TITUS
Gottfried von Strassburg, Tristan
Part No. 10
Previous part

Chapter: 10 
10: Morold


Verse: 5867    Waz leite ich nû mê hier an?
Verse: 5868    der lantlôse Tristan,

Verse: 5869    dô der ze Curnewâle kam,
Verse: 5870    ein maere er al zehant vernam,

Verse: 5871    daz ime vil swaere was vernommen:
Verse: 5872    daz von Îlande waere komen

Verse: 5873    Môrolt der sêre starke
Verse: 5874    und vorderte von Marke

Verse: 5875    mit kampflîchen handen
Verse: 5876    den zins von beiden landen,

Verse: 5877    von Curnwal und von Engelant.
Verse: 5878    umbe den zins was ez sô gewant:

Verse: 5879    der dô z' Îlanden künic was,
Verse: 5880    als ich 'z an der istôrje las

Verse: 5881    und als daz rehte maere seit,
Verse: 5882    der hiez Gurmûn Gemuotheit

Verse: 5883    und was geborn von Affricâ
Verse: 5884    und was sîn vater künic dâ.

Verse: 5885    dô der verschiet, dô viel daz lant
Verse: 5886    an in und sînes bruoder hant,

Verse: 5887    der als wol erbe was als er.
Verse: 5888    Gurmûn was aber sô rîcher ger

Verse: 5889    und alse hôhe gemuot,
Verse: 5890    daz er dekein gemeine guot

Verse: 5891    mit niemanne wolte hân.
Verse: 5892    sîn herze enwolte in niht erlân,

Verse: 5893    ern müese selbe ein hêrre wesen.
Verse: 5894    er begunde ûz welen unde ûz lesen

Verse: 5895    die starken, die muotvesten
Verse: 5896    und zuo der nôt die besten,

Verse: 5897    die ieman erkande,
Verse: 5898    ritter und sarjande,

Verse: 5899    die er mit sînem guote
Verse: 5900    oder mit höfschlîchem muote

Verse: 5901    zuo z' ime gewinnen kunde,
Verse: 5902    und liez ouch an der stunde

Verse: 5903    sînem bruoder al sîn lant.
Verse: 5904    sus kêrte er dannen zehant

Verse: 5905    und nam von den maeren,
Verse: 5906    den gewaltegen Rômaeren

Verse: 5907    urloup unde botschaft,
Verse: 5908    swaz er betwünge mit craft,

Verse: 5909    daz er daz z' eigen haete
Verse: 5910    und ouch in dâ von taete

Verse: 5911    eteslîch reht und êre.
Verse: 5912    und enbeite ouch dô niemêre.

Verse: 5913    er vuor mit eime starken her
Verse: 5914    über lant und über mer,

Verse: 5915    biz daz er z' Îlande kam
Verse: 5916    und an dem lande sige genam

Verse: 5917    und sî mit strîte des betwanc,
Verse: 5918    daz sî 'n ze hêrren âne ir danc

Verse: 5919    und ze künege nâmen
Verse: 5920    und sît her dar an kâmen,

Verse: 5921    daz s' ime z' allen zîten
Verse: 5922    mit stürmen und mit strîten

Verse: 5923    diu bîlant hulfen twingen.
Verse: 5924    in disen selben dingen

Verse: 5925    betwanc er ouch ze sîner hant
Verse: 5926    Curnewal und Engelant.

Verse: 5927    dô was aber Marke ein kint,
Verse: 5928    als kint ze wer unveste sint,

Verse: 5929    und kam alsô von sîner craft
Verse: 5930    und wart Gurmûne zinshaft.

Verse: 5931    ouch half Gurmûnen sêre
Verse: 5932    und gab im craft und êre,

Verse: 5933    daz er Môroldes swester nam.
Verse: 5934    von dem sô wart er vorhtsam.

Verse: 5935    der was ein herzoge dâ
Verse: 5936    und haete ouch vil gerne eteswâ

Verse: 5937    selbe ein lant besezzen;
Verse: 5938    wan er as wol vermezzen

Verse: 5939    und haete lant und michel guot,
Verse: 5940    lîp unde manlîchen muot.

Verse: 5941    der was sîn vorvehtaere.
Verse: 5942    Waz aber des zinses waere,

Verse: 5943    den man z' Îlanden sande
Verse: 5944    von ietwederem lande,

Verse: 5945    des bescheide ich iuch reht und vür wâr:
Verse: 5946    si sanden in daz êrste jâr

Verse: 5947    driu hundert marc messinges
Verse: 5948    und anders keines dinges;

Verse: 5949    daz ander silber, daz dritte golt;
Verse: 5950    des vierden sô kam Môrolt

Verse: 5951    der starke von Îlanden dar
Verse: 5952    ze wîge und ouch ze kampfe gar.

Verse: 5953    vür den sô wurden besant
Verse: 5954    ze Curnewâle und z' Engelant

Verse: 5955    barûne und ir genôze.
Verse: 5956    die giengen ouch ze lôze

Verse: 5957    ze sîner gegenwürte,
Verse: 5958    welher im antwürte

Verse: 5959    sîn kint, daz dienestbaere
Verse: 5960    und an dem lîbe waere

Verse: 5961    sô schoene und sô genaeme,
Verse: 5962    als ez dem hove gezaeme,

Verse: 5963    niht megede, niuwan knebelîn,
Verse: 5964    und solten ouch der drîzec sîn

Verse: 5965    von ietwederem lande.
Verse: 5966    und ensolte dirre schande

Verse: 5967    nieman anders widerstân,
Verse: 5968    ez enmüese mit einwîge ergân

Verse: 5969    oder aber mit lantvehte.
Verse: 5970    nu enmohten s' aber ze rehte

Verse: 5971    mit offenlîcher wer niht komen,
Verse: 5972    wan diu lant haeten abe genomen.

Verse: 5973    sô was ouch Môrolt alse starc,
Verse: 5974    als unerbermig unde als arc,

Verse: 5975    daz wider in lützel kein man,
Verse: 5976    sach er in under ougen an,

Verse: 5977    getorste wâgen den lîp
Verse: 5978    ihte mêre danne ein wîp.

Verse: 5979    und alse der zins ûf sîne vart
Verse: 5980    hin wider Îlant geschicket wart

Verse: 5981    und daz vünfte jâr în gie,
Verse: 5982    sô muosen aber diu zwei lant ie

Verse: 5983    iemer ze sunnewenden
Verse: 5984    die boten ze Rôme senden,

Verse: 5985    die Rôme wol gezaemen,
Verse: 5986    und daz die dâ vernaemen,

Verse: 5987    welch gebot und welhen rât
Verse: 5988    der gewaltege sênât

Verse: 5989    enbüte unde sande
Verse: 5990    einem iegelîchem lande,

Verse: 5991    daz undertân ze Rôme was.
Verse: 5992    wan man in alle jâr dâ las

Verse: 5993    und tete in ouch kunt mit maeren,
Verse: 5994    wie sî nâch Rômaeren

Verse: 5995    loys unde lantreht solten wegen,
Verse: 5996    wie s' ir gerihtes solten pflegen.

Verse: 5997    und muosen ouch reht alsô leben,
Verse: 5998    als in dâ lêre wart gegeben.

Verse: 5999    diz zinsreht unde disen prîsant
Verse: 6000    den liezen disiu zwei lant

Verse: 6001    in dem vünften jâre ie schouwen
Verse: 6002    die werden Rôme, ir vrouwen.

Verse: 6003    doch buten s' ir dise êre
Verse: 6004    niht ellîche alsô sêre

Verse: 6005    weder durch reht noch durch got
Verse: 6006    sô durch Gurmûnes gebot.

Verse: 6007    Nu sul wir wider zem maere komen.
Verse: 6008    Tristan der haete wol vernomen

Verse: 6009    diz leit ze Curnewâle.
Verse: 6010    ouch was im vor dem mâle

Verse: 6011    wol kunt, mit welher sicherheit
Verse: 6012    der selbe zins was ûf geleit.

Verse: 6013    iedoch sô hôrte er alle tage
Verse: 6014    von der lantliute sage

Verse: 6015    des landes laster und sîn leit,
Verse: 6016    swelhen enden er gereit

Verse: 6017    vür stete oder vür castêl.
Verse: 6018    und als er aber ze Tintajêl

Verse: 6019    zuo dem hovegesinde kam,
Verse: 6020    seht, dâ hôrte er und vernam

Verse: 6021    in gazzen unde in strâzen
Verse: 6022    von clage al solch gelâzen,

Verse: 6023    daz ez in muote starke.
Verse: 6024    vil schiere kâmen Marke

Verse: 6025    und hin ze hove maere,
Verse: 6026    daz Tristan komen waere.

Verse: 6027    des wâren s' alle samet vrô.
Verse: 6028    vrô meine ich aber, als ez in dô

Verse: 6029    nâch ir leide was gewant.
Verse: 6030    wan die allerbesten, die man vant

Verse: 6031    in allem Curnewâle,
Verse: 6032    die wâren zuo dem mâle

Verse: 6033    alle dar ze hove komen
Verse: 6034    ze laster, alse ir habet vernomen.

