TITUS
Gottfried von Strassburg, Tristan
Part No. 13
Previous part

Chapter: 13 
13: Der Kampf mit dem Drachen


Verse: 8897    Nû Tristan der ist ze vride komen.
Verse: 8898    ie noch hât nieman vernomen,

Verse: 8899    waz er welle ane gân.
Verse: 8900    nu sol manz iuch wizzen lân,

Verse: 8901    sone belanget iuch des maeres niht.
Verse: 8902    daz maere saget unde giht

Verse: 8903    von einem serpande,
Verse: 8904    der was dô dâ ze lande.

Verse: 8905    der selbe leide vâlant
Verse: 8906    der haete liute unde lant

Verse: 8907    mit alsô schedelîchem schaden
Verse: 8908    sô schedelîchen überladen,

Verse: 8909    daz der künec swuor einen eit
Verse: 8910    bî küniclîcher wârheit:

Verse: 8911    swer ime benaeme daz leben,
Verse: 8912    er wolte im sîne tohter geben,

Verse: 8913    der edel und ritter waere.
Verse: 8914    diz selbe lantmaere

Verse: 8915    und daz vil wunneclîche wîp
Verse: 8916    diu verluren tûsenden den lîp,

Verse: 8917    die dar ze kampfe kâmen,
Verse: 8918    ir ende dâ genâmen.

Verse: 8919    des maeres was daz lant vol.
Verse: 8920    diz maere erkande ouch Tristan wol.

Verse: 8921    diz eine sterkete in dar an,
Verse: 8922    daz er der reise ie began,

Verse: 8923    diz was sîn meistiu zuoversiht,
Verse: 8924    anders trôstes haete er niht.

Verse: 8925    'Nu ist es zît, nu kêre zuo!'
Verse: 8926    des anderen tages vruo

Verse: 8927    nu wâfent er sich alsô wol,
Verse: 8928    als ein man ze noeten sol.

Verse: 8929    ûf ein starkez ors saz er,
Verse: 8930    er hiez im reichen ein sper

Verse: 8931    grôz unde veste,
Verse: 8932    daz sterkeste und daz beste,

Verse: 8933    daz man in dem kiele vant.
Verse: 8934    ûf sînen wec reit er zehant

Verse: 8935    über velt und über gevilde.
Verse: 8936    er nam im in der wilde

Verse: 8937    manege kêre und manege vart.
Verse: 8938    und alse der tac stîgende wart,

Verse: 8939    dô liez er vaste hine gân
Verse: 8940    wider daz tal z' Anferginân.

Verse: 8941    daz was des trachen heimwist,
Verse: 8942    alsô man an der geste list.

Verse: 8943    nu sach er verre dort hin dan
Verse: 8944    vier gewâfende man

Verse: 8945    über ungeverte und über velt
Verse: 8946    ein lützel balder danne enzelt

Verse: 8947    vliehende gâlopieren,
Verse: 8948    der einer von den vieren

Verse: 8949    truhsaeze was der künigîn.
Verse: 8950    der was ouch unde wolte sîn

Verse: 8951    der jungen küniginne amîs,
Verse: 8952    wider ir willen alle wîs.

Verse: 8953    und alse ie man ze velde reit
Verse: 8954    durch gelücke und durch manheit,

Verse: 8955    sô was ouch der truhsaeze dâ
Verse: 8956    eteswenne und eteswâ

Verse: 8957    durch niht, wan daz man jaehe,
Verse: 8958    daz man ouch in dâ saehe,

Verse: 8959    dâ man nâch âventiure rite,
Verse: 8960    und anders was ouch niht dermite,

Verse: 8961    wan ern gesach den trachen nie,
Verse: 8962    ern kêrte belderîchen ie.

Verse: 8963    nu Tristan wart vil wol gewar
Verse: 8964    an der vliehenden schar,

Verse: 8965    der trache der waere eteswâ dâ,
Verse: 8966    und stapfet ouch des endes sâ

Verse: 8967    und reit unlange, unz er gesach
Verse: 8968    sîner ougen ungemach,

Verse: 8969    den egeslîchen trachen.
Verse: 8970    der warf ûz sînem rachen

Verse: 8971    rouch unde vlammen unde wint
Verse: 8972    alse des tiuveles kint

Verse: 8973    und kêrte gein im aldort her.
Verse: 8974    Tristan der sancte daz sper,

Verse: 8975    daz ors er mit den sporen nam.
Verse: 8976    sô swinde er dar gerüeret kam,

Verse: 8977    daz er 'm daz sper zem giele în stach,
Verse: 8978    sô daz ez ime den rachen brach

Verse: 8979    und innen an dem herzen want
Verse: 8980    und er selbe ûf den serpant

Verse: 8981    sô sêre mit dem orse stiez,
Verse: 8982    daz er daz ors dâ tôtez liez

Verse: 8983    und er dâ von vil kûme entran.
Verse: 8984    der trache gieng ez aber an

Verse: 8985    mit vrâze und mit viure,
Verse: 8986    unz ez der ungehiure

Verse: 8987    vor dem satele gâr verswande.
Verse: 8988    nu was im aber als ande

Verse: 8989    daz sper, daz in dâ sêrte,
Verse: 8990    daz er von dem orse kêrte

Verse: 8991    hin wider ein steingevelle.
Verse: 8992    Tristan sîn kampfgeselle

Verse: 8993    der kêrte im nâch rehte ûf sîn spor.
Verse: 8994    der veige streich im allez vor

Verse: 8995    mit solher ungedulte,
Verse: 8996    daz er den walt vulte

Verse: 8997    mit egeslîcher stimme
Verse: 8998    und hürste vil von grimme

Verse: 8999    abe brande und ûz der erden sluoc.
Verse: 9000    des treib er vil und sô genuoc,

Verse: 9001    biz in der smerze überwant
Verse: 9002    und under eine steinwant

Verse: 9003    vil nâhen sich gedructe.
Verse: 9004    Tristan sîn swert dô zucte

Verse: 9005    und wânde, er vünde in âne strît.
Verse: 9006    nein, ez wart engestlîcher sît,

Verse: 9007    dan ez ê mâles waere.
Verse: 9008    doch enwas ez nie sô swaere,

Verse: 9009    Tristan ruorte aber den trachen an,
Verse: 9010    der trache wider an den man

Verse: 9011    und brâhte in z' alsô grôzer nôt,
Verse: 9012    daz er wânde wesen tôt.

Verse: 9013    ern liez in nie ze were komen,
Verse: 9014    er haete im schiere benomen

Verse: 9015    beidiu slege unde wer.
Verse: 9016    dô was sîn ouch ein michel her.

Verse: 9017    er vuorte mit im an den kampf
Verse: 9018    beidiu rouch unde tampf

Verse: 9019    und andere stiure
Verse: 9020    an slegen unde an viure,

Verse: 9021    an zenen unde an griffen:
Verse: 9022    die wâren gesliffen,

Verse: 9023    sêre scharpf unde wahs,
Verse: 9024    noch wahser danne ein scharsahs.

Verse: 9025    dâ mite treib er in umbe
Verse: 9026    manege engestlîche crumbe

Verse: 9027    von boumen ze buschen.
Verse: 9028    dâ muose er sich vertuschen

Verse: 9029    und vristen, swie er mohte,
Verse: 9030    wan ime der kampf niht tohte.

Verse: 9031    und haete ez doch sô sêre
Verse: 9032    versuochet mit der kêre,

Verse: 9033    daz ime der schilt vor der hant
Verse: 9034    vil nâch ze koln was verbrant,

Verse: 9035    wan er gieng in mit viure an,
Verse: 9036    daz er im kûme vor entran.

