TITUS
Gottfried von Strassburg, Tristan
Part No. 17
Previous part

Chapter: 17 
17: Das Geständniss


Verse: 11875    Die kiele stiezen aber an
Verse: 11876    und vuoren vrôlîche dan,

Verse: 11877    wan alse vil daz Minne
Verse: 11878    zwei herze dar inne

Verse: 11879    von ir strâze haete brâht.
Verse: 11880    diu zwei diu wâren verdâht,

Verse: 11881    bekumberet beide
Verse: 11882    mit dem lieben leide,

Verse: 11883    daz solhiu wunder stellet.
Verse: 11884    daz honegende gellet,

Verse: 11885    daz süezende siuret,
Verse: 11886    daz touwende viuret,

Verse: 11887    daz senftende smerzet,
Verse: 11888    daz elliu herze entherzet

Verse: 11889    und al die werlt verkêret.
Verse: 11890    daz haete sî versêret,

Verse: 11891    Tristanden unde Îsôte.
Verse: 11892    si twanc ein nôt genôte

Verse: 11893    und in seltsaener ahte:
Verse: 11894    ir dewederez enmahte

Verse: 11895    gehaben ruowe noch gemach,
Verse: 11896    wan sô ez daz andere sach.

Verse: 11897    sô s' aber ein ander sâhen,
Verse: 11898    daz gieng in aber nâhen,

Verse: 11899    wan sî enmohten under in zwein
Verse: 11900    ir willen niht gehaben in ein.

Verse: 11901    daz geschuof diu vremede und diu scham,
Verse: 11902    diu in ir wunne benam.

Verse: 11903    so s' eteswenne tougen
Verse: 11904    mit gelîmeten ougen

Verse: 11905    ein ander solten nemen war,
Verse: 11906    sô wart ir lîch gelîche var

Verse: 11907    dem herzen unde dem sinne.
Verse: 11908    Minne die verwaerinne

Verse: 11909    die endûhte es niht dâ mite genuoc,
Verse: 11910    daz man s' in edelen herzen truoc

Verse: 11911    verholne unde tougen,
Verse: 11912    sine wolte under ougen

Verse: 11913    ouch offenbaeren ir gewalt.
Verse: 11914    der was an in zwein manicvalt.

Verse: 11915    unlange in ein ir varwe schein.
Verse: 11916    ir varwe schein unlange in ein.

Verse: 11917    si wehselten genôte
Verse: 11918    bleich wider rôte;

Verse: 11919    si wurden rôt unde bleich,
Verse: 11920    als ez diu Minne in understreich.

Verse: 11921    hie mite erkande ietwederez wol,
Verse: 11922    als man an solhen dingen sol,

Verse: 11923    daz eteswaz von minnen
Verse: 11924    in ietwederes sinnen

Verse: 11925    zem anderen was gewant,
Verse: 11926    unde begunden ouch zehant

Verse: 11927    lieplîche in ein gebâren,
Verse: 11928    zît unde state vâren

Verse: 11929    ir rûne unde ir maere.
Verse: 11930    der minnen wildenaere

Verse: 11931    leiten ein ander dicke
Verse: 11932    ir netze unde ir stricke,

Verse: 11933    ir warte unde ir lâge
Verse: 11934    mit antwürte und mit vrâge.

Verse: 11935    si triben vil maere under in.
Verse: 11936    Îsôte rede und ir begin

Verse: 11937    daz was vil rehte in megede wîs.
Verse: 11938    si kam ir trût und ir amîs

Verse: 11939    alumbe her von verren an.
Verse: 11940    von ende mante s' in her dan,

Verse: 11941    wie er ze Develîne
Verse: 11942    in einem schiffelîne

Verse: 11943    gevlozzen wunt und eine kam,
Verse: 11944    wie in ir muoter an sich nam

Verse: 11945    und wie s' in ouch generte.
Verse: 11946    von allem dem geverte,

