TITUS
Gottfried von Strassburg, Tristan
Part No. 14
Previous part

Chapter: 14 
14: Der Splitter


Verse: 9983    Die vrouwen giengen beide dan
Verse: 9984    und nâmen aber ir spilman

Verse: 9985    in ir vlîz und in ir pflege.
Verse: 9986    ir beider vlîz was alle wege

Verse: 9987    mit süezer bedaehtekeit
Verse: 9988    niuwan an diu dinc geleit,

Verse: 9989    diu sîn helfe solten wesen.
Verse: 9990    ouch was er iezuo wol genesen,

Verse: 9991    lieht an dem lîbe und schône var.
Verse: 9992    nu nam Îsôt sîn dicke war

Verse: 9993    und marcte in ûzer mâze
Verse: 9994    an lîbe und an gelâze.

Verse: 9995    si blickte im dicke tougen
Verse: 9996    an die hende und under d' ougen.

Verse: 9997    si besach sîn arme und sîniu bein,
Verse: 9998    an den ez offenlîche schein,

Verse: 9999    daz er so tougenlîche hal.
Verse: 10000    si bespehete in obene hin zetal.

Verse: 10001    swaz maget an manne spehen sol,
Verse: 10002    daz geviel ir allez an im wol

Verse: 10003    und lobete ez in ir muote.
Verse: 10004    nu daz diu schoene, guote

Verse: 10005    sîne geschepfede sô rîch
Verse: 10006    und sîne site sô hêrlîch

Verse: 10007    sunder bespehete unde besach,
Verse: 10008    ir herze tougenlîche sprach:

Verse: 10009    'got hêrre wunderaere,
Verse: 10010    ist iht des wandelbaere,

Verse: 10011    dest ie begienge oder begâst,
Verse: 10012    und dest an uns geschaffen hâst,

Verse: 10013    sô ist hie zewâre wandel an,
Verse: 10014    daz dirre hêrlîche man,

Verse: 10015    an den du solhe saelekeit
Verse: 10016    lîbes halben hâst geleit,

Verse: 10017    daz der als irreclîche
Verse: 10018    von rîche ze rîche

Verse: 10019    sîne nôtdürfte suochen sol.
Verse: 10020    im solte billîch unde wol

Verse: 10021    ein rîche dienen oder ein lant,
Verse: 10022    des dinc alsô waere gewant.

Verse: 10023    diu werlt stât wunderlîche,
Verse: 10024    sô vil manic künicrîche

Verse: 10025    besetzet ist mit swacher art,
Verse: 10026    daz ime der einez niht enwart.

Verse: 10027    ein lîp alsô gebaere,
Verse: 10028    der sô getugendet waere,

Verse: 10029    der solte guot und êre hân.
Verse: 10030    an ime ist sêre missetân.

Verse: 10031    got hêrre, dû hâst ime gegeben
Verse: 10032    dem lîbe ein ungelîchez leben.'

Verse: 10033    sus redete s' ofte diu maget.
Verse: 10034    nu haete ir muoter ouch gesaget

Verse: 10035    ir vater umbe den koufman
Verse: 10036    al von ende her dan,

Verse: 10037    als ir ez selbe habet vernomen,
Verse: 10038    diz dinc wie 'z allez her ist komen

Verse: 10039    und wie er nihtes gerte,
Verse: 10040    wan daz man in gewerte

Verse: 10041    vrides dâ nâch mêre,
Verse: 10042    swenne er dekeine kêre

Verse: 10043    naeme in daz künicrîche.
Verse: 10044    diz haete s' ime heinlîche

Verse: 10045    von ende unz ende gesaget.
Verse: 10046    Hier under hiez ouch ime diu maget

Verse: 10047    ir knappen Paranîsen
Verse: 10048    sînen harnasch und sîn îsen

Verse: 10049    wîz unde schoene machen
Verse: 10050    und z' andern sînen sachen

Verse: 10051    wol unde vlîzeclîchen sehen.
Verse: 10052    nu diz was allez geschehen.

Verse: 10053    ez was schône und wol bereit
Verse: 10054    und über ein ander hin geleit.

Verse: 10055    nu gie diu maget heinlîche dar
Verse: 10056    und nam es alles sunder war.

Verse: 10057    Nu ergieng ez aber Îsolde,
Verse: 10058    alsô der billîch wolde:

Verse: 10059    daz si aber ir herzequâle
Verse: 10060    zem anderen mâle

Verse: 10061    vor den andern allen vant.
Verse: 10062    ir herze daz was dar gewant,

Verse: 10063    ir ouge allez dar wac,
Verse: 10064    dâ der harnasch dâ lac.

Verse: 10065    und enweiz niht, wie si des gezam,
Verse: 10066    daz sî daz swert ze handen nam,

Verse: 10067    als juncvrouwen unde kint
Verse: 10068    gelustic unde gelengic sint

Verse: 10069    und weizgot ouch genuoge man.
Verse: 10070    si zôch ez ûz und sach ez an

Verse: 10071    und schouwete ez wâ unde wâ.
Verse: 10072    nu sach si den gebresten dâ.

Verse: 10073    si begunde an die scharten
Verse: 10074    lange unde sêre warten

Verse: 10075    und gedâhte in ir muote:
Verse: 10076    'sam mir got der guote,

Verse: 10077    ich waene, ich den gebresten hân,
Verse: 10078    der hier inne solte stân,

Verse: 10079    und zwâre ich wil es nemen war.'
Verse: 10080    si brâhte in unde sazte in dar.

Verse: 10081    nu vuogete diu lucke
Verse: 10082    und daz vertâne stucke

Verse: 10083    und wâren alse einbaere,
Verse: 10084    als ob ez ein dinc waere,

Verse: 10085    als ouch gewesen wâren
Verse: 10086    innerhalp zwein jâren.

Verse: 10087    nu begunde ir herze kalten
Verse: 10088    umbe ir schaden den alten.