Verse: 9037    doch werte ez niht vil lange.
Verse: 9038    der mortsame slange

Verse: 9039    der kam schiere dar an,
Verse: 9040    daz er zwîvelen began

Verse: 9041    und ime daz sper sô nâhe gie,
Verse: 9042    daz er sich aber nider lie

Verse: 9043    und want sich ange und ange.
Verse: 9044    Tristan was aber unlange.

Verse: 9045    er kam gerüeret balde her,
Verse: 9046    daz swert daz stach er zuo dem sper

Verse: 9047    zem herzen în unz an die hant.
Verse: 9048    nu lie der veige vâlant

Verse: 9049    einen dôz und eine stimme
Verse: 9050    sô griulîch und sô grimme

Verse: 9051    ûz sînem veigen giele,
Verse: 9052    als himel und erde viele

Verse: 9053    und daz der selbe mortschal
Verse: 9054    verre in daz lant erhal

Verse: 9055    und Tristan harte sêre erschrac.
Verse: 9056    und alse der trache dô gelac,

Verse: 9057    daz er in tôten gesach,
Verse: 9058    den giel er im ûf brach,

Verse: 9059    mit micheler arbeit.
Verse: 9060    ûz dem rachen er im sneit

Verse: 9061    der zungen mit dem swerte
Verse: 9062    der mâze, als er ir gerte.

Verse: 9063    in sînen buosem er si stiez;
Verse: 9064    den giel er wider ze samene liez.

Verse: 9065    sus kêrte er gein der wilde hin.
Verse: 9066    daz tete er aber durch den sin:

Verse: 9067    er wolte sich verbergen dâ,
Verse: 9068    den tac geruowen eteswâ

Verse: 9069    und wider komen ze sîner maht
Verse: 9070    und wolte danne hin ze naht

Verse: 9071    ze sînen lantgesellen wider.
Verse: 9072    nu zôch in aber diu hitze nider,

Verse: 9073    die er beidiu von der arbeit
Verse: 9074    und dâ zuo von dem trachen leit,

Verse: 9075    und müedete in sô sêre,
Verse: 9076    daz er iezuo niemêre

Verse: 9077    und vil kûme mohte leben.
Verse: 9078    nu gesach er eine lachen sweben

Verse: 9079    smal unde mâzlîche grôz,
Verse: 9080    in die von einem velse vlôz

Verse: 9081    ein küelez cleinez brunnelîn.
Verse: 9082    dâ viel er alse gewâfent în

Verse: 9083    und sancte sich unz an den grunt.
Verse: 9084    er lie hie vor niwan den munt.

Verse: 9085    dâ lag er den tac und die naht.
Verse: 9086    wan ime benam al sîne maht

Verse: 9087    diu leide zunge, die er truoc.
Verse: 9088    der rouch, der von der an in sluoc,

Verse: 9089    der eine entworhte in garwe
Verse: 9090    an crefte und an der varwe,

Verse: 9091    daz er von dannen niht enkam,
Verse: 9092    unz in diu künigîn dâ nam.

Verse: 9093    Der truhsaeze, alse ich hân gesaget,
Verse: 9094    der der saeligen maget

Verse: 9095    vriunt unde ritter wolte sîn,
Verse: 9096    dem begunden die gedanke sîn

Verse: 9097    ûf swellen harte grôze
Verse: 9098    von des trachen dôze,

Verse: 9099    der alsô griulîch und sô grôz
Verse: 9100    über walt und über velt dôz.

Verse: 9101    in sîn herze er allez las,
Verse: 9102    rehte alse ez ouch ergangen was,

Verse: 9103    und dâhte: 'er ist binamen tôt
Verse: 9104    oder aber in alsô grôzer nôt,

Verse: 9105    daz ich in mag gewinnen
Verse: 9106    mit eteslîchen sinnen.'

Verse: 9107    von jenen drîn er sich verstal,
Verse: 9108    eine halden stapfet er ze tal

Verse: 9109    und lie wol balde hine gân,
Verse: 9110    hin dâ der schrei dâ was getân.

Verse: 9111    und alse er zuo dem orse kam,
Verse: 9112    eine ruowe er ime dâ nam.

Verse: 9113    bî dem sô habete er lange
Verse: 9114    trahtende cleine und ange.

Verse: 9115    in nam der kurzen reise
Verse: 9116    grôz angest unde vreise.

Verse: 9117    iedoch genante er über lanc
Verse: 9118    und reit als âne sînen danc

Verse: 9119    erschrocken unde herzelôs
Verse: 9120    die rihte hin, dâ er dâ kôs,

Verse: 9121    daz daz loup und daz gras
Verse: 9122    vor ime abe gesenget was,

Verse: 9123    und kam in kurzer vriste,
Verse: 9124    ê danne er sîn iht wiste,

Verse: 9125    rehte ûf den trachen, dâ er lac.
Verse: 9126    und er der truhsaeze erschrac

Verse: 9127    als inneclîche sêre,
Verse: 9128    daz er nâch eine kêre

Verse: 9129    zer erden haete genomen,
Verse: 9130    durch daz er ime sô bî was komen

Verse: 9131    und ime sô nâhen gereit.
Verse: 9132    nu was er aber zehant bereit:

Verse: 9133    daz ors warf er sô balde wider,
Verse: 9134    daz er mit dem orse nider

Verse: 9135    ze einem hûfen gelac.
Verse: 9136    nu er sich wider ûf gewac

Verse: 9137    ( ich meine von der erden),
Verse: 9138    done mohte im state niht werden

Verse: 9139    vor vorhten, die er haete,
Verse: 9140    daz er sô vil getaete,

Verse: 9141    daz er ûf daz ors gesaeze.
Verse: 9142    der leide truhsaeze

Verse: 9143    er liez ez stân unde vlôch.
Verse: 9144    dô ime dô nieman nâch zôch,

Verse: 9145    dô gestuont er unde sleich dô wider,
Verse: 9146    nâch sînem sper greif er nider,

Verse: 9147    daz ors er bî dem zügele nam,
Verse: 9148    z' einem ronen er gezogen kam,

Verse: 9149    ûf daz ors gesaz er,
Verse: 9150    sînes schaden vergaz er:

Verse: 9151    er sprancte verre dort hin dan
Verse: 9152    und sach her wider den trachen an,

Verse: 9153    waz ampaere er haete,
Verse: 9154    ob er lebete oder entaete.

Verse: 9155    nu er in tôten ersach,
Verse: 9156    'heil, ob got wil' er dô sprach

Verse: 9157    'hie ist âventiure vunden.
Verse: 9158    ich bin ze guoten stunden

Verse: 9159    und ze heile komen her!'
Verse: 9160    hie mite sô neicte er daz sper,

Verse: 9161    mit dem zügel er hancte,
Verse: 9162    er hiu unde sprancte

Verse: 9163    und lie hin gân punieren,
Verse: 9164    punierende crôieren:

Verse: 9165    'schevalier damoysêle!
Verse: 9166    ma blunde Îsôt, ma bêle!'

Verse: 9167    er stach ûf in mit solher craft,
Verse: 9168    der starke eschîne schaft

Verse: 9169    daz er im durch die hant reit.
Verse: 9170    daz er aber dô niemere streit,

Verse: 9171    daz liez er niuwan durch den list.
Verse: 9172    er dâhte: 'ob dirre in lebene ist,

Verse: 9173    der disen trachen hât erslagen,
Verse: 9174    sone kan ez mich niht vür getragen,

Verse: 9175    daz ich hie mite hân ûf geleit.'
Verse: 9176    er kêrte dannen unde reit

Verse: 9177    und suohte her unde hin
Verse: 9178    ûf den gedingen, ob er in

Verse: 9179    iender haete vunden
Verse: 9180    sô müeden oder sô wunden,

Verse: 9181    daz ime der strît töhte
Verse: 9182    und mit im strîten möhte,

Verse: 9183    daz ern erslagen wolte haben
Verse: 9184    und in erslagenen begraben.

