TITUS
Gottfried von Strassburg, Tristan
Part No. 12
Previous part

Chapter: 12 
12: Die Brautfahrt


Verse: 8226    Nu Marke sîn oeheim

Verse: 8227    und daz lantliut vernam,
Verse: 8228    daz er gesunder wider kam,

Verse: 8229    si wurden al gelîche
Verse: 8230    von allem dem rîche

Verse: 8231    rehte unde ûz allem herzen vrô.
Verse: 8232    der künec sîn vriunt der vrâgte in dô,

Verse: 8233    wie 'z ime ergangen waere.
Verse: 8234    und er seite ime daz maere

Verse: 8235    von obene hin ze grunde
Verse: 8236    so 'r ebeneste kunde.

Verse: 8237    des nam s' ouch alle wunder
Verse: 8238    und begunden hier under

Verse: 8239    vil schimpfen unde lachen
Verse: 8240    und michel lahter machen

Verse: 8241    von sîner verte in Îlant,
Verse: 8242    von sîner vîndinne hant,

Verse: 8243    wie schône in diu generte,
Verse: 8244    von allem dem geverte,

Verse: 8245    daz er under in begie.
Verse: 8246    si jâhen, sine gevrieschen nie

Verse: 8247    solhes wunders gemach.
Verse: 8248    Nu diz allez geschach,

Verse: 8249    daz sîn genist und sîn vart
Verse: 8250    sêre unde wol belachet wart,

Verse: 8251    dô vrâgeten s' in genôte
Verse: 8252    von der maget Îsôte.

Verse: 8253    'Îsôt' sprach er 'daz ist ein maget!
Verse: 8254    daz al diu werlt von schoene saget,

Verse: 8255    deist allez hie wider alse ein wint.
Verse: 8256    diu liehte Îsôt daz ist ein kint

Verse: 8257    von gebaerden und von lîbe,
Verse: 8258    daz kint noch maget von wîbe

Verse: 8259    als lustic unde als ûz erkorn
Verse: 8260    nie wart noch niemer wirt geborn.

Verse: 8261    diu lûtere, diu liehte Îsolt,
Verse: 8262    diu ist lûter alse arâbesch golt.

Verse: 8263    des ich ie waenende was,
Verse: 8264    alse ich 'z an den buochen las,

Verse: 8265    diu von ir lobe geschriben sint,
Verse: 8266    Aurôren tohter unde ir kint,

Verse: 8267    Tyntarides diu maere,
Verse: 8268    daz an ir eine waere

Verse: 8269    aller wîbe schônheit
Verse: 8270    an einen bluomen geleit:

Verse: 8271    von dem wâne bin ich komen,
Verse: 8272    Îsôt hât mir den wân benomen

Verse: 8273    ine geloube niemer mê,
Verse: 8274    daz sunne von Mycêne gê.

Verse: 8275    ganzlîchiu schoene ertagete nie
Verse: 8276    ze Criechenlant, si taget hie.

Verse: 8277    alle gedanke und alle man
Verse: 8278    die kapfen niuwan Îlant an.

Verse: 8279    dâ nemen ir ougen wunne,
Verse: 8280    sehen, wie diu niuwe sunne

Verse: 8281    nâch ir morgenrôte
Verse: 8282    Îsôt nâch Îsôte,

Verse: 8283    dâ her von Develîne
Verse: 8284    in elliu herze schîne!

Verse: 8285    diu liehte wunneclîche
Verse: 8286    si erliuhtet elliu rîche.

Verse: 8287    daz s' alle lobes von wîben sagent,
Verse: 8288    swaz sî mit lobe ze maeren tragent,

Verse: 8289    deist allez hie wider ein niht.
Verse: 8290    der Îsôt under ougen siht,

Verse: 8291    dem liutert 'z herze unde muot,
Verse: 8292    rehte als diu gluot dem golde tuot:

Verse: 8293    ez liebet leben unde lîp.
Verse: 8294    mit ir enist kein ander wîp

Verse: 8295    erleschet noch geswachet,
Verse: 8296    als maneger maere machet.

Verse: 8297    ir schoene diu schoenet,
Verse: 8298    si zieret unde croenet

Verse: 8299    wîp unde wîplîchen namen.
Verse: 8300    des ensol sich ir dekeiniu schamen.'

Verse: 8301    Als Tristan haete gesaget
Verse: 8302    von sîner vrouwen der maget,

Verse: 8303    der wunneclîchen von Îlant,
Verse: 8304    dâ nâch als ez im was erkant,

Verse: 8305    swer dô dâ bî dem maere was
Verse: 8306    und ez rehte in sîn herze las,

Verse: 8307    dem süezete diu rede den muot
Verse: 8308    rehte alse des meien tou die bluot:

Verse: 8309    si haeten alle muot dâ van.
Verse: 8310    der wol gemuote Tristan

Verse: 8311    der greif dô wider an sîn leben.
Verse: 8312    im was ein ander leben gegeben:

Verse: 8313    er was ein niuborner man.
Verse: 8314    ez huop sich êrste umbe in an.

