TITUS
Gottfried von Strassburg, Tristan
Part No. 16
Previous part

Chapter: 16 
16: Der Minnetrank


Verse: 11367    Dô disiu rede g' endet was,
Verse: 11368    der künec seite in den palas

Verse: 11369    sînes landes cumpanjûnen,
Verse: 11370    rittern und barûnen,

Verse: 11371    daz diz Tristan waere,
Verse: 11372    und kündete in diz maere,

Verse: 11373    als er ez haete vernomen,
Verse: 11374    war umbe er z' Îlant waere komen

Verse: 11375    und wie er gelobet haete,
Verse: 11376    er solte ez ime dâ staete

Verse: 11377    mit Markes vürsten machen
Verse: 11378    mit allen den sachen,

Verse: 11379    als er im vor benande.
Verse: 11380    daz gesinde von Îlande

Verse: 11381    waz dirre maere sêre vrô.
Verse: 11382    die lanthêrren sprâchen dô,

Verse: 11383    daz diu suone waere
Verse: 11384    gevellic unde gebaere,

Verse: 11385    wan langez hazzen under in
Verse: 11386    tribe ie die zît mit schaden hin.

Verse: 11387    der künec gebôt unde bat,
Verse: 11388    daz in Tristan an der stat

Verse: 11389    der rede gewis taete,
Verse: 11390    als er 'm gelobet haete.

Verse: 11391    er tete ouch alsô: Tristan
Verse: 11392    und alle sînes hêrren man

Verse: 11393    die swuoren zuo dem mâle
Verse: 11394    daz lant ze Curnewâle

Verse: 11395    ze morgengâbe Îsolde,
Verse: 11396    und daz si wesen solde

Verse: 11397    vrouwe über allez Engelant.
Verse: 11398    Hie mite bevalch Gurmûn zehant

Verse: 11399    Îsolde hant von hande
Verse: 11400    ir vînde Tristande.

Verse: 11401    ir vînde spriche ich umbe daz:
Verse: 11402    si was im dannoch gehaz.

Verse: 11403    Tristan der nam s' an sîne hant.
Verse: 11404    'künec' sprach er 'hêrre von Îlant,

Verse: 11405    wir biten iuch, mîn vrouwe und ich,
Verse: 11406    daz ir durch sî und ouch durch mich,

Verse: 11407    ez sîn ritter oder kint,
Verse: 11408    die her ze zinse geben sint

Verse: 11409    von Curnwal und von Engelant,
Verse: 11410    die suln in mîner vrouwen hant

Verse: 11411    billîchen und von rehte sîn,
Verse: 11412    wan si ist der lande künigîn,

Verse: 11413    daz ir ir die lâzet vrî.'
Verse: 11414    'vil gerne' sprach der künec 'daz sî.

Verse: 11415    eist wol mit mînen minnen,
Verse: 11416    varnt s' alle mit iu hinnen.'

Verse: 11417    der maere wart manc herze vrô.
Verse: 11418    Tristan der hiez gewinnen dô

Verse: 11419    einen kiel ze sînem kiele
Verse: 11420    und daz ouch der geviele

Verse: 11421    im selben unde Îsolde
Verse: 11422    und dâ zuo, swem er wolde.

Verse: 11423    und alse ouch der bereit wart,
Verse: 11424    Tristan bereite sich zer vart.

Verse: 11425    in allen den enden,
Verse: 11426    dâ man die ellenden

Verse: 11427    ze hove und in dem lande vant,
Verse: 11428    die besande man zehant.

Verse: 11429    Die wîle und sich ouch Tristan
Verse: 11430    mit sînen lantgesellen dan

Verse: 11431    bereite unde berihtete,
Verse: 11432    die wîle sô betihtete

Verse: 11433    Îsôt diu wîse künigîn
Verse: 11434    in ein glasevezzelîn

Verse: 11435    einen tranc von minnen,
Verse: 11436    mit alsô cleinen sinnen

Verse: 11437    ûf geleit und vor bedâht,
Verse: 11438    mit solher crefte vollebrâht:

Verse: 11439    mit sweme sîn ieman getranc,
Verse: 11440    den muose er âne sînen danc

Verse: 11441    vor allen dingen meinen
Verse: 11442    und er dâ wider in einen.

