TITUS
Gottfried von Strassburg, Tristan
Part No. 11
Previous part

Chapter: 11 
11: Tantris


Verse: 7231    Nû grîfe wider, dâ ich 'z liez.
Verse: 7232    Tristan dô der ze stade gestiez

Verse: 7233    âne ros und âne sper,
Verse: 7234    nû kâmen tûsent rotte her

Verse: 7235    gedrungen mit ir gruoze
Verse: 7236    ze orse und ze vuoze.

Verse: 7237    si enpfiengen in vrôlîche.
Verse: 7238    künec unde künicrîche

Verse: 7239    dien gelebeten nie sô lieben tac,
Verse: 7240    des man in wol getrûwen mac.

Verse: 7241    wan in was ûf erstanden
Verse: 7242    grôz êre ûz sînen handen.

Verse: 7243    ir aller laster unde ir leit
Verse: 7244    daz haete er eine hin geleit.

Verse: 7245    und aber die wunden, die er truoc,
Verse: 7246    die beclageten sî genuoc

Verse: 7247    und gieng in sêre nâhen.
Verse: 7248    wan sî sich aber versâhen,

Verse: 7249    daz er von dirre swaere
Verse: 7250    schiere genesen waere,

Verse: 7251    done ahten sî 'z ze nihte.
Verse: 7252    si vuorten in in rihte

Verse: 7253    hin wider zem palas under in.
Verse: 7254    wol balde entwâfenten si in

Verse: 7255    und schuofen ime senfte unde gemach,
Verse: 7256    als er oder ieman vor gesprach.

Verse: 7257    arzâte man besande,
Verse: 7258    von bürgen und von lande

Verse: 7259    die allerbesten die man vant.
Verse: 7260    wie dô? die wâren besant,

Verse: 7261    die leiten allen ir sin
Verse: 7262    mit arzâtlîchem liste an in.

Verse: 7263    waz truoc daz vür oder waz half daz?
Verse: 7264    im was doch nihtes deste baz.

Verse: 7265    daz s' alle samet wisten
Verse: 7266    von arzâtlîchen listen,

Verse: 7267    daz enmohte im niht ze staten gestân.
Verse: 7268    daz gelüppe was alsô getân,

Verse: 7269    daz sî 'z mit nihte kunden
Verse: 7270    gescheiden von der wunden,

Verse: 7271    unz ez im al den lîp ergienc
Verse: 7272    und eine varwe gevienc

Verse: 7273    sô jaemerlîcher hande,
Verse: 7274    daz man in kûme erkande.

Verse: 7275    dar zuo gevie der selbe slac
Verse: 7276    einen sô griulîchen smac,

Verse: 7277    daz ime daz leben swârte,
Verse: 7278    sîn eigen lîp unmârte.

Verse: 7279    ouch was sîn meistez ungemach,
Verse: 7280    daz er daz alle zît wol sach,

Verse: 7281    daz er den begunde swâren,
Verse: 7282    die sîne vriunde ê wâren,

Verse: 7283    und erkande ie baz unde baz
Verse: 7284    Môroldes rede. ouch haete er daz

Verse: 7285    ê mâles dicke wol vernomen,
Verse: 7286    wie schoene und wie vollekomen

Verse: 7287    Îsôt sîn swester waere.
Verse: 7288    wan von ihr vlouc ein maere

Verse: 7289    in allen den bîlanden,
Verse: 7290    diu ir namen erkanden:

Verse: 7291    diu wîse Îsôt, diu schoene Îsôt
Verse: 7292    diu liuhtet alse der morgenrôt.

Verse: 7293    Tristan der sorchafte man
Verse: 7294    hie gedâhte er z' allen zîten an

Verse: 7295    und wiste wol: solt er genesen,
Verse: 7296    daz enkünde niemer gewesen

Verse: 7297    wan eine von ir liste,
Verse: 7298    diu disen list dâ wiste,

Verse: 7299    diu sinnerîche künigîn.
Verse: 7300    wie 'z aber möhte gesîn,

Verse: 7301    des enkunde er niht betrahten.
Verse: 7302    nu begunde er aber daz ahten,

Verse: 7303    sît ez sîn tôt doch waere,
Verse: 7304    sô waere im alsô maere

Verse: 7305    der lîp gewâget oder tôt
Verse: 7306    als disiu tôtlîche nôt.

Verse: 7307    hie mite besazte er sînen sin,
Verse: 7308    er wolte binamen dâ hin,

Verse: 7309    er engienge im, swie got wolte,
Verse: 7310    genaese, ob er solte.

Verse: 7311    sînen oeheim den besande er.
Verse: 7312    er seite im al von ende her

Verse: 7313    sîn tougen unde sînen muot,
Verse: 7314    als ein vriunt sînem vriunde tuot,

Verse: 7315    wes im wille waere
Verse: 7316    nâch Môroldes maere.

Verse: 7317    diz geviel im übele unde wol.
Verse: 7318    wan daz man schaden ze noeten sol

Verse: 7319    dulten, als man beste kan.
Verse: 7320    under zwein übelen kiese ein man,

Verse: 7321    daz danne minner übel ist.
Verse: 7322    daz selbe ist ouch ein nütze list.

Verse: 7323    sus wurden sî zwêne under in zwein
Verse: 7324    ir dinges alles inein,

Verse: 7325    als ez ouch allez gendet wart,
Verse: 7326    wie er volante sîne vart:

Verse: 7327    wie manz verswîgen solte,
Verse: 7328    daz er z' Îlanden wolte;

Verse: 7329    wie man solte sagen maere,
Verse: 7330    daz er in Salerne waere

Verse: 7331    durch sînes lîbes genist.
Verse: 7332    nu disiu rede besetzet ist,

Verse: 7333    Curvenal wart ouch besant.
Verse: 7334    dem selben sageten s' ouch zehant

Verse: 7335    ir beider willen unde ir muot.
Verse: 7336    diz dûhte Curvenâlen guot

Verse: 7337    und jach, er wolte mit im wesen,
Verse: 7338    mit ime ersterben oder genesen.

Verse: 7339    und alse ez âbendende wart,
Verse: 7340    nu bereite man in zuo z' ir vart

Verse: 7341    eine barken unde ein schiffelîn
Verse: 7342    und schuof in vollen rât dar în

Verse: 7343    an lîpnar unde an spîse,
Verse: 7344    an anderre schifwîse.

Verse: 7345    da wart der arme Tristan
Verse: 7346    mit maneger clage getragen an

Verse: 7347    vil tougenlîche unde alsô,
Verse: 7348    daz dirre schiffunge dô

Verse: 7349    vil lützel ieman wart gewar,
Verse: 7350    wan die man ouch besande dar.