Verse: 6035    die edelen lantgenôze
Verse: 6036    die giengen dâ ze lôze

Verse: 6037    ir kinden z' einem valle.
Verse: 6038    sus vant si Tristan alle

Verse: 6039    kniuwende und an ir gebete,
Verse: 6040    daz iegelîcher sunder tete

Verse: 6041    unschamelîch unde untougen,
Verse: 6042    mit riezenden ougen,

Verse: 6043    mit inneclîchem smerzen
Verse: 6044    des lîbes unde des herzen:

Verse: 6045    daz im got der guote
Verse: 6046    beschirmete unde behuote

Verse: 6047    sîn edelkeit und ouch sîn kint.
Verse: 6048    nu s' alle an ir gebete sint,

Verse: 6049    Tristan kam zuo gegangen.
Verse: 6050    wie wart aber er enpfangen?

Verse: 6051    daz ist iu lîhte geseit:
Verse: 6052    Tristan wart von der wârheit

Verse: 6053    under allem dem gesinde
Verse: 6054    von keinem muoterkinde

Verse: 6055    noch ouch von Markes gruoze
Verse: 6056    enpfangen niht sô suoze,

Verse: 6057    als er doch waere getân,
Verse: 6058    und haete sî diz leit verlân.

Verse: 6059    Des nam aber Tristan cleine war,
Verse: 6060    wan gienc et baltlîchen dar,

Verse: 6061    dâ man in daz lôz dâ maz,
Verse: 6062    dâ Môrolt unde Marke saz.

Verse: 6063    'ir hêrren' sprach er 'alle samet,
Verse: 6064    alle mit einem namen genamet,

Verse: 6065    die hie ze lôze loufent,
Verse: 6066    ir edelkeit verkoufent,

Verse: 6067    schamt ir iuch der schanden niht,
Verse: 6068    diu disem lande an iu geschiht?

Verse: 6069    sô manhaft alse ir alle zît
Verse: 6070    alle unde an allen dingen sît,

Verse: 6071    sô soltet ir billîche
Verse: 6072    beide iuch und iuwer rîche

Verse: 6073    ahpaeren unde hêren
Verse: 6074    und an den êren mêren!

Verse: 6075    nu habet ir iuwer vrîheit
Verse: 6076    iuwern vînden geleit

Verse: 6077    ze vüezen und ze handen
Verse: 6078    mit zinslîchen schanden.

Verse: 6079    und iuwer edelen kindelîn,
Verse: 6080    diu iuwer wunne solten sîn,

Verse: 6081    iuwer lust und iuwer leben,
Verse: 6082    diu gebet ir und habet gegeben

Verse: 6083    ze schalken unde z' eigen
Verse: 6084    und enkunnet niht gezeigen,

Verse: 6085    wer iuch betwinge dar zuo
Verse: 6086    oder welher hande nôt ez tuo

Verse: 6087    niwan ein einwîc unde ein man.
Verse: 6088    kein ander nôt enist hier an.

Verse: 6089    und enkunnet under iu allen
Verse: 6090    an einen niht gevallen,

Verse: 6091    der wider einen man sîn leben
Verse: 6092    an die wâge welle geben,

Verse: 6093    weder er belîbe oder gesige.
Verse: 6094    nû sî daz, daz er dâ belige,

Verse: 6095    deiswâr so ist doch der kurze tôt
Verse: 6096    und disiu lange lebende nôt

Verse: 6097    ze himele und ûf der erde
Verse: 6098    in ungelîchem werde.

Verse: 6099    ist aber, daz er dâ gesiget
Verse: 6100    und daz daz unreht geliget,

Verse: 6101    sô hât er iemer mêre
Verse: 6102    dort gotes lôn, hie êre.

Verse: 6103    jâ suln vetere vür ir kint,
Verse: 6104    wan sî mit in ein leben sint,

Verse: 6105    ir leben geben: deist mit gote.
Verse: 6106    ez ist gâr wider gotes gebote,

Verse: 6107    der sîner kinde vrîheit
Verse: 6108    der eigenschefte vür leit,

Verse: 6109    daz er sî ze schalken gebe
Verse: 6110    und er mit vrîheite lebe.

Verse: 6111    sol ich iu rât umbe iuwer leben
Verse: 6112    nâch gote und nâch den êren geben,

Verse: 6113    oô râte ich zwâre dar an,
Verse: 6114    dazu iu kieset einen man,

Verse: 6115    swâ sô man den vinde
Verse: 6116    under disem lantgesinde,

Verse: 6117    der ze kampfe sî getân
Verse: 6118    und an gelücke welle lân,

Verse: 6119    weder er genese oder entuo.
Verse: 6120    und bitet den alle derzuo

Verse: 6121    durch gotes willen allermeist,
Verse: 6122    daz ime der heilege geist

Verse: 6123    gelücke gebe und êre,
Verse: 6124    und envürhte niht ze sêre

Verse: 6125    Môroldes groeze und sîne craft.
Verse: 6126    sî et an gote gemuothaft,

Verse: 6127    der nie dekeinen man verlie,
Verse: 6128    der mit dem rehten umbe gie.

Verse: 6129    wol balde gêt ze râte.
Verse: 6130    berâtet iuch wol drâte,

Verse: 6131    wie ir iuch dirre schande erwert
Verse: 6132    und iuch vor einem manne ernert!

Verse: 6133    g' unêret niemer mêre
Verse: 6134    iur geburt und iuwer êre!"

Verse: 6135    'Â hêrre" sprâchen s' alle dô
Verse: 6136    'jâ ist disem manne niht alsô.

Verse: 6137    ime kan nieman vor genesen."
Verse: 6138    Tristan sprach: "lât die rede wesen!

Verse: 6139    durch got versinnet iuch doch noch.
Verse: 6140    nû sît ir an gebürte doch

Verse: 6141    allen künegen ebengrôz
Verse: 6142    und aller keisere genôz,

Verse: 6143    und wellet iuwer edelen kint,
Verse: 6144    idu iu gelîche edele sint,

Verse: 6145    versellen und versachen
Verse: 6146    und ze schalken machen?

Verse: 6147    und ist daz, daz ir keinen man
Verse: 6148    niht muget geherzen hier an,

Verse: 6149    daz er durch iuwer aller leit
Verse: 6150    und durch des landes armekeit

Verse: 6151    getürre nâch dem rehten
Verse: 6152    in gotes namen vehten

Verse: 6153    gegen dem einem manne,
Verse: 6154    geruochet ir es danne

Verse: 6155    an got gelâzen unde an mich,
Verse: 6156    deiswâr, ir hêrren, sô wil ich

Verse: 6157    mîne jugent und mîn leben
Verse: 6158    durch got an âventiure geben

Verse: 6159    und vil den kampf durch iuch bestân.
Verse: 6160    got lâze in iu ze guote ergân

Verse: 6161    und bringe iuch wider ze rehte!
Verse: 6162    ouch swie mir an der vehte

Verse: 6163    iht anders danne wol geschiht,
Verse: 6164    daz enschadet iu z' iuwerm rehte niht.

Verse: 6165    gelige ich an dem kampfe tôt,
Verse: 6166    dâ mite ist iuwer keines nôt

Verse: 6167    eeder abe noch an gekêret,
Verse: 6168    geminret noch gemêret.

Verse: 6169    sô stât ez aber rehte als ê.
Verse: 6170    sî daz ez aber ze heile ergê,

Verse: 6171    daz ist binamen von gotes gebote.
Verse: 6172    des endankent nieman niuwan gote.

Verse: 6173    wan den ich eine sol bestân,
Verse: 6174    als ich vil wol vernomen hân,

Verse: 6175    der ist von muote und ouch von craft
Verse: 6176    ze ernestîcher ritterschaft

Verse: 6177    ein lange her bewaeret man.
Verse: 6178    sô gân ich alrêrest an

Verse: 6179    an muote und an der crefte
Verse: 6180    und bin ze ritterschefte

Verse: 6181    niht alsô kürbaere,
Verse: 6182    als uns nu nôt waere.

Verse: 6183    wan daz ich aber zer vehte
Verse: 6184    an gote und ouch an rehte

Verse: 6185    zwô sigebaere helfe hân,
Verse: 6186    die suln mit mir ze kampfe gân!

Verse: 6187    dar zuo hân ich willigen muot,
Verse: 6188    der selbe ist ouch ze kampfe guot.

Verse: 6189    und helfent mir die selben drî,
Verse: 6190    swie unversuoht ich anders sî,

Verse: 6191    sô hân ich guoten trôst dar an,
Verse: 6192    ich genese wol vor einem man.'

Verse: 6193    'Hêrre' sprach al diu ritterschaft
Verse: 6194    'diu heilege gotes craft,

Verse: 6195    diu al die werlt geschaffen hât,
Verse: 6196    diu vergelte iu trôst unde rât

Verse: 6197    unde den saeleclîchen wân,
Verse: 6198    den ir uns allen habet getân.

Verse: 6199    hêrre, lât iu daz ende sagen:
Verse: 6200    unser rât mag lützel vür getragen.

Verse: 6201    solte unser saelde hân geruoht,
Verse: 6202    sô vil sô wir sîn haben versuoht,

Verse: 6203    als ofte es ie begunnen wart,
Verse: 6204    ez waere niht biz her gespart.

Verse: 6205    wirn haben niht z' einem mâle
Verse: 6206    wir hie ze Curnewâle

Verse: 6207    umbe unser angest rât genomen.
Verse: 6208    wir sîn an manege sprâche komen

Verse: 6209    und enkunden doch dekeinen nie
Verse: 6210    under uns vinden, ern wolt ie

Verse: 6211    sîn kint vür eigen gerner geben,
Verse: 6212    dan er verlür sîn selbes leben

Verse: 6213    wider disen vâlandes man.'
Verse: 6214    'wie redet ir sus!' sprach Tristan

Verse: 6215    'jâ ist der dinge vil geschehen.
Verse: 6216    man hât des wunder gesehen,

Verse: 6217    daz unrehtiu hôhvart
Verse: 6218    mit cleiner craft genidert wart.