Verse: 8315    er was dô geil unde vrô.
Verse: 8316    künec unde hof die wâren dô

Verse: 8317    ze sînem willen gereit,
Verse: 8318    biz sich diu veige unmüezekeit,

Verse: 8319    der verwâzene nît,
Verse: 8320    der selten iemer gelît,

Verse: 8321    under in begunde üeben,
Verse: 8322    der hêrren vil betrüeben

Verse: 8323    an ir muote und an ir siten,
Verse: 8324    daz sî 'n der êren beniten

Verse: 8325    unde der werdekeite,
Verse: 8326    die der hof an in leite

Verse: 8327    und al daz lantgesinde.
Verse: 8328    si begunden vil swinde

Verse: 8329    reden ze sînen dingen
Verse: 8330    und in ze maere bringen,

Verse: 8331    er waere ein zouberaere.
Verse: 8332    diu vorderen maere,

Verse: 8333    wie er ir vînt Môrolden sluoc,
Verse: 8334    wie sich sîn dinc z' Îlant getruoc,

Verse: 8335    des begunden s' under in dô jehen,
Verse: 8336    ez waere ûz zoubere geschehen.

Verse: 8337    'seht' sprâchen s' alle 'merket hie
Verse: 8338    und sprechet, wie genas er ie

Verse: 8339    vor dem starken Môrolde?
Verse: 8340    wie betroug er Îsolde

Verse: 8341    die wîsen küniginne,
Verse: 8342    sîne tôtvîndinne,

Verse: 8343    daz si sîn alsô vlîzec was,
Verse: 8344    biz daz er von ir hant genas?

Verse: 8345    merket wunder, hoeret her:
Verse: 8346    der pârâtiere, wie kan er

Verse: 8347    gesehendiu ougen blenden
Verse: 8348    und allez daz verenden,

Verse: 8349    daz er ze endene hât!'
Verse: 8350    Hie mite gevielen s' an den rât,

Verse: 8351    die Markes râtes pflâgen,
Verse: 8352    daz si Marke an lâgen

Verse: 8353    beidiu vruo und spâte
Verse: 8354    mit vlîzeclîchem râte,

Verse: 8355    daz er ein wîp naeme,
Verse: 8356    von der er z' erben kaeme

Verse: 8357    einer tohter oder eines suns.
Verse: 8358    Marke sprach: 'got der hât uns

Verse: 8359    einen guoten erben geben.
Verse: 8360    got helfe uns, daz er müeze leben!

Verse: 8361    Tristan die wîle er leben sol,
Verse: 8362    sô wizzet endelîche wol,

Verse: 8363    sone sol niemer künigîn
Verse: 8364    noch vrouwe hie ze hove gesîn.'

Verse: 8365    hie mite wart aber des hazzes mê,
Verse: 8366    des nîdes aber dô mê dan ê,

Verse: 8367    den sî Tristande truogen,
Verse: 8368    und begunde ouch an genuogen

Verse: 8369    ûz brechen alsô sêre,
Verse: 8370    daz sî 'z in dô nie mêre

Verse: 8371    vor verhelen kunden
Verse: 8372    und ime ze manegen stunden

Verse: 8373    die gebaerde buten und diu wort,
Verse: 8374    daz er ervorhte den mort

Verse: 8375    und was in den sorgen ie,
Verse: 8376    daz s' eteswenne und eteswie

Verse: 8377    den rât in ein getrüegen,
Verse: 8378    daz sî 'n mortlîche slüegen.

Verse: 8379    sînen oeheim Marken den bat er,
Verse: 8380    daz er der lanthêrren ger

Verse: 8381    z' einem ende braehte
Verse: 8382    und durch got bedaehte

Verse: 8383    sîn angest unde sîne nôt.
Verse: 8384    er enwiste, wenne ez sîn tôt

Verse: 8385    und sîn ende waere.
Verse: 8386    Sin oeheim der gewaere

Verse: 8387    der sprach: 'neve Tristan,
Verse: 8388    swîc, ine kume hie niemer an.

Verse: 8389    ine ger niht erben niuwan dîn;
Verse: 8390    ouch soltu gâr âne angest sîn

Verse: 8391    umbe dînen lîp und umbe dîn leben:
Verse: 8392    ich wil dir guoten vride geben.

Verse: 8393    ir aller nîden unde ir haz
Verse: 8394    nu sô dir got, waz schadet dir daz?