Verse: 7351    sînem oeheime Marke
Verse: 7352    dem bevalh er harte starke

Verse: 7353    sîn gesinde und ander sîn dinc.
Verse: 7354    daz sînes dinges iemer rinc

Verse: 7355    von ein ander kaeme,
Verse: 7356    biz man von ime vernaeme

Verse: 7357    gewislîchiu maere,
Verse: 7358    wie 'z ime ergangen waere.

Verse: 7359    sîne harphen er besande.
Verse: 7360    die vuorte er ouch von lande

Verse: 7361    und sînes dinges nie niht mê.
Verse: 7362    Hie mite so stiezen s' an den sê.

Verse: 7363    sus vuoren sî von dannen
Verse: 7364    niwan mit ahte mannen.

Verse: 7365    die selben haeten ouch ir leben
Verse: 7366    ze bürgen und ze pfande geben

Verse: 7367    und ouch versichert bî gote,
Verse: 7368    daz s' ûz ir zweier gebote

Verse: 7369    niemer vuoz getraeten.
Verse: 7370    nu sî geschiffet haeten

Verse: 7371    und Marke nâch Tristande sach,
Verse: 7372    sîn kurzewîle und sîn gemach,

Verse: 7373    ich weiz wol, daz was cleine.
Verse: 7374    ze herzen und ze beine

Verse: 7375    gieng ime daz selbe scheiden.
Verse: 7376    wan daz ez aber in beiden

Verse: 7377    ze vröuden und ze liebe kam.
Verse: 7378    nu daz daz lantvolc vernam,

Verse: 7379    mit wie getâner swaere
Verse: 7380    Tristan gevaren waere

Verse: 7381    hin wider Salerne durch genesen,
Verse: 7382    waere er ir aller kint gewesen,

Verse: 7383    sîn leit enwaere in allen nie
Verse: 7384    nâher gegangen, danne ez gie.

Verse: 7385    und wan im ouch sîn ungemach
Verse: 7386    in ir dieneste geschach,

Verse: 7387    al deste nâher gieng ez in.
Verse: 7388    Nu Tristan der vuor allez hin

Verse: 7389    über state und über maht
Verse: 7390    beidiu tac unde naht

Verse: 7391    die rihte wider Îlant,
Verse: 7392    als in des marnaeres hant

Verse: 7393    wol geleiten kunde.
Verse: 7394    und als daz schif begunde

Verse: 7395    Îlande alsô genâhen,
Verse: 7396    daz sî daz lant wol sâhen,

Verse: 7397    Tristan den stiurmeister bat,
Verse: 7398    daz er sich gein der houbetstat

Verse: 7399    ze Develîne wante,
Verse: 7400    wan er daz wol erkante,

Verse: 7401    daz diu wîse küniginne
Verse: 7402    haete ir wesen dar inne.

Verse: 7403    des endes er dô gâhete.
Verse: 7404    und alse er ir genâhete,

Verse: 7405    daz er si kôs und ebene sach,
Verse: 7406    'seht hêrre' er zuo Tristande sprach

Verse: 7407    'ich sihe die stat: waz râtet ir?'
Verse: 7408    Tristan dô sprach: 'dâ sulen wir

Verse: 7409    hie enkeren unde belîben,
Verse: 7410    disen âbent hie vertrîben

Verse: 7411    und ouch der naht ein teil hie sîn.'
Verse: 7412    sus wurfen sî den anker în

Verse: 7413    und ruoweten den âbent dâ.
Verse: 7414    und in der naht dô hiez er sâ

Verse: 7415    gein der stat hin lâzen gân.
Verse: 7416    und alse daz dô was getân,

Verse: 7417    daz sî sô nâhe kâmen,
Verse: 7418    daz s' ir gemerke nâmen

Verse: 7419    eine halbe mîle von der stat,
Verse: 7420    Tristan ime dô geben bat

Verse: 7421    daz aller ermeste gewant,
Verse: 7422    daz man in der barken vant.

Verse: 7423    und als man ime daz ane getete,
Verse: 7424    er hiez sich legen an der stete

Verse: 7425    ûz der barken in daz schiffelîn.
Verse: 7426    sîne harpfen hiez er ouch dar în

Verse: 7427    und in der mâze spîse geben,
Verse: 7428    daz er ir möhte geleben

Verse: 7429    drî tage oder viere.
Verse: 7430    nû diz was allez schiere

Verse: 7431    nâch sînem willen getân.
Verse: 7432    Curvenâlen hiez er vür sich gân

Verse: 7433    und ouch die schifman mit im.
Verse: 7434    'vriunt Curvenal' sprach er 'nû nim

Verse: 7435    dise barken und diz liut an dich
Verse: 7436    und pflig ir schône und wol durch mich

Verse: 7437    alle stunde und alle zît!
Verse: 7438    und alse ir wider komen sît,

Verse: 7439    sô lône in alsô rîche,
Verse: 7440    daz s' unser heinlîche

Verse: 7441    getriuwelîche mit uns tragen
Verse: 7442    und nieman niht hier umbe sagen.

Verse: 7443    und kêre balde wider heim.
Verse: 7444    grüeze mînen oeheim

Verse: 7445    und sage im daz, daz ich noch lebe
Verse: 7446    und müge ouch noch mit gotes gebe

Verse: 7447    wol vürbaz leben unde genesen.
Verse: 7448    er ensol niht leidic umbe mich wesen.

Verse: 7449    und sage im daz zewâre,
Verse: 7450    ich kome in disem jâre,

Verse: 7451    ist daz ich genesen sol.
Verse: 7452    gelinget mînen dingen wol,

Verse: 7453    daz wirt im schiere bekant.
Verse: 7454    sage in den hof und in daz lant,

Verse: 7455    daz ich belîbe in dirre nôt
Verse: 7456    under wegen ûf der verte tôt.

Verse: 7457    mîn gesinde, daz ich noch dâ habe,
Verse: 7458    des lâ binamen niht komen abe.

Verse: 7459    sich, daz si mîn dâ bîten
Verse: 7460    biz zuo den selben zîten,

Verse: 7461    als ich dir hie gesaget hân.
Verse: 7462    und ist aber ez alsô getân,

Verse: 7463    daz mir in dirre jâres vrist
Verse: 7464    gelücke niht geschehen ist,

Verse: 7465    sô muget ir iuch mîn wol bewegen,
Verse: 7466    sô lât ir got der sêle pflegen

Verse: 7467    und nemet ir iuwer selbe war:
Verse: 7468    sô nim dû mîn liut unde var

Verse: 7469    hin heim ze Parmenîe wider
Verse: 7470    und lâ dich bî Rûâle nider,

Verse: 7471    mînem lieben vater. dem sage von mir,
Verse: 7472    daz er mir mîner triuwe an dir

Verse: 7473    durch sîne triuwe lône
Verse: 7474    und biete dir ez schône

Verse: 7475    und tugentlîche, als er wol kan,
Verse: 7476    und underwîse in ouch dar an:

Verse: 7477    die mir habent gedienet her,
Verse: 7478    daz er mich an den gewer

Verse: 7479    einer bete und keiner mê:
Verse: 7480    als iegelîches dienest stê,

Verse: 7481    daz er im danke und lône alsô.
Verse: 7482    nû lieben liute' sprach er dô

Verse: 7483    'hie mite sô sît ir gote ergeben,
Verse: 7484    vart iuwer strâze und lât mich sweben.

