TITUS
Gottfried von Strassburg, Tristan
Part No. 15
Previous part

Chapter: 15 
15: Das Wahrzeichen


Verse: 10803    Hie mite sô was ouch der tac komen,
Verse: 10804    der dâ zem kampfe was genomen,

Verse: 10805    und was vil michel hêrschaft,
Verse: 10806    des lantvolkes michel craft

Verse: 10807    vor dem künege in dem sal.
Verse: 10808    ouch was dâ maneger hande zal

Verse: 10809    under den guoten knehten.
Verse: 10810    si vrâgeten, wer dâ vehten

Verse: 10811    vür die maget Îsolde
Verse: 10812    mit dem truhsaezen wolde.

Verse: 10813    diu vrâge gie her unde hin.
Verse: 10814    nune was et nieman under in,

Verse: 10815    der iht hier umbe erkande.
Verse: 10816    under diu was ouch Tristande

Verse: 10817    sîn schrîn und sîniu cleider komen.
Verse: 10818    dâ haete er sunder ûz genomen

Verse: 10819    drî gürtele den vrouwen drîn,
Verse: 10820    daz keiserîn noch künigîn

Verse: 10821    nie keinen bezzeren gewan.
Verse: 10822    schapel unde vürspan,

Verse: 10823    seckel unde vingerlîn,
Verse: 10824    der was ebene vol der schrîn

Verse: 10825    und was daz allez alsô guot,
Verse: 10826    daz niemer keines herzen muot

Verse: 10827    des gedenken möhte,
Verse: 10828    waz ez bezzer töhte.

Verse: 10829    des enkam ouch nie niht dervan,
Verse: 10830    wan alse vil daz Tristan

Verse: 10831    im selben dar van genam:
Verse: 10832    einen gürtel, der im rehte kam,

Verse: 10833    ein schapel unde ein spengelîn,
Verse: 10834    diu ime gebaere mohten sîn.

Verse: 10835    'ir schoenen' sprach er 'alle drî,
Verse: 10836    disen schrîn und swaz dar inne sî,

Verse: 10837    dâ mite sô schaffet alle
Verse: 10838    und tuot, swaz iu gevalle.'

Verse: 10839    Mit disen maeren gieng er dan.
Verse: 10840    sîniu cleider leite er an

Verse: 10841    und kêrte dâ zuo sînen pîn
Verse: 10842    und vleiz sich, wie er sich dar în

Verse: 10843    gefeitierte alsô wol,
Verse: 10844    als ein volmüete ritter sol.

Verse: 10845    ze wunsche stuonden ime ouch die.
Verse: 10846    nu er wider în zen vrouwen gie

Verse: 10847    und sî 'n begunden schouwen,
Verse: 10848    nu begunden in die vrouwen

Verse: 10849    durch ir gedanke lâzen gân.
Verse: 10850    er dûhte s' alle drî getân

Verse: 10851    schône unde saeliclîche.
Verse: 10852    die drî saeldenrîche

Verse: 10853    si gedâhten alle in einer vrist:
Verse: 10854    'zewâre, dirre man der ist

Verse: 10855    ein menlîch crêatiure;
Verse: 10856    sîn wât und sîn figiure

Verse: 10857    si schepfent wol an ime den man.
Verse: 10858    si zement sô wol ein ander an.

Verse: 10859    sîn dinc ist allez wol gewant.'
Verse: 10860    Nu haete ouch Tristan besant

Verse: 10861    sîne cumpanîe. diu was komen
Verse: 10862    und haeten einen stuol genomen

Verse: 10863    nâch ein ander in dem sal.
Verse: 10864    dâ gie diu michel werlde al

Verse: 10865    und beschouweten besunder
Verse: 10866    der cleidere wunder,

Verse: 10867    diu s' an in allen sâhen.
Verse: 10868    genuoge dâ jâhen,

Verse: 10869    ezn getrüege nie sô manic man
Verse: 10870    als ebenguotiu cleider an.