Verse: 10089    ir varwe diu wart beide
Verse: 10090    von zorne und von leide

Verse: 10091    tôtbleich und iesâ viuwerrôt.
Verse: 10092    'â' sprach si 'saeldelôse Îsôt,

Verse: 10093    owê mir unde wâfen!
Verse: 10094    wer hât diz veige wâfen

Verse: 10095    von Curnewâle her getragen?
Verse: 10096    hie wart mîn oeheim mite erslagen,

Verse: 10097    und der in sluoc, der hiez Tristan.
Verse: 10098    wer gab ez disem spilman?

Verse: 10099    der ist doch Tantris genant.'
Verse: 10100    Die namen begunde sî zehant

Verse: 10101    beide in ir sinnen ahten,
Verse: 10102    ir beider lût betrahten.

Verse: 10103    'â hêrre' sprach si wider sich
Verse: 10104    'dise namen die beswaerent mich.

Verse: 10105    ine kan niht wizzen, wie in sî.
Verse: 10106    si lûtent nâhe ein ander bî.

Verse: 10107    Tantris' sprach si 'und Tristan,
Verse: 10108    dâ ist binamen heinlîche an.'

Verse: 10109    nu sî die namen begunde
Verse: 10110    zetrîben in dem munde,

Verse: 10111    nu geviel si an die buochstabe,
Verse: 10112    dâ man si beide schepfet abe,

Verse: 10113    und vant in disem al zehant
Verse: 10114    die selben, die s' in jenem vant.

Verse: 10115    nu begunde s' an in beiden
Verse: 10116    die sillaben scheiden

Verse: 10117    und sazte nâch alse vor
Verse: 10118    und kam rehte ûf des namen spor.

Verse: 10119    si vant ir ursuoche dar an.
Verse: 10120    vür sich sô las si Tristan,

Verse: 10121    her wider sô las si Tantris.
Verse: 10122    hie mite was sî des namen gewis.

Verse: 10123    'jâ jâ' sprach aber diu schoene dô
Verse: 10124    'ist disen maeren danne sô,

Verse: 10125    disen valsch und dise trügeheit
Verse: 10126    hât mir mîn herze wol geseit.

Verse: 10127    wie wol ich wiste al dise vart,
Verse: 10128    sît ich in merkende wart,

Verse: 10129    sît ich an ime lîp unde gebar
Verse: 10130    und sîn dinc allez alsô gar

Verse: 10131    besunder in mîn herze las,
Verse: 10132    daz er gebürte ein hêrre was!

Verse: 10133    wer haete ouch diz getân wan er,
Verse: 10134    daz er von Curnewâle her

Verse: 10135    ze sînen tôtvînden vert
Verse: 10136    und wir in zwirnt haben ernert!

Verse: 10137    ernert? er ist nû vil ungenesen.
Verse: 10138    diz swert daz muoz sîn ende wesen!

Verse: 10139    Nu île, rich dîn leit, Îsôt!
Verse: 10140    gelît er von dem swerte tôt,

Verse: 10141    dâ mite er dînen oeheim sluoc,
Verse: 10142    sô ist der râche genuoc!'

Verse: 10143    si nam daz swert ze handen,
Verse: 10144    si gienc über Tristanden,

Verse: 10145    dâ er in einem bade saz.
Verse: 10146    'jâ' sprach si 'Tristan, bistu daz?'

Verse: 10147    'nein vrouwe, ich bin 'z Tantris.'
Verse: 10148    'sô bistu, des bin ich gewis,

Verse: 10149    Tantris unde Tristan.
Verse: 10150    die zwêne sint ein veiger man.

Verse: 10151    daz mir Tristan hât getân,
Verse: 10152    daz muoz ûf Tantrîsen gân.

Verse: 10153    du giltest mînen oehein!'
Verse: 10154    'nein süeziu juncvrouwe, nein!

Verse: 10155    durch gotes willen, waz tuot ir?
Verse: 10156    gedenket iuwers namen an mir.

Verse: 10157    ir sît ein vrouwe unde ein maget.
Verse: 10158    swâ man den mort von iu gesaget,

Verse: 10159    dâ ist diu wunneclîche Îsôt
Verse: 10160    iemer an den êren tôt.

Verse: 10161    diu sunne, diu von Îlant gât,
Verse: 10162    diu manic herze ervröuwet hât,

Verse: 10163    â, diu hât danne ein ende!
Verse: 10164    owê der liehten hende,

Verse: 10165    wie zimet daz swert dar inne?'
Verse: 10166    Nu gie diu küniginne,

Verse: 10167    ir muoter, zuo den türen în:
Verse: 10168    'wie nû?' sprach sî 'waz sol diz sîn?

Verse: 10169    tohter, was tiutest dû hie mite?
Verse: 10170    sint diz schoene vrouwen site?

Verse: 10171    hâstû dînen sin verlorn?
Verse: 10172    weder ist diz schimpf oder zorn?

Verse: 10173    waz sol daz swert in dîner hant?'
Verse: 10174    'â vrouwe muoter, wis gemant

Verse: 10175    unser beider herzeswaere.
Verse: 10176    diz ist der mordaere,

Verse: 10177    Tristan, der dînen bruoder sluoc.
Verse: 10178    nu habe wir guoter state genuoc,

Verse: 10179    daz wir uns an im rechen
Verse: 10180    und diz swert durch in stechen.

Verse: 10181    ez enkumet uns beiden niemer baz.'
Verse: 10182    'ist diz Tristan? wie weistu daz?'

Verse: 10183    'ich weiz ez wol, ez ist Tristan.
Verse: 10184    diz swert ist sîn, nu sich ez an

Verse: 10185    und sich die scharten dar bî
Verse: 10186    und merke danne, ob er 'z sî.

Verse: 10187    ich sazte iezuo diz stuckelîn
Verse: 10188    ze dirre veigen scharten în.

Verse: 10189    owê, dô sach ich, daz ez schein
Verse: 10190    einbaerelîche und rehte als ein.'