Verse: 11947    wie si selbe in sîner pflege
Verse: 11948    schrîben lernete alle wege,

Verse: 11949    latîne unde seitspil.
Verse: 11950    der umberede der was vil,

Verse: 11951    die s' ime vür ougen leite
Verse: 11952    von sîner manheite

Verse: 11953    und ouch von dem serpande.
Verse: 11954    und wie s' in zwirnt erkande

Verse: 11955    in dem mose und in dem bade.
Verse: 11956    diu rede was under in gerade,

Verse: 11957    si seite ime und er seite ir.
Verse: 11958    'â' sprach Îsôt 'dô ez sich mir

Verse: 11959    ze alsô guoten staten getruoc,
Verse: 11960    daz ich iuch in dem bade niht sluoc,

Verse: 11961    got hêrre, wie gewarb ich sô!
Verse: 11962    daz ich nu weiz, wiste ich ez dô,

Verse: 11963    binamen sô waere ez iuwer tôt.'
Verse: 11964    'war umbe' sprach er 'schoene Îsôt?

Verse: 11965    waz wirret iu? waz wizzet ir?'
Verse: 11966    'swaz ich weiz, daz wirret mir.

Verse: 11967    swaz ich sihe, daz tuot mir wê.
Verse: 11968    mich müejet himel unde sê.

Verse: 11969    lîp unde leben daz swaeret mich.'
Verse: 11970    si stiurte unde leinde sich

Verse: 11971    mit ir ellebogen an in.
Verse: 11972    daz was der belde ein begin.

Verse: 11973    ir spiegelliehten ougen
Verse: 11974    diu volleten tougen.

Verse: 11975    ir begunde ir herze quellen,
Verse: 11976    ir süezer munt ûf swellen,

Verse: 11977    ir houbet daz wac allez nider.
Verse: 11978    ir vriunt begunde ouch sî dar wider

Verse: 11979    mit armen umbevâhen,
Verse: 11980    ze verre noch ze nâhen,

Verse: 11981    niwan in gastes wîse.
Verse: 11982    er sprach suoze unde lîse:

Verse: 11983    'ei schoene süeze, saget mir:
Verse: 11984    waz wirret iu, waz claget ir?'

Verse: 11985    Der Minnen vederspil Îsôt,
Verse: 11986    'lameir' sprach sî 'daz ist mîn nôt,

Verse: 11987    lameir daz swaeret mir den muot,
Verse: 11988    lameir ist, daz mir leide tuot.'

Verse: 11989    dô sî lameir sô dicke sprach,
Verse: 11990    er bedâhte unde besach

Verse: 11991    anclîchen unde cleine
Verse: 11992    des selben wortes meine.

Verse: 11993    sus begunde er sich versinnen,
Verse: 11994    l' ameir daz waere minnen,

Verse: 11995    l' ameir bitter, la meir mer.
Verse: 11996    der meine der dûhte in ein her.

Verse: 11997    er übersach der drîer ein
Verse: 11998    unde vrâgete von den zwein.

Verse: 11999    er versweic die minne,
Verse: 12000    ir beider vogetinne,

Verse: 12001    ir beider trôst, ir beider ger.
Verse: 12002    mer unde sûr beredete er.

Verse: 12003    'ich waene' sprach er 'schoene Îsôt,
Verse: 12004    mer unde sûr sint iuwer nôt.

Verse: 12005    iu smecket mer unde wint.
Verse: 12006    ich waene, iu diu zwei bitter sint?'

Verse: 12007    'nein hêrre, nein! waz saget ir?
Verse: 12008    der dewederez wirret mir,

Verse: 12009    mirn smecket weder luft noch sê.
Verse: 12010    lameir al eine tuot mir wê.'

