

Verse: 5093    daz ime der vater was erslagen,
Verse: 5094    als er Rûâlen hôrte sagen,

Verse: 5095    daz qual in in dem muote.
Verse: 5096    alsus was übel bî guote,

Verse: 5097    bî linge schade, bî liebe leit
Verse: 5098    eines herzen staetiu sicherheit.

Verse: 5099    Ir aller jehe lît dar an,
Verse: 5100    haz der lige ie dem jungen man

Verse: 5101    mit groezerem ernest an
Verse: 5102    dan einem stündigen man.

Verse: 5103    Ob aller sîner werdekeit
Verse: 5104    sô swebete Tristande ie daz leit

Verse: 5105    und daz verborgen ungemach,
Verse: 5106    daz nieman lebender an im sach,

Verse: 5107    daz im Riwalînes tôt
Verse: 5108    und Morgânes leben bôt.

Verse: 5109    daz leit lag ime mit sorgen an.
Verse: 5110    der sorcsame Tristan

Verse: 5111    und sîn getriulîcher rât,
Verse: 5112    der noch von triuwen namen hât,

Verse: 5113    der saelige Foitenant,
Verse: 5114    die bereiteten zehant

Verse: 5115    mit rîchem geraete,
Verse: 5116    des man den wunsch dâ haete,

Verse: 5117    eine rîlîche barken.
Verse: 5118    sus kâmen sî vür Marken.

Verse: 5119    Tristan sprach: 'lieber hêrre mîn,
Verse: 5120    ez sol mit iuwern hulden sîn,

Verse: 5121    daz ich ze Parmenîe var
Verse: 5122    und neme nâch iuwerm râte war,

Verse: 5123    wie unser dinc dâ sî gewant
Verse: 5124    umbe liut und umbe lant,

Verse: 5125    daz ir dâ sprechet, ez sî mîn.'
Verse: 5126    Der künec sprach: 'neve, diz sol sîn.

Verse: 5127    swie kûme ich dîn doch müge enbern,
Verse: 5128    ich wil dich dirre bete gewern.

Verse: 5129    var heim ze Parmenîe,
Verse: 5130    dû und dîn cumpanîe.

Verse: 5131    bedarft dû ritterschefte mê,
Verse: 5132    die nim, als dir ze muote stê.

Verse: 5133    nim ros, nim silber unde golt
Verse: 5134    und swes dû bedürfen solt,

Verse: 5135    als dû 's bedürfen wellest.
Verse: 5136    und swen dû dir gesellest,

Verse: 5137    dem biut ez sô mit guote,
Verse: 5138    mit geselleclîchem muote,

Verse: 5139    daz er dîn dienest gerne sî
Verse: 5140    und dir mit triuwen wese bî.

Verse: 5141    vil lieber neve, wirb unde lebe,
Verse: 5142    als dir dîn vater lêre gebe,

Verse: 5143    der getriuwe Rûal, der hie stât,
Verse: 5144    der michel triuwe und êre hât

Verse: 5145    mit dir begangen unze her.
Verse: 5146    und sî daz dich des got gewer,

Verse: 5147    daz dû dich dâ verrihtest
Verse: 5148    und dîn dinc dâ beslihtest

Verse: 5149    nâch vrumen und nâch êren,
Verse: 5150    sô soltu wider kêren.

Verse: 5151    kêre wider her ze mir.
Verse: 5152    ein dinc lob ich und leiste dir:

Verse: 5153    sê mîne triuwe in dîne hant,
Verse: 5154    daz ich dir mîn guot und mîn lant

Verse: 5155    iemer gelîche teile.
Verse: 5156    und sî 'z an dînem heile,

Verse: 5157    daz dû mich sülest überleben,
Verse: 5158    sô sî dir allez z' eigene geben.

Verse: 5159    wan ich wil durch den willen dîn
Verse: 5160    êlîches wîbes âne sîn,

Verse: 5161    die wîle ich iemer leben sol.
Verse: 5162    neve, dû hâst vernomen wol

Verse: 5163    mîne bete und mînen sin.
Verse: 5164    bistû mir holt, als ich dir bin,

Verse: 5165    treistû mir herze, als ich dir trage,
Verse: 5166    weiz got sô sul wir unser tage

Verse: 5167    vrôlîche mit ein ander leben.
Verse: 5168    hie mite sî dir urloup gegeben.

Verse: 5169    der megede sun der hüete dîn!
Verse: 5170    und lâ dir wol bevolhen sîn

Verse: 5171    dîn gescheffede und dîn êre!'
Verse: 5172    hie enbiten s' ouch nimêre.

Verse: 5173    Tristan und sîn vriunt Rûal
Verse: 5174    die schiffeten von Curnewal,

Verse: 5175    sî unde ir massenîe,
Verse: 5176    heim wider ze Parmenîe.