Verse: 10191    'â' sprach diu muoter zehant,
Verse: 10192    'Îsôt, wes hâstu mich gemant?

Verse: 10193    daz ich mîn leben ie gewan!
Verse: 10194    und ist diz danne Tristan,

Verse: 10195    wie bin ich dar an sô betrogen!'
Verse: 10196    nu haete ouch Îsôt ûf gezogen

Verse: 10197    daz swert und trat hin über in.
Verse: 10198    ir muoter kêrte zuo z' ir hin:

Verse: 10199    'lâ stân, Îsôt' sprach sî 'lâ stân!
Verse: 10200    weist iht, waz ich vertriuwet hân?'

Verse: 10201    'ine ruoche, zwâre ez ist sîn tôt.'
Verse: 10202    Tristan sprach: 'merzî, bêle Îsôt!'

Verse: 10203    'î übeler man' sprach Îsôt 'î,
Verse: 10204    unde vorderstû merzî?

Verse: 10205    merzî gehoeret niht ze dir.
Verse: 10206    dîn leben daz lâzest dû mir!'

Verse: 10207    'Nein tohter' sprach diu muoter dô
Verse: 10208    'ez enstât nû leider niht alsô,

Verse: 10209    daz wir uns mügen gerechen,
Verse: 10210    wir enwellen danne brechen

Verse: 10211    unser triuwe und unser êre.
Verse: 10212    engâhe niht ze sêre.

Verse: 10213    er ist in mîner huote
Verse: 10214    mit lîbe und mit guote.

Verse: 10215    ich hân in, swie 'z dar zuo sî komen,
Verse: 10216    genzlîche in mînen vride genomen.'

Verse: 10217    'genâde vrouwe' sprach Tristan,
Verse: 10218    'vrouwe, gedenket wol dar an,

Verse: 10219    daz ich iu guot unde leben
Verse: 10220    an iuwer êre hân ergeben

Verse: 10221    unde enpfienget mich alsô.'
Verse: 10222    'du liugest!' sprach diu junge dô

Verse: 10223    'ich weiz wol, wie diu rede ergie.
Verse: 10224    sine gelobete Tristande nie

Verse: 10225    weder vride noch huote
Verse: 10226    an lîbe noch an guote.'

Verse: 10227    hie mite sô lief s' in aber an.
Verse: 10228    hie mite rief aber Tristan:

Verse: 10229    'â bêle Îsôt, merzî, merzî!'
Verse: 10230    ouch was diu muoter ie dâ bî,

Verse: 10231    diu durnehte künigîn.
Verse: 10232    er mohte sunder sorge sîn.

Verse: 10233    Ouch waere er zuo den stunden
Verse: 10234    in daz bat gebunden,

Verse: 10235    und Îsôt eine dâ gewesen:
Verse: 10236    er waere doch vor ir genesen.

Verse: 10237    diu süeze, diu guote,
Verse: 10238    diu siure an wîbes muote

Verse: 10239    noch herzegallen nie gewan,
Verse: 10240    wie solte diu geslahen man?

Verse: 10241    wan daz s' et von ir leide
Verse: 10242    und ouch von zorne beide

Verse: 10243    solhe gebaerde haete,
Verse: 10244    als ob si 'z gerne taete,

Verse: 10245    und haete ouch lîhte getân,
Verse: 10246    möhte sî daz herze hân.

Verse: 10247    daz was ir aber tiure
Verse: 10248    ze sus getâner siure.

Verse: 10249    doch was ir herze nie sô guot,
Verse: 10250    sine haete zorn und unmuot,

Verse: 10251    wan sî den hôrte unde sach,
Verse: 10252    von dem ir leide geschach.

Verse: 10253    si hôrte ir vînt unde sahen
Verse: 10254    und mohte sîn doch niht geslahen.

Verse: 10255    diu süeze wîpheit lag ir an
Verse: 10256    unde zucte sî dâ van.

Verse: 10257    an ir striten harte
Verse: 10258    die zwô widerwarte,

Verse: 10259    die widerwarten conterfeit
Verse: 10260    zorn unde wîpheit,

Verse: 10261    diu übele bî ein ander zement,
Verse: 10262    swâ si sich ze handen nement.

Verse: 10263    sô zorn an Îsolde
Verse: 10264    den vînt slahen wolde,

Verse: 10265    sô gie diu süeze wîpheit zuo.
Verse: 10266    'nein' sprach si suoze 'niene tuo!'

Verse: 10267    sus was ir herze in zwei gemuot,
Verse: 10268    ein herze was übel unde guot.

Verse: 10269    diu schoene warf daz swert dernider
Verse: 10270    und nam ez aber iesâ wider.

Verse: 10271    sine wiste in ir muote
Verse: 10272    under übel und under guote,

Verse: 10273    ze wederem si solte:
Verse: 10274    si wolte unde enwolte;

Verse: 10275    si wolte tuon unde lân.
Verse: 10276    sus lie der zwîvel umbe gân,

Verse: 10277    biz doch diu süeze wîpheit
Verse: 10278    an dem zorne sige gestreit,

Verse: 10279    sô daz der tôtvînt genas
Verse: 10280    und Môrolt ungerochen was.

Verse: 10281    Hie mite warf sî daz swert von ir,
Verse: 10282    weinende sprach si: 'ouwê mir,

Verse: 10283    daz ich ie disen tac gesach!'
Verse: 10284    diu wîse, ir muoter, zuo z' ir sprach:

Verse: 10285    'herzetohter mîne,
Verse: 10286    die herzeswaere dîne,

Verse: 10287    die selben die sint leider mîn
Verse: 10288    baz unde harter danne dîn.

Verse: 10289    nâch gotes genâden sî engânt dir
Verse: 10290    niht alse nâhen alse mir.

Verse: 10291    mîn bruoder leider der ist tôt.
Verse: 10292    daz was biz her mîn meistiu nôt.