Verse: 11443    in was ein tôt unde ein leben,
Verse: 11444    ein triure, ein vröude samet gegeben.

Verse: 11445    den tranc den nam diu wîse,
Verse: 11446    si sprach Brangaenen lîse.

Verse: 11447    'Brangaene' sprach si 'niftel mîn,
Verse: 11448    lâ dir die rede niht swaere sîn,

Verse: 11449    du solt mit mîner tohter hin.
Verse: 11450    dâ nâch sô stelle dînen sin.

Verse: 11451    swaz ich dir sage, daz vernim.
Verse: 11452    diz glas mit disem tranke nim,

Verse: 11453    daz habe in dîner huote
Verse: 11454    hüete es vor allem guote.

Verse: 11455    sich, daz es ûf der erde
Verse: 11456    ieman innen werde.

Verse: 11457    bewar mit allem vlîze
Verse: 11458    daz es ieman enbîze.

Verse: 11459    vlîze dich wol starke:
Verse: 11460    swenne Îsôt unde Marke

Verse: 11461    in ein der minne komen sîn,
Verse: 11462    sô schenke in disen tranc vür wîn

Verse: 11463    und lâ si 'n trinken ûz in ein.
Verse: 11464    bewar daz, daz sîn mit in zwein

Verse: 11465    ieman enbîze. daz ist sin.
Verse: 11466    noch selbe entrink es niht mit in.

Verse: 11467    der tranc der ist von minnen.
Verse: 11468    daz habe in dînen sinnen.

Verse: 11469    ich bevilhe dir Îsôte
Verse: 11470    vil tiure und vil genôte.

Verse: 11471    an ir sô lît mîn beste leben.
Verse: 11472    ich unde sî sîn dir ergeben

Verse: 11473    ûf alle dîne saelekeit.
Verse: 11474    hie mite sî dir genuoc geseit.'

Verse: 11475    'trût vrouwe' sprach Brangaene dô
Verse: 11476    'ist iuwer beider wille alsô,

Verse: 11477    sô sol ich gerne mit ir varn,
Verse: 11478    ir êre und al ir dinc bewarn,

Verse: 11479    sô ich iemer beste kan.'
Verse: 11480    Urloup nam dô Tristan

Verse: 11481    und al sîn liut hie unde dort.
Verse: 11482    si schieden ze Weisefort

Verse: 11483    mit michelen vröuden abe.
Verse: 11484    nu volgete ime unz in die habe

Verse: 11485    durch Îsôte minne
Verse: 11486    künec unde küniginne

Verse: 11487    und al ir massenîe.
Verse: 11488    sîn unverwânde amîe,

Verse: 11489    sîn unverwantiu herzenôt,
Verse: 11490    diu liehte wunneclîche Îsôt

Verse: 11491    diu was im z' allen zîten
Verse: 11492    weinende an der sîten.

Verse: 11493    ir vater, ir muoter beide
Verse: 11494    vertriben mit manegem leide

Verse: 11495    die selben kurzen stunde.
Verse: 11496    manec ouge dâ begunde

Verse: 11497    riezen unde werden rôt.
Verse: 11498    Îsôt was maneges herzen nôt.

Verse: 11499    si bar vil manegem herzen
Verse: 11500    tougenlîchen smerzen.

Verse: 11501    diu weineten genôte
Verse: 11502    ir ougen wunne, Îsôte.

Verse: 11503    dâ was gemeine weine.
Verse: 11504    dâ weineten gemeine

Verse: 11505    vil herzen und vil ougen
Verse: 11506    offenlîchen unde tougen.