Verse: 5177    Ob iu nu lieb ist vernomen
Verse: 5178    umb dirre hêrren willekomen,

Verse: 5179    ich sage iu, alse ich hân vernomen,
Verse: 5180    wie sî dâ wâren willekomen:

Verse: 5181    Ir aller leitaere,
Verse: 5182    der getriuwe, der gewaere

Verse: 5183    Rûal trat vor ûz an daz lant.
Verse: 5184    sîn hüetelîn und sîn gewant

Verse: 5185    leit er höfschlîche dort hin dan.
Verse: 5186    Tristanden lief er lachend an,

Verse: 5187    er kuste in und sprach: 'hêrre mîn,
Verse: 5188    gote sult ir willekomen sîn,

Verse: 5189    iuwerm lande unde mir!
Verse: 5190    kieset, hêrre: sehet ir

Verse: 5191    diz schoene lant bî disem mer?
Verse: 5192    veste stete, starke wer

Verse: 5193    und manic schoene castêl:
Verse: 5194    seht, daz hât iuwer vater Canêl

Verse: 5195    an iuch geerbet unde brâht.
Verse: 5196    sît ir nu biderbe unde bedâht,

Verse: 5197    swes iuwer ouge hie gesiht,
Verse: 5198    des engât iu niemer niht.

Verse: 5199    des bin ich iemer iuwer wer.'
Verse: 5200    mit diser rede sô kêrte er her

Verse: 5201    mit rîchem herzen unde vrô.
Verse: 5202    vil vrôlîche enpfieng er dô

Verse: 5203    die ritter al besunder.
Verse: 5204    er begunde sî ze wunder

Verse: 5205    mit sînen worten süezen
Verse: 5206    salûieren unde grüezen.

Verse: 5207    hie mite vuorte er s' ûf Canoêl.
Verse: 5208    die stete unde diu castêl,

Verse: 5209    diu von Canêles jâren
Verse: 5210    in sîner pflege wâren

Verse: 5211    in allem dem lande,
Verse: 5212    diu gab er ûf Tristande

Verse: 5213    nâch vil getriuwelîchem site
Verse: 5214    und ouch diu sînen dâ mite,

Verse: 5215    diu in wâren an gevallen
Verse: 5216    von sînen vordern allen.

Verse: 5217    Waz sol der rede nû mêre?
Verse: 5218    er haete rât und êre;

Verse: 5219    durch daz bôt er dem hêrren rât
Verse: 5220    als der, der rât und êre hât,

Verse: 5221    und mit im al den sînen.
Verse: 5222    daz vlîzen und daz pînen,

Verse: 5223    daz er mit süezem muote
Verse: 5224    in allen ze guote

Verse: 5225    und alle wîs an in begie,
Verse: 5226    dazn gesach mannes ouge nie.

Verse: 5227    Wie dô? wie ist mir sus geschehen?
Verse: 5228    ich hân mich selben übersehen.

Verse: 5229    wâ sint nû mîne sinne?
Verse: 5230    die guoten marschalkinne,

Verse: 5231    die reinen, die staeten,
Verse: 5232    mîne vrouwen Floraeten,

Verse: 5233    daz ich die sus verswigen hân,
Verse: 5234    deist niht dâ her von hove getân.

Verse: 5235    ich sol ez aber der süezen
Verse: 5236    bezzeren unde büezen:

Verse: 5237    diu hôfsche, diu guote,
Verse: 5238    diu guote gemuote,

Verse: 5239    diu werdeste, diu beste,
Verse: 5240    ich weiz wol, daz si ir geste

Verse: 5241    niht eine mit dem munde enpfie.
Verse: 5242    wan swâ daz wort von munde gie,

Verse: 5243    dâ gie der süeze wille ie vor.
Verse: 5244    ir herze daz vuor rehte enbor,

Verse: 5245    als ez gevidert waere.
Verse: 5246    si wâren vil einbaere

Verse: 5247    beidiu ir wille und ir wort.
Verse: 5248    ich weiz wol, daz si über bort

Verse: 5249    vil geselleclîchen giengen,
Verse: 5250    dâ sî die geste enpfiengen.

Verse: 5251    diu saelige Floraete
Verse: 5252    waz vröude ir herze haete

Verse: 5253    wider ir hêrren unde ir kint,
Verse: 5254    daz kint, des disiu maere sint,

Verse: 5255    ( ir sun Tristanden den mein ich)
Verse: 5256    entriuwen des erkenne ich mich

Verse: 5257    an manegen unde genuogen
Verse: 5258    ir tugenden unde ir vuogen,

Verse: 5259    die ich von der saeligen las.
Verse: 5260    daz der niht ein lützel was,

Verse: 5261    daz bewârte s' alsô wol,
Verse: 5262    als ein wîp allerbeste sol.

Verse: 5263    wan si schuof ir kinde
Verse: 5264    und sînem ingesinde

Verse: 5265    al die êre und daz gemach,
Verse: 5266    daz ie rittern geschach.

Verse: 5267    Hie mite sô wurden besant
Verse: 5268    ze Parmenîe über al daz lant

Verse: 5269    die hêrren und diu hêrschaft,
Verse: 5270    die dâ haeten die craft

Verse: 5271    der stete und der castêle.
Verse: 5272    nû die ze Canoêle

Verse: 5273    gemeinlîche kâmen,
Verse: 5274    gesâhen und vernâmen

Verse: 5275    von Tristande die warheit,
Verse: 5276    als uns daz maere von im seit

Verse: 5277    und alse ir selbe habet vernomen,
Verse: 5278    dô vlugen tûsent willekomen

Verse: 5279    von iegelîches munde.
Verse: 5280    liut unde lant begunde

Verse: 5281    von langem leide erwachen
Verse: 5282    und sich ze vröuden machen,

Verse: 5283    ze wunderlîchem wunder.
Verse: 5284    sî empfiengen al besunder

Verse: 5285    ir lêhen, ir liut unde ir lant
Verse: 5286    von ir hêrren Tristandes hant.