Verse: 12011    dô er des wortes z' ende kam,
Verse: 12012    minne dar inne vernam,

Verse: 12013    er sprach vil tougenlîche z' ir:
Verse: 12014    'entriuwen, schoene, als ist ouch mir,

Verse: 12015    lameir und ir, ir sît mîn nôt.
Verse: 12016    herzevrouwe, liebe Îsôt,

Verse: 12017    ir eine und iuwer minne
Verse: 12018    ir habet mir mîne sinne

Verse: 12019    gâr verkêret unde benomen,
Verse: 12020    ich bin ûzer wege komen

Verse: 12021    sô starke und alsô sêre:
Verse: 12022    in erhol mich niemer mêre.

Verse: 12023    mich müejet und mich swaeret,
Verse: 12024    mir swachet unde unmaeret

Verse: 12025    allez, daz mîn ouge siht.
Verse: 12026    in al der werlde enist mir niht

Verse: 12027    in mînem herzen liep wan ir.'
Verse: 12028    Îsôt sprach: 'hêrre, als sît ir mir.'

Verse: 12029    Dô die gelieben under in
Verse: 12030    beide erkanden einen sin,

Verse: 12031    ein herze und einen willen,
Verse: 12032    ez begunde in beidiu stillen

Verse: 12033    und offenen ir ungemach.
Verse: 12034    ietwederez sach unde sprach

Verse: 12035    daz ander beltlîcher an:
Verse: 12036    der man die maget, diu maget den man.

Verse: 12037    vremede under in diu was dô hin.
Verse: 12038    er kuste sî und sî kust in

Verse: 12039    lieplîchen unde suoze.
Verse: 12040    daz was der minnen buoze

Verse: 12041    ein saeleclîcher anevanc.
Verse: 12042    ietwederez schancte unde tranc

Verse: 12043    die süeze, diu von herzen gie.
Verse: 12044    sô sî die state gewunnen ie,

Verse: 12045    sô gie der wehsel under in
Verse: 12046    slîchende her unde hin

Verse: 12047    vil tougenlîchen unde alsô,
Verse: 12048    daz nieman in der werlde dô

Verse: 12049    ir willen unde ir muot bevant
Verse: 12050    wan sî, der er doch was bekant:

Verse: 12051    Brangaene diu wîse.
Verse: 12052    diu blickete dicke lîse

Verse: 12053    und vil tougenlîche dar
Verse: 12054    und nam ir tougenheite war

Verse: 12055    und dâhte dicke wider sich:
Verse: 12056    'ouwê, nû verstân ich mich,

Verse: 12057    diu minne hebet mit disen an.'
Verse: 12058    vil schiere wart, daz sî began

Verse: 12059    den ernest an in beiden sehen
Verse: 12060    und ûzen an ir lîbe spehen

Verse: 12061    den inneren smerzen
Verse: 12062    ir muotes unde ir herzen.

Verse: 12063    si muote ir beider ungemach,
Verse: 12064    wan sî si z' allen zîten sach

Verse: 12065    ameiren unde amûren,
Verse: 12066    siuften unde trûren,

Verse: 12067    trahten und pansieren,
Verse: 12068    ir varwe wandelieren.

Verse: 12069    sin genâmen nie vor trahte war
Verse: 12070    dekeiner slahte lîpnar,

Verse: 12071    biz sî der mangel und daz leit
Verse: 12072    an dem lîbe als überstreit,

Verse: 12073    daz es Brangaenen angest nam
Verse: 12074    und in die vorhte dâ von kam,

Verse: 12075    ez waere ir beider ende,
Verse: 12076    und dâhte: 'nû genende,

Verse: 12077    ervar, waz dirre maere sî!'
Verse: 12078    Si gesaz in eines tages bî

Verse: 12079    heinlîchen unde lîse.
Verse: 12080    diu stolze, diu wîse

Verse: 12081    'hie ist nieman' sprach si 'wan wir driu.
Verse: 12082    saget mir ir zwei, waz wirret iu?