Verse: 10293    nu vürhte ich eine nôt von dir,
Verse: 10294    entriuwen tohter, diu gât mir

Verse: 10295    vil nâher danne jeniu tuo.
Verse: 10296    mir wart nie niht sô liep sô duo.

Verse: 10297    ê daz mir iht an dir geschehe,
Verse: 10298    daz ich rehte ungerne sehe,

Verse: 10299    ich lâze ê gerne disen haz.
Verse: 10300    ich lîde sanfter unde baz

Verse: 10301    eine swaere danne zwô.
Verse: 10302    mîn dinc daz stât mir iezuo sô

Verse: 10303    umbe den unsaeligen man,
Verse: 10304    der uns mit kampfe sprichet an.

Verse: 10305    wir ensehen genôte dar zuo,
Verse: 10306    dîn vater, der künec, ich unde duo

Verse: 10307    wir haben iemer mêre
Verse: 10308    verloren unser êre

Verse: 10309    und enwerden niemer mêre vrô.'
Verse: 10310    Jener in dem bade der sprach dô:

Verse: 10311    'saeligen vrouwen beide,
Verse: 10312    eist wâr, ich hân iu leide

Verse: 10313    und aber mit grôzer nôt getân.
Verse: 10314    welt ir iuch, alse ir sult, enstân,

Verse: 10315    sô wizzet ir wol, daz diu nôt
Verse: 10316    niht anders was niwan der tôt.

Verse: 10317    den lîdet nôte ein ieclîch man,
Verse: 10318    die wîle er sich generen kan.

Verse: 10319    swie 'z aber dar umbe ergangen ist,
Verse: 10320    swie 'z iu nû ze dirre vrist

Verse: 10321    ze dem truhsaezen ist gewant,
Verse: 10322    daz kêret allez z' einer hant.

Verse: 10323    dem sol ich ein guot ende geben,
Verse: 10324    ich meine, ob ir mich lâzet leben

Verse: 10325    und es enirre mich der tôt.
Verse: 10326    vrouwe Îsôt und aber Îsôt,

Verse: 10327    ich weiz wol, daz ir alle zît
Verse: 10328    sinnic unde saelic sît,

Verse: 10329    getriuwe unde bescheiden.
Verse: 10330    möht ich mich hin z' iu beiden

Verse: 10331    einer rede verlâzen
Verse: 10332    und woltet ir iuch mâzen

Verse: 10333    übeler gebaerde her ze mir
Verse: 10334    und ouch des hazzes, des ir

Verse: 10335    Tristande lange habet getragen,
Verse: 10336    ich wolte iu guotiu maere sagen.'

Verse: 10337    Îsôte muoter Îsôt
Verse: 10338    si sach in lange an und wart rôt.

Verse: 10339    ir liehten ougen wurden vol.
Verse: 10340    'owê!' sprach sî 'nu hoere ich wol

Verse: 10341    und weiz vür wâr, daz ir ez sît.
Verse: 10342    ich zwîvelte unz an dise zît.

Verse: 10343    nu habet ir mir die wârheit
Verse: 10344    ungevrâget geseit.

Verse: 10345    ôwî ôwî, hêr Tristan,
Verse: 10346    daz ich iuwer ie gewalt gewan

Verse: 10347    sô guoten, alse ich iezuo hân,
Verse: 10348    und der alsô niht ist getân,

Verse: 10349    daz ich in alsô g' üeben müge,
Verse: 10350    als ez mir wege und alse ez tüge!

Verse: 10351    gewalt ist aber sô manicvalt.
Verse: 10352    ich waene, ich mac wol disen gewalt

Verse: 10353    an mînem vînde üeben,
Verse: 10354    daz reht sô vil getrüeben

Verse: 10355    an einem übelen manne.
Verse: 10356    jâ hêrre, wil ich danne?

Verse: 10357    entriuwen jâ, ich waene.'
Verse: 10358    Ie mitten kam Brangaene

Verse: 10359    diu stolze, diu wîse
Verse: 10360    lachende unde lîse,

Verse: 10361    schône unde wol gestrichen
Verse: 10362    aldort her în geslichen

Verse: 10363    und sach daz swert dâ ligen bar,
Verse: 10364    die vrouwen beide riuwevar.

Verse: 10365    'wie nû?' sprach diu gevüege dô
Verse: 10366    'disen gebaerden wiest den sô?

Verse: 10367    waz maere trîbet ir driu?
Verse: 10368    disiu vrouwen ougen wie sint diu

Verse: 10369    alsus trüebe und alsô naz?
Verse: 10370    diz swert hie lît, waz tiutet daz?'

Verse: 10371    'sich' sprach diu guote künigîn,
Verse: 10372    'Brangaene, herzeniftel mîn,

Verse: 10373    sich, wie wir alle sîn betrogen.
Verse: 10374    wir haben ze blintlîche erzogen

Verse: 10375    den slangen vür die nahtegalen,
Verse: 10376    dem rappen kerne vür gemalen,

Verse: 10377    der der tûben solte sîn.
Verse: 10378    wie haben wir, hêrre trehtîn,

Verse: 10379    den vînt vür den vriunt ernert,
Verse: 10380    dem übelen tôde zwirnt erwert

Verse: 10381    mit unser selber handen
Verse: 10382    unsern vînt Tristanden!

Verse: 10383    sich, warte, er sitzet: deist Tristan.
Verse: 10384    nu hân ich zwîvel dar an,

Verse: 10385    weder ich mich reche oder entuo.
Verse: 10386    niftel, waz raetest dû dar zuo?'