Verse: 10871    daz s' aber alle stille swigen,
Verse: 10872    dem lantgesinde rede verzigen,

Verse: 10873    daz geschach durch die geschiht:
Verse: 10874    sine kunden der lantsprache niht.

Verse: 10875    Hie mite sante ouch der künic în
Verse: 10876    einen boten nâch der künigîn,

Verse: 10877    daz sî ze hove kaeme
Verse: 10878    und ir tohter zuo z' ir naeme.

Verse: 10879    'Îsôt' sprach sî 'wol ûf, gâ wir!
Verse: 10880    hêr Tristan, sô belîbet ir.

Verse: 10881    ich tuon zehant nâch iu gesant,
Verse: 10882    sô neme iuch Brangaene an ir hant

Verse: 10883    und gât ir zwei nâch uns dar în!'
Verse: 10884    'gerne, vrouwe künigîn.'

Verse: 10885    sus kam diu küniginne Îsôt,
Verse: 10886    daz vrôlîche morgenrôt,

Verse: 10887    und vuorte ir sunnen an ir hant,
Verse: 10888    daz wunder von Îlant,

Verse: 10889    die liehten maget Îsôte.
Verse: 10890    diu sleich ir morgenrôte

Verse: 10891    lîse unde staetelîche mite
Verse: 10892    in einem spor, in einem trite,

Verse: 10893    suoze gebildet über al,
Verse: 10894    lanc, ûf gewollen unde smal,

Verse: 10895    gestellet in der waete,
Verse: 10896    als sî diu Minne draete

Verse: 10897    ir selber z' einem vederspil,
Verse: 10898    dem wunsche z' einem endezil,

Verse: 10899    dâ vür er niemer komen kan.
Verse: 10900    si truoc von brûnem samît an

Verse: 10901    roc unde mantel, in dem snite
Verse: 10902    von Franze, und was der roc dâ mite

Verse: 10903    dâ engegene, dâ die sîten
Verse: 10904    sinkent ûf ir lîten,

Verse: 10905    gefranzet unde g' enget,
Verse: 10906    nâhe an ir lîp getwenget

Verse: 10907    mit einem borten, der lac wol,
Verse: 10908    dâ der borte ligen sol.

Verse: 10909    der roc der was ir heinlîch,
Verse: 10910    er tete sich nâhen zuo der lîch.

Verse: 10911    ern truoc an keiner stat hin dan,
Verse: 10912    er suohte allenthalben an

Verse: 10913    al von obene hin ze tal.
Verse: 10914    er nam den valt unde den val

Verse: 10915    under den vüezen alse vil,
Verse: 10916    als iuwer iegelîcher wil.

Verse: 10917    der mantel was ze vlîze
Verse: 10918    mit hermîner wîze

Verse: 10919    innen al ûz gezieret,
Verse: 10920    bî zîlen geflottieret.

Verse: 10921    ern was ze kurz noch ze lanc.
Verse: 10922    er swebete, dâ er nider sanc,

Verse: 10923    weder zer erden noch enbor.
Verse: 10924    dâ stuont ein höfscher zobel vor

Verse: 10925    der mâze, als in diu Mâze sneit,
Verse: 10926    weder ze smal noch ze breit,

Verse: 10927    gesprenget, swarz unde grâ.
Verse: 10928    swarz unde grâ diu waren dâ

Verse: 10929    alsô gemischet under ein,
Verse: 10930    daz ir dewederez dâ schein.

Verse: 10931    der nam ouch sîne crumbe
Verse: 10932    rehte an der wîze al umbe,

Verse: 10933    dâ der zobel die vuoge nimet,
Verse: 10934    dâ diz bî dem sô wol gezimet.

Verse: 10935    diu tassel dâ diu solten sîn,
Verse: 10936    dâ was ein cleinez snuorlîn

Verse: 10937    von wîzen berlîn în getragen.
Verse: 10938    dâ haete diu schoene în geslagen

Verse: 10939    ir dûmen von ir linken hant.
Verse: 10940    die rehten haete sî gewant

Verse: 10941    hin nider baz, ir wizzet wol,
Verse: 10942    dâ man den mantel sliezen sol,

Verse: 10943    und slôz in höfschlîche in ein
Verse: 10944    mit ir vingere zwein.