Verse: 12083    ich sihe iuch z' allen stunden
Verse: 12084    mit trahte gebunden,

Verse: 12085    siuften, trûren unde clagen.'
Verse: 12086    'höfschiu, getörste ich 'z iu gesagen,

Verse: 12087    ich sagete ez iu' sprach Tristan.
Verse: 12088    'jâ hêrre, vil wol: sprechet an;

Verse: 12089    swaz ir welt, daz saget mir!'
Verse: 12090    'saeligiu guotiu' sprach er z' ir

Verse: 12091    'in getar niht sprechen vürbaz,
Verse: 12092    irn gewisset uns ê daz

Verse: 12093    mit triuwen und mit eiden,
Verse: 12094    daz ir uns armen beiden

Verse: 12095    guot unde genaedic wellet wesen.
Verse: 12096    anders sô sîn wir ungenesen.'

Verse: 12097    Brangaene bôt ir triuwe hin.
Verse: 12098    si gelobete unde gewissete in

Verse: 12099    mit ir triuwen und mit gote
Verse: 12100    ze lebene nâch ir gebote.

Verse: 12101    'getriuwiu guotiu' sprach Tristan
Verse: 12102    'nu sehet got ze vorderst an

Verse: 12103    und dar nâch iuwer saelekeit.
Verse: 12104    bedenket unser zweier leit

Verse: 12105    und unser angestlîche nôt.
Verse: 12106    ich armer und diu arme Îsôt,

Verse: 12107    ine weiz wie 'z uns ergangen ist,
Verse: 12108    wir zwei wir sîn in kurzer vrist

Verse: 12109    unsinnic worden beide
Verse: 12110    mit wunderlîchem leide.

Verse: 12111    wir sterben von minnen
Verse: 12112    und enkunnen niht gewinnen

Verse: 12113    weder zît noch state dar zuo,
Verse: 12114    ir irret uns spâte unde vruo.

Verse: 12115    und sicherlîche: sterben wir,
Verse: 12116    dâst nieman schuldic an wan ir.

Verse: 12117    unser tôt und unser leben
Verse: 12118    diu sint in iuwer hant gegeben.

Verse: 12119    hie mite ist iu genuoc gesaget.
Verse: 12120    Brangaene, saeligiu maget,

Verse: 12121    nu helfet unde genâdet ir
Verse: 12122    iuwerre vrouwen unde mir!'

Verse: 12123    Brangaene wider Îsôte sprach:
Verse: 12124    'vrouwe, ist iuwer ungemach,

Verse: 12125    als er dâ giht, von solher nôt?'
Verse: 12126    'jâ herzeniftel!' sprach Îsôt.

Verse: 12127    Brangaene sprach: 'daz riuwe got,
Verse: 12128    daz der vâlant sînen spot

Verse: 12129    mit uns alsus gemachet hât!
Verse: 12130    nu sihe ich wol, es ist niht rât,

Verse: 12131    ine müeze durch iuch beide
Verse: 12132    mir selber nâch leide

Verse: 12133    und iu nâch laster werben.
Verse: 12134    ê ich iuch lâze sterben,

Verse: 12135    ich wil iu guote state ê lân,
Verse: 12136    swes ir wellet ane gân.

Verse: 12137    durch mich enlât niemêre,
Verse: 12138    swes ir durch iuwer êre

Verse: 12139    niht gerne wellet lâzen.
Verse: 12140    swâ ir iuch aber gemâzen

Verse: 12141    und enthaben muget an dirre tât,
Verse: 12142    dâ enthabet iuch, daz ist mîn rât.

Verse: 12143    lât diz laster under uns drîn
Verse: 12144    verswigen unde beliben sîn.

Verse: 12145    breitet ir 'z iht mêre,
Verse: 12146    ez gât an iuwer êre.

Verse: 12147    ervert ez ieman âne uns driu,
Verse: 12148    ir sît verlorn und ich mit iu.