Verse: 7485    ich muoz ze disen zîten
Verse: 7486    der gotes genâden bîten.

Verse: 7487    sô habet ouch ir zît, daz ir vart,
Verse: 7488    iuwern lîp und iuwer leben bewart.

Verse: 7489    ez nâhet vaste gein dem tage.'
Verse: 7490    sus kêrten sî mit maneger clage

Verse: 7491    und mit manegem jâmer hin.
Verse: 7492    mit manegem trahene liezen s' in

Verse: 7493    swebende ûf dem wilden sê.
Verse: 7494    in getete nie scheiden alsô wê.

Verse: 7495    ein iegelîch getriuwer man,
Verse: 7496    der ie getriuwen vriunt gewan

Verse: 7497    und weiz, wie man den meinen sol,
Verse: 7498    entriuwen der verstât sich wol

Verse: 7499    umbe Curvenâles swaere.
Verse: 7500    swie swaere im aber waere

Verse: 7501    al sîn herze und al sîn sin,
Verse: 7502    sô schiffete er doch allez hin.

Verse: 7503    Tristan beleip al eine dâ.
Verse: 7504    der swebete dâ wâ unde wâ

Verse: 7505    mit jâmer und mit sorgen
Verse: 7506    unz an den liehten morgen.

Verse: 7507    unde als die von Develîn
Verse: 7508    daz wîselôse schiffelîn

Verse: 7509    in dem wâge ersâhen,
Verse: 7510    sie hiezen balde gâhen

Verse: 7511    und nemen des schiffelînes war.
Verse: 7512    die boten die kêrten iesâ dar.

Verse: 7513    nu sî begunden nâhen
Verse: 7514    und dannoch nieman sâhen,

Verse: 7515    nu gehôrten s' al dort her
Verse: 7516    suoze unde nâch ir herzen ger

Verse: 7517    eine süeze harpfen clingen
Verse: 7518    und mit der harpfen singen

Verse: 7519    einen man sô rehte suoze,
Verse: 7520    daz sîz in z' eime gruoze

Verse: 7521    und ze âventiure nâmen
Verse: 7522    und von der stat nie kâmen,

Verse: 7523    die wîle er harpfete unde sanc.
Verse: 7524    diu vröude diu was aber unlanc,

Verse: 7525    die sî von im haeten an der stete,
Verse: 7526    wan swaz er in dâ spiles getete

Verse: 7527    mit handen oder mit munde,
Verse: 7528    daz engie niht von grunde:

Verse: 7529    daz herze dazn was niht dermite.
Verse: 7530    so enist ez ouch niht spiles site,

Verse: 7531    daz man 'z dekeine wîle tuo,
Verse: 7532    daz herze daz enstê darzuo.

Verse: 7533    al eine geschehe es harte vil,
Verse: 7534    ez enheizet doch niht rehte spil,

Verse: 7535    daz man sus ûzen hin getuot
Verse: 7536    âne herze und âne muot.

Verse: 7537    wan daz diu jugent Tristanden
Verse: 7538    mit munde und ouch mit handen

Verse: 7539    ir z' einer kurzewîle twanc,
Verse: 7540    daz er ir harpfete unde sanc,

Verse: 7541    ez was dem marteraere
Verse: 7542    ein marter unde ein swaere.

Verse: 7543    und alse er sîn spil dô verliez,
Verse: 7544    daz ander schif dar nâher stiez.

Verse: 7545    sus griffen s' an sîn schiffelîn
Verse: 7546    und warten widerstrît dar în.

Verse: 7547    Nu si sîn begunden nemen war
Verse: 7548    und in sô jaemerlîche var

Verse: 7549    und sô getânen sâhen,
Verse: 7550    nu begunde ez in versmâhen,

Verse: 7551    daz er daz wunder kunde
Verse: 7552    mit handen und mit munde.

Verse: 7553    doch gruozten s' in als einen man,
Verse: 7554    der guoten gruoz verdienen kan,

Verse: 7555    mit munde und ouch mit handen
Verse: 7556    und bâten dô Tristanden,

Verse: 7557    daz er in seite maere,
Verse: 7558    wie 'z ime ergangen waere.

Verse: 7559    'diz sage ich iu' sprach Tristan
Verse: 7560    'ich was ein höfscher spilman

Verse: 7561    und kunde genuoge
Verse: 7562    höfscheit unde vuoge.

Verse: 7563    sprechen unde swîgen,
Verse: 7564    lîren unde gîgen,

Verse: 7565    harpfen unde rotten,
Verse: 7566    schimpfen unde spotten,

Verse: 7567    daz kunde ich allez alsô wol,
Verse: 7568    als sô getân liut von rehte sol.

Verse: 7569    dâ mite gewan ich sô genuoc,
Verse: 7570    biz mich daz guot über truoc

Verse: 7571    und mêre haben wolte,
Verse: 7572    dan ich von rehte solte.

Verse: 7573    sus liez ich mich an koufrât,
Verse: 7574    daz mir den lîp verrâten hât.

Verse: 7575    zuo gesellen ich gewan
Verse: 7576    einen rîchen koufman

Verse: 7577    und luode wir zwêne einen kiel
Verse: 7578    mit allem dem, als uns geviel,

Verse: 7579    dâ heime ze Hispanje
Verse: 7580    und wolten ze Britanje.

Verse: 7581    alsus bestuont uns ûf dem mer
Verse: 7582    in einem schiffe ein roupher,

Verse: 7583    die nâmen uns cleine unde grôz
Verse: 7584    und sluogen mînen koufgenôz

Verse: 7585    und allez, daz dâ lebende was.
Verse: 7586    daz aber ich eine genas

Verse: 7587    mit dirre wunden, die ich hân,
Verse: 7588    daz hât diu harpfe getân,

Verse: 7589    an der ir iegelîcher sach,
Verse: 7590    als ich in selbe verjach,

Verse: 7591    ich waere ein art spilman.
Verse: 7592    sus gewan ich in mit noeten an

Verse: 7593    diz selbe cleine schiffelîn
Verse: 7594    und sô vil spîse dar în,

Verse: 7595    daz ich ir hân biz her gelebet.
Verse: 7596    sus bin ich eine sider geswebet

Verse: 7597    mit marter und mit maneger clage
Verse: 7598    wol vierzic naht und vierzic tage,

Verse: 7599    swar mich die winde sluogen,
Verse: 7600    die wilden ünde truogen

Verse: 7601    wîlent her und wîlent hin.
Verse: 7602    und enkan niht wizzen, wâ ich bin,

Verse: 7603    und weiz noch minre, war ich sol.
Verse: 7604    nu tuot ir hêrren alsô wol,

Verse: 7605    daz iu lône unser trehtîn,
Verse: 7606    und helfet mir, dâ liute sîn!'