Verse: 5287    si swuoren hulde und wurden man.
Verse: 5288    hier under haete ie Tristan

Verse: 5289    den tougenlîchen smerzen
Verse: 5290    verborgen in dem herzen,

Verse: 5291    der dâ von Morgâne gie.
Verse: 5292    der smerze der begab in nie

Verse: 5293    weder vruo noch spâte.
Verse: 5294    alsus gieng er ze râte

Verse: 5295    mit mâgen und mit mannen
Verse: 5296    und jach, er wolte dannen

Verse: 5297    ze Britanje gâhen,
Verse: 5298    sîn lêhen enpfâhen

Verse: 5299    von sînes vîendes hant,
Verse: 5300    durch daz er sînes vater lant

Verse: 5301    mit rehte haete deste baz.
Verse: 5302    diz sprach er unde tete ouch daz:

Verse: 5303    er vuor von Parmenîe
Verse: 5304    er und sîn cumpanîe

Verse: 5305    bereitet unde gewarnet wol,
Verse: 5306    alse der man ze rehte sol,

Verse: 5307    der ûf angestlîche tât
Verse: 5308    ernestlîchen willen hât.

Verse: 5309    Dô Tristan ze Britanje kam,
Verse: 5310    von âventiure er dô vernam

Verse: 5311    und hôrte waerlîche sagen,
Verse: 5312    Morgân der herzoge rite dâ jagen

Verse: 5313    von walde ze walde.
Verse: 5314    nû hiez er îlen balde,

Verse: 5315    die ritter sich bereiten
Verse: 5316    und under ir rocke leiten

Verse: 5317    ir halsperge unde ir dinc,
Verse: 5318    und so daz nieman keinen rinc

Verse: 5319    ûz dem gewande lieze gân.
Verse: 5320    nu diz geschach, diz was getân.

Verse: 5321    und über daz leite ie der man
Verse: 5322    sîne reisekappen an

Verse: 5323    und sâzen ûf ir ors alsô.
Verse: 5324    ir gezoc hiezen si dô

Verse: 5325    stetelîche wider rîten
Verse: 5326    und niemannes bîten

Verse: 5327    und teilten ir ritterschaft.
Verse: 5328    dâ wart diu groezere craft

Verse: 5329    geschicket an die widervart,
Verse: 5330    daz der gezoc waere bewart,

Verse: 5331    dâ der ûf sîne strâze gie.
Verse: 5332    dô diz geschach, dô haeten die,

Verse: 5333    die mit Tristande kêrten hin,
Verse: 5334    wol drîzec ritter under in.

Verse: 5335    jene an der widerkêre
Verse: 5336    wol sehzic oder mêre.

Verse: 5337    vil schiere wart, daz Tristan
Verse: 5338    hunde unde jegere sehen began.

Verse: 5339    die selben vrâgte er maere,
Verse: 5340    wâ der herzoge waere.

Verse: 5341    die tâten ez im iesâ kunt.
Verse: 5342    und er des endes sâ zestunt

Verse: 5343    und vant ouch dâ vil schiere
Verse: 5344    ûf einer waltriviere

Verse: 5345    vil ritter Britûne.
Verse: 5346    den wâren pavelûne

Verse: 5347    und hüten ûf daz gras geslagen,
Verse: 5348    dar umbe und dar în getragen

Verse: 5349    loub unde liehter bluomen vil.
Verse: 5350    ir hunde unde ir vederspil

Verse: 5351    daz haeten sî ze handen.
Verse: 5352    die gruozten ouch Tristanden

Verse: 5353    und sîne rotte dâ mite
Verse: 5354    höfschlîche nâch dem hovesite.

Verse: 5355    die seiten im ouch iesâ,
Verse: 5356    Morgân ir hêrre rite dâ

Verse: 5357    vil nâhen in dem walde.
Verse: 5358    dar îlten sî dô balde.

Verse: 5359    dâ vunden s' ouch Morgânen
Verse: 5360    und ûfe castelânen

Verse: 5361    vil ritter Britûne haben.
Verse: 5362    nu sî begunden zuo z' im traben.

Verse: 5363    Morgân enpfie die geste,
Verse: 5364    der willen er niht weste

Verse: 5365    vil gestlîchen unde wol,
Verse: 5366    als man die geste enpfâhen sol.

Verse: 5367    sîn lantgesinde tete alsam:
Verse: 5368    ir iegelîcher der kam

Verse: 5369    gerant mit sînem gruoze
Verse: 5370    nâch diser unmuoze,

Verse: 5371    dô diz grüezen gar geschach,
Verse: 5372    Tristan ze Morgâne sprach:

Verse: 5373    'hêrre, ich bin komen dâ her
Verse: 5374    nâch mînem lêhen unde ger,

Verse: 5375    daz ir mir daz hie lîhet
Verse: 5376    und mir des niht verzîhet,

Verse: 5377    des ich ze rehte haben sol.
Verse: 5378    sô tuot ir höfschlîch unde wol.'

Verse: 5379    Morgân sprach: 'hêrre, saget mir,
Verse: 5380    von wannen oder wer sît ir?'

Verse: 5381    Tristan sprach aber dô wider in:
Verse: 5382    'von Parmenîe ich bürtic bin

Verse: 5383    und hiez mîn vater Riwalîn.
Verse: 5384    hêrre, des erbe sol ich sîn.