Verse: 12149    herzevrouwe, schoene Îsôt,
Verse: 12150    iuwer leben und iuwer tôt

Verse: 12151    diu sîn in iuwer pflege ergeben.
Verse: 12152    leitet tôt unde leben,

Verse: 12153    als iu ze muote gestê.
Verse: 12154    nâch dirre zît enhabet niemê

Verse: 12155    dekeine vorhte her ze mir.
Verse: 12156    swaz iu gevalle, daz tuot ir.'

Verse: 12157    Des nahtes, dô diu schoene lac,
Verse: 12158    ir triure unde ir trahte pflac

Verse: 12159    nâch ir trûtamîse,
Verse: 12160    nu kam geslichen lîse

Verse: 12161    zuo der kemenâten în
Verse: 12162    ir amîs unde ir arzatîn,

Verse: 12163    Tristan und diu Minne.
Verse: 12164    Minne diu arzatinne

Verse: 12165    si vuorte ze handen
Verse: 12166    ir siechen Tristanden.

Verse: 12167    ouch vant s' Îsôte ir siechen dâ.
Verse: 12168    die siechen beide nam si sâ

Verse: 12169    und gab in ir, im sîe
Verse: 12170    ein ander z' arzatîe.

Verse: 12171    wer haete ouch dise beide
Verse: 12172    von dem gemeinem leide

Verse: 12173    vereinet unde bescheiden
Verse: 12174    wan einunge an in beiden,

Verse: 12175    der stric ir beider sinne?
Verse: 12176    Minne diu strickaerinne

Verse: 12177    diu stricte zwei herze an in zwein
Verse: 12178    mit dem stricke ir süeze in ein

Verse: 12179    mit alsô grôzer meisterschaft,
Verse: 12180    mit alsô wunderlîcher craft,

Verse: 12181    daz si unreloeset wâren
Verse: 12182    in allen ir jâren.

Verse: 12183    Ein langiu rede von minnen
Verse: 12184    diu swaeret höfschen sinnen.

Verse: 12185    kurz rede von guoten minnen
Verse: 12186    diu guotet guoten sinnen.

Verse: 12187    Swie lützel ich in mînen tagen
Verse: 12188    des lieben leides habe getragen,

Verse: 12189    des senften herzesmerzen,
Verse: 12190    der innerhalp des herzen

Verse: 12191    sô rehte sanfte unsanfte tuot,
Verse: 12192    mir wîsaget doch mîn muot,

Verse: 12193    des ich im wol gelouben sol,
Verse: 12194    den zwein gelieben waere wol

Verse: 12195    und sanfte in ir muote,
Verse: 12196    dô sî die leiden huote,

Verse: 12197    die wâren suht der minne,
Verse: 12198    der Minnen vîendinne

Verse: 12199    von ir stîgen haeten brâht.
Verse: 12200    ich hân von in zwein vil gedâht

Verse: 12201    und gedenke hiute und alle tage.
Verse: 12202    swenne ich liebe und senede clage

Verse: 12203    vür mîniu ougen breite
Verse: 12204    und ir gelegenheite

Verse: 12205    in mînem herzen ahte,
Verse: 12206    sô wahsent mîne trahte

Verse: 12207    und muot, mîn hergeselle,
Verse: 12208    als er in diu wolken welle.

Verse: 12209    swenne ich bedenke sunder
Verse: 12210    daz wunder und daz wunder,

Verse: 12211    daz man an liebe vünde,
Verse: 12212    der ez gesuochen künde;

Verse: 12213    waz vröude an liebe laege,
Verse: 12214    der ir mit triuwen pflaege:

Verse: 12215    sô wirt mîn herze sâ zestunt
Verse: 12216    groezer danne Setmunt

Verse: 12217    und erbarmet mich diu minne
Verse: 12218    von allem mînem sinne,

Verse: 12219    daz meistic alle, die der lebent,
Verse: 12220    an minnen hangent unde clebent

Verse: 12221    und ir doch nieman rehte tuot.
Verse: 12222    wir wellen alle haben muot

Verse: 12223    und mit minnen umbe gân.
Verse: 12224    nein, minne ist niht alsô getân,

Verse: 12225    als wir s' ein ander machen
Verse: 12226    mit velschlîchen sachen.