Verse: 7607    'Geselle' sprâchen aber die boten
Verse: 7608    'dîner süezen stimme und dîner noten

Verse: 7609    der soltu hie geniezen.
Verse: 7610    dune solt niht langer vliezen

Verse: 7611    âne trôst und âne rât.
Verse: 7612    swaz sô dich her gevüeret hât,

Verse: 7613    got oder wazzer oder wint,
Verse: 7614    wir bringen dich, dâ liute sint.'

Verse: 7615    diz tâten s' ouch: si vuorten in
Verse: 7616    mit schiffe mit alle hin

Verse: 7617    reht in die stat, als er si bat.
Verse: 7618    sîn schif daz haften s' an den stat

Verse: 7619    und sprâchen aber: 'sich, spilman,
Verse: 7620    nim war, sich dise burc an

Verse: 7621    und dise schoene stat hie bî.
Verse: 7622    weistu noch, waz stete ez sî?'

Verse: 7623    'nein hêrre, in weiz niht, waz ez ist.'
Verse: 7624    'sô sage wir dir daz, daz du bist

Verse: 7625    ze Develîne in Îlant.'
Verse: 7626    'des lobe ich den heilant,

Verse: 7627    daz ich doch under liuten bin!
Verse: 7628    wan eteswer ist under in,

Verse: 7629    der sîne güete an mir begât
Verse: 7630    und tuot mir eteslîchen rât.'

Verse: 7631    Hie mite kêrten die boten hin
Verse: 7632    unde begunden under in

Verse: 7633    mit rede von sînen sachen
Verse: 7634    vil michel wunder machen.

Verse: 7635    si seiten wider ze maere,
Verse: 7636    daz in widervaren waere

Verse: 7637    âventiure an einem man,
Verse: 7638    dâ man sich es lützel an

Verse: 7639    und niemer solte versehen.
Verse: 7640    si seiten, alse ez was geschehen:

Verse: 7641    ê sî dar nâher kaemen,
Verse: 7642    daz s' aldort her vernaemen

Verse: 7643    einen alsô süezen harpfen clanc
Verse: 7644    und mit der harpfen einen sanc.

Verse: 7645    got möhte in gerne hoeren
Verse: 7646    in sînen himelkoeren.

Verse: 7647    und jâhen, daz daz waere
Verse: 7648    ein armer marteraere,

Verse: 7649    ein tôtwunder spilman.
Verse: 7650    'wol hin, ir seht ez ime wol an,

Verse: 7651    er stirbet morgen oder noch.
Verse: 7652    und in der marter hat er doch

Verse: 7653    einen muot sô lebelîchen.
Verse: 7654    in allen künicrîchen

Verse: 7655    envünde man ein herze niht,
Verse: 7656    daz alsô grôzer ungeschiht

Verse: 7657    möhte genemen sô cleine war.'
Verse: 7658    Die burgaere kêrten dar

Verse: 7659    und triben maneger hande
Verse: 7660    maere mit Tristande

Verse: 7661    und vrâgeten in sus unde sô.
Verse: 7662    aber seite er iegelîchem dô

Verse: 7663    in der gelegenheite,
Verse: 7664    als er den boten ê seite.

Verse: 7665    sus baten s' in, er harpfete in.
Verse: 7666    und er kêrte allen sînen sin

Verse: 7667    an ir gebot und an ir bete,
Verse: 7668    wan er 'z von allem herzen tete.

Verse: 7669    swâ mite er sich in kunde
Verse: 7670    mit handen oder mit munde

Verse: 7671    gelieben, daz was al sîn ger,
Verse: 7672    des vleiz er sich und daz tete er.

Verse: 7673    und alse der arme spilman
Verse: 7674    wider sînes lîbes state began

Verse: 7675    sîn harpfen und sîn singen
Verse: 7676    sô rehte suoze bringen,

Verse: 7677    ez begunde s' alle erbarmen.
Verse: 7678    sus hiezen sî den armen

Verse: 7679    ûz sînem schiffelîne tragen
Verse: 7680    und einem arzâte sagen,

Verse: 7681    daz er 'n ze hûse naeme.
Verse: 7682    und swaz im rehte kaeme,

Verse: 7683    daz er des vlîz haete
Verse: 7684    und umbe ir guot im taete

Verse: 7685    beidiu helfe unde gemach.
Verse: 7686    diz wart getân und diz geschach.

Verse: 7687    und alse er 'n heim brâhte,
Verse: 7688    al sîn gemach bedâhte,

Verse: 7689    alse er 'z allerbeste
Verse: 7690    von sînem liste weste,

Verse: 7691    dô half ez allez cleine.
Verse: 7692    diz maere wart gemeine

Verse: 7693    über al die stat ze Develîn.
Verse: 7694    ein schar gienc ûz, diu ander în

Verse: 7695    und clageten sîn ungemach.
Verse: 7696    In der wîle ez dô geschach,

Verse: 7697    daz ein pfaffe dar în kam
Verse: 7698    und sîne vuoge vernam

Verse: 7699    an handen unde an munde.
Verse: 7700    wan er ouch selbe kunde

Verse: 7701    list unde kunst genuoge,
Verse: 7702    mit handen manege vuoge

Verse: 7703    an iegelîchem seitspil
Verse: 7704    und kunde ouch vremeder sprâche vil.

Verse: 7705    an vuoge unde an höfscheit
Verse: 7706    haete er gewendet unde geleit

Verse: 7707    sîne tage und sîne sinne.
Verse: 7708    der was der küniginne

Verse: 7709    meister unde gesinde
Verse: 7710    und haete sî von kinde

Verse: 7711    gewitzeget sêre
Verse: 7712    an maneger guoten lêre,

Verse: 7713    mit manegem vremedem liste,
Verse: 7714    den sî von im wiste.

Verse: 7715    ouch lêrte er ie genôte
Verse: 7716    ir tohter Îsôte,

Verse: 7717    die erwünscheten maget,
Verse: 7718    von der diu werlt elliu saget

Verse: 7719    und von der disiu maere sint:
Verse: 7720    diu was ir einegez kint,

Verse: 7721    und haete alle ir vlîzekeit
Verse: 7722    sît des tages an sî geleit,

Verse: 7723    daz s' iht gelernen kunde
Verse: 7724    mit handen oder mit munde.

Verse: 7725    die haete er ouch in sîner pflege.
Verse: 7726    die lêrte er dô und alle wege

Verse: 7727    beidiu buoch und seitspil.
Verse: 7728    dô der an Tristande alse vil

Verse: 7729    schoener künste und vuoge ersach,
Verse: 7730    in erbarmete sîn ungemach

Verse: 7731    vil inneclîche sêre
Verse: 7732    und enbeite ouch dô niemêre.