Verse: 5385    ich selbe heize Tristan.'
Verse: 5386    Morgân sprach: 'hêrre, ir komet mich an

Verse: 5387    mit alse unnützen maeren,
Verse: 5388    daz s' alse waege waeren

Verse: 5389    verswigen alse vür brâht.
Verse: 5390    ich bin des kurze bedâht:

Verse: 5391    soltet ir iht von mir hân,
Verse: 5392    des waere iu schiere state getân.

Verse: 5393    wan iu enwürre niht dar an,
Verse: 5394    ir enwaeret ein gezaeme man

Verse: 5395    einen iegelîchen êren,
Verse: 5396    daz ir ez soltet kêren.

Verse: 5397    wir wizzen aber alle wol,
Verse: 5398    ( diu lant sint dirre maere vol)

Verse: 5399    in welher wîse Blanschefluor
Verse: 5400    mit iuwerm vater von lande vuor,

Verse: 5401    ze welhen êren ez ir kam,
Verse: 5402    wie diu vriuntschaft ende nam.'

Verse: 5403    'vriuntschaft? wie meinet ir daz?'
Verse: 5404    'ich ensage iu nû niht vür baz,

Verse: 5405    wan diser rede der ist alsô.'
Verse: 5406    'Hêrre' sprach aber Tristan dô

Verse: 5407    'bî disem maere erkenne ich mich.
Verse: 5408    ir meinet ez alsô, daz ich

Verse: 5409    niht êlîche sî geborn
Verse: 5410    und süle dâ mit hân verlorn

Verse: 5411    mîn lêhen und mîn lêhenreht.'
Verse: 5412    'entriuwen, hêrre guot kneht,

Verse: 5413    dâ vür hân ichz und manic man.'
Verse: 5414    'ir redet übel' sprach Tristan

Verse: 5415    'ich wânde doch, ez waere
Verse: 5416    gevellec unde gebaere,

Verse: 5417    swer dem man leide taete,
Verse: 5418    daz er mit rede doch haete

Verse: 5419    sin unde vuoge wider in.
Verse: 5420    haetet ir nu vuoge unde sin,

Verse: 5421    sô leide als ir mir habet getân,
Verse: 5422    ir möhtet mir doch rede erlân,

Verse: 5423    diu niuwe swaere wecket
Verse: 5424    und alte schulde recket.

Verse: 5425    ir sluoget mir den vater doch.
Verse: 5426    hie mite endunket iuch noch

Verse: 5427    mînes leides niht genuoc,
Verse: 5428    irn jehet, mîn muoter, diu mich truoc,

Verse: 5429    diu trüege mich kebeslîche.
Verse: 5430    sem mir got der rîche!

Verse: 5431    ich weiz wol, sô manc edele man,
Verse: 5432    des ich hie niht genennen kan,

Verse: 5433    sîne hende mir gevalten hât.
Verse: 5434    und haeten sî dise untât,

Verse: 5435    der ir dâ jehet, an mir erkant,
Verse: 5436    ir keiner haete sîne hant

Verse: 5437    zwischen die mîne nie geleit.
Verse: 5438    die wizzen wol die wârheit,

Verse: 5439    daz mîn vater Riwalîn
Verse: 5440    mîne muoter an daz ende sîn

Verse: 5441    brâhte vür ein êlîch wîp.
Verse: 5442    ist daz ich daz ûf iuwern lîp

Verse: 5443    bewaeren unde bereden sol,
Verse: 5444    entriuwen daz berede ich wol.'

Verse: 5445    'ûz' sprach Morgân 'in gotes haz!
Verse: 5446    iuwer bereden waz sol daz?

Verse: 5447    iuwer slac engât ze keinem man,
Verse: 5448    der ie ze hove reht gewan.'

Verse: 5449    'diz wirt wol schîn' sprach Tristan.
Verse: 5450    er zucte swert und rande in an.

Verse: 5451    er sluoc im obene ze tal
Verse: 5452    beidiu hirne und hirneschal,

Verse: 5453    daz ez im an der zungen want.
Verse: 5454    hie mite sô stach er ime zehant

Verse: 5455    daz swert gein dem herzen în.
Verse: 5456    dô wart diu wârheit wol schîn

Verse: 5457    des sprichwortes, daz dâ giht,
Verse: 5458    daz schulde ligen und vûlen niht.

Verse: 5459    Morgânes cumpanjûne,
Verse: 5460    die vrechen Britûne,

Verse: 5461    die enkunden ime dâ niht gevromen
Verse: 5462    noch ze helfe im nie sô schiere komen,

Verse: 5463    ern laege an dem valle.
Verse: 5464    iedoch sô wâren s' alle,

Verse: 5465    als sî dô mohten, an ir wer.
Verse: 5466    ir wart viel schiere ein michel her.

Verse: 5467    die ungewarneten man
Verse: 5468    si kâmen alle ir vînde an

Verse: 5469    mit manlîchem muote.
Verse: 5470    warnunge unde huote

Verse: 5471    der nam dâ lützel ieman war,
Verse: 5472    wan drungen et mit hûfen dar

Verse: 5473    und tâten s' alle mit gewalt
Verse: 5474    ûz hin se velde vür den walt.

Verse: 5475    hie huop sich ein michel ruoft,
Verse: 5476    michel weinen unde wuoft.