Verse: 12227    wir nemen der dinge unrehte war.
Verse: 12228    wir saejen bilsensâmen dar

Verse: 12229    und wellen danne, daz uns der
Verse: 12230    liljen unde rôsen ber.

Verse: 12231    entriuwen des mac niht gewesen.
Verse: 12232    wir müezen daz her wider lesen,

Verse: 12233    daz dâ vor gewerket wirt,
Verse: 12234    und nemen, daz uns der sâme birt.

Verse: 12235    wir müezen snîden unde maen
Verse: 12236    daz selbe, daz wir dar gesaen.

Verse: 12237    wir bûwen die minne
Verse: 12238    mit gegelletem sinne,

Verse: 12239    mit valsche und mit âkust
Verse: 12240    und suochen danne an ir die lust

Verse: 12241    des lîbes unde des herzen.
Verse: 12242    sone birt si niuwan smerzen,

Verse: 12243    unguot und unvruht unde unart,
Verse: 12244    als ez an ir gebûwen wart.

Verse: 12245    als ez uns danne riuwe birt
Verse: 12246    und innerthalp des herzen swirt

Verse: 12247    und toetet uns dar inne,
Verse: 12248    sô zîhen wir 's die minne

Verse: 12249    und schuldegen sî dar an,
Verse: 12250    diu schulde nie dar an gewan.

Verse: 12251    wir saejen alle valscheit,
Verse: 12252    sô snîden laster unde leit.

Verse: 12253    tuo uns daz leit iht sêre wê,
Verse: 12254    sô bedenken ez ê:

Verse: 12255    saejen bezzer unde baz
Verse: 12256    unde snîden ouch daz.

Verse: 12257    wir, die zer werlde haben muot,
Verse: 12258    swie sô er sî boese oder guot,

Verse: 12259    wie tuon wir unseren tagen,
Verse: 12260    die wir vertrîben und verjagen

Verse: 12261    in dem namen der minne
Verse: 12262    und vinden niht dar inne

Verse: 12263    niwan die selben arbeit,
Verse: 12264    die wir haben an sî geleit:

Verse: 12265    misselinge und ungeschiht!
Verse: 12266    des guoten vinde wir dâ niht,

Verse: 12267    des unser iegelîcher gert
Verse: 12268    und des wir alle sîn entwert:

Verse: 12269    daz ist der staete vriundes muot,
Verse: 12270    der staeteclîche sanfte tuot,

Verse: 12271    der die rôsen bî dem dorne treit,
Verse: 12272    die senfte bî der arbeit;

Verse: 12273    an dem ie lît verborgen
Verse: 12274    diu wunne bî den sorgen;

Verse: 12275    der an dem ende ie vröude birt,
Verse: 12276    als ofte als er beswaeret wirt.

Verse: 12277    den vindet lützel ieman nuo;
Verse: 12278    alsô vorwerke wir dar zuo.

Verse: 12279    Ez ist vil wâr, daz man dâ saget:
Verse: 12280    'Minne ist getriben unde gejaget

Verse: 12281    in den endelesten ort.'
Verse: 12282    wirn haben an ir niwan daz wort.

Verse: 12283    uns ist niwan der name beliben
Verse: 12284    und han ouch den alsô zetriben,

Verse: 12285    alsô verwortet und vernamet,
Verse: 12286    daz sich diu müede ir namen schamet

Verse: 12287    und ir daz wort unmaeret.
Verse: 12288    si swachet unde swaeret

Verse: 12289    ir selber ûf der erde.
Verse: 12290    diu êrelôse unwerde,

Verse: 12291    si slîchet under hûsen biten
Verse: 12292    und treit von lasterlîchen siten

Verse: 12293    gemanicvaltet einen sac,
Verse: 12294    in dem s' ir diube und ir bejac

Verse: 12295    ir selbes munde verseit
Verse: 12296    und ez ze strâze veile treit.