Verse: 11507    und aber Îsôt und aber Îsôt,
Verse: 11508    diu sunne unde ir morgenrôt,

Verse: 11509    und ouch daz volmaene,
Verse: 11510    diu schoene Brangaene,

Verse: 11511    dô sî sich muosen scheiden,
Verse: 11512    diu eine von den beiden,

Verse: 11513    dô sach man jâmer unde leit.
Verse: 11514    diu getriuwelîche sicherheit

Verse: 11515    schiet sich mit manegem leide.
Verse: 11516    Îsôt kuste si beide

Verse: 11517    dicke und ze manegem mâle.
Verse: 11518    Nu die von Curnewâle

Verse: 11519    unde ouch Îlandaere,
Verse: 11520    der vrouwen volgaere,

Verse: 11521    alle ze schiffe wâren komen
Verse: 11522    und haeten urloup genomen.

Verse: 11523    Tristan der gie ze jungest în.
Verse: 11524    diu liehte junge künigîn,

Verse: 11525    diu bluome von Îlant,
Verse: 11526    Îsôt diu gieng im an der hant

Verse: 11527    trûric unde sêre unvrô.
Verse: 11528    si zwei si nigen dem lande dô

Verse: 11529    und bâten den gotes segen
Verse: 11530    der liute unde des landes pflegen.

Verse: 11531    si stiezen an und vuoren dan.
Verse: 11532    mit hôher stimme huoben s' an

Verse: 11533    und sungen eines unde zwir:
Verse: 11534    'in gotes namen varen wir '

Verse: 11535    und strichen allez hinewart.
Verse: 11536    Nu was den vrouwen zuo z' ir vart

Verse: 11537    mit Tristandes râte
Verse: 11538    ein kielkemenâte

Verse: 11539    nâch heinlîcher sache
Verse: 11540    gegeben zuo z' ir gemache.

Verse: 11541    dâ was diu küniginne
Verse: 11542    mit ir juncvrouwen inne

Verse: 11543    und mit in lützel kein man
Verse: 11544    wan underwîlen Tristan.

Verse: 11545    der gie wîlent dar în
Verse: 11546    und trôste die künigîn,

Verse: 11547    dâ si weinende saz.
Verse: 11548    die weinde unde clagete daz,

Verse: 11549    daz s' alsô von ir lande,
Verse: 11550    dâ sî die liute erkande,

Verse: 11551    und von ir vriunden allen schiet
Verse: 11552    und vuor mit der unkunden diet,

Verse: 11553    sine wiste war oder wie.
Verse: 11554    sô trôste sî Tristan ie,

Verse: 11555    sô er suozeste kunde.
Verse: 11556    ze iegelîcher stunde,

Verse: 11557    alse er zuo z' ir triure kam,
Verse: 11558    zwischen sîn arme er si nam

Verse: 11559    vil suoze unde lîse
Verse: 11560    und niuwan in der wîse,

Verse: 11561    als ein man sîne vrouwen sol.
Verse: 11562    der getriuwe der versach sich wol,

Verse: 11563    daz er der schoenen waere
Verse: 11564    ein senfte zuo z' ir swaere.

Verse: 11565    und alse dicke als ez ergie,
Verse: 11566    daz er sîn arme an sî verlie,

Verse: 11567    sô gedâhte ie diu schoene Îsôt
Verse: 11568    an ir oeheimes tôt

Verse: 11569    und sprach ie danne wider in:
Verse: 11570    'lât stân, meister, habet iuch hin,

Verse: 11571    tuot iuwer arme hin dan!
Verse: 11572    ir sît ein harte müelîch man.

Verse: 11573    war umbe rüeret ir mich?'
Verse: 11574    'ei schoene, missetuon ich?'

Verse: 11575    'jâ ir, wan ich bin iu gehaz.'
Verse: 11576    'saeligiu' sprach er 'umbe waz?'

Verse: 11577    'ir sluoget mînen oehein.'
Verse: 11578    'deist doch versüenet.' 'des al ein:

Verse: 11579    ir sît mir doch unmaere,
Verse: 11580    wan ich waere âne swaere

Verse: 11581    und âne sorge, enwaeret ir.
Verse: 11582    ir alterseine habet mir

Verse: 11583    disen kumber allen ûf geleit
Verse: 11584    mit pârât und mit kündekeit.