Verse: 10387    'nein vrouwe, tuot die rede hin!
Verse: 10388    iuwer saelde und iuwer sin

Verse: 10389    diu sint hie zuo ze guot,
Verse: 10390    daz ir iemer keinen muot

Verse: 10391    ûf solhe untât gewinnet
Verse: 10392    und iemer sô g' unsinnet,

Verse: 10393    daz ir ze manslahte
Verse: 10394    iemer gewinnet ahte

Verse: 10395    unde ouch danne z' einem man,
Verse: 10396    des ir iuch habet genomen an

Verse: 10397    ze vride und ze huote.
Verse: 10398    es enwart iu nie ze muote,

Verse: 10399    des ich gote wol getrûwen sol.
Verse: 10400    ouch sult ir des gedenken wol,

Verse: 10401    waz rede iuch mit im ane gât,
Verse: 10402    diu niwan umbe iuwer êre stât.

Verse: 10403    soltet ir iuwer êre geben
Verse: 10404    umbe keines iuwers vîndes leben?'

Verse: 10405    'waz wiltu danne, daz ich tuo?'
Verse: 10406    'vrouwe, dâ denket selbe zuo.

Verse: 10407    gât hinnen, lât in ûz gân.
Verse: 10408    die wîle muget ir rât hân,

Verse: 10409    waz iu daz waegeste sî.'
Verse: 10410    hie mite giengen si dan si drî

Verse: 10411    durch rât in ir heinlîche.
Verse: 10412    Îsôt diu sinnerîche

Verse: 10413    'seht' sprach si 'ir beide, sprechet an:
Verse: 10414    waz mag er meinen, dirre man?

Verse: 10415    er sprach wider uns beide daz,
Verse: 10416    wolten wir lâzen disen haz,

Verse: 10417    den wir im lange haben getragen,
Verse: 10418    er wolte uns guotiu maere sagen.

Verse: 10419    waz diz sî, des wundert mich.'
Verse: 10420    Brangaene sprach: 'dâ râte ich,

Verse: 10421    daz in nieman innen bringe
Verse: 10422    dekeiner slahte undinge,

Verse: 10423    biz wir bevinden sînen muot.
Verse: 10424    sîn muot ist lîhte vil guot

Verse: 10425    hin z' iuwer beider êren.
Verse: 10426    man sol den mantel kêren,

Verse: 10427    als ie die winde sint gewant.
Verse: 10428    wer weiz, ob er in Îlant

Verse: 10429    durch iuwer êre komen ist.
Verse: 10430    hüetet sîn ze dirre vrist

Verse: 10431    und lobet ouch eines iemer got:
Verse: 10432    daz dirre ungevüege spot

Verse: 10433    umbe des truhsaezen valscheit
Verse: 10434    mit ime sol werden hin geleit.

Verse: 10435    got der haete unser ruoche
Verse: 10436    an unserre suoche.

Verse: 10437    wan waere er an den stunden
Verse: 10438    niht kurzlîche vunden,

Verse: 10439    weiz got, sô waere er iesâ tôt.
Verse: 10440    wizze Crist, juncvrouwe Îsôt,

Verse: 10441    sô vüere ez wirs, danne ez var.
Verse: 10442    habet niht ungebaerde dar,

Verse: 10443    wan wirt er ihtes innen
Verse: 10444    und mag er danne entrinnen,

Verse: 10445    des hât er reht, daz er daz tuo.
Verse: 10446    von diu dâ denket beide zuo:

Verse: 10447    bietet ime ez alse wol,
Verse: 10448    alse man von rehte sol.

Verse: 10449    daz râte ich iu, des volget mir.
Verse: 10450    Tristan der ist als edel als ir

Verse: 10451    unde ist höfsch unde wîs,
Verse: 10452    vollekomen alle wîs.

Verse: 10453    swie iu daz herze hin z' im sî,
Verse: 10454    sît ime doch höfschlîche bî.

Verse: 10455    binamen, swes er habe gedâht,
Verse: 10456    in hât ernest ûz brâht.

Verse: 10457    sîn gewerp und sîn gerinc
Verse: 10458    der ist umbe ernestlîchiu dinc.'

Verse: 10459    Sus stuonden s' ûf und giengen dan
Verse: 10460    und kâmen hin, dâ Tristan

Verse: 10461    heinlîche an sînem bette saz.
Verse: 10462    Tristan sîn selbes niht vergaz.

Verse: 10463    er vuor ûf balde gegen in
Verse: 10464    und viel sâ gegen in allen hin

Verse: 10465    und lac den höfschen süezen
Verse: 10466    vlêhlîche zuo den vüezen

Verse: 10467    und sprach ouch mit dem valle:
Verse: 10468    'genâde, ir süezen alle,

Verse: 10469    habet genâde wider mich!
Verse: 10470    lât mich geniezen, daz ich

Verse: 10471    durch iuwer êre und iuwern vromen
Verse: 10472    her bin in iuwer rîche komen.'

Verse: 10473    diu liehte cumpanîe,
Verse: 10474    die liehten alle drîe,

Verse: 10475    ieglîchiu warf ir ougen dan
Verse: 10476    und sâhen alle ein ander an.

Verse: 10477    si stuonden unde er lac alsô.
Verse: 10478    'vrouwe' sprach Brangaene dô

Verse: 10479    'der ritter lît ze lange dâ.'
Verse: 10480    diu küniginne sprach iesâ:

Verse: 10481    'waz wiltu nû, daz ich im tuo?
Verse: 10482    mîn herze stât mir niht dar zuo,

Verse: 10483    daz ich sîn vriunt gewesen müge.
Verse: 10484    ine weiz niht, waz getuo, daz tüge.'

Verse: 10485    Brangaene diu sprach aber z' ir:
Verse: 10486    'nu liebiu vrouwe, volget mir,

Verse: 10487    ir und mîn juncvrouwe Îsôt.
Verse: 10488    ich weiz ez wârez alse den tôt,

Verse: 10489    daz ir 'n in iuwern sinnen
Verse: 10490    unsanfte muget geminnen

Verse: 10491    vor iuwerm alten leide.
Verse: 10492    sô gelobet im doch daz beide,

Verse: 10493    daz er des lîbes sicher sî.
Verse: 10494    er geredet vil lîhte dâ bî

Verse: 10495    sînes vrumen aber eteswaz.'
Verse: 10496    die vrouwen sprâchen: 'nû sî daz.'