Verse: 10945    vürbaz dâ viel er selbe wider
Verse: 10946    und nam den valt al z' ende nider,

Verse: 10947    daz man diz unde daz dâ sach,
Verse: 10948    ich meine vederen unde dach.

Verse: 10949    man sach ez inne und ûzen
Verse: 10950    und innerthalben lûzen

Verse: 10951    daz bilde, daz diu Minne
Verse: 10952    an lîbe und an dem sinne

Verse: 10953    sô schône haete gedraet.
Verse: 10954    diu zwei, gedraet unde genaet,

Verse: 10955    diun vollebrâhten nie baz
Verse: 10956    ein lebende bilde danne daz.

Verse: 10957    gevedere schâchblicke
Verse: 10958    die vlugen dâ snêdicke

Verse: 10959    schâchende dar unde dan.
Verse: 10960    ich waene, Îsôt vil manegen man

Verse: 10961    sîn selbes dâ beroubete.
Verse: 10962    Si truoc ûf ir houbete

Verse: 10963    einen cirkel von golde
Verse: 10964    smal, alse er wesen solde,

Verse: 10965    geworht mit spaehem sinne.
Verse: 10966    dâ lâgen gimmen inne,

Verse: 10967    erwünschete steine,
Verse: 10968    vil lieht und iedoch cleine,

Verse: 10969    die besten von dem lande.
Verse: 10970    smaragde und jachande,

Verse: 10971    saphîre und calcedône,
Verse: 10972    und wâren die sô schône

Verse: 10973    wâ unde wâ dar în geleit,
Verse: 10974    daz wercmannes wîsheit

Verse: 10975    nâch rehter spâcheite
Verse: 10976    nie steine baz geleite.

Verse: 10977    dâ lûhte golt unde golt,
Verse: 10978    der cirkel unde Îsolt

Verse: 10979    in widerstrît ein ander an.
Verse: 10980    da enwas kein alse wîse man,

Verse: 10981    haete er der steine niht gesehen,
Verse: 10982    daz er iemer haete verjehen,

Verse: 10983    daz dâ kein cirkel waere.
Verse: 10984    sô gelîch und alse einbaere

Verse: 10985    was ir har dem golde.
Verse: 10986    sus gienc Îsôt Îsolde,

Verse: 10987    diu tohter ir muoter bî,
Verse: 10988    vrô und aller sorgen vrî.

Verse: 10989    ir trite die wâren unde ir swanc
Verse: 10990    gemezzen weder kurz noch lanc

Verse: 10991    und iedoch beider mâze.
Verse: 10992    si was an ir gelâze

Verse: 10993    ûfreht und offenbaere.
Verse: 10994    gelîch dem sperwaere,

Verse: 10995    gestreichet alse ein papegân.
Verse: 10996    si liez ir ougen umbe gân

Verse: 10997    als der valke ûf dem aste.
Verse: 10998    ze linde noch ze vaste

Verse: 10999    haeten si beide ir weide.
Verse: 11000    si weideten beide

Verse: 11001    als ebene und alse lîse
Verse: 11002    und in sô süezer wîse,

Verse: 11003    daz dâ vil lützel ougen was,
Verse: 11004    in enwaeren diu zwei spiegelglas

Verse: 11005    ein wunder unde ein wunne.
Verse: 11006    diu wunnebernde sunne

Verse: 11007    si breite ir schîn über al,
Verse: 11008    si ervröute liute unde sal

Verse: 11009    slîchende neben ir muoter hin.
Verse: 11010    si zwô si wâren under in

Verse: 11011    in süezer unmuoze
Verse: 11012    mit zweier hande gruoze

Verse: 11013    grüezende unde nîgende,
Verse: 11014    sprechende unde swîgende.