Verse: 9185    und alse er sîn dô niene vant,
Verse: 9186    'lâ hêrre varn!' dâhte er zehant

Verse: 9187    'sweder er lebe oder entuo,
Verse: 9188    bin ich der êrste darzuo,

Verse: 9189    mich enwîset nieman dâ van.
Verse: 9190    ich bin gevriunt unde geman,

Verse: 9191    sô wert und sô genaeme,
Verse: 9192    swer sich 'z an genaeme,

Verse: 9193    der haete doch dar an verlorn.'
Verse: 9194    er lie hin rîten gân mit sporn

Verse: 9195    ze sînem strîtgesellen wider
Verse: 9196    und erbeizete dâ zer erden nider.

Verse: 9197    an sînen strît er wider vie
Verse: 9198    rehte an der stete, dâ er in lie.

Verse: 9199    mit dem swerte, daz er truoc,
Verse: 9200    dâ mite gebecte er unde gesluoc

Verse: 9201    den vînt sô vil wâ unde wâ
Verse: 9202    biz ern verschriet dâ unde dâ.

Verse: 9203    genuoc versuohte er 'z an den cragen.
Verse: 9204    den haete er ime gerne abe geslagen;

Verse: 9205    dô was er sô herte und sô grôz,
Verse: 9206    daz in der arbeit verdroz.

Verse: 9207    über einen ronen brach er daz sper.
Verse: 9208    daz vorder stucke daz stach er

Verse: 9209    dem trachen zuo dem gorgen în,
Verse: 9210    als ez ein tjoste solte sîn.

Verse: 9211    Ûf sînen spanjôl saz er dô.
Verse: 9212    er begunde vrôlîch unde vrô

Verse: 9213    ze Weisefort în rüeren
Verse: 9214    und hiez bald ûz vüeren

Verse: 9215    vier pferit und einen kanzwagen,
Verse: 9216    der daz houbet solte tragen,

Verse: 9217    und seite in allen maere,
Verse: 9218    wie ime gelungen waere

Verse: 9219    und waz er angeste hie mite
Verse: 9220    und kumberlîcher noete erlite.

Verse: 9221    'jâ hêrre, al diu werlt' sprach er
Verse: 9222    'diu enbiete niuwan ôre her,

Verse: 9223    betrahte und sehe daz wunder an,
Verse: 9224    waz der geherzete man

Verse: 9225    und der gestandene muot
Verse: 9226    durch liebes wîbes willen tuot!

Verse: 9227    daz ich der nôt, in der ich was,
Verse: 9228    ie dannen kam und ie genas,

Verse: 9229    des wundert unde wundert mich
Verse: 9230    und weiz ouch wol binamen, waer ich

Verse: 9231    senfte alse ein ander man gewesen,
Verse: 9232    ine waere niemer genesen.

Verse: 9233    ine weiz niht, wer er waere:
Verse: 9234    ein âventiuraere,

Verse: 9235    der ouch nâch âventiure reit,
Verse: 9236    der was ze sîner veicheit,

Verse: 9237    ê danne ich kaeme, zuo z' im komen,
Verse: 9238    der hât sîn ende dâ genomen.

Verse: 9239    got haete sîn vergezzen.
Verse: 9240    sî sint beidiu vrezzen,

Verse: 9241    ros unde man ist allez mort.
Verse: 9242    daz ros daz lît noch halbez dort

Verse: 9243    zekuwen unde besenget.
Verse: 9244    waz töhte ez iu gelenget?

Verse: 9245    ich hân mê noete erliten hie mite,
Verse: 9246    dan kein man ie durch wîp erlite.'

Verse: 9247    sîne vriunde er alle zuo sich nam,
Verse: 9248    zem serpande er wider kam

Verse: 9249    und zeigete in sîn wunder.
Verse: 9250    und bat ouch al besunder,

Verse: 9251    daz sî der wârheit jaehen,
Verse: 9252    als sî si dâ gesaehen.

Verse: 9253    daz houbet vuorte er mit im dan.
Verse: 9254    sîne mâge und sîne man

Verse: 9255    die ladete er, die besander,
Verse: 9256    nâch dem künege rander

Verse: 9257    und mante in sîner sicherheit.
Verse: 9258    der rede der wart ein tac geleit

Verse: 9259    ze Weisefort vür daz lant.
Verse: 9260    hie mite sô wart daz lant besant,

Verse: 9261    die lantbarûne die mein ich.
Verse: 9262    nu die bereiten alle sich,

Verse: 9263    als in von hove was getaget.
Verse: 9264    Nu wart ouch al zehant gesaget

Verse: 9265    ze hove den vrouwen maere.
Verse: 9266    die marter und die swaere,

Verse: 9267    die s' alle haeten dâ van,
Verse: 9268    dien gesach an vrouwen nie kein man.

Verse: 9269    diu süeze maget, diu schoene Îsôt,
Verse: 9270    diu was rehte in ir herzen tôt.

Verse: 9271    sô leiden tac si nie gesach.
Verse: 9272    Îsôt ir muoter zuo z' ir sprach:

Verse: 9273    'nein schoeniu tohter, nein, lâ stân,
Verse: 9274    lâ dir diz niht sô nâhen gân!

Verse: 9275    wan sweder ez mit der wârheit
Verse: 9276    oder aber mit lüge ist ûf geleit,

Verse: 9277    wir suln ez doch wol undervarn.
Verse: 9278    ouch sol uns got dar vor bewarn.

Verse: 9279    niene weine, tohter mîne,
Verse: 9280    diu clâren ougen dîne

Verse: 9281    diu ensuln niemer werden rôt
Verse: 9282    umbe alsô swechlîche nôt.'

Verse: 9283    'â muoter' sprach diu schoene
Verse: 9284    'vrouwe, niene gehoene

Verse: 9285    dîne geburt unde dich!
Verse: 9286    ê ich 's gevolge, sô stich ich

Verse: 9287    rehte in mîn herze ein mezzer ê.
Verse: 9288    ê sîn wille an mir ergê,

Verse: 9289    ich nim mir selber ê den lîp.
Verse: 9290    ern gewinnet niemer wîp

Verse: 9291    noch vrouwen an Îsôte,
Verse: 9292    ern habe mich danne tôte.'

Verse: 9293    'nein schoeniu tohter, vürhte niht.
Verse: 9294    swes er oder ieman hie von giht,

Verse: 9295    daz ist allez samet verlorn.
Verse: 9296    und haete es al diu werlt gesworn,

Verse: 9297    ern wirdet niemer dîn man.'
Verse: 9298    und alse ez nahten began,

Verse: 9299    diu wîse vrâgete unde sprach
Verse: 9300    umbe ir tohter ungemach

Verse: 9301    ir tougenlîche liste,
Verse: 9302    von den si wunder wiste,

Verse: 9303    daz s' in ir troume gesach,
Verse: 9304    daz ez niht alsô geschach,

Verse: 9305    als der lantschal sagete.
Verse: 9306    Und iesâ dô ez tagete,

Verse: 9307    si rief Îsôte und sprach ir zuo:
Verse: 9308    'â süeziu tohter, wachestuo?'

Verse: 9309    'jâ' sprach si 'vrouwe muoter mîn.'
Verse: 9310    'nu lâ dîn angesten sîn.

Verse: 9311    ich wil dir liebiu maere sagen:
Verse: 9312    ern hât den trachen niht erslagen.