Verse: 7733    er gie zer küniginne dan
Verse: 7734    und seite ir, daz ein spilman

Verse: 7735    in der stat dâ waere,
Verse: 7736    der waere ein marteraere

Verse: 7737    und tôt mit lebendem lîbe
Verse: 7738    und daz nie man von wîbe

Verse: 7739    sîner künste als ûz erkorn
Verse: 7740    noch baz gemuot würde geborn.

Verse: 7741    'â' sprach er 'edeliu künigîn,
Verse: 7742    möhte ez iemer gesîn,

Verse: 7743    daz wir dar zuo gedaehten,
Verse: 7744    daz wir in eteswar braehten,

Verse: 7745    dar ir mit vuoge kaemet,
Verse: 7746    daz wunder vernaemet,

Verse: 7747    daz ein sterbender man
Verse: 7748    als inneclîche suoze kan

Verse: 7749    geharpfen unde gesingen
Verse: 7750    und doch an sînen dingen

Verse: 7751    weder rât noch helfe kan gewesen.
Verse: 7752    wan ern kan niemer genesen.

Verse: 7753    sîn meister und sîn arzât,
Verse: 7754    der sîn biz her gepflegen hât,

Verse: 7755    der hât in ûz der pflege gelân,
Verse: 7756    ern mag im niht ze staten gestân

Verse: 7757    mit keiner slahte sinne.'
Verse: 7758    'Sich' sprach diu küniginne

Verse: 7759    'ich sol den kameraeren sagen,
Verse: 7760    müge er ez iemer vertragen

Verse: 7761    und verdoln, daz man in handele
Verse: 7762    und under handen wandele,

Verse: 7763    daz sî 'n uns her ûf bringen,
Verse: 7764    ob ime ze sînen dingen

Verse: 7765    dekeiner slahte helfe tüge
Verse: 7766    oder obe in iht generen müge.'

Verse: 7767    Diz wart getân und diz geschach.
Verse: 7768    nu daz diu künigîn gesach

Verse: 7769    sîn angest al begarwe,
Verse: 7770    die wunden unde ir varwe,

Verse: 7771    nu erkande sîz gelüppe dâ.
Verse: 7772    'ach armer spilman' sprach si sâ

Verse: 7773    'dû bist mit gelüppe wunt.'
Verse: 7774    'ine weiz' sprach Tristan sâ zestunt

Verse: 7775    'ine kan niht wizzen, waz ez ist,
Verse: 7776    wan mir enmac kein arzâtlist

Verse: 7777    gehelfen noch gevrumen hie zuo.
Verse: 7778    nune weiz ich mêre, waz getuo,

Verse: 7779    wan daz ich mich gote muoz ergeben
Verse: 7780    und leben, die wîle ich mac geleben.

Verse: 7781    swer aber genâde an mir begê,
Verse: 7782    sît ez mir kumberlîche stê,

Verse: 7783    dem lône got: mirst helfe nôt,
Verse: 7784    ich bin mit lebendem lîbe tôt.'

Verse: 7785    Diu wîse sprach im aber zuo:
Verse: 7786    'spilman, sag an, wie heizestuo?'

Verse: 7787    'vrouwe, ich heize Tantris.'
Verse: 7788    'Tantris, nu wis an mir gewis,

Verse: 7789    daz ich dich binamen neren sol.
Verse: 7790    wis gemuot, und gehabe dich wol!

Verse: 7791    ich wil dîn arzât selbe sîn.'
Verse: 7792    'genâde, süeziu künigîn,

Verse: 7793    diu zunge diu gruone iemer,
Verse: 7794    daz herze ersterbe niemer,

Verse: 7795    diu wîsheit diu müeze iemer leben,
Verse: 7796    den helfelôsen helfe geben,

Verse: 7797    dîn name der müeze werden
Verse: 7798    gewerdet ûf der erden!'

Verse: 7799    'Tantris' sprach aber diu künigîn
Verse: 7800    'möhte ez an dînen staten gesîn,

Verse: 7801    wan dazt aber alse uncreftic bist,
Verse: 7802    als ez kein wunder an dir ist,

Verse: 7803    sô hôrte ich gerne harpfenspil.
Verse: 7804    des kanstu, hoere ich sagen, vil.'

Verse: 7805    'nein vrouwe, sprechet alsô niht.
Verse: 7806    mich enirret kein mîn ungeschiht,

Verse: 7807    ine tuo und müge ez harte wol,
Verse: 7808    daz iuwer dienest wesen sol.'

Verse: 7809    sus wart sîn harpfe dar besant.
Verse: 7810    ouch besande man zehant

Verse: 7811    die jungen küniginne.
Verse: 7812    daz wâre insigel der minne,

Verse: 7813    mit dem sîn herze sider wart
Verse: 7814    versigelt unde vor verspart

Verse: 7815    aller der werlt gemeiner
Verse: 7816    niuwan ir al einer,

Verse: 7817    diu schoene Îsôt si kam ouch dar
Verse: 7818    und nam vil vlîzeclîche war,

Verse: 7819    dâ Tristan harpfende saz.
Verse: 7820    nu harpfete er ouch michel baz,

Verse: 7821    dan er ie dâ vor getaete.
Verse: 7822    wan er gedingen haete,

Verse: 7823    sîn ungelücke waere hin,
Verse: 7824    dâ sang er unde harphete in

Verse: 7825    niht alse ein lebelôser man,
Verse: 7826    er vieng ez lebelîchen an

Verse: 7827    und alse der wol gemuote tuot.
Verse: 7828    er machete ez in sô rehte guot

Verse: 7829    mit handen und mit munde,
Verse: 7830    daz er in der kurzen stunde

Verse: 7831    ir aller hulde alsô gevienc,
Verse: 7832    daz ez im z' allem guote ergienc.

Verse: 7833    und al des spiles, des er getete,
Verse: 7834    beide anderswâ und an der stete,

Verse: 7835    sô smacte ie der veige slac
Verse: 7836    und machete einen solhen smac,

Verse: 7837    daz nieman keine stunde
Verse: 7838    bî ime belîben kunde.

Verse: 7839    Aber sprach diu küniginne dô:
Verse: 7840    'Tantris, swenne ez gevüege alsô,

Verse: 7841    daz dir dîn dinc alsô gestê,
Verse: 7842    daz dirre smac an dir zergê

Verse: 7843    und ieman bî dir müge genesen,
Verse: 7844    sô lâ dir wol bevolhen wesen

Verse: 7845    dise jungen maget Îsôte,
Verse: 7846    diu lernete ie genôte

Verse: 7847    diu buoch und dar zuo seitspil
Verse: 7848    und kan des ouch billîche vil

Verse: 7849    nâch den tagen und nâch der vrist,
Verse: 7850    als sî derbî gewesen ist.