Verse: 11015    ir reht was an in beiden
Verse: 11016    besetzet unde bescheiden.

Verse: 11017    ir eine gruozte, diu ander neic,
Verse: 11018    diu muoter sprach, diu tohter sweic.

Verse: 11019    diz triben die wol gezogen zwô.
Verse: 11020    diz was ir unmuoze dô.

Verse: 11021    Nu daz sich Îsôt unde Îsôt,
Verse: 11022    diu sunne unde ir morgenrôt,

Verse: 11023    haeten nider gelâzen,
Verse: 11024    dem künege bî gesâzen,

Verse: 11025    nu nam der truhsaeze allez war
Verse: 11026    und vrâgete her unde dar,

Verse: 11027    wâ der gewaltesaere,
Verse: 11028    der vrouwen kempfe waere.

Verse: 11029    des was er unberihtet dâ.
Verse: 11030    sîne mâge nam er sâ.

Verse: 11031    der was ein michel her umb in.
Verse: 11032    vür den künec sô gieng er hin.

Verse: 11033    dem gerihte antwurte er sich.
Verse: 11034    'nu hêrre' sprach er 'hie bin ich

Verse: 11035    und vordere mîn kampfreht.
Verse: 11036    wâ ist nû der guote kneht,

Verse: 11037    der mich an mînen êren
Verse: 11038    hie waenet umbe kêren?

Verse: 11039    ich hân noch vriunde unde man.
Verse: 11040    ouch ist mîn reht sô guot hier an:

Verse: 11041    tuot mir daz lantreht, alse ez sol.
Verse: 11042    ich geteidinge wol.

Verse: 11043    gewalt entsitze ich cleine,
Verse: 11044    ir entuot ez danne al eine.'

Verse: 11045    'Truhsaeze' sprach diu künigîn
Verse: 11046    'sol dirre kampf unwendic sîn,

Verse: 11047    sone weiz ich rehte, waz getuo.
Verse: 11048    ich bin dar ungewarnet zuo.

Verse: 11049    und zwâre woltestû 'n noch lân
Verse: 11050    ûf solhe rede understân,

Verse: 11051    daz Îsôt dirre maere
Verse: 11052    ledic und âne waere,

Verse: 11053    truhsaeze, zwâre ez kaeme dir
Verse: 11054    ze alse guoten staten als ir.'

Verse: 11055    'ledic?' sprach der ander dô
Verse: 11056    'jâ vrouwe, ir taetet ouch alsô,

Verse: 11057    ir liezet ouch gewunnen spil.
Verse: 11058    swaz ir geredet, ich waene, ich wil

Verse: 11059    mit vrumen und mit êren
Verse: 11060    von disem spile kêren.

Verse: 11061    ich haete michel arbeit
Verse: 11062    unsinneclîchen an geleit,

Verse: 11063    solte ich nû dar vone gân.
Verse: 11064    vrouwe, ich wil iuwer tohter hân.

Verse: 11065    daz ist daz ende dar an.
Verse: 11066    ir wizzet in sô wol, den man,

Verse: 11067    der den trachen dâ sluoc.
Verse: 11068    den bringet, sô ist der rede genuoc.'

Verse: 11069    'Truhsaeze' sprach diu künigîn
Verse: 11070    'ich hoere wol, ez muoz et sîn.

Verse: 11071    ich muoz mîn selbe nemen war.'
Verse: 11072    si wincte Paranîse dar.

Verse: 11073    'gâ hin' sprach sî 'und brinc den man.'
Verse: 11074    nu sâhen s' alle ein ander an,

Verse: 11075    ritter und barûne.
Verse: 11076    under in wart michel rûne,

Verse: 11077    vil vrâge und manic maere,
Verse: 11078    wer der kempfe waere.

Verse: 11079    nune wiste ez ir dekeiner dâ.
Verse: 11080    Hie mite kam ouch geslichen sâ

Verse: 11081    diu stolze Brangaene,
Verse: 11082    daz schoene volmaene,

Verse: 11083    und vuorte ze handen
Verse: 11084    ir geverten Tristanden.