Verse: 9313    swaz âventiure in her getruoc,
Verse: 9314    er ist ein gast, der in dâ sluoc.

Verse: 9315    wol ûf, wir suln vil balde dar,
Verse: 9316    der maere selbe nemen war!

Verse: 9317    Brangaene, stant ûf lîse
Verse: 9318    und sage uns Paranîse,

Verse: 9319    daz er uns satele schiere.
Verse: 9320    wir müezen varn wir viere,

Verse: 9321    ich und mîn tohter, dû und er.
Verse: 9322    und bringe er uns diu pferit her,

Verse: 9323    so ez schiereste müge gesîn,
Verse: 9324    vür unser hâltürlîn,

Verse: 9325    dâ der boumgarte
Verse: 9326    hin ze velde warte!'

Verse: 9327    nu diz was allez gereit,
Verse: 9328    diu rotte saz ûf unde reit

Verse: 9329    des endes, dâ si hôrten sagen,
Verse: 9330    daz der trache was erslagen.

Verse: 9331    nu sî daz ors vunden,
Verse: 9332    daz gereite sî begunden

Verse: 9333    bemerken unde betrahten
Verse: 9334    und in ir sinnen ahten,

Verse: 9335    sin gesaehen nie z' Îlande
Verse: 9336    gereite solher hande,

Verse: 9337    und kâmen alle dar an,
Verse: 9338    swer sô er waere, der man,

Verse: 9339    den daz ors dar trüege,
Verse: 9340    daz der den trachen slüege.

Verse: 9341    vürbaz riten si dô zehant
Verse: 9342    und kâmen ûf den serpant.

Verse: 9343    nu was des tiuvels genôz
Verse: 9344    als ungehiure und alsô grôz,

Verse: 9345    diu liehte vrouwîne schar
Verse: 9346    daz diu wart alse ein tôte var

Verse: 9347    vor angesten, dô s' in ersach.
Verse: 9348    Diu muoter aber zer tohter sprach:

Verse: 9349    'ei wie sicher ich es bin,
Verse: 9350    der truhsaeze daz er in

Verse: 9351    ie getorste bestân!
Verse: 9352    wir mugen 'z âne sorge lân.

Verse: 9353    und zwâre, tohter Îsôt,
Verse: 9354    dirre man sî lebende oder tôt,

Verse: 9355    mich anet sêre, daz er sî
Verse: 9356    verborgen eteswâ hie bî.

Verse: 9357    ez wîsaget mir mîn muot.
Verse: 9358    von dannen, dunket ez dich guot,

Verse: 9359    sô kêren an die suoche,
Verse: 9360    ob unser got sô ruoche,

Verse: 9361    daz wir in eteswâ vinden
Verse: 9362    und mit im überwinden

Verse: 9363    die grundelôsen herzenôt,
Verse: 9364    diu uns beswaeret alse der tôt.'

Verse: 9365    des berieten sî sich schiere.
Verse: 9366    die gereisen alle viere

Verse: 9367    si riten von ein ander sâ,
Verse: 9368    diu suohte hie und disiu dâ.

Verse: 9369    nu ergieng ez, alse ez solte
Verse: 9370    und alse der billîch wolte,

Verse: 9371    diu junge künigîn Îsôt
Verse: 9372    daz sî ir leben unde ir tôt,

Verse: 9373    ir wunne unde ir ungemach
Verse: 9374    ze allerêrste gesach.

Verse: 9375    von sînem helme gienc ein glast,
Verse: 9376    der vermeldete ir den gast.

Verse: 9377    nu sî des helmes wart gewar,
Verse: 9378    si kêrte und rief ir muoter dar:

Verse: 9379    'vrouwe île, rît her nâher baz!
Verse: 9380    ich sihe dort glesten, ine weiz waz.

Verse: 9381    ez ist rehte alse ein helm getân.
Verse: 9382    ich waene in rehte ersehen hân.'

Verse: 9383    'entriuwen' sprach diu muoter dô
Verse: 9384    'mich selben dunket ouch alsô.

Verse: 9385    got der wil unser ruochen.
Verse: 9386    ich waene, den wir suochen,

Verse: 9387    daz wir den haben vunden.'
Verse: 9388    sus riefen s' an den stunden

Verse: 9389    den anderen zwein zuo z' in
Verse: 9390    und riten alle viere hin.

Verse: 9391    Nu si ime begunden nâhen
Verse: 9392    und in sô ligen sâhen,

Verse: 9393    nu wânden s' alle, er waere tôt.
Verse: 9394    'er ist tôt!' sprach ieweder Îsôt

Verse: 9395    'unser gedinge der ist hin.
Verse: 9396    der truhsaeze der hât in

Verse: 9397    mortlîche ermordet unde erslagen
Verse: 9398    und hât in in diz mos getragen.'

Verse: 9399    si erbeizeten alle viere
Verse: 9400    und haeten in vil schiere

Verse: 9401    her ûz gezogen an daz lant.
Verse: 9402    den helm enstricten s' ime zehant

Verse: 9403    und stricten ime die cuppen dan.
Verse: 9404    diu wîse Îsôt diu sach in an

Verse: 9405    und sach wol, daz er lebete
Verse: 9406    und aber sîn leben clebete

Verse: 9407    kûme alse an einem hâre.
Verse: 9408    'er lebet' sprach si 'zwâre.

Verse: 9409    nu balde, entwâfent in!
Verse: 9410    ist daz ich alsô saelic bin,

Verse: 9411    daz er niht verchwunden hât,
Verse: 9412    sô mag es alles werden rât.'

Verse: 9413    die schoenen alle drîe,
Verse: 9414    diu liehte cumpanîe,

Verse: 9415    dô si den ellenden
Verse: 9416    mit snêwizen henden

Verse: 9417    entwâfenen begunden,
Verse: 9418    die zungen sî dô vunden.

Verse: 9419    'sich, warte' sprach diu künigîn
Verse: 9420    'waz ist diz oder waz mag diz sîn?

Verse: 9421    Brangaene, höfschiu niftel, sprich!'
Verse: 9422    'ez ist ein zunge, dunket mich.'

Verse: 9423    'du sprichest wâr, Brangaene.
Verse: 9424    mich dunket unde ich waene,

Verse: 9425    sô was ouch sî des trachen.
Verse: 9426    unser saelde diu wil wachen.

Verse: 9427    herzetohter, schoene Îsôt,
Verse: 9428    ich weiz ez alse mînen tôt,

Verse: 9429    wir sîn zer rehten verte komen.
Verse: 9430    diu zunge hât ouch ime benomen

Verse: 9431    beidiu craft unde sin.'
Verse: 9432    hie mite entwâfenten s' in

Verse: 9433    und dô s' an ime niht vunden
Verse: 9434    weder slege noch wunden,

Verse: 9435    dô wâren s' alle samet vrô.
Verse: 9436    trîaken nam diu wîse dô,

Verse: 9437    diu listege künigîn
Verse: 9438    und vlôzte im der alsô vil în,

Verse: 9439    biz daz er switzen began.
Verse: 9440    'er wil genesen' sprach sî 'der man,

Verse: 9441    der tampf gerûmet schiere hie,
Verse: 9442    der von der zungen an in gie,

Verse: 9443    sô mag er sprechen unde ûf sehen.'
Verse: 9444    daz was ouch schiere geschehen.

Verse: 9445    er lag unlange, unz ez geschach,
Verse: 9446    daz er beide ûf und umbe sach.