Verse: 11585    waz hât iuch mir ze schaden gesant
Verse: 11586    von Curnewâle in Îlant?

Verse: 11587    die mich von kinde hânt erzogen,
Verse: 11588    den habet ir mich nu an ertrogen

Verse: 11589    und vüeret mich, in weiz wâ hin.
Verse: 11590    ine weiz, wie ich verkoufet bin,

Verse: 11591    und enweiz ouch, waz mîn werden sol.'
Verse: 11592    'Nein schoene Îsôt, gehabet iuch wol.

Verse: 11593    jâ muget ir michel gerner sîn
Verse: 11594    in vremede ein rîchiu künigîn

Verse: 11595    dan in der künde arm unde swach.
Verse: 11596    in vremedem lande êre unde gemach

Verse: 11597    und schame in vater rîche,
Verse: 11598    diu smeckent ungelîche.'

Verse: 11599    'jâ meister Tristan' sprach diu maget
Verse: 11600    'ich naeme ê, swaz ir mir gesaget,

Verse: 11601    eine maezlîche sache
Verse: 11602    mit liebe und mit gemache

Verse: 11603    dan ungemach und arbeit
Verse: 11604    bî micheler rîcheit.'

Verse: 11605    'ir redet wâr' sprach Tristan;
Verse: 11606    'swâ man aber gehaben kan

Verse: 11607    die rîcheit bî gemache,
Verse: 11608    die saeligen zwô sache

Verse: 11609    die loufent baz gemeine
Verse: 11610    dan ietwedere al eine.

Verse: 11611    nu sprechet, waere ez dâ zuo komen,
Verse: 11612    dar ir müeset hân genomen

Verse: 11613    den truhsaezen ze manne,
Verse: 11614    wie vüere ez aber danne?

Verse: 11615    ich weiz wol, sô waeret ir vrô.
Verse: 11616    und danket ir mir danne alsô,

Verse: 11617    daz ich iu kam ze trôste
Verse: 11618    und iuch von ime erlôste?'

Verse: 11619    'des wirt iu spâte' sprach diu maget
Verse: 11620    von mir iemer danc gesaget.

Verse: 11621    wan lôstet ir mich von im dô,
Verse: 11622    ir habet mich aber sider sô

Verse: 11623    verclüteret mit swaere,
Verse: 11624    daz mir noch lieber waere

Verse: 11625    der truhsaeze ze man genomen,
Verse: 11626    dan ich mit iu waere ûz komen.

Verse: 11627    wan swie tugendelôs er sî,
Verse: 11628    waere er mir keine wîle bî,

Verse: 11629    er lieze sîne untugent durch mich.
Verse: 11630    got weiz, dar an erkante ouch ich,

Verse: 11631    daz ich im liep waere.'
Verse: 11632    Tristan sprach: 'disiu maere

Verse: 11633    sint mir ein âventiure.
Verse: 11634    daz wider der natiure

Verse: 11635    kein herze tugentlîche tuo,
Verse: 11636    dâ gehoeret michel arbeit zuo.

Verse: 11637    ez hât diu werlt vür eine lüge,
Verse: 11638    daz iemer unart g' arten müge.

Verse: 11639    schoeniu, gehabet ir iuch wol!
Verse: 11640    in kurzen zîten ich iu sol

Verse: 11641    einen künec ze hêrren geben,
Verse: 11642    an dem ir vröude und schoene leben,

Verse: 11643    guot unde tugent und êre
Verse: 11644    vindet iemer mêre.'

Verse: 11645    Hie mite strichen die kiele hin.
Verse: 11646    si beide haeten under in

Verse: 11647    guoten wint und guote var.
Verse: 11648    nu was diu vrouwîne schar,

Verse: 11649    Îsôt und ir gesinde,
Verse: 11650    in wazzer unde in winde

Verse: 11651    des ungevertes ungewon.
Verse: 11652    unlanges kâmen sî dâ von

Verse: 11653    in ungewonlîche nôt.
Verse: 11654    Tristan ir meister dô gebôt,

Verse: 11655    daz man ze lande schielte
Verse: 11656    und eine ruowe hielte.