Verse: 11085    diu stolze und diu wol gesite
Verse: 11086    si gieng im sitelîche mite,

Verse: 11087    an lîbe und an gelâze
Verse: 11088    liutsaelic ûzer mâze,

Verse: 11089    ir muotes stolz unde vrî.
Verse: 11090    ouch gieng ir ir geverte bî

Verse: 11091    in stolzlîcher wîse.
Verse: 11092    des dinc was ouch ze prîse

Verse: 11093    und ze wunder ûf geleit
Verse: 11094    an iegelîcher saelekeit,

Verse: 11095    diu den ritter schepfen sol.
Verse: 11096    ez stuont allez an im wol,

Verse: 11097    daz ze ritters lobe stât.
Verse: 11098    sîn geschepfede und sîn wât

Verse: 11099    die gehullen wunneclîche in ein.
Verse: 11100    si bildeten under in zwein

Verse: 11101    einen ritterlîchen man.
Verse: 11102    er truoc cyclâdes cleider an,

Verse: 11103    diu wâren ûzer mâze rîch,
Verse: 11104    vremede unde lobelîch.

Verse: 11105    sine wâren niht von hove geben.
Verse: 11106    daz golt daz was dar în geweben

Verse: 11107    niht in der hovemâze.
Verse: 11108    die sîdenen strâze

Verse: 11109    die kôs man kûmelîche dâ:
Verse: 11110    si wâren wâ unde wâ

Verse: 11111    sô mit dem golde ertrenket
Verse: 11112    und in daz golt versenket,

Verse: 11113    daz man daz werc dâ kûme sach.
Verse: 11114    ein netze daz was ûf daz dach

Verse: 11115    von cleinen berlîn getragen.
Verse: 11116    die maschen alse wît geslagen,

Verse: 11117    als ein hant an der breite hât.
Verse: 11118    dar durch sô bran der cyclât

Verse: 11119    rehte alse ein glüejender kol.
Verse: 11120    er was von timît innen vol,

Verse: 11121    vil brûner danne ein vîolate,
Verse: 11122    rehte ebenbrûn der gloien blate.

Verse: 11123    der selbe pfelle der tet sich
Verse: 11124    an den valt und an den strich

Verse: 11125    alse nâhe und alse wol,
Verse: 11126    als ein pfelle beste sol.

Verse: 11127    er stuont dem lobelîchen man
Verse: 11128    wol unde lobelîchen an

Verse: 11129    und alle wîs nâch sîner ger.
Verse: 11130    _f sînem houbete truoc er

Verse: 11131    von spaehem werke spaehen schîn,
Verse: 11132    ein wunneclîch schapelekîn,

Verse: 11133    daz rehte alsam ein kerze bran.
Verse: 11134    dâ lûhten alse sterne van

Verse: 11135    topâzen und sardîne,
Verse: 11136    crisolîten und rubîne.

Verse: 11137    ez was lieht unde clâr,
Verse: 11138    ez haete im houbet unde hâr

Verse: 11139    clârlîchen umbevangen.
Verse: 11140    sus kam er în gegangen

Verse: 11141    rîch unde hôhe gemuot.
Verse: 11142    sîn gebâr was hêrlîch unde guot.

Verse: 11143    al sîn geverte daz was rîch.
Verse: 11144    er was selbe rîlîch

Verse: 11145    an allen sînen sachen.
Verse: 11146    si begunden ime rûm machen,

Verse: 11147    dâ er zem palas în gie.
Verse: 11148    hie mite sô wurden sîn ouch die

Verse: 11149    von Curnewâle gewar.
Verse: 11150    si sprungen vrôlîche dar,

Verse: 11151    si gruozten unde enpfiengen,
Verse: 11152    dâ sî bihanden giengen,

Verse: 11153    Brangaenen und Tristanden.
Verse: 11154    si nâmen sî ze handen

Verse: 11155    die geverten beide, sî und in,
Verse: 11156    und condewierten s' under in

Verse: 11157    schône unde hêrlîche
Verse: 11158    hin vür daz künicrîche.