Verse: 5477    alsus vlouc Morgânes tôt
Verse: 5478    mit maneger hande clagenôt,

Verse: 5479    als ob er vlücke waere.
Verse: 5480    er seite leidiu maere

Verse: 5481    ûf die bürge und in daz lant.
Verse: 5482    in dem lande vlouc zehant

Verse: 5483    niht wan daz eine clagewort:
Verse: 5484    'â noster sires, il est mort!

Verse: 5485    welch rât wirt des landes nuo?
Verse: 5486    nu zieren helde, kêret zuo

Verse: 5487    von steten und von vesten
Verse: 5488    gelônen disen gesten,

Verse: 5489    des s' uns ze leide haben getân!'
Verse: 5490    sus liezen s' ûf ir rucke gân

Verse: 5491    mit staeteclîchem strîte;
Verse: 5492    ouch vunden s' alle zîte

Verse: 5493    an ir gesten vollen strît.
Verse: 5494    die kêrten ie ze maneger zît

Verse: 5495    mit einer ganzen rotte wider
Verse: 5496    und wurfen manigen dâ nider

Verse: 5497    und wâren doch ie vliehende
Verse: 5498    und allez wider ziehende,

Verse: 5499    dâ sî dâ westen ir craft.
Verse: 5500    sus kâmen s' ûf ir ritterschaft.

Verse: 5501    dâ nâmen s' ouch herberge
Verse: 5502    ûf einem vesten berge,

Verse: 5503    dar ûfe was ir wesen die naht.
Verse: 5504    der nehte wart des landes maht

Verse: 5505    sô starc und alsô veste,
Verse: 5506    daz s' aber ir leiden geste,

Verse: 5507    als schiere als ez wart tagende,
Verse: 5508    mit gewalte wurden jagende

Verse: 5509    und manegen nider stâchen,
Verse: 5510    den hûfen dicke brâchen

Verse: 5511    mit speren und mit swerten,
Verse: 5512    diu dâ niht lange werten.

Verse: 5513    dâ wâren swert unde sper
Verse: 5514    deiswâr in harte kurzer wer.

Verse: 5515    ir wart dâ manigez vertân,
Verse: 5516    so s' in die rotte liezen gân.

Verse: 5517    ouch was daz lützele her
Verse: 5518    sô vrechlîche an sîner wer,

Verse: 5519    daz dâ vil michel schade geschach,
Verse: 5520    dâ man in in den hûfen brach.

Verse: 5521    die schar die wurden beider sît
Verse: 5522    ze einer und ze maneger zît

Verse: 5523    mit grôzem schaden überladen.
Verse: 5524    si nâmen unde tâten schaden

Verse: 5525    vil schedelîche an manegem man.
Verse: 5526    sus triben si 'z mit ein ander an,

Verse: 5527    biz daz daz innere her
Verse: 5528    begunde swachen an der wer,

Verse: 5529    wan in gienc abe und jenen zuo.
Verse: 5530    die mêrten sich spâte unde vruo

Verse: 5531    an ir state und an ir maht,
Verse: 5532    sô daz si dannoch vor der naht

Verse: 5533    besâzen aber die geste
Verse: 5534    in einer wazzerveste,

Verse: 5535    dâ sich die geste ûz werten
Verse: 5536    und sich die naht dâ nerten.

Verse: 5537    sus was daz her besezzen,
Verse: 5538    mit her al umbemezzen,

Verse: 5539    als ez beziunet waere.
Verse: 5540    die vremeden sorgaere,

Verse: 5541    Tristan unde sîne man,
Verse: 5542    nu wie geviengen s' ir dinc an?

Verse: 5543    daz sage ich iu, wie ez in ergie,
Verse: 5544    wie sich ir sorge zerlie,

Verse: 5545    wie sî von dannen kâmen,
Verse: 5546    sige an ir vînden nâmen.

Verse: 5547    Tristan dô der von lande schiet,
Verse: 5548    als ime sîn rât Rûal geriet,

Verse: 5549    sîn lêhen dâ z' enpfâhene
Verse: 5550    und iesâ wider ze gâhene,

Verse: 5551    sît des lac z' allem mâle
Verse: 5552    dem saeligen Rûâle

Verse: 5553    der selbe wân ze herzen ie,
Verse: 5554    reht alse ez ouch Tristande ergie.

Verse: 5555    iedoch geriet er die geschiht
Verse: 5556    umbe Morgânes schaden niht.

Verse: 5557    hundert ritter er besande
Verse: 5558    und kêrte nâch Tristande

Verse: 5559    eben unde rehte ûf sîne vart.
Verse: 5560    unlanges und vil schiere ez wart,

Verse: 5561    daz er ze Britanje kam.
Verse: 5562    vil rehte er al zehant vernam,

Verse: 5563    wie ez gevaren waere.
Verse: 5564    und nâch des landes maere

Verse: 5565    sô nam er sîner reise ein mez
Verse: 5566    ze den Britûnen ûf daz sez.

Verse: 5567    nu sî begunden nâhen,
Verse: 5568    daz sî die vînde sâhen,

Verse: 5569    do enwart an ir rotte
Verse: 5570    ir keinem ze spotte

Verse: 5571    weder nâch noch niender abe gezogen.
Verse: 5572    si kâmen alle samet gevlogen

Verse: 5573    mit vliegenden banieren.
Verse: 5574    dâ wart michel crôieren

Verse: 5575    under ir massenîe:
Verse: 5576    'schevelier Parmenîe!