Verse: 11657    nu man gelante in eine habe,
Verse: 11658    nu gie daz volc almeistic abe

Verse: 11659    durch banekîe ûz an daz lant.
Verse: 11660    nu gienc ouch Tristan zehant

Verse: 11661    begrüezen unde beschouwen
Verse: 11662    die liehten sîne vrouwen.

Verse: 11663    und alse er zuo z' ir nider gesaz
Verse: 11664    und redeten diz unde daz

Verse: 11665    von ir beider dingen,
Verse: 11666    er bat im trinken bringen.

Verse: 11667    Nune was dâ nieman inne
Verse: 11668    âne die küniginne

Verse: 11669    wan cleiniu juncvrouwelîn.
Verse: 11670    der einez sprach: 'seht, hie stât wîn

Verse: 11671    in disem vezzelîne.'
Verse: 11672    nein, ezn was niht mit wîne,

Verse: 11673    doch ez ime gelîch waere.
Verse: 11674    ez was diu wernde swaere,

Verse: 11675    diu endelôse herzenôt,
Verse: 11676    von der si beide lâgen tôt.

Verse: 11677    nu was aber ir daz unrekant.
Verse: 11678    si stuont ûf und gie hin zehant,

Verse: 11679    dâ daz tranc und daz glas
Verse: 11680    verborgen unde behalten was.

Verse: 11681    Tristande ir meister bôt si daz.
Verse: 11682    er bôt Îsôte vürbaz.

Verse: 11683    si tranc ungerne und über lanc
Verse: 11684    und gap dô Tristande unde er tranc

Verse: 11685    und wânden beide, ez waere wîn.
Verse: 11686    iemitten gienc ouch Brangaene în

Verse: 11687    unde erkande daz glas
Verse: 11688    und sach wol, waz der rede was.

Verse: 11689    si erschrac sô sêre unde erkam,
Verse: 11690    daz ez ir alle ir craft benam

Verse: 11691    und wart reht alse ein tôte var.
Verse: 11692    mit tôtem herzen gie si dar.

Verse: 11693    si nam daz leide veige vaz,
Verse: 11694    si truoc ez dannen und warf daz

Verse: 11695    in den tobenden wilden sê.
Verse: 11696    'owê mir armen!' sprach s' 'owê,

Verse: 11697    daz ich zer werlde ie wart geborn!
Verse: 11698    ich arme, wie hân ich verlorn

Verse: 11699    mîn êre und mîne triuwe!
Verse: 11700    daz ez got iemer riuwe,

Verse: 11701    daz ich an dise reise ie kam,
Verse: 11702    daz mich der tôt dô niht ennam,

Verse: 11703    dô ich an dise veige vart
Verse: 11704    mit Îsôt ie bescheiden wart!

Verse: 11705    ouwê Tristan unde Îsôt,
Verse: 11706    diz tranc ist iuwer beider tôt!'

Verse: 11707    Nu daz diu maget unde der man,
Verse: 11708    Îsôt unde Tristan,

Verse: 11709    den tranc getrunken beide, sâ
Verse: 11710    was ouch der werlde unmuoze dâ,

Verse: 11711    Minne, aller herzen lâgaerîn,
Verse: 11712    und sleich z' ir beider herzen în.

Verse: 11713    ê sî 's ie wurden gewar,
Verse: 11714    dô stiez s' ir sigevanen dar

Verse: 11715    und zôch si beide in ir gewalt.
Verse: 11716    si wurden ein und einvalt,

Verse: 11717    die zwei und zwîvalt wâren ê.
Verse: 11718    si zwei enwâren dô niemê

Verse: 11719    widerwertic under in.
Verse: 11720    Îsôte haz der was dô hin.

Verse: 11721    diu süenaerinne Minne
Verse: 11722    diu haete ir beider sinne

Verse: 11723    von hazze gereinet,
Verse: 11724    mit liebe alsô vereinet,

Verse: 11725    daz ietweder dem anderm was
Verse: 11726    durchlûter alse ein spiegelglas.