Verse: 8395    hazzen unde nîden
Verse: 8396    daz muoz der biderbe lîden.

Verse: 8397    der man der werdet al die vrist,
Verse: 8398    die wîle und er geniten ist.

Verse: 8399    wirde unde nît diu zwei diu sint
Verse: 8400    rehte alse ein muoter unde ir kint.

Verse: 8401    diu wirde diu birt alle zît
Verse: 8402    und vuoret haz unde nît.

Verse: 8403    wen gevellet ouch mê hazzes an
Verse: 8404    dan einen saeligen man?

Verse: 8405    diu saelde ist arm unde swach,
Verse: 8406    diu nie dekeinen haz gesach.

Verse: 8407    lebe iemer und wirp iemer daz,
Verse: 8408    daz du einen tac sîst âne haz.

Verse: 8409    dû enwirbest niemer daz,
Verse: 8410    daz du iemer werdest âne haz.

Verse: 8411    wellest aber von boeser diet
Verse: 8412    ungehazzet sîn, sô sing ir liet

Verse: 8413    und wis mit in ein boese wiht,
Verse: 8414    sône hazzent sî dich niht.

Verse: 8415    Tristan, swaz ieman getuo,
Verse: 8416    sô rihte dû dich ie dar zuo,

Verse: 8417    daz tû hôhes muotes sîs.
Verse: 8418    wis vor bedenkende alle wîs

Verse: 8419    dînen vrumen und dîn êre
Verse: 8420    und enrât mir niht mêre,

Verse: 8421    daz dir ze schaden müge ergân!
Verse: 8422    swaz rede hier umbe wirt getân,

Verse: 8423    des envolge ich weder in noch dir.'
Verse: 8424    'hêrre, sô gebietet mir,

Verse: 8425    sô wil ich von dem hove varn.
Verse: 8426    ine mac mich vor in niht bewarn.

Verse: 8427    sol ich bî disem hazze wesen,
Verse: 8428    sone kan ich niemer genesen.

Verse: 8429    ê ich sus angestlîche
Verse: 8430    elliu künicrîche

Verse: 8431    wolte haben ze mîner hant,
Verse: 8432    ich waere ê iemer âne lant.'

Verse: 8433    Dô Marke sînen ernest sach,
Verse: 8434    er bat in swîgen unde sprach:

Verse: 8435    'neve, swie gerne ich staete
Verse: 8436    und triuwe zuo dir haete,

Verse: 8437    sone gestatestû mir 's niht.
Verse: 8438    swaz sô nû hier ûz geschiht,

Verse: 8439    dâ bin ich gâr unschuldic an.
Verse: 8440    swie ich dir nû gevolgen kan,

Verse: 8441    dâ bin ich aber bereite zuo.
Verse: 8442    sag an, waz wiltu daz ich tuo?'

Verse: 8443    'dâ besendet iuwern hoverât,
Verse: 8444    der iuch hier ûf geleitet hât,

Verse: 8445    und ervaret iegelîches muot:
Verse: 8446    vrâget, wie si dunke guot,

Verse: 8447    daz ir hie mite gebâret,
Verse: 8448    ir willen sô gevâret,

Verse: 8449    daz ez mit êren müge gestân.'
Verse: 8450    nu diz wart schiere getân,

Verse: 8451    daz s' alle wâren besant.
Verse: 8452    nu die gerieten ouch zehant

Verse: 8453    und niwan durch Tristandes tôt:
Verse: 8454    möhte ez gesîn, diu schoene Îsôt

Verse: 8455    diu gezaeme im wol ze wîbe
Verse: 8456    an gebürte, an tugende, an lîbe,

Verse: 8457    und statten ouch den rât alsô.
Verse: 8458    vür Marken kâmen s' alle dô.

Verse: 8459    ir einer, der ez kunde,
Verse: 8460    der sprach mit einem munde

Verse: 8461    ir aller willen unde ir muot:
Verse: 8462    'hêrre' sprach er 'uns dunket guot:

Verse: 8463    diu schoene Îsôt von Îlant,
Verse: 8464    als al den landen ist bekant,

Verse: 8465    diu uns und in gelegen sint,
Verse: 8466    diu ist ein maget unde ein kint,

Verse: 8467    an die wîplîchiu saelekeit
Verse: 8468    alle die saelde hât geleit,

Verse: 8469    die si dar gelegen kunde,
Verse: 8470    als ir ze maneger stunde

Verse: 8471    von ir selbe habet vernomen,
Verse: 8472    diu ist saelic unde vollekomen

Verse: 8473    an lebene unde an lîbe,
Verse: 8474    mag iu diu ze wîbe

Verse: 8475    und uns ze vrouwen werden,
Verse: 8476    sone kan uns ûf der erden

Verse: 8477    an wîbe niemer baz geschehen.'
Verse: 8478    Der künic sprach: 'lât hêrre sehen:

Verse: 8479    ob ich die gerne wolte hân,
Verse: 8480    wie solte ez iemer ergân?