Verse: 5577    Parmenîe schevelier!'
Verse: 5578    dâ jagete banier und banier

Verse: 5579    schaden und ungevüere
Verse: 5580    durch die hütesnüere.

Verse: 5581    si tâten die Britûne
Verse: 5582    durch ir pavelûne

Verse: 5583    mit toedegen wunden.
Verse: 5584    nu die inneren begunden

Verse: 5585    ir lantbaniere erkennen,
Verse: 5586    ir zeichen hoeren nennen,

Verse: 5587    si begunden ir rûm wîten,
Verse: 5588    ûz an die wîte rîten.

Verse: 5589    Tristan lie vaste strîten gân.
Verse: 5590    dâ wart michel schade getân

Verse: 5591    an den lantgesellen.
Verse: 5592    vâhen unde vellen,

Verse: 5593    slahen unde stechen,
Verse: 5594    daz begunde ir schar durchbrechen

Verse: 5595    ze beiden sîten in dem her
Verse: 5596    und brâhte s' ouch daz ûzer wer,

Verse: 5597    daz die zwô cumpanîe
Verse: 5598    'schevelier Parmenîe!'

Verse: 5599    sô vil geriefen unde getriben.
Verse: 5600    des wâren s' âne wer beliben.

Verse: 5601    under in was wer noch kêre
Verse: 5602    noch keines strîtes mêre

Verse: 5603    wan tuschen unde vliehen,
Verse: 5604    zogen unde ziehen

Verse: 5605    wider bürge und wider walt.
Verse: 5606    der strît der wart dâ manicvalt.

Verse: 5607    ir vluht was ir meistiu wer
Verse: 5608    und vür den tôt ir bestiu ner.

Verse: 5609    Nu disiu schunfentiure ergie,
Verse: 5610    diu ritterschaft sich nider lie

Verse: 5611    und nâmen herberge sâ.
Verse: 5612    und die von ir gesinde dâ

Verse: 5613    ze velde lâgen erslagen,
Verse: 5614    die hiezen sî ze grabe tragen.

Verse: 5615    jene, die dâ wunt wâren,
Verse: 5616    die hiezen sî ûf bâren

Verse: 5617    und kêrten wider ze lande.
Verse: 5618    hie mite sô was Tristande

Verse: 5619    sîn lêhen und sîn sunderlant
Verse: 5620    verlihen ûz sîn selbes hant.

Verse: 5621    er was von dem hêrre unde man,
Verse: 5622    von dem sîn vater nie niht gewan.

Verse: 5623    sus haete er sich verrihtet
Verse: 5624    und al sîn dinc beslihtet:

Verse: 5625    verrihtet an dem guote,
Verse: 5626    beslihtet an dem muote.

Verse: 5627    sîn unreht daz was allez reht,
Verse: 5628    sîn swaerer muot lîht unde sleht.

Verse: 5629    er haete dô ze sîner hant
Verse: 5630    sînes vater erbe und al sîn lant

Verse: 5631    unversprochenlîche unde alsô,
Verse: 5632    daz nieman in den zîten dô

Verse: 5633    ansprâche haete an kein sîn guot.
Verse: 5634    hie mite sô kêrte er sînen muot,

Verse: 5635    als ime gebôt und ime geriet
Verse: 5636    sîn oeheim, dô er von im schiet,

Verse: 5637    hin wider ze Curnewâle
Verse: 5638    und enmohte ouch von Rûâle

Verse: 5639    niht gewenden sîn gemüete,
Verse: 5640    der alsô manege güete

Verse: 5641    mit veterlîcher staete
Verse: 5642    an ime erzeiget haete.

Verse: 5643    sîn herze daz lac starke
Verse: 5644    an Rûal unde an Marke.

Verse: 5645    an disen zwein was al sîn sin.
Verse: 5646    der sin stuont ime her unde hin.

Verse: 5647    Nu spreche ein saeliger man:
Verse: 5648    der saelige Tristan

Verse: 5649    wie gewirbet er nû hie zuo,
Verse: 5650    daz er in beiden rehte tuo

Verse: 5651    und lône ietwederem, alse er sol?
Verse: 5652    iuwer iegelîch der weiz daz wol:

Verse: 5653    ern kan daz niemer bewarn,
Verse: 5654    ern müeze ir einen lâzen varn

Verse: 5655    und bî dem andern bestân.
Verse: 5656    lât hoeren, wie sol ez ergân?

Verse: 5657    vert er ze Curnewâle wider,
Verse: 5658    sô leit er Parmenîe nider

Verse: 5659    an aller sîner werdekeit
Verse: 5660    und ist ouch Rûal nider geleit

Verse: 5661    an vröuden unde an muote,
Verse: 5662    an allem dem guote,

Verse: 5663    von dem sîn wunne solte gân.
Verse: 5664    und wil er aber dâ bestân,

Verse: 5665    sone wil er sich niht kêren
Verse: 5666    ze hoeheren êren

Verse: 5667    und übergât ouch Markes rât,
Verse: 5668    an dem al sîn êre stât.

Verse: 5669    wie sol er sich hier an bewarn?
Verse: 5670    weiz got dâ muoz er wider varn.