Verse: 9447    Nu er der saeligen schar
Verse: 9448    bî ime und umbe in wart gewar,

Verse: 9449    er gedâhte in sînem muote:
Verse: 9450    'â hêrre got der guote,

Verse: 9451    dû hâst mîn unvergezzen.
Verse: 9452    mich hânt driu lieht besezzen,

Verse: 9453    diu besten, diu diu werlt hât,
Verse: 9454    manges herzen vröude unde rât

Verse: 9455    und maneges ougen wunne:
Verse: 9456    Îsôt diu liehte sunne

Verse: 9457    und ouch ir muoter Îsôt
Verse: 9458    daz vrôlîche morgenrôt,

Verse: 9459    diu stolze Brangaene
Verse: 9460    daz schoene volmaene!'

Verse: 9461    hie mite genante er unde sprach
Verse: 9462    kûme unde kûmeclîchen: 'ach,

Verse: 9463    wer sît ir unde wâ bin ich?'
Verse: 9464    'â ritter, mahtu sprechen? sprich!

Verse: 9465    wir helfen dir ze dîner nôt!'
Verse: 9466    sprach aber diu sinnerîche Îsôt.

Verse: 9467    'jâ süeziu vrouwe, saelic wîp,
Verse: 9468    und ine weiz, wie mir der lîp

Verse: 9469    und al mîn craft in kurzer vrist
Verse: 9470    geswachet unde geswichen ist.'

Verse: 9471    diu junge Îsôt diu sach in an:
Verse: 9472    'diz ist Tantris der spilman '

Verse: 9473    sprach sî 'ob ich in ie gesach.'
Verse: 9474    der andern ietwederiu sprach:

Verse: 9475    'uns dunket ouch entriuwen sô.'
Verse: 9476    diu wîse diu sprach aber dô:

Verse: 9477    'bistû 'z Tantris?' 'vrouwe, jâ.'
Verse: 9478    'sag an' sprach aber diu wîse sâ

Verse: 9479    'wâ bistû her komen oder wie
Verse: 9480    oder waz wirbestu hie?'

Verse: 9481    'saeligest aller wîbe,
Verse: 9482    ine hân ez an dem lîbe

Verse: 9483    noch leider an der crefte niht,
Verse: 9484    daz ich iu mîne geschiht

Verse: 9485    bescheidenlîche müge gesagen.
Verse: 9486    heizet mich vüeren oder tragen

Verse: 9487    durch gotes willen eteswar,
Verse: 9488    dâ mîn ieman neme war

Verse: 9489    doch disen tag und dise naht.
Verse: 9490    und kume ich wider ze mîner maht,

Verse: 9491    so ist reht, daz ich tuo unde sage,
Verse: 9492    swaz iu lîche und iu behage.'

Verse: 9493    Sus nâmen sî Tristanden
Verse: 9494    si viere ze handen,

Verse: 9495    ûf ein pferit huoben s' in
Verse: 9496    und under in vuorten s' in hin.

Verse: 9497    sus brâhten s' in heinlîchen în
Verse: 9498    wider durch ir hâltürlîn,

Verse: 9499    daz umbe ir reise und umbe ir vart
Verse: 9500    nie nieman nihtes inne wart.

Verse: 9501    dâ schuofen s' ime helfe unde gemach.
Verse: 9502    die zungen, alse ich ê dâ sprach,

Verse: 9503    sîn îsen und sîn ander dinc
Verse: 9504    des enbleip dâ weder vadem noch rinc.

Verse: 9505    si vuorten 'z allez mit in dan,
Verse: 9506    beidiu harnasch unde man.

Verse: 9507    Nu daz der ander tac dô kam,
Verse: 9508    diu wîse in aber ze handen nam.

Verse: 9509    'nu Tantris' sprach si 'sage mir
Verse: 9510    bî den genâden, alse ich dir

Verse: 9511    nû unde ê mâles hân getân,
Verse: 9512    daz ich dich zwirnt erneret hân

Verse: 9513    und bin dir willic unde holt,
Verse: 9514    und als du dînem wîbe solt.

Verse: 9515    wenne kaeme dû in Îlant?
Verse: 9516    wie slüege dû den serpant?'

Verse: 9517    'vrouwe, daz wil ich iu sagen.
Verse: 9518    ich kam in disen kurzlîchen tagen,

Verse: 9519    es sint drî tage von hiute,
Verse: 9520    ich und ander koufliute

Verse: 9521    mit eime kiele in dise habe.
Verse: 9522    dô kam ein roupher hinnen abe,

Verse: 9523    ine weiz durch welhe geschiht,
Verse: 9524    die wolten uns, haete ich ez niht

Verse: 9525    mit mînem guote underkomen,
Verse: 9526    den lîp zem guote hân genomen.

Verse: 9527    nu ist ez uns alsô gewant:
Verse: 9528    wir müezen dicke vremediu lant

Verse: 9529    heinlîchen unde bûwen
Verse: 9530    und enwizzen wem getrûwen,

Verse: 9531    wan man uns vil gewaltes tuot.
Verse: 9532    sô weiz ich wol, mir waere guot,

Verse: 9533    mit swelher slahte dingen
Verse: 9534    ich 'z dâ zuo möhte bringen,

Verse: 9535    daz mich diu lant erkanden.
Verse: 9536    künde in vremeden landen

Verse: 9537    diu rîchet den koufman.
Verse: 9538    seht, vrouwe, dâ gedâhte ich an,

Verse: 9539    wan mir ist umbe den serpant
Verse: 9540    daz lantmaere lange erkant

Verse: 9541    und sluog in niuwan umbe daz.
Verse: 9542    ich waene, daz ich deste baz

Verse: 9543    vride unde genâde vinde
Verse: 9544    bî disem lantgesinde.'

Verse: 9545    'vride unde genâde' sprach Îsôt
Verse: 9546    'diu müezen dich an dînen tôt

Verse: 9547    mit wernden êren bringen!
Verse: 9548    du bist ze guoten dingen

Verse: 9549    dir selbem unde uns komen her.
Verse: 9550    nu trahte, wes dîn herze ger.

Verse: 9551    daz ist getân, daz schaffe ich dir
Verse: 9552    von mînem hêrren und von mir.'

Verse: 9553    'genâde, vrouwe, sô ergib ich
Verse: 9554    mînen kiel unde mich

Verse: 9555    vil verre an iuwer triuwe.
Verse: 9556    seht, daz mich iht geriuwe,

Verse: 9557    daz ich iu guot unde leben
Verse: 9558    an iuwer triuwe hân ergeben.'

Verse: 9559    'nein zwâre Tantris, ez entuot.
Verse: 9560    umbe dîn leben unde umbe dîn guot

Verse: 9561    ensorge nû niemêre.
Verse: 9562    mîne triuwe und mîn êre,

Verse: 9563    sê hie, die nim in dîne hant.
Verse: 9564    daz dir niemer ze Îlant

Verse: 9565    bî mînem lebene leit geschiht.
Verse: 9566    Entwer mich einer bete niht

Verse: 9567    und biut mir eteslîchen rât
Verse: 9568    umbe eine sache, an der nu stât

Verse: 9569    mîn êre und al mîn saelekeit.'
Verse: 9570    und seite im, alse ich hân geseit,

Verse: 9571    wes sich der truhsaeze
Verse: 9572    umbe dise tât vermaeze.

Verse: 9573    wie sêre und wie genôte
Verse: 9574    er spraeche nâch Îsôte

Verse: 9575    und wie er den valsch und die lüge
Verse: 9576    ze offenlîchem kampfe züge,

Verse: 9577    ob ieman über in kaeme,
Verse: 9578    der sich ez an genaeme.

Verse: 9579    'saeligiu vrouwe' sprach Tristan
Verse: 9580    'hie enhabet keine sorge van.