Verse: 6219    daz möhte ouch vil wol noch ergân,
Verse: 6220    der ez getörste bestân.'

Verse: 6221    Nu Môrolt der hôrte allez an
Verse: 6222    und verdûhte in sêre, daz Tristan

Verse: 6223    sô vaste nâch dem kampfe sprach,
Verse: 6224    dô er 'n sô kindeschen sach,

Verse: 6225    und truog im in dem herzen haz.
Verse: 6226    Tristan sprach aber dô vürbaz:

Verse: 6227    'ir hêrren alle, redet hie zuo,
Verse: 6228    waz ist iu noch liep, daz ich tuo?'

Verse: 6229    'hêrre' sprachen s' alle dô
Verse: 6230    'kunde ez iemer werden sô,

Verse: 6231    der wân, den ir uns habet getân,
Verse: 6232    daz der möhte vür sich gân:

Verse: 6233    daz waere unser aller ger.'
Verse: 6234    'ist iu daz liep?' sprach aber er.

Verse: 6235    'sît daz ez danne an dise vrist
Verse: 6236    und her ze mir behalten ist,

Verse: 6237    wil 's danne got geruochen,
Verse: 6238    sô wil ich versuochen,

Verse: 6239    ob iu got habe ûf geleit
Verse: 6240    an mir dekeine saelekeit

Verse: 6241    und ob ich selbe iht saelden habe.'
Verse: 6242    hie begunde in Marke leiten abe

Verse: 6243    mit allen sînen sinnen.
Verse: 6244    er wânde im abe gewinnen,

Verse: 6245    ob er 'z in lâzen hieze,
Verse: 6246    daz er ez durch in lieze.

Verse: 6247    nein er, weiz got, er entete.
Verse: 6248    weder mit gebote noch mit bete

Verse: 6249    kund er ime sô vil niht mite gegân,
Verse: 6250    daz er 'z durch in wolde lân.

Verse: 6251    Wan gieng et hin, dâ Môrolt saz
Verse: 6252    und redete aber dô vürbaz:

Verse: 6253    'hêrre' sprach er 'saget mir,
Verse: 6254    sô helfe iu got, waz werbet ir?'

Verse: 6255    'vriunt' sprach Môrolt sâ zestunt
Verse: 6256    'wes vrâget ir? iu ist doch wol kunt,

Verse: 6257    waz ich hie wirbe und wes ich ger.'
Verse: 6258    'ir hêrren alle, hoeret her:

Verse: 6259    der künec mîn hêrre und sîne man!'
Verse: 6260    sprach aber der wîse Tristan;

Verse: 6261    'mîn hêr Môrolt, ir habet wâr,
Verse: 6262    ich weiz ez unde erkennez gâr:

Verse: 6263    al sî ez lasterbaere,
Verse: 6264    ez ist iedoch ein maere,

Verse: 6265    daz nieman undertreten mac.
Verse: 6266    man hât den zins nu manegen tac

Verse: 6267    von hinnen und von Engelant
Verse: 6268    z' Îlanden âne reht gesant.

Verse: 6269    dar zuo brach ez sich lange
Verse: 6270    mit michelem getwange,

Verse: 6271    mit manigem gewalte;
Verse: 6272    wan man den landen valte

Verse: 6273    beidiu bürge unde stete
Verse: 6274    und in ouch an den liuten tete

Verse: 6275    sô grôzen und sô manegen schaden,
Verse: 6276    biz daz si wurden überladen

Verse: 6277    mit gewalte und mit unrehte,
Verse: 6278    unz daz die guoten knehte,

Verse: 6279    die dannoch wâren genesen,
Verse: 6280    die muosen undertaenic wesen

Verse: 6281    alles des man in gebôt,
Verse: 6282    durch daz si vorhten den tôt

Verse: 6283    und enmohten, alse in was getân,
Verse: 6284    die zît niht anders ane gegân.

Verse: 6285    als ist daz michel unreht,
Verse: 6286    als ir noch hiutes tages seht,

Verse: 6287    an in begangen iemer sît
Verse: 6288    und waere zwâre lange zît,

Verse: 6289    daz sî der grôzen swacheit
Verse: 6290    mit wîge haeten widerseit;

Verse: 6291    wan sî sint sêre vür komen.
Verse: 6292    diu lant diu habent zuo genomen

Verse: 6293    an kunden unde an gesten,
Verse: 6294    an steten unde an vesten,

Verse: 6295    an guote und an den êren.
Verse: 6296    man sol ez wider kêren,

Verse: 6297    daz uns her verkêret ist,
Verse: 6298    wan unser aller genist

Verse: 6299    muoz sus hin an gewalte wesen.
Verse: 6300    sul wir iemer genesen,

Verse: 6301    daz müeze wir beherten
Verse: 6302    mit wîge und mit herverten.

Verse: 6303    unser dinc stât an den liuten wol.
Verse: 6304    diu lant sint beidiu liute vol.

Verse: 6305    man sol ez uns her wider geben,
Verse: 6306    daz man uns allez unser leben

Verse: 6307    mit gewalte hât genomen.
Verse: 6308    wir suln dar selbe zuo z' in komen,

Verse: 6309    swenne uns got schiereste lât.
Verse: 6310    swaz man des unseren dâ hât,

Verse: 6311    es sî lützel oder vil,
Verse: 6312    der mînes willen volgen wil

Verse: 6313    und mînes râtes dar an pflegen:
Verse: 6314    man muoz ez uns her wider wegen

Verse: 6315    unz an den jungesten rinc.
Verse: 6316    ie noch möht unser messinc

Verse: 6317    ze rôtem golde werden.
Verse: 6318    ez ist vil ûf der erden

Verse: 6319    vremeder dinge geschehen,
Verse: 6320    der man sich minre hât versehen.

Verse: 6321    und dirre hêrren edeliu kint,
Verse: 6322    diu dâ ze schalken worden sint,

Verse: 6323    diu möhten noch wol werden vrî,
Verse: 6324    swie ungedâht es in doch sî.

Verse: 6325    got sî, der mich noch des gewer!
Verse: 6326    wan ich 's in sînem namen ger,

Verse: 6327    daz ich noch mit mîn selbes hant
Verse: 6328    den hervanen in Îlant

Verse: 6329    mit disen lantgenôzen
Verse: 6330    alsô müez ûf gestôzen,

Verse: 6331    daz daz lant und diu erde
Verse: 6332    von mir genidert werde!'

Verse: 6333    Môrolt sprach aber: 'hêr Tristan,
Verse: 6334    naemet ir iuch minre an

Verse: 6335    dirre dinge und dirre maere,
Verse: 6336    ich waene, ez iu guot waere.

Verse: 6337    wan swaz hier under rede geschiht,
Verse: 6338    wirn lâzen doch dar umbe niht,

Verse: 6339    des wir ze rehte sulen hân.'
Verse: 6340    hie mite gieng er vür Marken stân:

Verse: 6341    'künec Marke' sprach er 'sprechet hie,
Verse: 6342    lât hoeren ir und alle die,

Verse: 6343    die hie ze gegenwürte sint
Verse: 6344    mit mir ze redene umbe ir kint,

Verse: 6345    bescheidet mich der maere baz.
Verse: 6346    ist iuwer aller wille daz

Verse: 6347    und lît ouch iuwer muot dar an,
Verse: 6348    als iuwer voget hêr Tristan

Verse: 6349    mit worten hie bescheiden hât?'
Verse: 6350    'jâ hêrre, eist unser aller rât,

Verse: 6351    unser wille und unser muot,
Verse: 6352    swaz er gesprichet oder getuot.'

Verse: 6353    Môrolt sprach aber: 'sô brechet ir
Verse: 6354    mînem hêrren unde mir

Verse: 6355    iuwer triuwe und iuwern eit
Verse: 6356    und alle die sicherheit,

Verse: 6357    diu under uns allen ie geschach.'
Verse: 6358    der höfsche Tristan aber dô sprach:

Verse: 6359    'nein hêrre, ir misseredet hier an.
Verse: 6360    ez lûtet übele, swer dem man

Verse: 6361    an sîne triuwe sprichet.
Verse: 6362    ir aller keiner brichet

Verse: 6363    weder triuwe noch eit.
Verse: 6364    ein gelübede unde ein sicherheit

Verse: 6365    wart wîlent under iu getân,
Verse: 6366    die sol man ouch noch staete lân:

Verse: 6367    daz s' alle jâr z' Îlanden
Verse: 6368    mit guotem willen sanden

Verse: 6369    von Curnewal und von Engelant
Verse: 6370    den zins, der in dâ wart benant,

Verse: 6371    oder aber si sazten sich ze wer
Verse: 6372    mit einwîge oder mit lanther.

Verse: 6373    sint s' iu der dinge noch bereit
Verse: 6374    und loesent ir triuwe unde ir eit

Verse: 6375    mit zinse oder aber mit vehte,
Verse: 6376    sô tuont s' iu allez rehte.