Verse: 10497    hie mite sô hiez si in ûf stân.
Verse: 10498    nû diz gelübede was getân,

Verse: 10499    si sâzen alle viere nider.
Verse: 10500    Tristan greif an sîn maere wider.

Verse: 10501    'Seht' sprach er 'vrouwe künigîn,
Verse: 10502    welt ir nû mîn guot vriunt sîn,

Verse: 10503    ich wil iu daz in ein tragen
Verse: 10504    noch innen disen zwein tagen

Verse: 10505    ( deiswâr ân allen argen list),
Verse: 10506    iuwer tohter, diu iu lieb ist,

Verse: 10507    daz s' einen edelen künic nimet,
Verse: 10508    der ir ze hêrren wol gezimet,

Verse: 10509    schoene unde milte,
Verse: 10510    zem spere und zem schilte

Verse: 10511    ein ritter edel und ûz erkorn,
Verse: 10512    von künigen unz her geborn

Verse: 10513    und ist ouch danne dâ bî
Verse: 10514    vil rîcher danne ir vater sî.'

Verse: 10515    'entriuwen' sprach diu künigîn
Verse: 10516    'möhte ich der rede gewis sîn,

Verse: 10517    ich volgete unde taete,
Verse: 10518    swes mich ieman baete.'

Verse: 10519    'vrouwe' sprach aber Tristan
Verse: 10520    'ich gewisse iuch schiere dar an.

Verse: 10521    bewaere ich 'z iu zehant niht,
Verse: 10522    sô diu suone geschiht,

Verse: 10523    sô lât mich ûz dem vride wesen
Verse: 10524    und lât mich niemer genesen.'

Verse: 10525    diu wîse sprach: 'Brangaene, sprich,
Verse: 10526    waz raetestû, wie dunket dich?'

Verse: 10527    'dâ dunket mich sîn rede guot
Verse: 10528    und râte ouch daz, daz ir ez tuot.

Verse: 10529    leget allen zwîvel hin
Verse: 10530    und stât ûf beide und küsset in!

Verse: 10531    al sî ich niht ein künigîn,
Verse: 10532    ich wil ouch an der suone sîn.

Verse: 10533    er was mîn mâc, swie arm ich sî.'
Verse: 10534    sus kusten s' in dô alle drî.

Verse: 10535    doch tet ez Îsôt diu junge
Verse: 10536    mit langer widerunge.

Verse: 10537    Nu disiu suone alsus geschach,
Verse: 10538    Tristan aber zen vrouwen sprach:

Verse: 10539    'nu weiz ez got der guote,
Verse: 10540    ine wart in mînem muote

Verse: 10541    sô vrô nie, alse ich iezuo bin.
Verse: 10542    ich hân al den sorgen hin

Verse: 10543    gewartet unde nâch gesehen,
Verse: 10544    die mir möhten geschehen,

Verse: 10545    daz ich mich des versehen sol
Verse: 10546    ( ine versihe mich 's niht, ich weiz ez wol),

Verse: 10547    daz ich in iuwern hulden bin.
Verse: 10548    nu leget alle sorge hin.

Verse: 10549    ich bin iu z' êren und ze vromen
Verse: 10550    von Curnewâle z' Îlant komen.

Verse: 10551    sît mîner êreren vart,
Verse: 10552    daz ich hie generet wart,

Verse: 10553    sît sprach ich iemer mêre
Verse: 10554    iuwer lop und iuwer êre

Verse: 10555    ze mînem hêrren Marke,
Verse: 10556    unz ime den muot sô starke

Verse: 10557    mit râte an iuch gewante,
Verse: 10558    daz er dar an genante E

Verse: 10559    kûme, unde sage iu umbe waz.
Verse: 10560    beidiu er vorhte den haz

Verse: 10561    und wolte ouch durch den willen mîn
Verse: 10562    êlîches wîbes âne sîn,

Verse: 10563    daz ich sîn erbaere
Verse: 10564    nâch sînem tôde waere.

Verse: 10565    hie wîsete aber ich in van,
Verse: 10566    unz er mir volgen began.

Verse: 10567    sus wurden wir zwêne under uns zwein
Verse: 10568    dirre selben reise in ein.

Verse: 10569    durch daz kam ich in Îlant,
Verse: 10570    durch daz sluoc ich den serpant.

Verse: 10571    und habet ir iuwer arbeit
Verse: 10572    vil saeleclîche an mich geleit,

Verse: 10573    des sol mîn juncvrouwe sîn
Verse: 10574    vrouwe unde künigîn

Verse: 10575    ze Curnewâle und z' Engelant.
Verse: 10576    nu ist iu mîn geverte erkant.

Verse: 10577    saeligiu massenîe,
Verse: 10578    saeligen alle drîe.

Verse: 10579    nu lât ez ouch verholn sîn.'
Verse: 10580    'Nu saget mir' sprach diu künigîn

Verse: 10581    'ob ich ez mînem hêrren sage
Verse: 10582    und eine suone in ein trage:

Verse: 10583    missetuon ich iht dar an?'
Verse: 10584    'nein ir, vrouwe' sprach Tristan

Verse: 10585    'er sol 'z von rehte wizzen.
Verse: 10586    sît et dar an gevlizzen,

Verse: 10587    daz mir kein schade iht ûf erstê.'
Verse: 10588    'nein hêrre, vürhtet iu nimê,

Verse: 10589    dane ist niemêre sorgen an.'
Verse: 10590    Hie mite giengen die vrouwen dan

Verse: 10591    in ir heinlîche sunder
Verse: 10592    und ahteten hier under

Verse: 10593    sîn gelücke und sîne linge
Verse: 10594    an iegelîchem dinge.