Verse: 11727    si haeten beide ein herze.
Verse: 11728    ir swaere was sîn smerze,

Verse: 11729    sîn smerze was ir swaere.
Verse: 11730    si wâren beide einbaere

Verse: 11731    an liebe unde an leide
Verse: 11732    und hâlen sich doch beide,

Verse: 11733    und tete daz zwîvel unde scham.
Verse: 11734    si schamte sich, er tete alsam;

Verse: 11735    si zwîvelte an im, er an ir.
Verse: 11736    swie blint ir beider herzen gir

Verse: 11737    an einem willen waere,
Verse: 11738    in was doch beiden swaere

Verse: 11739    der urhap unde der begin.
Verse: 11740    daz hal ir willen under in.

Verse: 11741    Tristan dô er der minne enpfant,
Verse: 11742    er gedâhte sâ zehant

Verse: 11743    der triuwen unde der êren
Verse: 11744    und wolte dannen kêren.

Verse: 11745    'nein' dâhte er allez wider sich
Verse: 11746    'lâ stân, Tristan, versinne dich,

Verse: 11747    niemer genim es keine war.'
Verse: 11748    sô wolte et ie daz herze dar.

Verse: 11749    wider sînem willen criegete er,
Verse: 11750    er gerte wider sîner ger.

Verse: 11751    er wolte dar und wolte dan.
Verse: 11752    der gevangene man

Verse: 11753    versuohte ez in dem stricke
Verse: 11754    ofte unde dicke

Verse: 11755    und was des lange staete.
Verse: 11756    der getriuwe der haete

Verse: 11757    zwei nâhe gêndiu ungemach:
Verse: 11758    swenne er ir under ougen sach,

Verse: 11759    und ime diu süeze Minne
Verse: 11760    sîn herze und sîne sinne

Verse: 11761    mit ir begunde sêren,
Verse: 11762    sô gedâhte er ie der Êren,

Verse: 11763    diu nam in danne dar van.
Verse: 11764    hie mite sô kêrte in aber an

Verse: 11765    Minne, sîn erbevogetîn.
Verse: 11766    der muose er aber gevolgec sîn.

Verse: 11767    in muoten harte sêre
Verse: 11768    sîn triuwe und sîn êre.

Verse: 11769    sô muote in aber diu Minne mê,
Verse: 11770    diu tete im wirs danne wê.

Verse: 11771    si tete im mê ze leide
Verse: 11772    dan Triuwe und Êre beide.

Verse: 11773    sîn herze sach si lachende an,
Verse: 11774    und nam sîn ouge der van.

Verse: 11775    als er ir aber niht ensach,
Verse: 11776    daz was sîn meistez ungemach.

Verse: 11777    dicke besatzte er sînen muot,
Verse: 11778    als der gevangene tuot,

Verse: 11779    wie er ir möhte entwenken,
Verse: 11780    und begunde ofte denken:

Verse: 11781    'kêre dar oder her,
Verse: 11782    verwandele dise ger,

Verse: 11783    minne und meine anderswâ!'
Verse: 11784    sô was ie dirre stric dâ.

Verse: 11785    er nam sîn herze und sînen sin
Verse: 11786    und suohte anderunge in in,

Verse: 11787    sone was ie niht dar inne
Verse: 11788    wan Îsôt unde Minne.

Verse: 11789    Alsam geschach Îsôte.
Verse: 11790    diu versuohte ez ouch genôte;

Verse: 11791    ir was diz leben ouch ande.
Verse: 11792    dô sî den lîm erkande

Verse: 11793    der gespenstegen minne
Verse: 11794    und sach wol, daz ir sinne

Verse: 11795    dar în versenket wâren,
Verse: 11796    si begunde stades vâren,

Verse: 11797    si wolte ûz unde dan.
Verse: 11798    sô clebete ir ie der lîm an.