Verse: 8481    wan nemet ir doch in iuwern sin,
Verse: 8482    wie 'z under uns und under in

Verse: 8483    nu guote wîle sî gewant:
Verse: 8484    und hazzet liut unde lant.

Verse: 8485    Gurmûn ist mir von herzen gram
Verse: 8486    und hât ouch reht, ich bin im sam.

Verse: 8487    wer getrüege iemer under uns zwein
Verse: 8488    sô grôze vriuntschaft inein?'

Verse: 8489    'hêrre' sprâchen s' aber dô
Verse: 8490    'ez vüeget sich vil dicke alsô,

Verse: 8491    daz under landen schade ergât.
Verse: 8492    sô suln si beidenthalben rât

Verse: 8493    beidiu suochen unde vinden
Verse: 8494    und suln ez mit ir kinden

Verse: 8495    wider ze suone bringen.
Verse: 8496    ûz hezlîchen dingen

Verse: 8497    wirt dicke michel vriuntschaft.
Verse: 8498    sît ir hie zuo gedanchaft,

Verse: 8499    ir muget doch wol geleben den tac,
Verse: 8500    daz Îlant iuwer werden mac.

Verse: 8501    Îlant stât niuwan an in drîn:
Verse: 8502    künic unde künigîn

Verse: 8503    an Îsôte eine g' erbet sint.
Verse: 8504    sî ist ir einegez kint.'

Verse: 8505    des antwurte in dô Marke:
Verse: 8506    'Tristan der hât mich starke

Verse: 8507    in gedanke durch si brâht.
Verse: 8508    ich hân vil durch sî gedâht,

Verse: 8509    als er si lobete wider mich.
Verse: 8510    von den gedanken bin ouch ich

Verse: 8511    von den andern allen
Verse: 8512    sô sêre an sî gevallen,

Verse: 8513    sine müge mir danne werden,
Verse: 8514    sone wirt ûf diser erden

Verse: 8515    niemer dekeiniu mîn wîp,
Verse: 8516    sam mir got und mîn selbes lîp!'

Verse: 8517    den eit tete er niht umbe daz,
Verse: 8518    daz im sîn gemüete iht baz

Verse: 8519    sô hin stüende danne her.
Verse: 8520    durch die kündekeit swuor er,

Verse: 8521    daz es im gâr was ungedâht,
Verse: 8522    daz ez iemer würde z' ende brâht.

Verse: 8523    Des küneges rât sprach aber dô:
Verse: 8524    'hêrre, gevüeget ir 'z alsô,

Verse: 8525    daz mîn hêr Tristan, der hie stât,
Verse: 8526    der dâ ze hove künde hât,

Verse: 8527    iuwer boteschaft dâ werben wil,
Verse: 8528    sô ist ez allez an ein zil

Verse: 8529    und an ein staetez ende brâht.
Verse: 8530    der ist wîse und wol bedâht

Verse: 8531    und saelic z' allen dingen.
Verse: 8532    der mag ez ze ende bringen.

Verse: 8533    er kan ir aller sprâche wol.
Verse: 8534    er endet, swaz er enden sol.'

Verse: 8535    'Ir râtet übel' sprach Marke
Verse: 8536    'ir vlîzet iuch ze starke

Verse: 8537    Tristandes schaden und sîner nôt.
Verse: 8538    er ist doch z' einem mâle tôt

Verse: 8539    vür iuch und iuwer erben.
Verse: 8540    ir sult in aber sterben

Verse: 8541    zem anderen mâle.
Verse: 8542    nein ir von Curnewâle,

Verse: 8543    ir müezet selbe dâ hin.
Verse: 8544    niemêre râtet mir ûf in!'

Verse: 8545    'hêrre' sprach aber Tristan
Verse: 8546    'sine misseredent niht hier an.

Verse: 8547    ez waere wol gevüege,
Verse: 8548    swâ iuch der muot zuo trüege,

Verse: 8549    griffe ich ez beltlîcher an
Verse: 8550    und bereiter danne ein ander man.

Verse: 8551    und ist ouch reht, daz ich ez tuo.
Verse: 8552    herre, ich bin harte guot dar zuo.

Verse: 8553    ez enwirbet zwâre nieman baz.
Verse: 8554    gebietet et in allen daz,

Verse: 8555    daz si selbe mit mir varn,
Verse: 8556    hin unde her mit mir bewarn

Verse: 8557    iuwer dinc und iuwer êre.'
Verse: 8558    'nein, dû enkumest niht mêre

Verse: 8559    in ir gewalt und in ir hant,
Verse: 8560    sît dich got wider hât gesant.'