Verse: 10595    ir iegelîchiu seite
Verse: 10596    von sîner wîsheite,

Verse: 10597    diu muoter sus, Brangaene sô.
Verse: 10598    'sich, muoter' sprach diu tohter dô

Verse: 10599    'wie wunderlîchen ich bevant,
Verse: 10600    daz er Tristan was genant:

Verse: 10601    dô ich des swertes z' ende kam,
Verse: 10602    die namen ich ze handen nam

Verse: 10603    Tantris unde Tristan.
Verse: 10604    nu ich si trîben began,

Verse: 10605    nu bedûhte mich an in zwein,
Verse: 10606    si haeten eteswaz in ein.

Verse: 10607    dâ nâch begunde ich trahten
Verse: 10608    und anclîchen ahten

Verse: 10609    und vant dô mit den buochstaben,
Verse: 10610    die man ze beiden namen sol haben,

Verse: 10611    daz ez allez ein was.
Verse: 10612    wan swederthalp ich hin las,

Verse: 10613    sone was ie niemê dar an
Verse: 10614    wan Tantris oder Tristan

Verse: 10615    und ie an einem beide.
Verse: 10616    nu muoter, nu scheide

Verse: 10617    disen namen Tantris
Verse: 10618    in ein tan und in ein tris

Verse: 10619    und sprich daz tris vür daz tan,
Verse: 10620    sô sprichestû Tristan.

Verse: 10621    sprich daz tan vür daz tris,
Verse: 10622    sô sprichest aber Tantris.'

Verse: 10623    diu muoter segenete sich.
Verse: 10624    'got' sprach si 'der gesegene mich!

Verse: 10625    von wannen kam dir ie der sin?'
Verse: 10626    nu sî drî von im under in

Verse: 10627    geredeten maneger hande,
Verse: 10628    diu künigîn diu sande

Verse: 10629    nâch dem künege; der kam dar.
Verse: 10630    'seht, hêrre' sprach si 'nemet war:

Verse: 10631    ir sult uns einer bete gewern,
Verse: 10632    der wir drî ernestlîche gern.

Verse: 10633    tuot ir 'z, ez kumet uns allen wol.'
Verse: 10634    'ich volge, swes ich volgen sol.

Verse: 10635    swaz ir wellet, deist getân.'
Verse: 10636    'habet ir 'z danne an mich verlân?'

Verse: 10637    sprach aber diu guote künigîn.
Verse: 10638    'jâ, swaz ir wellet, daz sol sîn.'

Verse: 10639    'genâde hêrre, deist genuoc.
Verse: 10640    hêrre, der mînen bruoder sluoc,

Verse: 10641    Tristan, den hân ich hinne.
Verse: 10642    den sult ir iuwer minne

Verse: 10643    und iuwer hulde lâzen hân.
Verse: 10644    sîn gewerp der ist alsô getân,

Verse: 10645    daz diu suone vuoge hât.'
Verse: 10646    der künec sprach: 'triuwen, disen rât

Verse: 10647    den lâze ich baltlîche an dich.
Verse: 10648    er gât dich mêre an danne mich.

Verse: 10649    Môrolt dîn bruoder der was dir
Verse: 10650    nâher gesippe danne mir.

Verse: 10651    hastu 'z umbe in varen lân,
Verse: 10652    wiltû, sô hân ouch ich 'z getan.'

Verse: 10653    Sus seite sî dem künege dô
Verse: 10654    Tristandes maere rehte alsô,

Verse: 10655    als er ir selbe sagete.
Verse: 10656    diz maere daz behagete

Verse: 10657    dem künege wol und sprach ir zuo:
Verse: 10658    'nu sich, daz er 'z mit triuwen tuo.'

Verse: 10659    Diu künigîn dô sande
Verse: 10660    Brangaenen nâch Tristande.

Verse: 10661    und alse Tristan în gie,
Verse: 10662    dem künege er sich ze vüezen lie.

Verse: 10663    'genâde, hêrre künec!' sprach er.
Verse: 10664    'stât ûf, hêr Tristan, gât her '

Verse: 10665    sprach Gurmûn 'unde küsset mich.
Verse: 10666    ungerne sô verkiuse ich,

Verse: 10667    iedoch verkiuse ich disen zorn,
Verse: 10668    sît in die vrouwen hânt verkorn.'

Verse: 10669    'hêrre' sprach aber Tristan
Verse: 10670    'an dirre suone dâ ist an

Verse: 10671    mîn hêrre und beidiu sîniu lant?'
Verse: 10672    'jâ hêrre' sprach Gurmûn zehant.

Verse: 10673    nu disiu suone z' ende kam,
Verse: 10674    diu künigîn Tristanden nam

Verse: 10675    und sazte in zuo z' ir tohter nider
Verse: 10676    und bat in ouch daz maere wider

Verse: 10677    ir hêrren al von êrste sagen,
Verse: 10678    wie ez sich haete dar getragen

Verse: 10679    an allen disen sachen
Verse: 10680    beidiu umbe den trachen

Verse: 10681    und umbe des küneges Markes ger.
Verse: 10682    daz seite er aber von ende her.

Verse: 10683    der künec sprach aber: 'hêr Tristan,
Verse: 10684    nu wie bewar ich mich hier an,

Verse: 10685    daz ich der rede gewis sî?'
Verse: 10686    'vil wol, hêrre, ich hân hie bî

Verse: 10687    mînes hêrren vürsten alle.
Verse: 10688    swaz gewisheit iu gevalle,

Verse: 10689    die saget ir mir. diu ist getân,
Verse: 10690    die wîle und ich ir einen hân.'

Verse: 10691    Hie mite sô schiet der künic dan.
Verse: 10692    die vrouwen unde Tristan

Verse: 10693    die beliben aber eine dâ.
Verse: 10694    Tristan nam Paranîsen sâ.