Verse: 12297    ôwê! den market schaffen wir.
Verse: 12298    daz wunder trîbe wir mit ir

Verse: 12299    und wellen des unschuldic sîn.
Verse: 12300    Minne, aller herzen künigîn,

Verse: 12301    diu vrîe, diu eine
Verse: 12302    diu ist umbe kouf gemeine!

Verse: 12303    wie habe wir unser hêrschaft
Verse: 12304    an ir gemachet zinshaft!

Verse: 12305    wir haben ein boese conterfeit
Verse: 12306    in daz vingerlîn geleit

Verse: 12307    und triegen uns dâ selbe mite.
Verse: 12308    ez ist ein armer trügesite,

Verse: 12309    der vriunden alsô liuget,
Verse: 12310    daz er sich selben triuget.

Verse: 12311    wir valschen minnaere,
Verse: 12312    der Minnen trügenaere,

Verse: 12313    wie vergânt uns unser tage,
Verse: 12314    daz wir unserre clage

Verse: 12315    sô selten liebez ende geben!
Verse: 12316    wie vertuon wir unser leben

Verse: 12317    âne liep und âne guot!
Verse: 12318    nu gît uns doch daz guoten muot,

Verse: 12319    daz uns ze nihte bestât.
Verse: 12320    swaz ieman schoener maere hât

Verse: 12321    von vriuntlîchen dingen,
Verse: 12322    swaz wir mit rede vür bringen

Verse: 12323    von den, die wîlent wâren
Verse: 12324    vor manegen hundert jâren,

Verse: 12325    daz tuot uns in dem herzen wol
Verse: 12326    und sîn der selben state sô vol,

Verse: 12327    daz lützel ieman waere
Verse: 12328    getriuwe unde gewaere

Verse: 12329    und wider den vriunt âne âkust,
Verse: 12330    ern möhte sus getâne lust

Verse: 12331    von sîn selbes sachen
Verse: 12332    in sînem herzen machen.

Verse: 12333    wan uns daz selbe z' aller zît
Verse: 12334    mit jâmer under vüezen lît,

Verse: 12335    dâ von ez allez ûf erstât:
Verse: 12336    deist triuwe, diu von herzen gât.

Verse: 12337    diu treit sich uns vergebene an.
Verse: 12338    sô kêre wir daz ouge dan

Verse: 12339    und trîben die süezen
Verse: 12340    unruochlîch under vüezen.

Verse: 12341    wir haben si mit unwerde
Verse: 12342    vertreten in der erde.

Verse: 12343    ob wir si gerne suohten dâ,
Verse: 12344    wirn wizzen alles gâhes wâ.

Verse: 12345    sô guot, sô lônbaere
Verse: 12346    triuwe under vriunden waere,

Verse: 12347    war umbe lieben wir si niht?
Verse: 12348    ein blic, ein inneclîch gesiht

Verse: 12349    ûz herzeliebes ougen,
Verse: 12350    der leschet âne lougen

Verse: 12351    hundert tûsent smerzen
Verse: 12352    des lîbes unde des herzen.

Verse: 12353    ein kus in liebes munde,
Verse: 12354    der von des herzen grunde

Verse: 12355    her ûf geslichen kaeme,
Verse: 12356    ôhî waz der benaeme

Verse: 12357    seneder sorge und herzenôt!
Verse: 12358    Ich weiz wol, Tristan unde Îsôt,

Verse: 12359    die gebitelôsen beide
Verse: 12360    benâmen ouch ir leide

Verse: 12361    unde ir triure ein ander vil,
Verse: 12362    dô sî begriffen daz zil

Verse: 12363    gemeines willen under in.
Verse: 12364    jener gelange was dô hin,

Verse: 12365    der die gedanken anget.
Verse: 12366    swes gelieben gelanget,

Verse: 12367    des triben s' under in genuoc,
Verse: 12368    sô sich diu zît alsô getruoc.