Verse: 8561    'hêrre, zewâre diz muoz wesen.
Verse: 8562    suln si sterben oder genesen,

Verse: 8563    daz muoz ouch mir mit in geschehen.
Verse: 8564    ich wil si selbe lâzen sehen,

Verse: 8565    belîbet diz lant erben vrî,
Verse: 8566    ob daz von mînen schulden sî.

Verse: 8567    heizet si sich bereiten!
Verse: 8568    ich wil den kiel leiten

Verse: 8569    und vüeren mit mîn selbes hant
Verse: 8570    in daz saelige Îlant

Verse: 8571    hin wider ze Develîne
Verse: 8572    gegen dem sunnenschîne,

Verse: 8573    der manegem herzen vröude birt.
Verse: 8574    wer weiz, ob uns diu schoene wirt?

Verse: 8575    hêrre, werde iu diu schoene Îsôt,
Verse: 8576    laege wir dan alle tôt,

Verse: 8577    dâ waere lützel schaden an.'
Verse: 8578    und alse Markes râtman

Verse: 8579    gehôrten, war diu rede gie,
Verse: 8580    sine wurden alsô trûric nie

Verse: 8581    in allen ir jâren,
Verse: 8582    sô sî der rede wâren.

Verse: 8583    nu muose ez unde solte wesen.
Verse: 8584    Tristan hiez ûz dem hove lesen

Verse: 8585    des küneges heinlîchaere,
Verse: 8586    zweinzec ritter gewaere

Verse: 8587    und zuo der nôt die besten.
Verse: 8588    von lande und von gesten

Verse: 8589    gewan er sehzic umbe solt.
Verse: 8590    des râtes haete er âne golt

Verse: 8591    zweinzec lantbarûne.
Verse: 8592    sus was der cumpanjûne

Verse: 8593    hundert unde dekeiner mê.
Verse: 8594    mit den vuor Tristan über sê,

Verse: 8595    die wâren sîn geselleschaft,
Verse: 8596    und vuorte ouch râtes die craft

Verse: 8597    an spîse unde an waete,
Verse: 8598    an anderm schifgeraete,

Verse: 8599    daz sô vil liuten zuo z' ir vart
Verse: 8600    nie kiel sô wol berâten wart.

Verse: 8601    Si lesent an Tristande,
Verse: 8602    daz ein swalwe z' Îlande

Verse: 8603    von Curnewâle kaeme,
Verse: 8604    ein vrouwen hâr dâ naeme

Verse: 8605    z' ir bûwe und z' ir geniste
Verse: 8606    ( ine weiz, wâ sî 'z dâ wiste)

Verse: 8607    und vuorte daz wider über sê.
Verse: 8608    genistet ie kein swalwe mê

Verse: 8609    mit solhem ungemache,
Verse: 8610    sô vil sô sî bûsache

Verse: 8611    bî ir in dem lande vant,
Verse: 8612    daz s' über mer in vremediu lant

Verse: 8613    nâch ir bûgeraete streich?
Verse: 8614    weiz got, hie spellet sich der leich,

Verse: 8615    hie lispet daz maere.
Verse: 8616    ouch ist ez alwaere,

Verse: 8617    swer saget, daz Tristan ûf daz mer
Verse: 8618    nâch wâne schiffete mit her

Verse: 8619    und ensolte des niht nemen war,
Verse: 8620    wie lange er vüere oder war,

Verse: 8621    und enwiste ouch niht wen suochen.
Verse: 8622    waz rach er an den buochen,

Verse: 8623    der diz hiez schrîben unde lesen?
Verse: 8624    jâ waeren s' alle samet gewesen,

Verse: 8625    der künic, der sî ûz sande,
Verse: 8626    sîn rât von dem lande,

Verse: 8627    die boten gouche unde soten,
Verse: 8628    waeren s' alsô gewesen boten.

Verse: 8629    Nû Tristan was ûf sîne vart
Verse: 8630    und schiffete allez hinewart,

Verse: 8631    er unde sîn geselleschaft.
Verse: 8632    der was ein teil vil sorchaft.

Verse: 8633    ich meine die barûne,
Verse: 8634    die zweinzic cumpanjûne,

Verse: 8635    den rât von Curnewâle.
Verse: 8636    die haeten zuo dem mâle

Verse: 8637    vil michel angest unde nôt.
Verse: 8638    sie wânden alle wesen tôt.

Verse: 8639    sie vluocheten der stunde
Verse: 8640    mit herzen und mit munde,

Verse: 8641    daz der reise unde der vart
Verse: 8642    ze Îlande ie gedâht wart.