Verse: 11159    Künec, ietweder künigîn
Verse: 11160    si tâten ime ir tugende schîn:

Verse: 11161    si stuonden ûf und gruozten in.
Verse: 11162    Tristan der neic in allen drîn.

Verse: 11163    dâ nâch gruozten si drîe
Verse: 11164    Tristandes cumpanîe

Verse: 11165    hêrlîche und alsô wol,
Verse: 11166    als man von rehte hêrren sol.

Verse: 11167    Hie mite kam al diu ritterschaft
Verse: 11168    zuo gedrungen herhaft

Verse: 11169    und gruozten die geste,
Verse: 11170    der geverte ir keiner weste.

Verse: 11171    jene bekanden aber iesâ
Verse: 11172    ir vetere unde ir mâge dâ,

Verse: 11173    die von Curnewâle z' Îlant
Verse: 11174    ze zinse wâren gesant.

Verse: 11175    dâ lief vor vröuden manic man
Verse: 11176    veter unde mâge weinende an.

Verse: 11177    vröude unde clage der was dâ vil,
Verse: 11178    der ich niht sunder rechen wil.

Verse: 11179    der künec dô Tristanden nam
Verse: 11180    selb andern, alse er dar kam,

Verse: 11181    in und Brangaenen die mein ich,
Verse: 11182    unde sazte sî ze sich

Verse: 11183    und vuogete aber under in daz,
Verse: 11184    daz Tristan innerthalben saz.

Verse: 11185    sô sâzen anderthalben sîn
Verse: 11186    die saeligen zwô künigîn.

Verse: 11187    ritter und barûne,
Verse: 11188    Tristandes cumpanjûne,

Verse: 11189    die sâzen ûf den esterîch.
Verse: 11190    und aber alsô, daz iegelîch

Verse: 11191    dem gerihte under ougen sach,
Verse: 11192    und sâhen, swaz sô dâ geschach.

Verse: 11193    Hie mite huop von Tristande
Verse: 11194    daz gesinde von dem lande

Verse: 11195    manec gerûne und manic zale.
Verse: 11196    ich weiz ez wol, daz in dem sale

Verse: 11197    ûz maneges mannes munde
Verse: 11198    lobebrunnen vil begunde

Verse: 11199    ûf wallen unde enspringen
Verse: 11200    von allen sînen dingen.

Verse: 11201    si sageten ime lob unde prîs
Verse: 11202    maneger hande und manege wîs.

Verse: 11203    ir genuoge sprâchen daz:
Verse: 11204    'wâ geschuof ie got figiure baz

Verse: 11205    ze ritterlîchem rehte?
Verse: 11206    hî, wie ist er ze vehte

Verse: 11207    und ze kampfwîse
Verse: 11208    gestellet sô ze prîse!

Verse: 11209    wie sint diu cleider, diu er treit,
Verse: 11210    sô rîlîchen ûf geleit!

Verse: 11211    ezn gesach nie man in Îlant
Verse: 11212    sus rehte keiserlîch gewant.

Verse: 11213    sîn massenîe diust gecleit
Verse: 11214    mit küniclîcher rîcheit.

Verse: 11215    und waerlîche, swer er sî
Verse: 11216    erst muotes unde guotes vrî.'

Verse: 11217    alsolher rede was dâ genuoc.
Verse: 11218    der truhsaeze der truoc

Verse: 11219    den ezzich in den ougen.
Verse: 11220    diu rede ist âne lougen.

Verse: 11221    Nu hiez man ruofen in den sal
Verse: 11222    eine stille über al.

Verse: 11223    diz was getân. nu daz geschach,
Verse: 11224    daz nieman wort noch halbez sprach,

Verse: 11225    der künic sprach: 'truhsaeze, sprich,
Verse: 11226    wes vermizzest dû dich?'