Verse: 6377    hêrre, hie zuo denket ir:
Verse: 6378    berâtet iuch und saget mir,

Verse: 6379    weder iu lieber sî getân.
Verse: 6380    an swederz ir iuch wellet lân,

Verse: 6381    an kampf oder aber an lantstrît,
Verse: 6382    des sît ir nû und alle zît

Verse: 6383    an uns gewis und ouch gewert.
Verse: 6384    ez müezen doch sper unde swert

Verse: 6385    under uns und iu bescheiden.
Verse: 6386    nu kieset under den beiden

Verse: 6387    ir einez unde saget uns daz.
Verse: 6388    der zins enlîchet nû niht baz.'

Verse: 6389    Môrolt sprach aber: 'hêr Tristan,
Verse: 6390    hie bin ich schiere komen an.

Verse: 6391    ich weiz wol, wederz ich dâ wil.
Verse: 6392    mîn ist hie nû niht alse vil,

Verse: 6393    daz ich ze lantstrîte
Verse: 6394    iht gewerlîche rîte.

Verse: 6395    ich vuor von lande über mer
Verse: 6396    mit einem heinlîchen her

Verse: 6397    und kam vil vridelîche
Verse: 6398    her in disiu rîche,

Verse: 6399    als ich ê mâles hân getân.
Verse: 6400    ich wânde, ez sus niht solte ergân.

Verse: 6401    in versach mich dirre geschiht
Verse: 6402    an dise lanthêrren niht.

Verse: 6403    ich wânde varn von hinnen
Verse: 6404    mit rehte und ouch mit minnen.

Verse: 6405    nû habet ir mir wîc vür geleit,
Verse: 6406    dar zuo bin ich noch unbereit.'

Verse: 6407    Tristan sprach: 'hêrre, ist iuwer muot
Verse: 6408    ze einem lantstrîte guot,

Verse: 6409    sô kêret umbe zehant,
Verse: 6410    vart wider heim in iuwer lant,

Verse: 6411    besendet iuwer ritterschaft,
Verse: 6412    besamenet alle iuwer craft

Verse: 6413    und kumet her wider und lât uns sehen,
Verse: 6414    wie unde waz uns süle geschehen.

Verse: 6415    und tuot ir des niht zwâre
Verse: 6416    in disem halben jâre,

Verse: 6417    sô nemet ir unser dâ z' iu war:
Verse: 6418    sô komen wir sicherlîchen dar.

Verse: 6419    man hât uns doch hie vor gezalt,
Verse: 6420    gewalt hoere wider gewalt

Verse: 6421    und craft wider crefte.
Verse: 6422    sît man mit ritterschefte

Verse: 6423    lant unde reht sol swachen,
Verse: 6424    hêrren ze schalken machen

Verse: 6425    und daz ein billîch wesen sol,
Verse: 6426    sô getrûwen wir des gote wol,

Verse: 6427    daz unser aller swacheit
Verse: 6428    noch werde wider hin z' iu geleit.'

Verse: 6429    'Got weiz' sprach Môrolt 'hêr Tristan,
Verse: 6430    ich hoere vil wol, daz ein man,

Verse: 6431    der nie ze solhem schalle kam
Verse: 6432    noch dirre drô nie niht vernam,

Verse: 6433    dem waeren disiu maere
Verse: 6434    sorclîch und angestbaere.

Verse: 6435    ich trûwe ir aber vil wol genesen.
Verse: 6436    ich bin ouch dicker dâ gewesen,

Verse: 6437    dâ schallen unde hôhvart
Verse: 6438    mit solher rede getriben wart.

Verse: 6439    ez ist wol der geloube mîn,
Verse: 6440    Gurmûn welle âne sorge sîn

Verse: 6441    umbe sîn liut und umbe sîn lant
Verse: 6442    vor iuwerm vanen unde iuwer hant.

Verse: 6443    ouch wirt dise übermüetekeit,
Verse: 6444    man enbreche uns danne triuwe und eit,

Verse: 6445    niemer gespart z' Îlanden.
Verse: 6446    wir suln ez hie mit handen,

Verse: 6447    wir zwêne under uns beiden
Verse: 6448    in einem ringe scheiden,

Verse: 6449    weder ir reht habet oder ich.'
Verse: 6450    Tristan sprach aber: 'diz muoz ich

Verse: 6451    mit gotes helfe erzeigen,
Verse: 6452    und müeze den geveigen,

Verse: 6453    der unreht under uns beiden habe!'
Verse: 6454    sînen hantschuoch zôh er abe.

Verse: 6455    er bôt in Môrolde dar.
Verse: 6456    'ir hêrren' sprach er 'nemet war:

Verse: 6457    der künec mîn hêrre und alle die,
Verse: 6458    die hie sîn, die hoeren, wie

Verse: 6459    ich disen kampf bespreche,
Verse: 6460    daz ich daz reht niht breche.

Verse: 6461    daz mîn hêr Môrolt, der hie stât,
Verse: 6462    noch der in her gesendet hât,

Verse: 6463    noch mit gewalt kein ander man
Verse: 6464    zins ze rehte nie gewan

Verse: 6465    ze Curnewal noch z' Engelant:
Verse: 6466    daz wil ich mit mîner hant

Verse: 6467    wâr machen und wârbaeren,
Verse: 6468    got unde der werlt bewaeren

Verse: 6469    ûf disen hêrren, der hie stât,
Verse: 6470    der unz her gevrumet hât

Verse: 6471    daz laster und daz ungemach,
Verse: 6472    daz disen zwein landen ie geschach.'

Verse: 6473    dâ rief an der stunde
Verse: 6474    von herzen und von munde

Verse: 6475    manec edeliu zunge hin ze gote,
Verse: 6476    daz got mit sînem gebote

Verse: 6477    bedaehte ir laster unde ir leit
Verse: 6478    und lôste sî von schalcheit.

Verse: 6479    swaz aber ir aller swaere
Verse: 6480    von disem kampfe waere,

Verse: 6481    daz gie Môrolde cleine
Verse: 6482    ze herzen oder ze beine:

Verse: 6483    er was vil unrekomen dâ van.
Verse: 6484    der wol gestandene man

Verse: 6485    der enleite ez niender nidere.
Verse: 6486    er bôt ouch ime dâ widere

Verse: 6487    des kampfes bewaerde
Verse: 6488    mit herter gebaerde,

Verse: 6489    mit fierer contenanze.
Verse: 6490    in dûhte disiu schanze

Verse: 6491    vil wol nâch sînem willen wesen.
Verse: 6492    er trûte ir harte wol genesen.

Verse: 6493    Nû diz gewisset was alsô,
Verse: 6494    der kampf der wart den hêrren dô

Verse: 6495    unz an den dritten tac gespart.
Verse: 6496    nû daz der dritte tac dô wart,

Verse: 6497    dô kam al diu lantschaft
Verse: 6498    und volkes ein sô michel craft,

Verse: 6499    daz der stat bî dem mer
Verse: 6500    aller bevangen was mit her.

Verse: 6501    Môrolt vuor wâfenen sich.
Verse: 6502    mit des gewaefene wil ich

Verse: 6503    noch mit sîner sterke
Verse: 6504    mînes herzen merke

Verse: 6505    noch mînes sinnes spitze sehe
Verse: 6506    mit nâhe merkender spehe

Verse: 6507    niht stumpfen noch lesten,
Verse: 6508    sô dicke als er zem besten

Verse: 6509    an rehter manheit ist gezalt.
Verse: 6510    diu zal von ime ist manicvalt,

Verse: 6511    daz er an muote, an groeze, an craft
Verse: 6512    ze vollekomener ritterschaft

Verse: 6513    daz lob in allen rîchen truoc.
Verse: 6514    hie sî des lobes von ime genuoc.

Verse: 6515    ich weiz wol, daz er kunde
Verse: 6516    dô unde z' aller stunde

Verse: 6517    ze kampfe und ouch ze vehte
Verse: 6518    nâch ritteres rehte

Verse: 6519    sînem lîbe vil wol mite gân.
Verse: 6520    er haete es ê sô vil getân.

Verse: 6521    Der guote künic Marke
Verse: 6522    dem gie der kampf sô starke

Verse: 6523    mit herzeleide an sînen lîp,
Verse: 6524    daz nie kein herzelôsez wîp

Verse: 6525    die nôt umbe einen man gewan.
Verse: 6526    er enhaete keinen trôst dar an,

Verse: 6527    ez enwaere Tristandes tôt,
Verse: 6528    und haete gerne jene nôt

Verse: 6529    iemer umbe den zins geliten,
Verse: 6530    daz der kampf waere vermiten.

Verse: 6531    nu ergieng ez aber allez baz
Verse: 6532    umbe diz und umbe daz,

Verse: 6533    umbe zins und umbe man.
Verse: 6534    Der unversuohte Tristan

Verse: 6535    ze nôtlîchen dingen
Verse: 6536    der begunde ouch sich mit ringen

Verse: 6537    warnen an der stunde,
Verse: 6538    sô er allerbeste kunde.

Verse: 6539    sînen lîp und sîniu bein
Verse: 6540    diu bewârte er schone und wol in ein.

Verse: 6541    dar über leite er edel werc,
Verse: 6542    zwô hosen und einen halsperc,

Verse: 6543    die wâren lieht unde wîz,
Verse: 6544    als der meister sînen vlîz

Verse: 6545    und alle sîne wîsheit
Verse: 6546    an sî haete geleit.

Verse: 6547    zwên edele sporen starke
Verse: 6548    die spîen im sîn vriunt Marke

Verse: 6549    und sîn getriuwer dienestman
Verse: 6550    mit weinendem herzen an.