Verse: 5671    daz sol man ime billîchen.
Verse: 5672    er sol an êren rîchen

Verse: 5673    und stîgen an dem muote,
Verse: 5674    wil ez sich ime ze guote

Verse: 5675    und ouch ze saelden kêren.
Verse: 5676    er sol wol aller êren

Verse: 5677    billîche muoten unde gern.
Verse: 5678    wil ouch in saelde der gewern,

Verse: 5679    des hât sî reht, daz sî daz tuo,
Verse: 5680    wan al sîn muot der stât dar zuo.

Verse: 5681    Tristan der sinnerîche
Verse: 5682    der kam vil sinneclîche

Verse: 5683    sînes willen über ein,
Verse: 5684    daz er sich sînen vetern zwein

Verse: 5685    als ebene teilen wolte,
Verse: 5686    als man in snîden solte.

Verse: 5687    sich selben teilet er inzwei
Verse: 5688    gelîche und ebene alse ein ei

Verse: 5689    und gab ir ietwederem daz,
Verse: 5690    daz er wiste, daz im baz

Verse: 5691    an allen sînen dingen kam.
Verse: 5692    swer nû die teile nie vernam,

Verse: 5693    die man an ganzem lîbe hât,
Verse: 5694    dem sage ich, wie diu teile ergât:

Verse: 5695    dane hât nieman zwîvel an,
Verse: 5696    zwô sache enmachen einen man,

Verse: 5697    ich meine lîp, ich meine guot.
Verse: 5698    von disen zwein kumt edeler muot

Verse: 5699    und werltlîcher êren vil.
Verse: 5700    der aber diu zwei scheiden wil,

Verse: 5701    sô wirt daz guot ein armuot.
Verse: 5702    der lîp, dem nieman rehte tuot,

Verse: 5703    der kumt von sînem namen dervan,
Verse: 5704    und wirt der man ein halber man

Verse: 5705    und doch mit ganzem lîbe.
Verse: 5706    als habet iu von dem wîbe:

Verse: 5707    ez sî man oder wîp,
Verse: 5708    sô muoz ie guot unde lîp

Verse: 5709    mit gemeinlîchen sachen
Verse: 5710    einen ganzen namen machen.

Verse: 5711    und werdent s' aber gescheiden,
Verse: 5712    sone ist niht an in beiden.

Verse: 5713    Dise rede die huop Tristan
Verse: 5714    rîche unde willeclîchen an

Verse: 5715    und ante s' ouch mit sinnen:
Verse: 5716    er hiez ime gewinnen

Verse: 5717    schoeniu ros und edele wât,
Verse: 5718    spîse und anderen rât,

Verse: 5719    des man ze hôhgezîten pflît,
Verse: 5720    und machete eine hôhgezît.

Verse: 5721    dar ladete er unde besande
Verse: 5722    die besten von dem lande,

Verse: 5723    an den des landes craft dô stuont.
Verse: 5724    die tâten, als die vriunde tuont,

Verse: 5725    und kâmen, alse in wart geseit.
Verse: 5726    nû was ouch Tristan bereit

Verse: 5727    mit allen sînen dingen.
Verse: 5728    er gap zwein jungelingen,

Verse: 5729    sînes vater Rûâles sünen, swert,
Verse: 5730    wan er ir z' erben haete gert

Verse: 5731    nâch ir vater Rûâle.
Verse: 5732    und swaz er zuo dem mâle

Verse: 5733    z' ir wirde und z' ir êren
Verse: 5734    sîner koste mohte kêren,

Verse: 5735    dâ haete er spâte unde vruo
Verse: 5736    als inneclîchen willen zuo,

Verse: 5737    als ob sî waeren sîniu kint.
Verse: 5738    nû daz sî ritter worden sint

Verse: 5739    und zwelf gesellen mit in zwein,
Verse: 5740    nû was der zwelf gesellen ein

Verse: 5741    Curvenal der hovelîche.
Verse: 5742    Tristan der tugende rîche

Verse: 5743    nam sîne bruoder an die hant,
Verse: 5744    wan ez ime ze höfscheit was gewant,

Verse: 5745    und vuorte sî bihanden dan.
Verse: 5746    sîne mâge unde sîne man

Verse: 5747    und alle, die dâ wâren
Verse: 5748    von sinnen oder von jâren

Verse: 5749    oder aber von in beiden
Verse: 5750    betrehtic unde bescheiden,

Verse: 5751    die wurden alle zehant
Verse: 5752    ze hove geladet unde besant.

Verse: 5753    nu hêrre, die sint alle dâ.
Verse: 5754    Tristan stuont ûf vor in sâ.

Verse: 5755    'ir hêrren alle' sprach er z' in
Verse: 5756    'den ich iemer gerne bin

Verse: 5757    mit triuwen und mit durnehtekeit
Verse: 5758    an allem dienste bereit,

Verse: 5759    als verre alse ich iemer kan,
Verse: 5760    mîne mâge und mîne liebe man,

Verse: 5761    von der genâden ich ez hân,
Verse: 5762    swaz mir got êren hât getân,

Verse: 5763    von iuwer helfe hân ich mich
Verse: 5764    verrihtet alles, des ich

Verse: 5765    in mînem herzen gerte.
Verse: 5766    swie mich 's got gewerte,

Verse: 5767    sô weiz ich doch wol, daz ez ie
Verse: 5768    von iuwer vrümede vollegie.