Verse: 9581    ir habet mir zwirnt lîp unde leben
Verse: 9582    mit gotes helfe wider gegeben,

Verse: 9583    diu suln ouch iu ze rehte
Verse: 9584    beidiu ze dirre vehte

Verse: 9585    und z' allen noeten bî stân,
Verse: 9586    die wîle ich sî gesunde hân.'

Verse: 9587    'got lône dir, lieber Tantris!
Verse: 9588    des bin ich gerne an dir gewis

Verse: 9589    und wil dir ouch des wol verjehen:
Verse: 9590    ist daz diz wunder sol geschehen,

Verse: 9591    sô sîn wir beide, ich unde Îsôt,
Verse: 9592    iemer mit lebendem lîbe tôt.'

Verse: 9593    'nein vrouwe, tuot die rede hin.
Verse: 9594    sît ich in iuwerm vride bin

Verse: 9595    und mînen lîb und swaz ich hân
Verse: 9596    an iuwer êre hân verlân

Verse: 9597    und dar an sicher wesen sol,
Verse: 9598    trût vrouwe, sô gehabet iuch wol!

Verse: 9599    helfet mir ze lîbe wider,
Verse: 9600    ich gelege ez allez eine nider.

Verse: 9601    und saget mir, vrouwe, ist iu bekant:
Verse: 9602    die zungen, die man bî mir vant,

Verse: 9603    beleip diu oder war tete man die?'
Verse: 9604    'entriuwen nein, ich hân si hie

Verse: 9605    und allez, daz du haben solt.
Verse: 9606    mîn schoeniu tohter selbe, Îsôlt,

Verse: 9607    und ich wir brâhten 'z allez dan.'
Verse: 9608    'diz kumt uns rehte' sprach Tristan;

Verse: 9609    'nu saeligiu künigîn,
Verse: 9610    lât aller slahte sorge sîn

Verse: 9611    und râtet mir ze mîner craft,
Verse: 9612    sô ist ez allez endehaft.'

Verse: 9613    Die küniginne beide,
Verse: 9614    beide âne underscheide,

Verse: 9615    si nâmen in ze handen
Verse: 9616    und swaz si beide erkanden,

Verse: 9617    daz ime ze heile und ze vromen
Verse: 9618    an sînem lîbe möhte komen,

Verse: 9619    daz was ir meiste unmüezekeit.
Verse: 9620    hier under haete michel leit

Verse: 9621    sîn kiel und sîn geselleschaft,
Verse: 9622    der was genuoc als angesthaft,

Verse: 9623    daz s' ungenesen wânden wesen.
Verse: 9624    ir dekeiner trûwete genesen,

Verse: 9625    wan s' innerhalp den zwein tagen
Verse: 9626    nie niht von ime gehoerten sagen.

Verse: 9627    ouch haeten sî den schal vernomen,
Verse: 9628    der von dem trachen ûz was komen.

Verse: 9629    und was des maeres vil getriben,
Verse: 9630    dâ waere ein ritter tôt beliben,

Verse: 9631    des ors daz laege halbez dâ.
Verse: 9632    nu dâhten ouch die sîne sâ:

Verse: 9633    'wer waere daz niwan Tristan?
Verse: 9634    dane ist binamen kein zwîvel an,

Verse: 9635    haete ez ime der tôt niht benomen,
Verse: 9636    er waere sît her wider komen.'

Verse: 9637    hie mite gerieten s' under in
Verse: 9638    und santen Curvenâlen hin,

Verse: 9639    daz er des orses naeme war.
Verse: 9640    daz tete er: Curvenal reit dar

Verse: 9641    und vant daz ors und erkande daz.
Verse: 9642    nu reit er aber vürbaz.

Verse: 9643    den trachen vant er ouch zehant
Verse: 9644    und alse er dô nimêre vant

Verse: 9645    von keinen sînen dingen
Verse: 9646    an gewande noch an ringen,

Verse: 9647    dô kam in michel zwîvel an.
Verse: 9648    'â' dâhte er 'hêrre Tristan,

Verse: 9649    weder bistu lebende oder tôt?
Verse: 9650    ôwî, ôwî' sprach er 'Îsôt,

Verse: 9651    ôwî, daz dîn lop und dîn nam
Verse: 9652    ie hin ze Curnewâle kam!

Verse: 9653    was dîn schoene und edelkeit
Verse: 9654    ze solhem schaden ûf geleit

Verse: 9655    einer der saeligesten art,
Verse: 9656    diu ie mit sper versigelt wart,

Verse: 9657    der dû ze wol geviele?'
Verse: 9658    sus kêrte er wider zem kiele

Verse: 9659    weinende unde clagende,
Verse: 9660    diu maere wider sagende,

Verse: 9661    als er si haete ervunden.
Verse: 9662    diu maere begunden

Verse: 9663    genuogen missevallen
Verse: 9664    und iedoch niht in allen.

Verse: 9665    daz selbe swaere maere
Verse: 9666    was niht ir aller swaere.

Verse: 9667    genuoge ez wol vertruogen.
Verse: 9668    ouch sach man an genuogen,

Verse: 9669    daz ez in grôze riuwe bar,
Verse: 9670    und was ouch der diu meiste schar.

Verse: 9671    sus was ir wille unde ir muot
Verse: 9672    undersniten übel unde guot.

Verse: 9673    mit disem wehsele geviel
Verse: 9674    der gezweiete kiel

Verse: 9675    an sprâchen unde an rûnen.
Verse: 9676    den zweinzic barûnen

Verse: 9677    den was niht inneclîche leit
Verse: 9678    der zwîvel, der in was geseit.

Verse: 9679    si wânden dannen komen dar mite.
Verse: 9680    und daz man sîn niht langer bite,

Verse: 9681    des bâten s' al gemeine
Verse: 9682    ( die zweinzic meine ich eine).

Verse: 9683    si rieten alle dar an,
Verse: 9684    daz man des nahtes vüere dan.

Verse: 9685    sô rieten aber ander daz,
Verse: 9686    daz sî beliben unde baz

Verse: 9687    ervüeren diu maere,
Verse: 9688    wie 'z ime ergangen waere.

Verse: 9689    alsus zehullen s' under in.
Verse: 9690    dise wolten gerne hin,

Verse: 9691    jene wolten dâ bestân.
Verse: 9692    sus ward ez dô dar an verlân,

Verse: 9693    sît daz sîn tôt niht waere
Verse: 9694    gewis noch offenbaere,

Verse: 9695    daz sî dâ langer beliben,
Verse: 9696    ir vorsche unde ir vrâge triben

Verse: 9697    zem minnesten doch zwêne tage:
Verse: 9698    daz was der barûne clage.

Verse: 9699    Hie mite sô was ouch der tac komen,
Verse: 9700    der ze Weisefort was genomen,

Verse: 9701    dar Gurmûn haete getaget
Verse: 9702    umbe sîne tohter die maget

Verse: 9703    und umbe den truhsaezen.
Verse: 9704    Gurmûnes umbesaezen,

Verse: 9705    sîne man und sîne mâge,
Verse: 9706    als er si durch râtvrâge

Verse: 9707    ze sînem tage haete besant,
Verse: 9708    die wâren alle dâ zehant.