Verse: 6551    sîne wâfenriemen er im bant
Verse: 6552    alle mit sîn selbes hant.

Verse: 6553    ein wâfenroc wart dar getragen,
Verse: 6554    der was, alse ich hôrte sagen,

Verse: 6555    mit drîhen in den spelten
Verse: 6556    zen vuogen und zen velten,

Verse: 6557    z' allen sînen enden
Verse: 6558    mit vrouwînen henden

Verse: 6559    in vremedem prîse bedâht
Verse: 6560    und noch prîslîcher vollebrâht.

Verse: 6561    hî! dô er den an sich genam,
Verse: 6562    wie lustic und wie lobesam

Verse: 6563    er dô dar inne waere,
Verse: 6564    daz waere sagebaere!

Verse: 6565    wan daz aber ichz niht lengen wil.
Verse: 6566    der rede der würde alze vil,

Verse: 6567    ob ich ez allez wolte
Verse: 6568    ergründen, alse ich solte.

Verse: 6569    und sult ir doch wol wizzen daz:
Verse: 6570    der man gezam dem rocke baz

Verse: 6571    und truog in lobes und êren an
Verse: 6572    vil mêre danne der roc den man.

Verse: 6573    swie guot, swie lobebaere
Verse: 6574    der wâfenroc doch waere,

Verse: 6575    er was doch sîner werdekeit,
Verse: 6576    der in dô haete ane geleit,

Verse: 6577    kûme unde kûmeclîche wert.
Verse: 6578    dar über gurte im Marke ein swert,

Verse: 6579    daz sîn leben und sîn herze was,
Verse: 6580    von dem er allermeist genas

Verse: 6581    vor Môrolde und ouch dicke sider.
Verse: 6582    und wac daz alsô rehte nider

Verse: 6583    und lac ûf sîner strâze
Verse: 6584    in sô gevüeger mâze,

Verse: 6585    daz ez noch ûf noch nider wac
Verse: 6586    wan rehte, dâ sîn weide lac.

Verse: 6587    ein helm wart ouch besendet dar,
Verse: 6588    der was als ein cristalle var,

Verse: 6589    lûter unde veste,
Verse: 6590    der schoeneste unde der beste,

Verse: 6591    den ie ritter ûf genam.
Verse: 6592    ich waene ouch ie sô guoter kam

Verse: 6593    inz lant ze Curnewâle.
Verse: 6594    dar ûffe stuont diu strâle,

Verse: 6595    der minnen wîsaginne,
Verse: 6596    diu sît her mit der minne

Verse: 6597    an ime vil wol bewaeret wart,
Verse: 6598    swie lange ez würde dar gespart.

Verse: 6599    den sazte im Marke ûf unde sprach:
Verse: 6600    'â neve, daz ich dich ie gesach,

Verse: 6601    daz wil ich gote vil tiure clagen.
Verse: 6602    ich wil dem allem widersagen,

Verse: 6603    des kein man ze vröuden giht,
Verse: 6604    ist, daz mir leide an dir geschiht.'

Verse: 6605    Ein schilt der wart ouch dar besant.
Verse: 6606    an dem haete ein gevüegiu hant

Verse: 6607    gewendet allen ir vlîz
Verse: 6608    und was der niuwan silberwîz,

Verse: 6609    durch daz er einbaere
Verse: 6610    helm unde ringen waere.

Verse: 6611    er was aber gebrûnieret,
Verse: 6612    mit lûtere gezieret

Verse: 6613    reht alse ein niuwe spiegelglas.
Verse: 6614    ein eber dar ûf gesniten was

Verse: 6615    vil meisterlîchen unde wol
Verse: 6616    von swarzem zobel alsam ein kol.

Verse: 6617    den leite im aber sîn oeheim an.
Verse: 6618    der stuont dem keiserlîchem man

Verse: 6619    und vuogete ime zer sîten
Verse: 6620    dô unde z' allen zîten,

Verse: 6621    als er dar gelîmet waere.
Verse: 6622    nû daz der lobebaere,

Verse: 6623    der genaeme kindesche man
Verse: 6624    Tristan den schilt an sich gewan,

Verse: 6625    nû lûhten disiu vier werc,
Verse: 6626    helm unde halsperc,

Verse: 6627    schilt unde hosen ein ander an
Verse: 6628    sô schône, ob sî der wercman

Verse: 6629    alle viere alsô haete ûf geleit,
Verse: 6630    daz iegelîches schônheit

Verse: 6631    dem andern schoene baere
Verse: 6632    und sîn geschoenet waere,

Verse: 6633    sone kunde ir aller vierer schîn
Verse: 6634    ebenliehter niemer sîn.

Verse: 6635    und aber daz niuwe wunder,
Verse: 6636    daz dar inne und dar under

Verse: 6637    ze schaden und ze sorgen
Verse: 6638    den vînden was verborgen,

Verse: 6639    haete aber daz dekeine craft
Verse: 6640    wider dirre vremeden meisterschaft,

Verse: 6641    diu ûzen an gebildet lac?
Verse: 6642    ich weiz ez wârez alse den tac:

Verse: 6643    swie sô der ûzer waere,
Verse: 6644    der innere bildaere

Verse: 6645    der was baz betihtet,
Verse: 6646    bemeistert unde berihtet

Verse: 6647    ze ritters figiure
Verse: 6648    dan diu ûzere faitiure.

Verse: 6649    daz werc daz was dar inne
Verse: 6650    an geschepfede unde an sinne

Verse: 6651    vil lobelîchen ûf geleit.
Verse: 6652    des wercmannes wîsheit

Verse: 6653    hî, wie wol diu dar an schein!
Verse: 6654    sîn brust, sîn arme und sîniu bein

Verse: 6655    diu wâren hêrlîch unde rîch,
Verse: 6656    wol gestalt und edelîch.

Verse: 6657    im stuont daz îsen dar obe
Verse: 6658    wol und ze wunderlîchem lobe.

Verse: 6659    sîn ors daz habete ein knappe dâ.
Verse: 6660    in Spanjenlant noch anderswâ

Verse: 6661    wart nie kein schoenerez erzogen.
Verse: 6662    ezn was niender în gesmogen:

Verse: 6663    ez was rîch und offen
Verse: 6664    zer brust und zuo den goffen,

Verse: 6665    starc ze beiden wenden,
Verse: 6666    erwünschet z' allen enden.

Verse: 6667    sîne vüeze und sîniu bein
Verse: 6668    diu behielten ouch vil wol in ein

Verse: 6669    al ir geschepfede unde ir reht.
Verse: 6670    die vüeze sinewel, diu bein sleht,

Verse: 6671    ûfrihtic alle viere
Verse: 6672    als einem wilden tiere;

Verse: 6673    ouch was ez kurzlîcher kust:
Verse: 6674    hin vor dem satel und vor der brust

Verse: 6675    dâ stuont ez alsô rehte wol,
Verse: 6676    als ein ros iemer beste sol.

Verse: 6677    dar ûffe ein wîziu decke lac,
Verse: 6678    lieht unde lûter alse der tac,

Verse: 6679    den andern ringen gelîch,
Verse: 6680    und was diu lanc und alsô rîch,

Verse: 6681    daz sî wol ebene nider gie
Verse: 6682    dem orse vaste vür diu knie.

Verse: 6683    Nû daz Tristan ze vehte
Verse: 6684    nâch ritteres rehte

Verse: 6685    nâch kampfes gewonheit
Verse: 6686    wol und ze prîse was bereit,

Verse: 6687    die dô wol kunden prîsen
Verse: 6688    beidiu man und îsen,

Verse: 6689    die kâmen alle samet dar an,
Verse: 6690    daz beidiu, îsen unde man,

Verse: 6691    geworhten schoener bilde nie.
Verse: 6692    swie wol daz aber schîne hie,

Verse: 6693    ez schein doch vil und verre baz,
Verse: 6694    sît dô er ûf daz ors gesaz

Verse: 6695    und sper ze handen genam,
Verse: 6696    dô was daz bilde lussam,

Verse: 6697    dô was der ritter lobelîch,
Verse: 6698    ob dem satel und unden rîch.

Verse: 6699    arme und ahsele beide
Verse: 6700    die haeten breite weide.

Verse: 6701    in den satel kunde er sich wol,
Verse: 6702    dâ man den satel sitzen sol,

Verse: 6703    gesetzen unde gevüegen.
Verse: 6704    hin neben des orses büegen

Verse: 6705    dâ swebeten sîniu schoeniu bein
Verse: 6706    strac unde sleht alsam ein zein.

Verse: 6707    dô stuont daz ors, dô stuont der man
Verse: 6708    sô rehte wol ein ander an,

Verse: 6709    als ob si waeren under in zwein
Verse: 6710    mit ein ander unde in ein

Verse: 6711    alsô gewahsen unde geborn.
Verse: 6712    die gebaerde wâren ûz erkorn,

Verse: 6713    staetelîch und staete,
Verse: 6714    die Tristan z' orse haete.

Verse: 6715    dar zuo swie wol gebaere
Verse: 6716    gebaerdehalp er waere,

Verse: 6717    sô was doch innerthalp der muot
Verse: 6718    sô reine g' artet und sô guot,

Verse: 6719    daz edeler muot und reiner art
Verse: 6720    under helme nie bedecket wart.

Verse: 6721    Sus was den kempfen beiden
Verse: 6722    ein kampfstat bescheiden,

Verse: 6723    ein cleiniu insel in dem mer,
Verse: 6724    dem stade sô nâhe unde dem her,

Verse: 6725    daz man dâ wol bereite sach,
Verse: 6726    swaz in der insele geschach.