Verse: 8643    sine kunden umbe ir eigen leben
Verse: 8644    in selben keinen rât gegeben.

Verse: 8645    si rieten her, si rieten hin
Verse: 8646    und enkunden nie niht under in

Verse: 8647    gerâten, daz in töhte
Verse: 8648    und daz rât heizen möhte.

Verse: 8649    und enwas ouch daz kein wunder:
Verse: 8650    hier umbe noch hier under

Verse: 8651    was râtes niht wan zweier ein,
Verse: 8652    in müese einez under zwein

Verse: 8653    bringen umbe ir leben vrist:
Verse: 8654    âventiure oder list.

Verse: 8655    der list was aber dâ tiure.
Verse: 8656    sô was ouch âventiure

Verse: 8657    ir keinem in wâne.
Verse: 8658    si wâren beider âne.

Verse: 8659    doch sprâchen ir genuoge:
Verse: 8660    'wîsheit unde vuoge

Verse: 8661    der ist harte vil an disem man.
Verse: 8662    ist daz uns got gelückes gan,

Verse: 8663    wir mugen vil wol mit ime genesen,
Verse: 8664    wolte er dekeiner mâze wesen

Verse: 8665    an sîner blinden vrecheit.
Verse: 8666    der ist ze vil an in geleit.

Verse: 8667    er ist ze vrech und ze gemuot,
Verse: 8668    ern ruochet hiute, waz er tuot.

Verse: 8669    ern gaebe niht ein halbez brôt
Verse: 8670    umbe uns noch umbe sîn selbes tôt.

Verse: 8671    und iedoch unser bester wân
Verse: 8672    der muoz an sînen saelden stân.

Verse: 8673    sîn witze muoz uns lêre geben,
Verse: 8674    wie wir gevristen daz leben.'

Verse: 8675    Dô sî z' Îlande kâmen,
Verse: 8676    ir gelende dâ genâmen,

Verse: 8677    dâ man in sagete maere,
Verse: 8678    daz der künic waere

Verse: 8679    ze Weisefort vür die stât,
Verse: 8680    Tristan den anker werfen bât

Verse: 8681    wol alse verre von der habe,
Verse: 8682    daz man mit einem bogen dar abe

Verse: 8683    niht möhte haben geslagen zuo z' in.
Verse: 8684    sîne lantbarûne bâten in,

Verse: 8685    daz er durch got in seite,
Verse: 8686    mit waz gelegenheite

Verse: 8687    er wolte werben umbe daz wîp.
Verse: 8688    ez gienge in sêre an den lîp.

Verse: 8689    ez diuhte sî und waere ouch guot,
Verse: 8690    daz er in seite sînen muot.

Verse: 8691    Tristan sprach: 'dâ entuot niemê,
Verse: 8692    bewart, daz iuwer keiner gê

Verse: 8693    hin vür den liuten z' ougen.
Verse: 8694    weset alle hinne tougen!

Verse: 8695    wan knehte und marnaere,
Verse: 8696    die vorschen der maere

Verse: 8697    ûf der brucke vor der schiftür,
Verse: 8698    und iuwer keiner kome dar vür!

Verse: 8699    swîget unde tuot iuch în!
Verse: 8700    ich wil selbe dâ vor sîn,

Verse: 8701    wan ich die lantsprâche kan.
Verse: 8702    man wirt uns schiere komende an

Verse: 8703    von den burgaeren
Verse: 8704    mit übelîchen maeren.

Verse: 8705    den muoz ich liegen disen tac,
Verse: 8706    swaz ich in geliegen mac.

Verse: 8707    helet ir iuch hier inne.
Verse: 8708    wan wirt man iuwer inne,

Verse: 8709    sô habe wir strît an der hant
Verse: 8710    und bestât uns allez daz lant.

Verse: 8711    die wîle ich morgen ûze sî
Verse: 8712    ( wan ich wil rîten hie bî

Verse: 8713    ûf âventiure vil vruo,
Verse: 8714    mir gelinge sone tuo)

Verse: 8715    sô sî Curvenal dâ vor
Verse: 8716    und andere mit im an dem tor,

Verse: 8717    den diu sprâche sî bekant.
Verse: 8718    und eines dinges sît gemant:

Verse: 8719    ist daz ich under wegen sî
Verse: 8720    vier tage oder drî,

Verse: 8721    zehant enbîtet mîn nimê,
Verse: 8722    entrinnet wider über sê

Verse: 8723    und neret leben unde lîp!
Verse: 8724    sô hân ich eine daz wîp

Verse: 8725    verzinset mit dem lîbe,
Verse: 8726    sô râtet ir ze wîbe

Verse: 8727    iuwerm hêrren, swar iuch dunke guot.
Verse: 8728    diz ist mîn rât und ouch mîn muot.'