Verse: 7851    und kanstu keiner lêre
Verse: 7852    und keiner vuoge mêre

Verse: 7853    danne ir meister oder ich,
Verse: 7854    des underwîse sî durch mich.

Verse: 7855    dar umbe wil ich dir dîn leben
Verse: 7856    und dînen lîp ze miete geben

Verse: 7857    wol gesunt und wol getân.
Verse: 7858    diu mag ich geben unde lân,

Verse: 7859    diu beidiu sint in mîner hant.'
Verse: 7860    'jâ ist ez danne alsô gewant '

Verse: 7861    sprach aber der sieche spilman
Verse: 7862    'daz ich sô wider komen kan

Verse: 7863    und mit spil genesen sol,
Verse: 7864    ob got wil, sô genise ich wol.

Verse: 7865    saeligiu küniginne,
Verse: 7866    sît daz iuwer sinne

Verse: 7867    alsô stânt, als ir dâ saget,
Verse: 7868    umbe iuwer tohter die maget,

Verse: 7869    sô trûwe ich harte wol genesen.
Verse: 7870    ich hân der buoche gelesen

Verse: 7871    in der mâze und alsô vil,
Verse: 7872    daz ich mir wol getrûwen wil,

Verse: 7873    ich gediene iu wol ze danke an ir.
Verse: 7874    dâ zuo sô weiz ich wol an mir,

Verse: 7875    daz mîner jâre kein man
Verse: 7876    sô manic edele seitspil kan.

Verse: 7877    swaz ir dar über geruochet
Verse: 7878    und her ze mir gesuochet,

Verse: 7879    daz ist allez getân,
Verse: 7880    als verre als ich 's state hân.'

Verse: 7881    Sus beschiet man ime ein kamerlîn
Verse: 7882    und schuof im alle tage dar în

Verse: 7883    alle die pflege und daz gemach,
Verse: 7884    daz er selbe vor gesprach.

Verse: 7885    alrêrste was diu wîsheit
Verse: 7886    ze vrumen und ze staten geleit,

Verse: 7887    die er in dem schiffe begienc,
Verse: 7888    dô er den schilt zer sîten hienc

Verse: 7889    und barc sîne wunden
Verse: 7890    vor den unkunden,

Verse: 7891    vor der îrlandeschen diet,
Verse: 7892    dô sî von Curnewâle schiet.

Verse: 7893    hie von sô was in unkunt
Verse: 7894    und enwisten niht, daz er was wunt.

Verse: 7895    wan haeten s' iht bevunden
Verse: 7896    umbe keine sîne wunden,

Verse: 7897    sô wol als in daz was erkant,
Verse: 7898    wie 'z umbe die wunden was gewant,

Verse: 7899    die Môrolt mit dem swerte sluoc,
Verse: 7900    daz er in allen noeten truoc,

Verse: 7901    ezn waere Tristande nie
Verse: 7902    ergangen, alse ez ime ergie.

Verse: 7903    nû half aber ime, daz er genas,
Verse: 7904    daz er sô vorbedaehtic was.

Verse: 7905    hie mac ein man erkennen an
Verse: 7906    und wizzen wol, wie dicke ein man

Verse: 7907    guote vorbedaehte
Verse: 7908    ze guotem ende braehte,

Verse: 7909    der gerne sinnebaere
Verse: 7910    und vorbesihtic waere.

Verse: 7911    Diu wîse küniginne
Verse: 7912    diu kêrte alle ir sinne

Verse: 7913    und alle ir witze dar an,
Verse: 7914    wie sî generte einen man,

Verse: 7915    umbe des lîp und umbe des leben
Verse: 7916    si gerne haete gegeben

Verse: 7917    ir lîp und alle ir êre.
Verse: 7918    si hazzete in noch mêre

Verse: 7919    dan sî sich selben minnete.
Verse: 7920    und swes si sich versinnete,

Verse: 7921    daz ime ze senfte und ze vromen
Verse: 7922    und ze heile möhte komen,

Verse: 7923    dâ was si spâte unde vruo
Verse: 7924    betrehtic unde gescheffec zuo.

Verse: 7925    daz enwas kein wunderlîch geschiht.
Verse: 7926    sine erkande ir vîndes niht.

Verse: 7927    und möhte sî daz wizzen,
Verse: 7928    an wen sî was vervlizzen

Verse: 7929    und wem sî half ûz tôdes nôt.
Verse: 7930    waere iht ergers danne der tôt,

Verse: 7931    den haete s' ime zewâre gegeben
Verse: 7932    vil michel gerner dan daz leben.

Verse: 7933    nu enwiste aber sî dâ niuwan guot
Verse: 7934    und truog im niuwan guoten muot.

Verse: 7935    Ob ich iu nû vil seite
Verse: 7936    und lange rede vür leite

Verse: 7937    von mîner vrouwen meisterschaft,
Verse: 7938    wie wunderlîche guote craft

Verse: 7939    ir arzenîe haete
Verse: 7940    und wie s' ir siechen taete,

Verse: 7941    waz hülfe ez und waz solte daz?
Verse: 7942    in edelen ôren lûtet baz

Verse: 7943    ein wort, daz schône gezimt,
Verse: 7944    dan daz man ûz der bühsen nimt.

Verse: 7945    als verre als ichz bedenken kan,
Verse: 7946    so sol ich mich bewarn dar an,

Verse: 7947    daz ich iu iemer wort gesage,
Verse: 7948    daz iuwern ôren missehage

Verse: 7949    und iuwerm herzen widerstê.
Verse: 7950    ich spriche ouch deste minner ê

Verse: 7951    von iegelîcher sache,
Verse: 7952    ê ich iu daz maere mache

Verse: 7953    unlîdic unde unsenfte bî
Verse: 7954    mit rede, diu niht des hoves sî.

Verse: 7955    umbe mîner vrouwen arzâtlist
Verse: 7956    und umbe ir siechen genist

Verse: 7957    wil ich iu kurzlîche sagen:
Verse: 7958    si half im inner zweinzec tagen,

Verse: 7959    daz man in allenthalben leit
Verse: 7960    und nieman durch die wunden meit,

Verse: 7961    der anders bî im wolte sîn.
Verse: 7962    sît gie diu junge künigîn

Verse: 7963    alle zît ze sîner lêre.
Verse: 7964    an die sô leite er sêre

Verse: 7965    sînen vlîz und sîne stunde.
Verse: 7966    daz beste daz er kunde,

Verse: 7967    sô schuollist, sô hantspil,
Verse: 7968    daz ich niht sunder zalen wil,

Verse: 7969    daz leite er ir besunder vür,
Verse: 7970    daz sî nâch ir selber kür

Verse: 7971    ze lêre dar ûz naeme,
Verse: 7972    swes sô sî gezaeme.