Verse: 11799    der zôch si wider unde nider.
Verse: 11800    diu schoene strebete allez wider

Verse: 11801    und stuont an iegelîchem trite.
Verse: 11802    si volgete ungerne mite.

Verse: 11803    si versuohte ez manegen enden.
Verse: 11804    mit vüezen und mit henden

Verse: 11805    nam sî vil manege kêre
Verse: 11806    und versancte ie mêre

Verse: 11807    ir hende unde ir vüeze
Verse: 11808    in die blinden süeze

Verse: 11809    des mannes unde der minne.
Verse: 11810    ir gelîmeten sinne

Verse: 11811    die enkunden niender hin gewegen
Verse: 11812    noch gebrucken noch gestegen

Verse: 11813    halben vuoz noch halben trite,
Verse: 11814    Minne diu enwaere ie dâ mite.

Verse: 11815    Îsôt, swar sî gedâhte,
Verse: 11816    swaz gedanke sî vür brâhte,

Verse: 11817    sone was ie diz noch daz dar an
Verse: 11818    wan minne unde Tristan.

Verse: 11819    und was daz allez tougen.
Verse: 11820    ir herze unde ir ougen

Verse: 11821    diu missehullen under in.
Verse: 11822    diu scham diu jagete ir ougen hin,

Verse: 11823    diu minne zôch ir herze dar.
Verse: 11824    diu widerwertige schar

Verse: 11825    maget unde man, minne unde scham,
Verse: 11826    diu was an ir sêre irresam.

Verse: 11827    diu maget diu wolte den man
Verse: 11828    und warf ir ougen der van.

Verse: 11829    diu scham diu wolte minnen
Verse: 11830    und brâhte es nieman innen.

Verse: 11831    waz truoc daz vür? scham unde maget,
Verse: 11832    als al diu werlt gemeine saget,

Verse: 11833    diu sint ein alsô haele dinc,
Verse: 11834    sô kurze wernde ein ursprinc:

Verse: 11835    sine habent sich niht lange wider.
Verse: 11836    Îsôt diu leite ir criec der nider

Verse: 11837    und tete, als ez ir was gewant.
Verse: 11838    diu sigelôse ergap zehant

Verse: 11839    ir lîp unde ir sinne
Verse: 11840    dem manne unde der minne.

Verse: 11841    si blicte underwîlen dar
Verse: 11842    und nam sîn tougenlîche war.

Verse: 11843    ir clâren ougen unde ir sin
Verse: 11844    diu gehullen dô wol under in.

Verse: 11845    ir herze unde ir ougen
Verse: 11846    diu schâcheten vil tougen

Verse: 11847    und lieplîchen an den man.
Verse: 11848    der man der sach si wider an

Verse: 11849    suoze und inneclîchen,
Verse: 11850    er begunde ouch entwîchen

Verse: 11851    do 's in diu minne niht erlie.
Verse: 11852    man unde maget si gâben ie

Verse: 11853    ze iegelîchen stunden,
Verse: 11854    sô sî mit vuogen kunden,

Verse: 11855    ein ander ougenweide.
Verse: 11856    die gelieben dûhten beide

Verse: 11857    ein ander schoener vil dan ê.
Verse: 11858    deist liebe reht, deist minnen ê.

Verse: 11859    ez ist hiure und was ouch vert
Verse: 11860    und ist, die wîle minne wert,

Verse: 11861    under gelieben allen,
Verse: 11862    daz s' ein ander baz gevallen,

Verse: 11863    sô liebe an in wahsende wirt,
Verse: 11864    die bluomen unde den wuocher birt

Verse: 11865    lieplîcher dinge,
Verse: 11866    dan an dem urspringe.

Verse: 11867    diu wuocherhafte minne
Verse: 11868    diu schoenet nâch beginne:

Verse: 11869    daz ist der sâme, den si hât,
Verse: 11870    von dem si niemer zegât.

Verse: 11871    Si dunket schoener sît dan ê.
Verse: 11872    dâ von sô tûret minnen ê.

Verse: 11873    diuhte minne sît als ê,
Verse: 11874    sô zegienge schiere minnen ê.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.