Verse: 10695    'geselle' sprach er 'gâ hin abe.
Verse: 10696    dâ stât ein kiel in der habe,

Verse: 10697    dâ ganc geswâslîche hin
Verse: 10698    und vrâge, welher under in

Verse: 10699    Curvenal dâ sî genant.
Verse: 10700    dem selben rûne zehant,

Verse: 10701    daz er ze sînem hêrren gê.
Verse: 10702    und sage ouch nieman niemê

Verse: 10703    und bringe in lîse, als höfsch du sîs.'
Verse: 10704    nu hêrre, daz tet Paranîs.

Verse: 10705    er brâhte in alsô lîse dar,
Verse: 10706    daz sîn nieman wart gewar.

Verse: 10707    nu s' în zer kemenâten
Verse: 10708    vür die vrouwen trâten,

Verse: 10709    im neic diu küniginne
Verse: 10710    und nieman mê dar inne.

Verse: 10711    sine nâmen sîn durch daz niht war,
Verse: 10712    er enkam niht alse ein ritter dar.

Verse: 10713    nu Curvenal Tristanden
Verse: 10714    den vrouwen under handen

Verse: 10715    vrôlîchen unde gesunden sach,
Verse: 10716    in franzoiser wîse er sprach:

Verse: 10717    'hâ bêâ dûz sire,
Verse: 10718    durch gotes willen, waz tuot ir,

Verse: 10719    daz ir sus wunneclîche
Verse: 10720    in disem himelrîche

Verse: 10721    sus lûzet verborgen
Verse: 10722    und lât uns in den sorgen?

Verse: 10723    wir wânden alle sîn verlorn.
Verse: 10724    biz iezuo haete ich wol gesworn,

Verse: 10725    daz ir niht lebende waeret.
Verse: 10726    wie habet ir uns beswaeret!

Verse: 10727    iuwer kiel und iuwer liute
Verse: 10728    die geswuoren wol noch hiute

Verse: 10729    und habent ez dâ vür, ir sît tôt,
Verse: 10730    und sint mit micheler nôt

Verse: 10731    her unze an dise naht beliben
Verse: 10732    und haeten daz in ein getriben,

Verse: 10733    si wolten hînaht hinnen sîn.'
Verse: 10734    'nein' sprach diu guote künigîn

Verse: 10735    'er lebet gesunder unde vrô.'
Verse: 10736    und Tristan der begunde dô

Verse: 10737    britûnsch sprechen wider in.
Verse: 10738    'Curvenal' sprach er 'gâ balde hin

Verse: 10739    und sage hin nider, mîn dinc stê wol
Verse: 10740    und ich ez allez enden sol,

Verse: 10741    dâ nâch wir ûz sîn gesant.'
Verse: 10742    hie mite sô seite er ime zehant

Verse: 10743    sîne linge al von grunde,
Verse: 10744    so er ebeneste kunde.

Verse: 10745    nû er im haete geseit
Verse: 10746    sîn gelücke und sîn arbeit,

Verse: 10747    'nu' sprach er 'balde, gâ hin nider.
Verse: 10748    sage mînen lanthêrren wider

Verse: 10749    und ouch den rittern dar zuo,
Verse: 10750    daz ir iegelîcher vruo

Verse: 10751    mit sînen dingen sî bereit
Verse: 10752    wol gestrichen unde gecleit

Verse: 10753    mit der aller besten wât,
Verse: 10754    die ir iegelîcher hât,

Verse: 10755    und nemen mînes boten war.
Verse: 10756    swenne ich in den sende dar,

Verse: 10757    sô rîten her ze hove ze mir.
Verse: 10758    ouch sende ich morgen vruo ze dir,

Verse: 10759    sô sende mir den cleinen schrîn,
Verse: 10760    dâ mîniu cleinoede inne sîn

Verse: 10761    und mîniu cleider dâ mite,
Verse: 10762    diu von dem allerbesten snite.

Verse: 10763    dich selben cleide ouch alsô wol,
Verse: 10764    alse ein hövesch ritter sol.'

Verse: 10765    Curvenal neic und kêrte dan.
Verse: 10766    Brangaene sprach: 'wer ist der man?

Verse: 10767    in dunket waerlîche
Verse: 10768    hier inne ein himelrîche.

Verse: 10769    weder ist er ritter oder kneht?'
Verse: 10770    'vrouwe, swâ vür ir in geseht,

Verse: 10771    er ist ein ritter unde ein man.
Verse: 10772    dane habet dekeinen zwîvel an,

Verse: 10773    daz disiu sunne nie beschein
Verse: 10774    tugenthafter herze kein.'

Verse: 10775    'â, saelic müeze er iemer sîn!'
Verse: 10776    sprach ietwederiu künigîn

Verse: 10777    und mîn vrou Brangaene ouch dermite,
Verse: 10778    diu höfsche und diu wol gesite.

Verse: 10779    Nu Curvenal zem schiffe kam,
Verse: 10780    sîne rede ze handen genam

Verse: 10781    dâ nâch, als ime was vür geleit,
Verse: 10782    er seite in, alse im was geseit

Verse: 10783    und ouch wie er Tristanden vant.
Verse: 10784    nû gebârten sî zehant,

Verse: 10785    rehte alse der tôt ist gewesen
Verse: 10786    und von dem tôde ist wider genesen.

Verse: 10787    als vröuten sî sich alle dô.
Verse: 10788    dâ wâren aber genuoge vrô

Verse: 10789    durch die lantsuone mêre
Verse: 10790    dan durch Tristandes êre.

Verse: 10791    die nîdegen barûne
Verse: 10792    si griffen an ir rûne

Verse: 10793    und an ir sprâchen wider als ê.
Verse: 10794    si zigen Tristanden aber dô mê

Verse: 10795    durch dise rîchen linge
Verse: 10796    zouberlîcher dinge.

Verse: 10797    iegelîcher sprach besunder:
Verse: 10798    'hie merket alle wunder,

Verse: 10799    waz dirre man wunders kan.
Verse: 10800    jâ hêrre, waz kan dirre man,

Verse: 10801    daz er ez allez endet,
Verse: 10802    dar an er sich gewendet!'




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.