Verse: 6727    und was ouch daz beredet dar an,
Verse: 6728    daz âne dise zwêne man

Verse: 6729    nieman dar în kaeme,
Verse: 6730    biz der kampf ende naeme.

Verse: 6731    daz wart ouch wol behalten.
Verse: 6732    sus wurden dar geschalten

Verse: 6733    den kempfen zwein zwei schiffelîn,
Verse: 6734    der ietwederz mohte sîn,

Verse: 6735    daz ez ein ors und einen man
Verse: 6736    gewâfent wol trüege dan.

Verse: 6737    nû disiu schif diu stuonden dâ.
Verse: 6738    Môrolt zôch in ir einez sâ.

Verse: 6739    daz ruoder nam er an die hant,
Verse: 6740    er schiffete anderhalp an lant.

Verse: 6741    und alse er ûz zem werde kam,
Verse: 6742    sîn schiffelîn er iesâ nam,

Verse: 6743    zuo dem stade hafte er daz.
Verse: 6744    ûf sîn ors er balde saz,

Verse: 6745    an sîne hant nam er sîn sper,
Verse: 6746    al über den wert sô liez er her

Verse: 6747    rîlîche gân punieren,
Verse: 6748    hin unde her laisieren.

Verse: 6749    und wâren sîn puneize
Verse: 6750    in dem ernestcreize

Verse: 6751    sô ringe und sô schimpfbaere,
Verse: 6752    als ez ze schimpfe waere.

Verse: 6753    Als Tristan ouch ze schiffe kam,
Verse: 6754    sîn dinc dar în ze sich genam,

Verse: 6755    beidiu sîn ors und ouch sîn sper.
Verse: 6756    vorn in dem schiffe dâ stuont er.

Verse: 6757    'künec' sprach er 'hêrre Marke,
Verse: 6758    nune sorget niht ze starke

Verse: 6759    umbe mînen lîp und umbe mîn leben.
Verse: 6760    wir suln ez allez gote ergeben.

Verse: 6761    unser angest hilfet hie zuo niht.
Verse: 6762    waz obe uns lîhte baz geschiht,

Verse: 6763    dan man uns habe ûf geleit?
Verse: 6764    unser sige und unser saelekeit

Verse: 6765    diu enstât an keiner ritterschaft
Verse: 6766    wan an der einen gotes craft.

Verse: 6767    lât alle vorvorhte wesen,
Verse: 6768    wan ich mac harte wol genesen.

Verse: 6769    mir ist ze disem dinge
Verse: 6770    mîn gemüete harte ringe.

Verse: 6771    als tuot ouch ir: gehabet iuch wol!
Verse: 6772    ez ergât doch niuwan, alse ez sol.

Verse: 6773    und aber swie sô mîn ding ergê,
Verse: 6774    an swelhem ende sô 'z gestê,

Verse: 6775    sô lât ir iuch doch hiute,
Verse: 6776    iuwer lant und iuwer liute,

Verse: 6777    an den ich mich verlâzen hân.
Verse: 6778    got selbe, der mit mir sol gân

Verse: 6779    ze ringe und ouch ze vehte,
Verse: 6780    der bringe reht ze rehte!

Verse: 6781    got muoz binamen mit mir gesigen
Verse: 6782    oder mit mir sigelôs beligen.

Verse: 6783    der walte es unde müeze es pflegen!'
Verse: 6784    hie mite bôt er in sînen segen.

Verse: 6785    sîn schiffelîn daz stiez er an
Verse: 6786    und vuor in gotes namen dan.

Verse: 6787    hie wart sîn lîp und ouch sîn leben
Verse: 6788    von manegem munde gote ergeben.

Verse: 6789    im wart von maneger edelen hant
Verse: 6790    manec süeze segen nâch gesant.

Verse: 6791    und alse er ûz ze stade gestiez,
Verse: 6792    sîn schiffelîn er vliezen liez

Verse: 6793    und saz ûf sîn ors iesâ.
Verse: 6794    nu was ouch Môrolt iesâ dâ.

Verse: 6795    'sag an' sprach er 'waz tiutet daz,
Verse: 6796    durch welhen list und umbe waz

Verse: 6797    hâstû daz schif lâzen gân?'
Verse: 6798    'daz hân ich umbe daz getân:

Verse: 6799    hie ist ein schif unde zwêne man,
Verse: 6800    und enist ouch dâ kein zwîvel an,

Verse: 6801    belîbent die niht beide hie,
Verse: 6802    daz aber binamen ir einer ie

Verse: 6803    ûf disem werde tôt beliget,
Verse: 6804    sô hât ouch jener, der dâ gesiget,

Verse: 6805    an disem einen genuoc,
Verse: 6806    daz dich dâ her zem werde truoc.'

Verse: 6807    Môrolt sprach aber: 'ich hoere wol,
Verse: 6808    daz diz unwendic wesen sol,

Verse: 6809    der kampf enmüeze vür sich gân.
Verse: 6810    liezestû 'n noch understân

Verse: 6811    und schiede wir mit minnen
Verse: 6812    ûf solhe rede von hinnen,

Verse: 6813    daz ich mîn zinsreht staete
Verse: 6814    von disen zwein landen haete.

Verse: 6815    daz diuhte mich dîn saelekeit.
Verse: 6816    wan zwâre mir ist sêre leit,

Verse: 6817    ist daz ich dich slâhen sol.
Verse: 6818    mirn geviel nie ritter alsô wol,

Verse: 6819    den ich mit ougen ie gesach.'
Verse: 6820    der gemuote Tristan aber dô sprach:

Verse: 6821    'der zins muoz vürder sîn getân,
Verse: 6822    sol kein suone under uns ergân.'

Verse: 6823    'entriuwen' sprach der ander dô
Verse: 6824    'diu suone wirdet niht alsô.

Verse: 6825    sus kome wir niht ze minnen.
Verse: 6826    der zins muoz mit mir hinnen.'

Verse: 6827    'sô trîbe wir' sprach Tristan
Verse: 6828    'vil harte unnütziu teidinc an.

Verse: 6829    Môrolt, sît daz du danne mîn
Verse: 6830    ze slahene sô gewis wilt sîn,

Verse: 6831    sô wer dich, wellestû genesen.
Verse: 6832    hie enmac niht anders an gewesen.'

Verse: 6833    Daz ors daz warf er umbe,
Verse: 6834    er machte ûz einer crumbe

Verse: 6835    eine rihtige slihte.
Verse: 6836    er lie her gân enrihte

Verse: 6837    mit aller sînes herzen ger
Verse: 6838    mit gesenketem sper.

Verse: 6839    mit vliegenden schenkelen,
Verse: 6840    mit sporn und mit enkelen

Verse: 6841    nam er daz ors zen sîten.
Verse: 6842    wes mohte ouch jener dô bîten,

Verse: 6843    dem ez umbe daz leben dô stuont?
Verse: 6844    der tete reht als sî alle tuont,

Verse: 6845    die ûf rehte manheit
Verse: 6846    alle ir sinne hânt geleit:

Verse: 6847    er nam ouch eine kêre
Verse: 6848    nâch sînes herzen lêre

Verse: 6849    wol balde hin und balder wider.
Verse: 6850    sper warf er ûf und iesâ nider.

Verse: 6851    sus kam er her gerüeret,
Verse: 6852    als den der tiuvel vüeret.

Verse: 6853    beidiu ros unde man
Verse: 6854    kâmen Tristanden vliegende an

Verse: 6855    noch balder danne ein smirlîn.
Verse: 6856    als giric was ouch Tristan sîn.

Verse: 6857    si kâmen mit gelîcher ger
Verse: 6858    gelîche vliegende her,

Verse: 6859    daz sî diu sper zestâchen,
Verse: 6860    daz s' in den schilten brâchen

Verse: 6861    wol ze tûsent stucken.
Verse: 6862    dô gieng ez an ein zucken

Verse: 6863    der swerte von den sîten.
Verse: 6864    si giengen z' orse strîten.

Verse: 6865    got selbe möhte ez gerne sehen.
Verse: 6866    Nu hoere ich al die werlde jehen

Verse: 6867    und stât ouch an dem maere,
Verse: 6868    daz diz ein einwîc waere,

Verse: 6869    und ist ir aller jehe dar an,
Verse: 6870    hiene waeren niuwan zwêne man.

Verse: 6871    ich prüeve ez aber an dirre zît,
Verse: 6872    daz ez ein offener strît

Verse: 6873    von zwein ganzen rotten was.
Verse: 6874    swie ich doch daz nie gelas

Verse: 6875    an Tristandes maere,
Verse: 6876    ich mache ez doch wârbaere.

Verse: 6877    Môrolt, als uns diu wârheit
Verse: 6878    ie hât gesaget und hiute seit,

Verse: 6879    der haete vier manne craft,
Verse: 6880    diz was vier manne ritterschaft.

Verse: 6881    daz was der strit in eine sît.
Verse: 6882    sô was anderhalp der strît:

Verse: 6883    daz eine got, daz ander reht,
Verse: 6884    daz dritte was ir zweier kneht

Verse: 6885    und ir gewaerer dienestman,
Verse: 6886    der wol gewaere Tristan,

Verse: 6887    daz vierde was willeger muot,
Verse: 6888    der wunder in den noeten tuot.