Verse: 8729    Des küneges marschalc von Îlant,
Verse: 8730    in des gewalt und in des hant

Verse: 8731    ez allez stuont, stat unde habe,
Verse: 8732    der kam gerüeret dort her abe

Verse: 8733    gewâfent unde wîcgar
Verse: 8734    mit einer michelen schar

Verse: 8735    beidiu der burgaere unde ir boten,
Verse: 8736    als in von hove was geboten

Verse: 8737    und als daz maere hie vor giht,
Verse: 8738    der dâ vor an daz maere siht:

Verse: 8739    swer dar ze stade gestieze,
Verse: 8740    daz man in vâhen hieze,

Verse: 8741    biz man vil rehte erkande,
Verse: 8742    ob er von Markes lande

Verse: 8743    und des gesindes waere.
Verse: 8744    die selben wîzenaere,

Verse: 8745    die leiden mortaeten,
Verse: 8746    die manegen mort haeten

Verse: 8747    begangen mit unschulden
Verse: 8748    ir hêrren ze hulden,

Verse: 8749    die kâmen in die habe gezogen
Verse: 8750    mit armbrusten und mit bogen

Verse: 8751    und mit anderre wer
Verse: 8752    als von rehte ein roupher.

Verse: 8753    des kieles meister Tristan
Verse: 8754    leit eine reisekappen an

Verse: 8755    durch anders niht wan umbe daz,
Verse: 8756    daz er sich haele deste baz.

Verse: 8757    ouch hiez er einen kopf dar tragen
Verse: 8758    von rôtem golde geslagen

Verse: 8759    und geworht ze vremedem prîse
Verse: 8760    in engeloyser wîse.

Verse: 8761    sus trat er in ein schiffelîn
Verse: 8762    und Curvenal zuo z' ime dar în

Verse: 8763    und kêrte hin gegen der habe
Verse: 8764    und bôt in sînen gruoz hin abe

Verse: 8765    mit gebaerden und mit munde,
Verse: 8766    sô er suozeste kunde.

Verse: 8767    swaz aber des gruozes waere,
Verse: 8768    genuoge burgaere

Verse: 8769    zen schiffelînen liefen,
Verse: 8770    von stade genuoge riefen:

Verse: 8771    'habe an lant, habe an lant!'
Verse: 8772    Tristan stiez in die habe zehant.

Verse: 8773    'ir hêrren' sprach er 'saget mir,
Verse: 8774    wie komet ir sus? waz tiutet ir

Verse: 8775    mit disem ungeverte?
Verse: 8776    iur gebaerde die sint herte.

Verse: 8777    ine weiz, wes mich versehen sol.
Verse: 8778    durch gotes willen tuot sô wol.

Verse: 8779    si ieman bî iu an der habe,
Verse: 8780    der gewalt von dem lande habe,

Verse: 8781    der hoere und verneme mich!'
Verse: 8782    'jâ' sprach der marschalc 'hie bin ich.

Verse: 8783    mîn gebaerde und mîn geverte
Verse: 8784    diu werdent iu sô herte,

Verse: 8785    daz ich binamen wizzen wil
Verse: 8786    iuwer geverte unz ûf ein zil.'

Verse: 8787    'entriuwen hêrre' sprach Tristan
Verse: 8788    'dâ habet ir mich bereiten an.

Verse: 8789    der mir geswîgen hieze
Verse: 8790    und mich ze spruche lieze,

Verse: 8791    des selben wolte ich gerne biten,
Verse: 8792    daz man mit guotlîchen siten

Verse: 8793    und sô mîn wort vernaeme,
Verse: 8794    als ez dem lande zaeme.'

Verse: 8795    hie mite wart ime ein stille gegeben.
Verse: 8796    'Hêrre' sprach Tristan 'unser leben,

Verse: 8797    unser geburt und unser lant
Verse: 8798    dar umbe ist ez alsô gewant,

Verse: 8799    als ich iu hie bediute.
Verse: 8800    wir sîn werbende liute

Verse: 8801    und mugen uns des niht geschamen.
Verse: 8802    koufliute heizen wir binamen,

Verse: 8803    ich und mîn cumpanîe,
Verse: 8804    und sîn von Normandîe.

Verse: 8805    unser wîp und unser kint sint dâ.
Verse: 8806    wir selbe sîn wâ unde wâ

Verse: 8807    von lande ze lande
Verse: 8808    koufende aller hande

Verse: 8809    und gewinnen, daz wir uns betragen.
Verse: 8810    und innen disen drîzec tagen

Verse: 8811    dô vuore wir von lande dan,
Verse: 8812    ich und zwêne ander koufman.