Verse: 7973    Îsôt diu schoene tete alsô:
Verse: 7974    daz allerbeste, daz si dô

Verse: 7975    under allen sînen listen vant,
Verse: 7976    des underwant si sich zehant

Verse: 7977    und was ouch vlîzec dar an,
Verse: 7978    swes s' in der werlde began.

Verse: 7979    ouch half si harte sêre
Verse: 7980    diu vordere lêre.

Verse: 7981    si kunde ê schoene vuoge
Verse: 7982    und höfscheit genuoge

Verse: 7983    mit handen und mit munde.
Verse: 7984    diu schoene si kunde

Verse: 7985    ir sprâche dâ von Develîn,
Verse: 7986    si kunde franzois und latîn,

Verse: 7987    videlen wol ze prîse
Verse: 7988    in welhischer wîse.

Verse: 7989    ir vingere die kunden,
Verse: 7990    swenne sî 's begunden,

Verse: 7991    die lîren wol gerüeren
Verse: 7992    und ûf der harpfen vüeren

Verse: 7993    die doene mit gewalte.
Verse: 7994    sie steigete unde valte

Verse: 7995    die noten behendeclîche.
Verse: 7996    ouch sanc diu saeldenrîche

Verse: 7997    suoze unde wol von munde.
Verse: 7998    und swaz s' ê vuoge kunde,

Verse: 7999    dâ kam si dô ze vrumen an.
Verse: 8000    ir meister der spilman

Verse: 8001    der bezzerte si sêre.
Verse: 8002    under aller dirre lêre

Verse: 8003    gab er ir eine unmüezekeit,
Verse: 8004    die heizen wir morâliteit.

Verse: 8005    diu kunst diu lêret schoene site.
Verse: 8006    dâ solten alle vrouwen mite

Verse: 8007    in ir jugent unmüezic wesen.
Verse: 8008    morâliteit daz süeze lesen

Verse: 8009    deist saelic unde reine.
Verse: 8010    ir lêre hât gemeine

Verse: 8011    mit der werlde und mit gote.
Verse: 8012    si lêret uns in ir gebote

Verse: 8013    got unde der werlde gevallen.
Verse: 8014    s' ist edelen herzen allen

Verse: 8015    ze einer ammen gegeben,
Verse: 8016    daz sî ir lîpnar unde ir leben

Verse: 8017    suochen in ir lêre.
Verse: 8018    wan sîne hânt guot noch êre,

Verse: 8019    ezn lêre sî morâliteit.
Verse: 8020    diz was ir meiste unmüezekeit

Verse: 8021    der jungen küniginne.
Verse: 8022    hie banekete s' ir sinne

Verse: 8023    und ir gedanke dicke mite.
Verse: 8024    hie von sô wart si wol gesite,

Verse: 8025    schône unde reine gemuot,
Verse: 8026    ir gebaerde süeze unde guot.

Verse: 8027    Sus kam diu süeze junge
Verse: 8028    ze solher bezzerunge

Verse: 8029    an lêre und an gebâre
Verse: 8030    in dem halben jâre,

Verse: 8031    daz von ir saelekeite
Verse: 8032    allez daz lant seite

Verse: 8033    und ouch ir vater der künec dâ van
Verse: 8034    vil grôze vröude gewan.

Verse: 8035    ir muoter ward ez sêre vrô.
Verse: 8036    nu gevuogete ez sich dicke alsô,

Verse: 8037    ir vater sô der was vröudehaft
Verse: 8038    oder alse vremediu ritterschaft

Verse: 8039    dâ ze hove vor dem künege was,
Verse: 8040    daz Îsôt in den palas

Verse: 8041    vür ir vater wart besant.
Verse: 8042    und allez daz ir was bekant

Verse: 8043    höfschlîcher liste und schoener site,
Verse: 8044    dâ kürzete s' ime die stunde mite

Verse: 8045    und mit im manegem an der stete.
Verse: 8046    swaz vröude sî dem vater getete,

Verse: 8047    daz vröute s' al gelîche:
Verse: 8048    arme unde rîche

Verse: 8049    sî haeten an ir beide
Verse: 8050    eine saelige ougenweide,

Verse: 8051    der ôren unde des herzen lust.
Verse: 8052    ûzen und innerhalp der brust

Verse: 8053    dâ was ir lust gemeine.
Verse: 8054    diu süeze Îsôt, diu reine

Verse: 8055    si sang in, si schreip und si las.
Verse: 8056    und swaz ir aller vröude was,

Verse: 8057    daz was ir banekîe.
Verse: 8058    si videlte ir stampenîe,

Verse: 8059    leiche und sô vremediu notelîn,
Verse: 8060    diu niemer vremeder kunden sîn,

Verse: 8061    in franzoiser wîse
Verse: 8062    von Sanze und San Dinîse.

Verse: 8063    der kunde s' ûzer mâze vil.
Verse: 8064    ir lîren unde ir harpfenspil

Verse: 8065    sluoc sî ze beiden wenden
Verse: 8066    mit harmblanken henden

Verse: 8067    ze lobelîchem prîse.
Verse: 8068    in Lût noch in Thamîse

Verse: 8069    gesluogen vrouwen hende nie
Verse: 8070    seiten süezer danne hie

Verse: 8071    la dûze Îsôt, la bêle.
Verse: 8072    si sang ir pasturêle,

Verse: 8073    ir rotruwange und ir rundate,
Verse: 8074    schanzûne, refloit und folate

Verse: 8075    wol unde wol und alze wol.
Verse: 8076    wan von ir wart manc herze vol

Verse: 8077    mit senelîcher trahte.
Verse: 8078    von ir wart maneger slahte

Verse: 8079    gedanke und ahte vür brâht.
Verse: 8080    durch sî wart wunder gedâht,

Verse: 8081    als ir wol wizzet, daz geschiht,
Verse: 8082    dâ man ein solich wunder siht

Verse: 8083    von schoene und von gevuocheit,
Verse: 8084    als an Îsôte was geleit.

Verse: 8085    Wem mag ich sî gelîchen
Verse: 8086    die schoenen, saelderîchen

Verse: 8087    wan den Syrênen eine,
Verse: 8088    die mit dem agesteine

Verse: 8089    die kiele ziehent ze sich?
Verse: 8090    als zôch Îsôt, sô dunket mich,

Verse: 8091    vil herzen unde gedanken în,
Verse: 8092    die doch vil sicher wânden sîn

Verse: 8093    von senedem ungemache.
Verse: 8094    ouch sint die zwô sache,

Verse: 8095    kiel âne anker unde muot,
Verse: 8096    ze ebenmâzene guot.