Verse: 6889    die viere und jene viere
Verse: 6890    ûz den gebilde ich schiere

Verse: 6891    zwô ganze rotte oder ahte man,
Verse: 6892    als übel als ich doch bilden kan.

Verse: 6893    E dûhte iuch, daz diz maere
Verse: 6894    gâr ungevüege waere,

Verse: 6895    daz ûf zwein orsen zwei her
Verse: 6896    iemer möhten komen ze wer.

Verse: 6897    nû habt ir 'z vür wâr vernomen,
Verse: 6898    daz hie zesamene waeren komen

Verse: 6899    under einem helme ieweder sît
Verse: 6900    vier ritter oder vier ritter strît.

Verse: 6901    die riten ouch zuo den zîten
Verse: 6902    vaste ûf ein ander strîten.

Verse: 6903    alsus kam ein geselleschaft,
Verse: 6904    Môrolt mit vier manne craft,

Verse: 6905    Tristanden alse ein dunre an.
Verse: 6906    der veige vâlandes man

Verse: 6907    der sluoc sô crefteclîche ûf in,
Verse: 6908    daz er im craft unde sin

Verse: 6909    vil nâch mit slegen haete benomen.
Verse: 6910    waere ime der schilt ze staten niht komen,

Verse: 6911    under dem er sich mit listen
Verse: 6912    kunde schirmen unde vristen,

Verse: 6913    weder helm noch halsperc
Verse: 6914    noch kein sîn ander kampfwerc

Verse: 6915    daz enhaete in dâ niht vür getragen,
Verse: 6916    ern haete in durch die ringe erslagen.

Verse: 6917    ern liez im nie die state geschehen,
Verse: 6918    daz er vor slegen möhte ûf gesehen.

Verse: 6919    sus gieng er in mit slegen an,
Verse: 6920    biz er 'm mit slegen an gewan,

Verse: 6921    daz Tristan von der slege nôt
Verse: 6922    den schilt ze verre von im bôt

Verse: 6923    unde den schirm ze hôhe truoc,
Verse: 6924    biz er im durch daz diech sluoc

Verse: 6925    einen alsô hezlîchen slac,
Verse: 6926    der vil nâch hin zem tôde wac,

Verse: 6927    daz ime daz vleisch und daz bein
Verse: 6928    durch hosen und durch halsperc schein

Verse: 6929    und daz daz bluot ûf schraete
Verse: 6930    und after dem werde waete.

Verse: 6931    'wie dô?' sprach Môrolt 'wiltu jehen?
Verse: 6932    hier an mahtû wol selbe sehen,

Verse: 6933    daz nieman unreht vüeren sol.
Verse: 6934    dîn unreht schînet hier an wol.

Verse: 6935    noch denke, wellestû genesen,
Verse: 6936    in welher wîse ez müge gewesen;

Verse: 6937    wan zwâre, Tristan, disiu nôt
Verse: 6938    diu ist dîn endeclîcher tôt.

Verse: 6939    ich eine enwende ez danne,
Verse: 6940    von wîbe noch von manne

Verse: 6941    sone wirdestû niemêr gesunt.
Verse: 6942    du bist mit eime swerte wunt,

Verse: 6943    daz toedic unde gelüppet ist.
Verse: 6944    arzât noch arzâte list

Verse: 6945    ernert dich niemer dirre nôt,
Verse: 6946    ez entuo mîn swester eine, Îsôt,

Verse: 6947    diu künegîn von Îlande.
Verse: 6948    diu erkennet maneger hande

Verse: 6949    wurze und aller crûte craft
Verse: 6950    und arzâtlîche meisterschaft.

Verse: 6951    diu kan eine disen list
Verse: 6952    und anders nieman, der der ist.

Verse: 6953    diun ner dich, dû bist ungenesen.
Verse: 6954    wiltû mir noch gevolgic wesen

Verse: 6955    und mir des zinses jehende sîn,
Verse: 6956    mîn swester diu künigîn

Verse: 6957    diu muoz dich selbe heilen
Verse: 6958    und ich wil mit dir teilen

Verse: 6959    geselleclîche, swaz ich hân,
Verse: 6960    und wil dir nihtes abe gân,

Verse: 6961    dâ dich dîn wille zuo getreit.'
Verse: 6962    Tristan sprach: 'mîne wârheit

Verse: 6963    und mîn êre die engibe ich
Verse: 6964    durch dîne swester noch durch dich.

Verse: 6965    ich hân in mîner vrîen hant
Verse: 6966    dâ her gevuort zwei vrîiu lant,

Verse: 6967    diu varnt ouch mit mir hinnen
Verse: 6968    oder ich muoz ir gewinnen

Verse: 6969    groezern schaden oder aber den tôt.
Verse: 6970    ouch enbin ich noch ze solher nôt

Verse: 6971    mit einer wunden niht getriben,
Verse: 6972    daz ez allez hier an sî beliben.

Verse: 6973    der kampf ist under uns beiden
Verse: 6974    ie noch vil ungescheiden.

Verse: 6975    der zins ist dîn tôt oder der mîn.
Verse: 6976    hie enmac niht anders ane gesîn.'

Verse: 6977    Hie mite ruorte er in aber an.
Verse: 6978    nu sprichet daz vil lîhte ein man,

Verse: 6979    ich selbe spriche ez ouch dar zuo:
Verse: 6980    'got unde reht, wâ sint sî nuo,

Verse: 6981    Tristandes strîtgesellen?
Verse: 6982    ob s' im iht helfen wellen,

Verse: 6983    des nimt mich michel wunder.
Verse: 6984    si sûment sich hier under.

Verse: 6985    ir rotte und ir geselleschaft
Verse: 6986    diu ist sêre worden schadehaft.

Verse: 6987    sine komen danne drâte,
Verse: 6988    sô koment s' al ze spâte.

Verse: 6989    von diu sô komen schiere!
Verse: 6990    hie rîtent zwêne an viere

Verse: 6991    und strîtent niuwan umbe ir leben.
Verse: 6992    daz selbe deist ouch sêre ergeben

Verse: 6993    an zwîvel unde an untrôst.
Verse: 6994    suln s' iemer werden erlôst,

Verse: 6995    daz muoz vil kurzlîche sîn!' E
Verse: 6996    got unde reht diu riten dô în

Verse: 6997    mit rehtem urteile,
Verse: 6998    ir rotte ze heile,

Verse: 6999    ir vînden ze valle.
Verse: 7000    hie begunden sî sich alle

Verse: 7001    gelîche rottieren:
Verse: 7002    viere wider vieren.

Verse: 7003    alsus reit schar wider schar.
Verse: 7004    und Tristan, alse er wart gewar

Verse: 7005    der sînen strîtgesellen,
Verse: 7006    dô wuohs im muot und ellen.

Verse: 7007    im brâhte sîn geselleschaft
Verse: 7008    beidiu herze unde craft.

Verse: 7009    daz ors er mit den sporn nam.
Verse: 7010    sô sêre er her gerüeret kam,

Verse: 7011    daz er nâch sîner gelust
Verse: 7012    hurtende mit des orses brust

Verse: 7013    den vînt sô sêre erschalte,
Verse: 7014    daz er 'n zer erden valte

Verse: 7015    mit orse mit alle.
Verse: 7016    und alse er von dem valle

Verse: 7017    ein lützel sich erholte
Verse: 7018    und wider zem orse wolte,

Verse: 7019    nû was ouch Tristan iesâ dâ.
Verse: 7020    den helm den sluog er ime iesâ,

Verse: 7021    dar er waete al dort hin dan.
Verse: 7022    hie mite sô lief in Môrolt an.

Verse: 7023    durch die covertiure er sluoc
Verse: 7024    Tristandes orse abe den buoc,

Verse: 7025    daz ez under ime dar nider gesaz,
Verse: 7026    und er tete weder wirs noch baz,

Verse: 7027    wan sprang et anderhalp dervan.
Verse: 7028    Môrolt der listege man

Verse: 7029    den schilt ze rucke er kêrte,
Verse: 7030    als in sîn witze lêrte.

Verse: 7031    mit der hant sô greif er nider,
Verse: 7032    den helm den nam er aber wider.

Verse: 7033    er haete in sîner wîsheit
Verse: 7034    alsô gedâht und ûf geleit,

Verse: 7035    sô er wider z' orse kaeme,
Verse: 7036    daz er den helm ûf naeme

Verse: 7037    und rite aber Tristanden an.
Verse: 7038    nû er den helm ze sich gewan

Verse: 7039    und hin zem orse gâhete
Verse: 7040    und dem alsô genâhete,

Verse: 7041    daz er die hant zem brîtel liez
Verse: 7042    und den linken vuoz gestiez

Verse: 7043    wol vaste in den stegereif
Verse: 7044    und mit der hant den satel ergreif,

Verse: 7045    nu haete in ouch Tristan erzogen.
Verse: 7046    er sluoc im ûf dem satelbogen

Verse: 7047    daz swert und ouch die zeswen hant,
Verse: 7048    daz si beidiu vielen ûf den sant

Verse: 7049    mit ringen mit alle.
Verse: 7050    und under disem valle

Verse: 7051    gab er im aber einen slac
Verse: 7052    reht obene, dâ diu kuppe lac,

Verse: 7053    und truoc ouch der sô sêre nider,
Verse: 7054    dô er daz wâfen zucte wider,

Verse: 7055    daz von dem selben zucke
Verse: 7056    des swertes ein stucke

Verse: 7057    in sîner hirneschal beleip,
Verse: 7058    daz ouch Tristanden sider treip

Verse: 7059    ze sorgen und ze grôzer nôt:
Verse: 7060    ez haete in nâch brâht ûf den tôt.