Verse: 8813    wir drî wir wolten under uns drîn
Verse: 8814    mit geselleschaft z' Iberne sîn

Verse: 8815    und sint wol ahte tage iezuo,
Verse: 8816    daz uns an einem tage vruo

Verse: 8817    von hinnen verre ein wint bestuont,
Verse: 8818    als uns die winde dicke tuont.

Verse: 8819    der hât uns drî gescheiden,
Verse: 8820    mich einen von in beiden

Verse: 8821    und enweiz niht, wie si sîn gevarn,
Verse: 8822    wan got der müeze sî bewarn,

Verse: 8823    sî sîn lebende oder tôt!
Verse: 8824    ich bin mit micheler nôt

Verse: 8825    vil manegen übelen wec geslagen
Verse: 8826    in disen swaeren ahte tagen.

Verse: 8827    und gester umbe den mitten tac,
Verse: 8828    dô sturm unde wint gelac,

Verse: 8829    dô erkante ich berge unde lant.
Verse: 8830    durch ruowen kêrte ich zehant

Verse: 8831    und ruowete unze hiute dâ.
Verse: 8832    hiute an dem morgen iesâ

Verse: 8833    dô ez liehtende wart,
Verse: 8834    dô streich ich aber ûf mîne vart

Verse: 8835    alhie her wider Weisefort.
Verse: 8836    nu vert ez hie wirs danne dort.

Verse: 8837    ich waene, ich bin noch ungenesen.
Verse: 8838    doch wânde ich hie genesen wesen,

Verse: 8839    wan ich die stat erkenne
Verse: 8840    und bin ouch eteswenne

Verse: 8841    mit koufliuten hie gewesen.
Verse: 8842    deste baz wânde ich genesen

Verse: 8843    und hie genâde vinden.
Verse: 8844    nu bin ich sturmwinden

Verse: 8845    alrêrste in die hant gevarn,
Verse: 8846    doch mag mich got noch wol bewarn.

Verse: 8847    sît ich bî disem gesinde
Verse: 8848    weder vride noch ruowe vinde,

Verse: 8849    sô kêre ich wider ûf daz mer.
Verse: 8850    dâ hân ich al der werlde wer

Verse: 8851    und strît genuogen an der vluht.
Verse: 8852    Geruochet aber ir iuwer zuht

Verse: 8853    und iuwer êre an mir begân,
Verse: 8854    der mâze als ich hie guotes hân,

Verse: 8855    daz teile ich iu vil gerne mite
Verse: 8856    umbe eine kurzlîche bite,

Verse: 8857    daz ir mir und mîner habe
Verse: 8858    schaffet vride in dirre habe,

Verse: 8859    biz ich besuoche unde besehe,
Verse: 8860    ob mir diu saelde geschehe,

Verse: 8861    daz ich mîn lantgesinde
Verse: 8862    ervorsche unde ervinde.

Verse: 8863    und wellet ir mich des gewern,
Verse: 8864    sô heizet mir ouch vride bern:

Verse: 8865    si gâhent vaste dort her,
Verse: 8866    ine weiz welhe oder wer,

Verse: 8867    in cleinen schiffelînen.
Verse: 8868    oder ich var wider zen mînen

Verse: 8869    und vürhte iuch alle niht ein strô.'
Verse: 8870    der marschalc der hiez s' alle dô

Verse: 8871    wider kêren an daz lant.
Verse: 8872    zem gaste sprach er aber zehant:

Verse: 8873    'waz welt ir dem künege geben,
Verse: 8874    daz ich iu guot unde leben

Verse: 8875    in disem rîche bewar?'
Verse: 8876    aber sprach der ellende dar:

Verse: 8877    'hêrre, ich gibe im alle tage,
Verse: 8878    swâ ich 'z gewinne oder bejage

Verse: 8879    eine marc von rôtem golde.
Verse: 8880    und sult ir iu ze solde

Verse: 8881    und ze miete disen kopf hân,
Verse: 8882    ob ich mich an iuch mag verlân.'

Verse: 8883    'jâ' sprachen s' alle zehant,
Verse: 8884    'er ist hie marschalc über diz lant.'

Verse: 8885    der marschalc sîne gâbe nam,
Verse: 8886    diu dûhte in rîche und lobesam,

Verse: 8887    und hiez in stôzen in die habe.
Verse: 8888    sînem lîbe und sîner habe

Verse: 8889    vride unde genâde er dô gebôt.
Verse: 8890    dâ wâren sî rîch unde rôt,

Verse: 8891    ich meine zins unde solt.
Verse: 8892    rîch unde rôt des küneges golt,

Verse: 8893    des boten solt rôt unde rîch.
Verse: 8894    si wâren beidiu rîlîch.

Verse: 8895    daz half ouch ime, daz ime geschach
Verse: 8896    beidiu genâde unde gemach.





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.