Verse: 8097    si sint sô selten beide
Verse: 8098    an staeter wegeweide,

Verse: 8099    sô dicke in ungewisser habe,
Verse: 8100    wankende beidiu an und abe,

Verse: 8101    ündende hin unde her.
Verse: 8102    sus swebet diu wîselôse ger,

Verse: 8103    der ungewisse minnen muot,
Verse: 8104    rehte als daz schif âne anker tuot

Verse: 8105    in ebengelîcher wîse.
Verse: 8106    diu gevüege Îsôt, diu wîse,

Verse: 8107    diu junge süeze künigîn
Verse: 8108    alsô zôch sî gedanken în

Verse: 8109    ûz maneges herzen arken,
Verse: 8110    als der agestein die barken

Verse: 8111    mit der Syrênen sange tuot.
Verse: 8112    si sanc in maneges herzen muot

Verse: 8113    offenlîchen unde tougen
Verse: 8114    durch ôren und durch ougen.

Verse: 8115    ir sanc, den s' offenlîche tete
Verse: 8116    beide anderswâ und an der stete,

Verse: 8117    daz was ir süeze singen,
Verse: 8118    ir senftez seiten clingen,

Verse: 8119    daz lûte und offenlîche
Verse: 8120    durch der ôren künicrîche

Verse: 8121    hin nider in diu herzen clanc.
Verse: 8122    sô was der tougenlîche sanc

Verse: 8123    ir wunderlîchiu schoene,
Verse: 8124    diu mit ir muotgedoene

Verse: 8125    verholne unde tougen
Verse: 8126    durch diu venster der ougen

Verse: 8127    in vil manic edele herze sleich
Verse: 8128    und daz zouber dar în streich,

Verse: 8129    daz die gedanke zehant
Verse: 8130    vienc unde vâhende bant

Verse: 8131    mit sene und mit seneder nôt.
Verse: 8132    Sus haete sich diu schoene Îsôt

Verse: 8133    von Tristandes lêre
Verse: 8134    gebezzeret sêre.

Verse: 8135    sî was suoze gemuot,
Verse: 8136    ir site und ir gebaerde guot.

Verse: 8137    si kunde schoeniu hantspil,
Verse: 8138    schoener behendekeite vil:

Verse: 8139    brieve und schanzûne tihten,
Verse: 8140    ir getihte schône slihten,

Verse: 8141    si kunde schrîben unde lesen.
Verse: 8142    nu was ouch Tristan genesen

Verse: 8143    ganz unde geheilet garwe,
Verse: 8144    daz ime lîch unde varwe

Verse: 8145    wider lûteren begunde.
Verse: 8146    nu vorhte er alle stunde,

Verse: 8147    daz in eteswer erkande
Verse: 8148    von gesinde oder von lande,

Verse: 8149    und was in staeter trahte,
Verse: 8150    mit wie gevüeger ahte

Verse: 8151    er urloup genaeme
Verse: 8152    und ûz den sorgen kaeme.

Verse: 8153    wan er wol wiste, möhte ez sîn,
Verse: 8154    im solte ietweder künigîn

Verse: 8155    kûme oder niemer urloup geben.
Verse: 8156    nu bedâhte er aber, daz sîn leben

Verse: 8157    z' allen zîten was geleit
Verse: 8158    in michel ungewisheit.

Verse: 8159    er gie zer küniginne
Verse: 8160    und begunde in schoenem sinne

Verse: 8161    sîne rede besetzen an der stete,
Verse: 8162    als er an allen steten tete.

Verse: 8163    er kniete vür si unde sprach:
Verse: 8164    'vrouwe, genâde unde gemach

Verse: 8165    und helfe, die ir mir habet getân,
Verse: 8166    die lâze iu got ze staten gestân

Verse: 8167    in dem êwigen rîche!
Verse: 8168    ir habet sô saeleclîche

Verse: 8169    mit mir geworben und sô wol,
Verse: 8170    daz es iu got iemer lônen sol

Verse: 8171    und ich ez iemer dienen wil
Verse: 8172    unz an mînes tôdes zil,

Verse: 8173    an swelher stat ich armer man
Verse: 8174    iuwer lop gevürdern kan.

Verse: 8175    saeligiu künigîn,
Verse: 8176    ez sol mit iuwern hulden sîn,

Verse: 8177    daz ich wider ze lande var,
Verse: 8178    wan mîn dinc stât alsô dar,

Verse: 8179    daz ich langer niht belîben kan.'
Verse: 8180    Diu vrouwe lachete in an.

Verse: 8181    'dîn smeichen' sprach si' deist ein wiht,
Verse: 8182    ich engibe dir urloubes niht,

Verse: 8183    dune kumest niht hinnen zwâre
Verse: 8184    vor disem ganzen jâre.'

Verse: 8185    'nein edeliu küniginne,
Verse: 8186    nemet in iuwer sinne,

Verse: 8187    wie ez umbe die gotes ê
Verse: 8188    und umbe herzeliebe stê.

Verse: 8189    ich hân dâ heime ein êlîch wîp,
Verse: 8190    die minne ich als mîn selbes lîp

Verse: 8191    und weiz wol, daz sich diu versiht
Verse: 8192    und enhât ouch zwîvel dar an niht,

Verse: 8193    ich ensî binamen tôt.
Verse: 8194    und ist mîn angest und mîn nôt:

Verse: 8195    wirt s' einem andern gegeben,
Verse: 8196    sô ist mîn trôst und mîn leben

Verse: 8197    und al diu vröude dâ hin,
Verse: 8198    ze der ich dingende bin,

Verse: 8199    und enwirde niemer mêre vrô.'
Verse: 8200    'entriuwen' sprach diu wîse dô

Verse: 8201    'Tantris, diu nôt ist êhaft.
Verse: 8202    alsus getâne geselleschaft

Verse: 8203    sol nieman guoter scheiden.
Verse: 8204    got der genâde iu beiden,

Verse: 8205    dînem wîbe unde dir!
Verse: 8206    swie rehte ungerne ich dîn enbir,

Verse: 8207    sô wil ich dîn durch got enbern.
Verse: 8208    urloubes muoz ich dich gewern

Verse: 8209    und bin dir willic unde holt.
Verse: 8210    ich und mîn tohter Îsôlt

Verse: 8211    wir geben dir ze dîner var
Verse: 8212    und ze dîner lîpnar

Verse: 8213    zwô marc von rôtem golde.
Verse: 8214    die habe dir von Îsolde!'

Verse: 8215    sus vielt der ellende
Verse: 8216    ietwedere sîne hende

Verse: 8217    des lîbes unde der sinne
Verse: 8218    ietwederer küniginne,

Verse: 8219    beidiu der muoter unde der maget.
Verse: 8220    'iu beiden' sprach er 'sî gesaget

Verse: 8221    von gote genâde und êre!'
Verse: 8222    und enbeite ouch dô niemêre,

Verse: 8223    er vuor von dannen z' Engelant,
Verse: 8224    von Engelanden al zehant

Verse: 8225    ze Curnewâle wider heim.



Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.