Verse: 11227    'hêrre, ich sluoc den serpant.'
Verse: 11228    der gast stuont ûf und sprach zehant:

Verse: 11229    'hêrre, ir entâtet.' 'hêrre, ich tete,
Verse: 11230    ich bewaere ez wol an dirre stete.'

Verse: 11231    'mit waz bewaerde?' sprach Tristan.
Verse: 11232    'diz houbet, seht, daz brâhte ich dan.'

Verse: 11233    'hêrre künec' sprach Tristan dô
Verse: 11234    'sît er des houbetes sô

Verse: 11235    ze bewaerde wil jehen,
Verse: 11236    sô heizet in daz houbet sehen.

Verse: 11237    vindet man die zungen dâ,
Verse: 11238    ich entwîche mînes rehtes sâ

Verse: 11239    und wil von mîme criege gân.'
Verse: 11240    sus wart daz houbet ûf getân

Verse: 11241    und niht dar inne vunden.
Verse: 11242    Tristan hiez an den stunden

Verse: 11243    die zungen bringen: diu kam dar.
Verse: 11244    'ir hêrren' sprach er 'nemet war

Verse: 11245    und seht, ob sî des trachen sî.'
Verse: 11246    nu stuonden si 's im alle bî

Verse: 11247    und jahen 's al gemeine
Verse: 11248    wan der truhsaeze al eine,

Verse: 11249    der wolte ez widerreden ie.
Verse: 11250    nune wiste er aber rehte wie.

Verse: 11251    der veige der begunde
Verse: 11252    mit zungen und mit munde,

Verse: 11253    mit rede und mit gedanken
Verse: 11254    schranken unde wanken.

Verse: 11255    ern kunde sprechen noch gelân,
Verse: 11256    ern wiste, waz gebaerde hân.

Verse: 11257    'ir hêrren alle' sprach Tristan
Verse: 11258    'hie merket alle wunder an,

Verse: 11259    wie sich diz hie zuo habe getragen.
Verse: 11260    dô ich den trachen haete erslagen

Verse: 11261    und ime mit lîhter arbeit
Verse: 11262    ûz sînem tôten rachen sneit

Verse: 11263    dise zungen und si dannen truoc,
Verse: 11264    daz er in sider ze tôde sluoc.'

Verse: 11265    die hêrren sprâchen alle:
Verse: 11266    'an disem lantschalle

Verse: 11267    ist lützel êren bejaget.
Verse: 11268    swaz ieman sprichet oder gesaget,

Verse: 11269    unser iegelîch der weiz daz wol,
Verse: 11270    ob man ze rehte reden sol,

Verse: 11271    der aller êrest dar kam
Verse: 11272    und die zungen dâ nam,

Verse: 11273    der sluoc ouch den serpant.'
Verse: 11274    des wart gevolget zehant.

Verse: 11275    Nu daz dem valschen gebrast
Verse: 11276    unde der valschelôse gast

Verse: 11277    des hoves volge gewan,
Verse: 11278    'hêr künec' sprach aber Tristan

Verse: 11279    'nu sît der triuwen gemant:
Verse: 11280    iuwer tohter stât in mîner hant.'

Verse: 11281    der künec sprach: 'hêrre, des gihe ich,
Verse: 11282    als ir gelobetet wider mich.'

Verse: 11283    'nein hêrre' sprach der valsche dô
Verse: 11284    'durch got ensprechet niht alsô.

Verse: 11285    swie 'z hier umbe ergangen sî,
Verse: 11286    dâ ist zewâre untriuwe bî

Verse: 11287    und ist mit valsche hie zuo komen.
Verse: 11288    ê aber mir werde benomen

Verse: 11289    mîn êre mit unrehte,
Verse: 11290    si muoz mir ê mit vehte

Verse: 11291    und mit kampfe hin gân.
Verse: 11292    hêrre, ich wil den kampf bestân.'

Verse: 11293    'truhsaeze' sprach diu wîse Îsôt
Verse: 11294    'du teidingest âne nôt.

Verse: 11295    mit wem wiltû kampfrehten?
Verse: 11296    dirre hêrre wil niht vehten.