Verse: 9709    die nam ouch er besunder
Verse: 9710    und suohte rât hier under

Verse: 9711    sô verre und alsô sêre,
Verse: 9712    als dem ez umbe sîn êre

Verse: 9713    und ouch niht anders enstât.
Verse: 9714    dar zuo besande er an den rât

Verse: 9715    sîn liebez wîp, die künigîn.
Verse: 9716    si mohte im ouch wol liep sîn,

Verse: 9717    wan er haete an ir einer dô
Verse: 9718    sunderlîcher saelden zwô,

Verse: 9719    der allerbesten, die der man
Verse: 9720    an liebem wîbe vinden kan:

Verse: 9721    schoene unde wîsheit,
Verse: 9722    der was der mâze an sî geleit,

Verse: 9723    daz s' ime wol mohte liep sîn.
Verse: 9724    diu saelige künigîn,

Verse: 9725    diu schoene wîse was ouch dâ.
Verse: 9726    ir vriunt der künic nam si sâ

Verse: 9727    von dem râte dort hin dan.
Verse: 9728    'wie râtestû?' sprach er 'sag an.

Verse: 9729    mir ist disiu rede swaere alse der tôt.'
Verse: 9730    'gehabet iuch wol' sprach aber Îsôt

Verse: 9731    'wir suln uns wol hier an bewarn.
Verse: 9732    ich hân ez allez undervarn.'

Verse: 9733    'wie? herzevrouwe, sage ouch mir.
Verse: 9734    sô vröuwe ich mich der rede mit dir.'

Verse: 9735    'unser truhsaeze, als er dâ giht,
Verse: 9736    seht, der ensluoc des trachen niht,

Verse: 9737    und der in sluoc, den weiz ich wol.
Verse: 9738    daz bewaere ich, swenne ich sol.

Verse: 9739    al iuwer angest leget nider!
Verse: 9740    gêt balde z' iuwerm râte wider.

Verse: 9741    saget in allen unde jehet,
Verse: 9742    als ir gehoeret unde gesehet

Verse: 9743    des truhsaezen wârheit,
Verse: 9744    ir loeset gerne iuwern eit,

Verse: 9745    den ir dem lande habet getân.
Verse: 9746    heizet s' alle mit iu gân

Verse: 9747    und sitzet an 'z gerihte.
Verse: 9748    envürhtet iu ze nihte.

Verse: 9749    lât den truhsaezen clagen
Verse: 9750    und sagen, swaz er welle sagen.

Verse: 9751    und alse ez danne zît sî,
Verse: 9752    sô bin ich unde Îsôt dâ bî.

Verse: 9753    sô gebietet mir 'z, sô spriche ich
Verse: 9754    vür iuch, vür Îsôt und vür mich.

Verse: 9755    hie mite lât dise rede stân.
Verse: 9756    ich wil nâch mîner tohter gân

Verse: 9757    und komen ouch iesâ wider, wir zwo.'
Verse: 9758    nâch ir tohter gie si dô,

Verse: 9759    der künic in den palas wider.
Verse: 9760    an daz gerihte saz er nider

Verse: 9761    und mit im vil barûne,
Verse: 9762    des landes cumpanjûne.

Verse: 9763    dâ was schoeniu ritterschaft,
Verse: 9764    von ritterschefte michel craft,

Verse: 9765    niht durch des küneges êre
Verse: 9766    sô starke noch sô sêre,

Verse: 9767    sô daz si gerne wolten sehen,
Verse: 9768    waz dâ solte geschehen

Verse: 9769    ûz disem lantschalle.
Verse: 9770    des wunderte s' alle.

Verse: 9771    Die saeligen Îsôte zwô
Verse: 9772    nu daz si mit ein ander dô

Verse: 9773    zem palas în giengen,
Verse: 9774    si gruozten unde enpfiengen

Verse: 9775    die hêrren al besunder.
Verse: 9776    hie mitten und hier under

Verse: 9777    wart vil gesprochen unde gedâht,
Verse: 9778    rede unde gedanke vil vür brâht

Verse: 9779    von ir beider saelekeit.
Verse: 9780    und iedoch mêre geseit

Verse: 9781    von des truhsaezen linge
Verse: 9782    dan von der vrouwen dinge.

Verse: 9783    si sprâchen unde gedâhten dar:
Verse: 9784    'nu kieset alle, nemet war,

Verse: 9785    wirt disem unsaeligen man,
Verse: 9786    der nie saelde gewan,

Verse: 9787    disiu saelege maget,
Verse: 9788    sô ist im elliu saelde ertaget,

Verse: 9789    diu ime oder dekeinem man
Verse: 9790    an einer maget ertagen kan.'

Verse: 9791    sus kâmen sî zem künege hin.
Verse: 9792    Der künec stuont ûf engegen in:

Verse: 9793    lieplîche sazte er sî ze sich.
Verse: 9794    'nû' sprach der künec 'truhsaeze, sprich.

Verse: 9795    waz ist dîn bete und dîn ger?'
Verse: 9796    'vil gerne, hêrre künec' sprach er;

Verse: 9797    'hêrre, ich ger unde bite,
Verse: 9798    daz ir dem lande küneges site

Verse: 9799    niemer zebrechet an mir.
Verse: 9800    welt ir 's jehen, sô sprâchet ir

Verse: 9801    und lobetet ez ouch beide
Verse: 9802    mit rede und mit dem eide:

Verse: 9803    swelh ritter disen serpant
Verse: 9804    slüege mit sîn eines hant,

Verse: 9805    ir gaebet ime ze solde
Verse: 9806    iuwer tohter Îsolde.

Verse: 9807    der eit verlôs vil manegen man.
Verse: 9808    dâ sach aber ich vil lützel an,

Verse: 9809    durch daz ich minnete daz wîp
Verse: 9810    unde wâgete den lîp

Verse: 9811    dicke engeslîcher danne ie man,
Verse: 9812    biz mir ze jungeste dar an

Verse: 9813    alsô gelanc, daz ich in sluoc.
Verse: 9814    ist ez dâ mite genuoc:

Verse: 9815    hie lît daz houbet, seht ez an.
Verse: 9816    daz selbe urkünde brâhte ich dan.

Verse: 9817    nu loeset iuwer wârheit.
Verse: 9818    küneges wort und küneges eit

Verse: 9819    diu suln wâr unde bewaeret sîn.'
Verse: 9820    'truhsaeze' sprach diu künigîn

Verse: 9821    'der alsô rîlîchen solt,
Verse: 9822    als mîn tohter ist, Îsolt,

Verse: 9823    ungedienet haben wil,
Verse: 9824    entriuwen des ist alze vil.'

Verse: 9825    'ei' sprach der truhsaeze dô
Verse: 9826    'vrouwe, ir tuot übel, wie redet ir sô?

Verse: 9827    mîn hêrre, der ez enden sol,
Verse: 9828    der kan doch selbe sprechen wol.

Verse: 9829    der spreche und antwürte mir.'
Verse: 9830    der künec sprach: 'vrouwe, sprechet ir

Verse: 9831    vür iuch, vür Îsôt und vür mich!'
Verse: 9832    'genâde hêrre, daz tuon ich.'

Verse: 9833    aber sprach diu küniginne:
Verse: 9834    'truhsaeze, dîne minne

Verse: 9835    die sint lûter unde guot
Verse: 9836    und hâst sô menlîchen muot.

Verse: 9837    du bist wol guotes wîbes wert.
Verse: 9838    swer aber sô hôhes lônes gert,

Verse: 9839    dâ er sîn niht verdienet hât,
Verse: 9840    entriuwen, deist ein missetât.

Verse: 9841    du hâst dir selbem ûf geleit
Verse: 9842    eine tât und eine manheit,

Verse: 9843    der dû mit alle unschuldic bist,
Verse: 9844    als ez mir zuo gerûnet ist.'

Verse: 9845    'Vrouwe, ir redet, ine weiz wie.
Verse: 9846    ich hân doch diz wortzeichen hie.'

Verse: 9847    'sô hâstu brâht ein houbet dan.
Verse: 9848    daz braehte ouch lîhte ein ander man,

Verse: 9849    ich meine, ob er Îsolde
Verse: 9850    dâ mite verdienen solde.