Verse: 5769    waz mag ich nû mêre sagen?
Verse: 5770    ir habet in disen unmangen tagen

Verse: 5771    iuwer êre und iuwer saelekeit
Verse: 5772    sô manege wîs an mich geleit,

Verse: 5773    daz ich des keinen zwîvel hân,
Verse: 5774    disiu werlt diu enmüeze ê zergân,

Verse: 5775    ê ir mir iemer keine zît
Verse: 5776    mînes willen wider gesît.

Verse: 5777    Vriunt unde man und alle die,
Verse: 5778    die durch mînen willen hie

Verse: 5779    oder durch ir selber tugende sîn,
Verse: 5780    nû lâzet iu die rede mîn

Verse: 5781    niht sêre missevallen.
Verse: 5782    ich künde und sage iu allen,

Verse: 5783    als Rûal mîn vater, der hie stât,
Verse: 5784    gesehen und ouch gehoeret hât:

Verse: 5785    daz mir mîn oeheim sîn lant
Verse: 5786    gesetzet hât in mîne hant

Verse: 5787    und wil ouch durch den willen mîn
Verse: 5788    êlîches wîbes âne sîn,

Verse: 5789    durch daz ich sîn erbe sî,
Verse: 5790    und wil, daz ich im wone bî,

Verse: 5791    swâ er sî oder swar er var.
Verse: 5792    nû hân ich mich bewegen dar

Verse: 5793    und stât mir al mîn muot dar zuo,
Verse: 5794    daz ich al sînen willen tuo

Verse: 5795    und wider zuo z' im kêre.
Verse: 5796    mîn urbor und mîn êre,

Verse: 5797    die ich in disen landen hân,
Verse: 5798    die wil ich lîhen unde lân

Verse: 5799    mînem vater Rûâle,
Verse: 5800    ob mir 'z ze Curnewâle

Verse: 5801    iht anders danne wol ergê,
Verse: 5802    sweder ich sterbe oder dâ bestê,

Verse: 5803    daz ez sîn erbelêhen sî.
Verse: 5804    sô stânt ouch sîne süne hie bî

Verse: 5805    und mit im ander sîniu kint.
Verse: 5806    die aber sîn erben vürbaz sint,

Verse: 5807    die haben alle reht dar an.
Verse: 5808    mîne man und mîne dienestman,

Verse: 5809    diu lêhen über allez lant
Verse: 5810    diu wil ich haben ze mîner hant

Verse: 5811    al mîniu jâr und mîne tage.'
Verse: 5812    hie wart grôz jâmer unde clage

Verse: 5813    under aller dirre ritterschaft.
Verse: 5814    si wurden alle unherzehaft.

Verse: 5815    ir muot, ir trôst was aller hin.
Verse: 5816    'â hêrre' sprâchen s' under in

Verse: 5817    'nû waere uns michel baz geschehen,
Verse: 5818    und haete wir iuch nie gesehen.

Verse: 5819    sone waere ouch disses leides niht,
Verse: 5820    daz uns nû von iu geschiht.

Verse: 5821    hêrre, unser trôst und unser wân
Verse: 5822    der was alsô hin z' iu getân,

Verse: 5823    uns waere ein leben an iu gegeben.
Verse: 5824    nein leider unser aller leben,

Verse: 5825    daz wir ze vröuden solten haben,
Verse: 5826    daz ist erstorben unde begraben,

Verse: 5827    swenne ir von hinnen kêret.
Verse: 5828    hêrre, ir habt uns gemêret

Verse: 5829    und niht geminret unser leit.
Verse: 5830    unser aller saelekeit

Verse: 5831    diu was ein lützel ûf gestigen
Verse: 5832    und ist nû wider nider gesigen.'

Verse: 5833    ich weiz ez wârez alse den tôt,
Verse: 5834    swie starc ir aller clagenôt

Verse: 5835    und swie grôz ir swaere
Verse: 5836    von disem maere waere E

Verse: 5837    Rûal, dem ez ze guote ergienc,
Verse: 5838    der grôze vrume dâ von enpfienc

Verse: 5839    und michel êre an guote,
Verse: 5840    daz ez im in dem muote

Verse: 5841    unsanfter danne in allen tete.
Verse: 5842    er enpfieng ein lêhen an der stete,

Verse: 5843    weiz got daz er dekeinez nie
Verse: 5844    mit solhem jâmer enpfie.

Verse: 5845    Nu Rûal unde siniu kint
Verse: 5846    belêhent unde g' erbet sint

Verse: 5847    von ir hêrren Tristandes hant,
Verse: 5848    Tristan ergab liut unde lant

Verse: 5849    gote und vuor von lande.
Verse: 5850    ouch kêrte mit Tristande

Verse: 5851    Curvenal sîn meister dan.
Verse: 5852    Rûal und ander sîne man,

Verse: 5853    daz lantliut al gemeine,
Verse: 5854    ob ir clage iht cleine

Verse: 5855    unde ir herzeswaere
Verse: 5856    nâch ir trûthêrren waere?

Verse: 5857    entriuwen daz verweiz ich wol:
Verse: 5858    Parmenîe daz was vol

Verse: 5859    clage unde clagemaere.
Verse: 5860    ir clage was sagebaere.

Verse: 5861    diu marschalkîn Floraete,
Verse: 5862    diu triuwe und êre haete,

Verse: 5863    diu leite marter an in lîp
Verse: 5864    als mit allem rehte ein wîp,

Verse: 5865    der got ein gerehtez leben
Verse: 5866    an wîbes êren hât gegeben.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.