Verse: 11297    er hât doch an Îsolde
Verse: 11298    behabet, daz er wolde.

Verse: 11299    er waere tumber danne ein kint
Verse: 11300    und vaehte er mit dir umbe den wint.'

Verse: 11301    'war umbe, vrouwe?' sprach Tristan
Verse: 11302    'ê danne er jehe, daz wir 'n hier an

Verse: 11303    gewalten unde unrehten,
Verse: 11304    ich wil ê mit im vehten.

Verse: 11305    hêrre unde vrouwe, sprechet dar,
Verse: 11306    gebietet ime daz, daz er var

Verse: 11307    wol balde wâfenen sich.
Verse: 11308    bereite sich, als tuon ich mich.'

Verse: 11309    Alse der truhsaeze sach,
Verse: 11310    daz sich diu rede ze kampfe brach,

Verse: 11311    sîne mâge und sîne man
Verse: 11312    die nam er alle und gie dan

Verse: 11313    an eine sprâche sunder
Verse: 11314    und suohte rât hier under.

Verse: 11315    nu dûhte sî daz maere
Verse: 11316    sô rehte lasterbaere,

Verse: 11317    daz er dâ lützel râtes vant.
Verse: 11318    ir iegelîcher sprach zehant:

Verse: 11319    'truhsaeze, dîniu tagedinc
Verse: 11320    diu haeten boesen ursprinc,

Verse: 11321    ze boesem ende sint s' ouch komen.
Verse: 11322    waz hâstû dich an genomen?

Verse: 11323    wiltû dich mit unrehte
Verse: 11324    bieten ze vehte,

Verse: 11325    daz gât dir waetlîch an daz leben.
Verse: 11326    waz râtes müge wir dir gegeben?

Verse: 11327    hiene gehoeret rât noch êre zuo.
Verse: 11328    verliusest dû daz leben nuo

Verse: 11329    ze gâr verlorner êre,
Verse: 11330    so ist aber des schaden noch mêre.

Verse: 11331    und dunket alle und sehen daz wol,
Verse: 11332    der wider dich dâ vehten sol,

Verse: 11333    derst ein geherzet man zer nôt.
Verse: 11334    bestâstu 'n, zwâre ez ist dîn tôt.

Verse: 11335    sît dich des vâlandes rât
Verse: 11336    verrâten an den êren hât,

Verse: 11337    sô behabe dînen lîp doch.
Verse: 11338    versuoche unde besich noch,

Verse: 11339    ob diz laster und die lüge
Verse: 11340    ieman hin gelegen müge

Verse: 11341    mit keiner slahte maere.'
Verse: 11342    dô sprach der lügenaere:

Verse: 11343    'wie welt ir, daz ich daz getuo?'
Verse: 11344    'dâ râte wir dir kurze zuo.

Verse: 11345    gâ wider în unde gich,
Verse: 11346    dîne vriunt die heizen dich

Verse: 11347    dise vorderunge varen lân.
Verse: 11348    nu wellestû dâ von gân.'

Verse: 11349    der truhsaeze tete alsô.
Verse: 11350    er gie wider în und seite dô,

Verse: 11351    sîne mâge und sîne man
Verse: 11352    die haeten in genomen dâ van,

Verse: 11353    nu wolte er ouch dâ von sîn.
Verse: 11354    'truhsaeze' sprach diu künigîn

Verse: 11355    'dazn wânde ich niemer geleben,
Verse: 11356    daz du iemer soltest ûf gegeben

Verse: 11357    alse gar gewunnen spil.'
Verse: 11358    alsolhes spottes wart dâ vil

Verse: 11359    getriben über den palas.
Verse: 11360    der arme truhsaeze was

Verse: 11361    ir gîge unde ir rotte.
Verse: 11362    si triben in mit spotte

Verse: 11363    umbe und umbe als einen bal.
Verse: 11364    dâ wart von spotte michel schal.

Verse: 11365    sus nam der valsch ein ende
Verse: 11366    mit offenlîcher schende.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.