Verse: 9851    sine wirt aber gewunnen niht
Verse: 9852    mit alsô cleiner geschiht.'

Verse: 9853    'nein zwâre' sprach diu junge Îsôt
Verse: 9854    'durch alsô maezlîche nôt

Verse: 9855    enwil ich niemer veile sîn.'
Verse: 9856    'âhî vrou junge künigîn '

Verse: 9857    sprach aber der truhsaeze dô
Verse: 9858    'daz ir ze mînen dingen sô

Verse: 9859    mit arge sprechende sît
Verse: 9860    der noete, der ich ze maneger zît

Verse: 9861    durch iuwer minne erliten hân!'
Verse: 9862    'daz sol ze guoten staten gestân,

Verse: 9863    daz ir mich minnet' sprach Îsolt
Verse: 9864    'ine wart iu nie getriu noch holt

Verse: 9865    noch zwâre niemer werden sol.'
Verse: 9866    'Jâ' sprach der ander 'ich weiz wol,

Verse: 9867    ir tuot vil rehte als elliu wîp.
Verse: 9868    ir sît alle alsô gelîp,

Verse: 9869    alsô g' artet unde gemuot:
Verse: 9870    iuch dunket ie daz arge guot,

Verse: 9871    daz guote dunket iuch ie arc.
Verse: 9872    diu art ist an iu allen starc.

Verse: 9873    ir sît verkêret alle wîs:
Verse: 9874    iu sint die tumben alle wîs,

Verse: 9875    iu sint die wîsen alle tump;
Verse: 9876    ir machet ûz dem slehten crump

Verse: 9877    und ûz dem crumben wider sleht;
Verse: 9878    ir habet allen ungereht

Verse: 9879    an iuwer seil gevazzet:
Verse: 9880    ir minnet, daz iuch hazzet;

Verse: 9881    ir hazzet, daz iuch minnet.
Verse: 9882    wie sît ir sus gesinnet,

Verse: 9883    wie minnet ir sô harte
Verse: 9884    der dinge widerwarte,

Verse: 9885    daz man der sô vil an iu siht!
Verse: 9886    der iuch dâ wil, desn welt ir niht

Verse: 9887    und welt den, der iuch niene wil.
Verse: 9888    ir sît daz irresameste spil,

Verse: 9889    daz ieman ûf dem brete kan.
Verse: 9890    er ist ein sinnelôser man,

Verse: 9891    der âne bürgen durch daz wîp
Verse: 9892    iemer geveilet den lîp.

Verse: 9893    und zwâre iedoch dar umbe niht,
Verse: 9894    swes ir jeht oder mîn vrouwe giht,

Verse: 9895    ez wirt al anders ûf geleit
Verse: 9896    oder man brichet mir den eit.'

Verse: 9897    Aber sprach diu küniginne:
Verse: 9898    'truhsaeze, dîne sinne

Verse: 9899    die sint starc unde spaehe,
Verse: 9900    der spaehe an sinnen saehe.

Verse: 9901    si habent dem gelîchen schîn,
Verse: 9902    als sî ze kemenâten sîn

Verse: 9903    in der vrouwen tougenheit bedâht.
Verse: 9904    dar zuo hâstû si vür brâht

Verse: 9905    rehte alse ein vrouwen ritter sol.
Verse: 9906    du weist der vrouwen art ze wol.

Verse: 9907    du bist dar în ze verre komen.
Verse: 9908    ez hât dir der manne art benomen.

Verse: 9909    du minnest ouch ze harte
Verse: 9910    der dinge widerwarte.

Verse: 9911    mich dunket, dir ist ouch wol dar mite.
Verse: 9912    du hâst die selben vrouwen site

Verse: 9913    sêre an dîn seil gevazzet:
Verse: 9914    du minnest, daz dich hazzet;

Verse: 9915    du wilt, daz dich niht enwil.
Verse: 9916    diz ist doch unser vrouwen spil.

Verse: 9917    waz nimest dû dich hie mit an?
Verse: 9918    sô dir got, du bist ein man,

Verse: 9919    lâz uns unser vrouwen art.
Verse: 9920    dune bist niht wol dar mite bewart.

Verse: 9921    habe dînes mannes sinne
Verse: 9922    und minne, daz dich minne.

Verse: 9923    welle, daz dich welle.
Verse: 9924    daz spil hât guot gevelle.

Verse: 9925    du seist uns ie genôte,
Verse: 9926    du wellest Îsôte

Verse: 9927    und sî enwelle dîn niht.
Verse: 9928    daz ist ir art: wer mac des iht?

Verse: 9929    si lât der dinge vil hin gân,
Verse: 9930    die sî doch vil wol möhte hân.

Verse: 9931    ir ist der vil unmaere,
Verse: 9932    dem sî doch vil liep waere,

Verse: 9933    der dû ze hant der êrste bist.
Verse: 9934    daz selbe ir von mir g' artet ist.

Verse: 9935    ich selbe enwart dir ouch nie holt.
Verse: 9936    ich weiz wol, alse entuot Îsolt:

Verse: 9937    ez ist ir g' artet von mir.
Verse: 9938    du verliusest michel minne an ir.

Verse: 9939    diu schoene, diu reine
Verse: 9940    si waere ze gemeine,

Verse: 9941    ob si iegelîchen solte
Verse: 9942    wellen, der si wolte.

Verse: 9943    Truhsaeze, als du hâst geseit,
Verse: 9944    mîn hêrre der sol sînen eit

Verse: 9945    vil gerne an dir bewaeren.
Verse: 9946    sich, daz du dînen maeren

Verse: 9947    und dîner rede sô mite gâst,
Verse: 9948    daz dû s' iht under wegen lâst:

Verse: 9949    volge dînen sachen!
Verse: 9950    ich hoere sagen, den trachen

Verse: 9951    den habe ein ander man erslagen.
Verse: 9952    sich, waz du dâ zuo wellest sagen.'

Verse: 9953    'wer waere der?' 'ich weiz in wol
Verse: 9954    und wil in bringen, swenne ich sol.'

Verse: 9955    'vrouwe, ez enist dekein man,
Verse: 9956    der sich hier umbe iht nimet an

Verse: 9957    und mich von mînen êren
Verse: 9958    mit valsche waenet kêren,

Verse: 9959    der mir state und reht wil geben,
Verse: 9960    dane sî mîn lîp umbe und mîn leben

Verse: 9961    gewâget unde geveilet,
Verse: 9962    swie mir der hof erteilet,

Verse: 9963    hant wider hende,
Verse: 9964    ê ich den vuoz gewende!'

Verse: 9965    'diz lobe ich' sprach diu künigîn
Verse: 9966    'und wil des selbe bürge sîn,

Verse: 9967    daz ich dich diser rede gewer
Verse: 9968    und dir 'n ze kampfe bringe her

Verse: 9969    von hiute unz an den dritten tac,
Verse: 9970    wan ich iezuo enmac,

Verse: 9971    den selben der den trachen sluoc.'
Verse: 9972    der künic sprach: 'des ist genuoc.'

Verse: 9973    ouch sprâchen al die herren dô:
Verse: 9974    'truhsaeze, ez ist genuoc alsô.

Verse: 9975    diz ist ein kurzlîchiu bite.
Verse: 9976    gâ dar, bestaete den kampf hie mite,

Verse: 9977    und tuo mîn vrouwe selbe alsam.'
Verse: 9978    der künec dô von in beiden nam

Verse: 9979    triuwe unde gewisse gîselschaft,
Verse: 9980    daz dirre kampf endehaft

Verse: 9981    des dritten tages waere.
Verse: 9982    hie mite zergie diz maere.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.