Verse: 7061    Môrolt, daz trôstelôse her,
Verse: 7062    do er âne craft und âne wer

Verse: 7063    sô sêre türmelende gie
Verse: 7064    und sich an den val verlie,

Verse: 7065    'wie dô, wie dô?' sprach Tristan
Verse: 7066    'sô dir got, Môrolt, sag an,

Verse: 7067    ist dir dirre maere iht kunt?
Verse: 7068    mich dunket, dû sîst sêre wunt.

Verse: 7069    ich waene, dîn dinc übele stê.
Verse: 7070    swie ez mîner wunden ergê,

Verse: 7071    dir waere guoter wurze nôt.
Verse: 7072    swaz sô dîn swester Îsôt

Verse: 7073    von erzenîe hât gelesen,
Verse: 7074    des wirt dir nôt, wiltû genesen.

Verse: 7075    der rehte und der gewaere got
Verse: 7076    und gotes waerlîch gebot

Verse: 7077    die habent dîn unreht wol bedâht
Verse: 7078    und reht an mir ze rehte brâht.

Verse: 7079    der müeze mîn ouch vürbaz pflegen!
Verse: 7080    disiu hôhvart diu ist gelegen!'

Verse: 7081    hie mite trat er im nâher baz.
Verse: 7082    daz swert daz nam er und gab daz

Verse: 7083    ze beiden sînen handen.
Verse: 7084    er sluoc sînem anden

Verse: 7085    daz houbet mit der cuppen abe.
Verse: 7086    Sus kêrte er wider zuo der habe,

Verse: 7087    dâ er Môroldes schif dâ vant.
Verse: 7088    dâ saz er în und vuor zehant

Verse: 7089    gein dem stade und gein dem her.
Verse: 7090    aldâ gehôrte er bî dem mer

Verse: 7091    grôze vröude und grôze clage,
Verse: 7092    vröude unde clage, als ich iu sage.

Verse: 7093    der saelde an sîner sige lac,
Verse: 7094    den was ein saeleclîcher tac

Verse: 7095    und michel vröude erstanden.
Verse: 7096    si slageten mit handen,

Verse: 7097    si lobeten got mit munde,
Verse: 7098    si sungen an der stunde

Verse: 7099    ze himele michel sigeliet.
Verse: 7100    so was ez aber der vremeden diet,

Verse: 7101    den leiden gesten von Îlant,
Verse: 7102    die dar wâren gesant,

Verse: 7103    ze michelem leide ertaget.
Verse: 7104    von den wart als vil geclaget,

Verse: 7105    als von disen gesungen.
Verse: 7106    si wunden unde twungen

Verse: 7107    ir jâmer under ir henden.
Verse: 7108    die jâmerigen ellenden,

Verse: 7109    die clagenden Îlandaere,
Verse: 7110    die wîle si in ir swaere

Verse: 7111    ze schiffen wolten gâhen,
Verse: 7112    Tristan begunde in nâhen

Verse: 7113    und an dem stade bekam er in.
Verse: 7114    'ir hêrren' sprach er 'kêret hin,

Verse: 7115    enpfâhet jenez zinsreht,
Verse: 7116    daz ir dort ûf dem werde seht,

Verse: 7117    und bringet iuwerm hêrren heim
Verse: 7118    und saget im, daz mîn oeheim

Verse: 7119    der künic Marke und sîniu lant
Verse: 7120    diu senden ime den prîsant

Verse: 7121    unde enbieten ime dâ bî:
Verse: 7122    swenne ez an sînem willen sî,

Verse: 7123    daz er 's geruoche unde ger,
Verse: 7124    daz er sîne boten her

Verse: 7125    nâch solhem zinse sende,
Verse: 7126    wir enlâzen s' îtelhende

Verse: 7127    niemer wider gekêren.
Verse: 7128    mit sus getânen êren

Verse: 7129    sende wir s' im hinnen,
Verse: 7130    swie kûme wir 'z gewinnen.'

Verse: 7131    und swaz hier under rede ergie,
Verse: 7132    mit dem schilte dacte er ie

Verse: 7133    daz bluot und die wunden
Verse: 7134    vor den unkunden

Verse: 7135    und ernerte in ouch daz selbe sider.
Verse: 7136    wan jene die kâmen alsô wider,

Verse: 7137    daz ez ir keiner nie bevant.
Verse: 7138    wan si schieden dan zehant

Verse: 7139    und vuoren hin zem werde sâ
Verse: 7140    und vunden vür ir hêrren dâ

Verse: 7141    einen zestucketen man.
Verse: 7142    den selben vuorten s' ouch von dan.

Verse: 7143    Nu sî ze lande kâmen,
Verse: 7144    ze handen si nâmen

Verse: 7145    den jaemerlîchen prîsant,
Verse: 7146    der bî in dar was gesant.

Verse: 7147    diu stucke meine ich elliu driu.
Verse: 7148    zesamene leiten si diu,

Verse: 7149    daz ieman iht dâ von verlür.
Verse: 7150    ir hêrren truogen sî si vür

Verse: 7151    und seiten ime, als ich ê las,
Verse: 7152    vil rehte als ime enboten was.

Verse: 7153    ich waene und versihe mich wol,
Verse: 7154    des ich mich wol versehen sol:

Verse: 7155    der künec Gurmûn Gemuotheit
Verse: 7156    der haete unmuot und michel leit

Verse: 7157    und gieng in ouch des nôt an.
Verse: 7158    er verlôs an disem einen man

Verse: 7159    herze unde muot, trôst unde craft
Verse: 7160    und maneges mannes ritterschaft.

Verse: 7161    diu schîbe, diu sîn êre truoc,
Verse: 7162    die Môrolt vrîlîche sluoc

Verse: 7163    in den bîlanden allen,
Verse: 7164    diu was dô nider gevallen.

Verse: 7165    diu künigîn sîn swester,
Verse: 7166    der leit was aber noch vester,

Verse: 7167    ir jâmer unde ir clagenôt.
Verse: 7168    sî unde ir tohter Îsôt

Verse: 7169    die quelten manege wîs ir lîp,
Verse: 7170    als ir wol wizzet, daz diu wîp

Verse: 7171    vil nâhe gênde clage hânt,
Verse: 7172    dâ in diu leit ze herzen gânt.

Verse: 7173    si sâhen disen tôten man
Verse: 7174    durch niht niwan durch jâmer an,

Verse: 7175    durch daz ir herzeswaere
Verse: 7176    al deste groezer waere.

Verse: 7177    daz houbet kusten s' und die hant,
Verse: 7178    diu in liute unde lant

Verse: 7179    haete gemachet undertân,
Verse: 7180    als ich hie vor gesaget hân.

Verse: 7181    des houbetes wunden
Verse: 7182    besâhen s' oben und unden

Verse: 7183    ange unde jaemerlîche.
Verse: 7184    nû ersach diu sinnerîche,

Verse: 7185    diu wîse küniginne
Verse: 7186    die scharten dar inne.

Verse: 7187    si besante ein cleinez zengelîn;
Verse: 7188    dâ mite sô reichte sî dar în

Verse: 7189    unde gewan die scharten dan.
Verse: 7190    sî unde ir tohter sâhen s' an

Verse: 7191    mit jâmer und mit leide
Verse: 7192    und nâmen sî dô beide

Verse: 7193    und leiten sî in einen schrîn,
Verse: 7194    dâ sît daz selbe stuckelîn

Verse: 7195    Tristanden brâhte ze nôt.
Verse: 7196    Nû hêrre Môrolt der ist tôt.

Verse: 7197    tribe ich nu michel maere
Verse: 7198    von ir aller swaere

Verse: 7199    und von ir clage, waz hülfe daz?
Verse: 7200    uns waere nihtes deste baz.

Verse: 7201    wer möhte ir aller leit beclagen?
Verse: 7202    Môrolt der wart ze grabe getragen,

Verse: 7203    begraben alse ein ander man.
Verse: 7204    Gurmûn dô trûren began

Verse: 7205    und hiez gebieten al zehant
Verse: 7206    über al daz rîche z' Îlant,

Verse: 7207    daz man genôte naeme war,
Verse: 7208    swaz in der werlde lebendes dar

Verse: 7209    von Curnewâle kaeme,
Verse: 7210    daz man ime den lîp naeme,

Verse: 7211    ez waere wîp oder man.
Verse: 7212    diz gebot und dirre ban

Verse: 7213    der gie vür sich sô sêre,
Verse: 7214    daz nieman keine kêre

Verse: 7215    ze keiner slahte stunde
Verse: 7216    dâ hin gehaben kunde

Verse: 7217    von curnewalscher diete,
Verse: 7218    daz er dekeine miete

Verse: 7219    möhte gebieten oder gegeben,
Verse: 7220    ez engienge im niuwan an daz leben,

Verse: 7221    biz maneger muoter kint dâ van
Verse: 7222    unschuldeclîche schaden gewan.

Verse: 7223    und was daz allez âne nôt,
Verse: 7224    wan Môrolt lac billîche tôt.

Verse: 7225    der was niwan an sîner craft
Verse: 7226    und niht an gote gemuothaft

Verse: 7227    und vuorte z' allen zîten
Verse: 7228    ze allen sînen strîten

Verse: 7229    gewalt unde hôhvart,
Verse: 7230    in den er ouch gevellet wart.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.