Verse: 12369    sô sî z' ir state kâmen,
Verse: 12370    si gâben unde nâmen

Verse: 12371    mit getriuwelîchem sinne
Verse: 12372    in selben unde der minne

Verse: 12373    willegen zins unde zol.
Verse: 12374    in was vil inneclîche wol

Verse: 12375    an der reise und an der vart.
Verse: 12376    dô diu vremede hine wart,

Verse: 12377    dô was ir heinlîche
Verse: 12378    rîlîch unde rîche.

Verse: 12379    und was daz wîsheit unde sin.
Verse: 12380    wan die sich helent under in,

Verse: 12381    sît daz si sich enbârent
Verse: 12382    und danne ir schame vârent

Verse: 12383    und gestent sich an liebe,
Verse: 12384    die sint ir selber diebe.

Verse: 12385    sô sî sich danne ie mêre helent,
Verse: 12386    sô s' ie mêre in selben stelent

Verse: 12387    und mischent liep mit leide.
Verse: 12388    dise gelieben beide

Verse: 12389    die enhâlen sich ze nihte.
Verse: 12390    mit rede und mit gesihte

Verse: 12391    wâren si heinlîch under in.
Verse: 12392    Sus triben sî die reise hin

Verse: 12393    mit wunneclîchem lebene
Verse: 12394    und doch niht gâr vergebene:

Verse: 12395    in tete diu vorvorhte wê.
Verse: 12396    sî bevorhten daz ê

Verse: 12397    dâ ez ouch sider zuo kam,
Verse: 12398    daz in sît vröude vil benam

Verse: 12399    und brâhte sî ze maneger nôt:
Verse: 12400    daz was daz, daz diu schoene Îsôt

Verse: 12401    dem manne werden solte,
Verse: 12402    dem sî niht werden wolte.

Verse: 12403    ouch twanc si beidiu noch ein leit:
Verse: 12404    daz was Îsôte wîpheit.

Verse: 12405    hier umbe was in leide.
Verse: 12406    diz leidete si beide.

Verse: 12407    doch was in disiu swaere
Verse: 12408    lîht unde tragebaere,

Verse: 12409    wan sî ir willen under in zwein
Verse: 12410    vrîlîche haeten in ein

Verse: 12411    dicke und ze manegem mâle.
Verse: 12412    nu daz si Curnewâle

Verse: 12413    gevuoren alsô nâhen,
Verse: 12414    daz sî daz lant wol sâhen,

Verse: 12415    des vröuten sî sich alle dô.
Verse: 12416    si wâren sîn alle vrô

Verse: 12417    wan eine Tristan unde Îsôt.
Verse: 12418    der angest was ez unde ir nôt.

Verse: 12419    der wille waere der geschehen,
Verse: 12420    sine haeten niemer lant gesehen.

Verse: 12421    diu vorhte ir beider êren
Verse: 12422    diu begunde ir herze sêren.

Verse: 12423    sine kunden sich berâten nie,
Verse: 12424    waz sî getaeten oder wie,

Verse: 12425    daz Îsôte wîpheit
Verse: 12426    dem künege würde verseit.

Verse: 12427    und doch swie unrâtbaere
Verse: 12428    kindesche minnaere

Verse: 12429    in ir kintheite sint,
Verse: 12430    der rât geviel doch an daz kint.

Verse: 12431    Sô minne an tumben kinden
Verse: 12432    ir spil gerâtet vinden,

Verse: 12433    sô muge wir an den kinden
Verse: 12434    witze unde liste vinden.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.