TITUS
Gottfried von Strassburg, Tristan
Part No. 18
Previous part

Chapter: 18 
18: Brangäne


Verse: 12435    Lange umberede sî hin geleit:
Verse: 12436    Îsôt vant in ir kintheit

Verse: 12437    eine witze und einen list,
Verse: 12438    den allerbesten zuo der vrist:

Verse: 12439    daz sî niemêre taeten,
Verse: 12440    niwan Brangaenen baeten,

Verse: 12441    daz si an der êrsten naht
Verse: 12442    sunder rede und sunder braht

Verse: 12443    bî Marke ir hêrren laege,
Verse: 12444    geselleschefte im pflaege.

Verse: 12445    ezn würde im niemer baz entsaget,
Verse: 12446    wan sî was schoene und was ouch maget.

Verse: 12447    alsus sô lêret minne
Verse: 12448    durnehteclîche sinne

Verse: 12449    ze valsche sîn vervlizzen,
Verse: 12450    die doch niht solten wizzen,

Verse: 12451    waz ze sus getâner trüge
Verse: 12452    und ze valscheit gezüge.

Verse: 12453    die gelieben alsô tâten:
Verse: 12454    Brangaenen sî bâten

Verse: 12455    alse lange und alsô vil,
Verse: 12456    biz sî si brâhten ûf daz zil,

Verse: 12457    daz s' in zer urtaete
Verse: 12458    gelobete, daz siz taete.

Verse: 12459    und lobete ez ouch mit maneger nôt.
Verse: 12460    sine wart niht z' einem mâle rôt

Verse: 12461    und missevar von dirre bete,
Verse: 12462    als ez ir michel nôt tete.

Verse: 12463    diu bete was ouch seltsaene.
Verse: 12464    'trût vrouwe' sprach Brangaene

Verse: 12465    'iuwer muoter, diu vrouwe mîn,
Verse: 12466    diu saelige künigîn

Verse: 12467    diu bevalch iuch mir in mîne pflege
Verse: 12468    und solte iuch selbe an disem wege

Verse: 12469    unde an dirre veigen vart
Verse: 12470    vor disem leide haben bewart.

Verse: 12471    nu habet ir laster unde leit
Verse: 12472    von mîner warlôsekeit.

Verse: 12473    von diu darf ich ez mâze clagen,
Verse: 12474    muoz ich daz laster mit iu tragen,

Verse: 12475    und waere ouch wol gevüege,
Verse: 12476    daz ich ez eine trüege,

Verse: 12477    möhtet ir dâ von gesîn.
Verse: 12478    genaedeclîcher trehtîn,

Verse: 12479    wie vergaeze dû mîn sô!'
Verse: 12480    Îsôt sprach zuo Brangaenen dô:

Verse: 12481    'stolziu niftel, sage mir,
Verse: 12482    waz meinestû, waz wirret dir?

Verse: 12483    mich wundert sêre, waz tu clages.'
Verse: 12484    'vrouwe, dâ warf ich anders tages

Verse: 12485    ûz dem schiffe ein glasevaz.'
Verse: 12486    'sô taete dû, waz wirret daz?'

Verse: 12487    'owî!' sprach sî 'daz selbe glas
Verse: 12488    und der tranc, der dar inne was,

Verse: 12489    der ist iuwer beider tôt.'
Verse: 12490    'war umbe, niftel?' sprach Îsôt

Verse: 12491    'wie ist disem maere?' 'im ist alsô.'
Verse: 12492    Brangaene seite in beiden dô

Verse: 12493    die rede von ende her dan.
Verse: 12494    'nu walte es got!' sprach Tristan

Verse: 12495    'ez waere tôt oder leben:
Verse: 12496    ez hât mir sanfte vergeben.

Verse: 12497    ine weiz, wie jener werden sol;
Verse: 12498    dirre tôt der tuot mir wol.

Verse: 12499    solte diu wunneclîche Îsôt
Verse: 12500    iemer alsus sî mîn tôt,

Verse: 12501    sô wolte ich gerne werben
Verse: 12502    umbe ein êweclîchez sterben.'

Verse: 12503    Lât alle rede belîben.
Verse: 12504    welle wir liebe trîben,

Verse: 12505    ezn mac sô niht belîben,
Verse: 12506    wirn müezen leide ouch trîben.

Verse: 12507    Swie sanfte uns mit der liebe sî,
Verse: 12508    sô müeze wir doch ie dâ bî

Verse: 12509    gedenken der êren.
Verse: 12510    swer sich an niht wil kêren

Verse: 12511    wan an des lîbes gelust,
Verse: 12512    daz ist der êren verlust.

Verse: 12513    swie wol Tristande taete
Verse: 12514    daz leben, daz er haete,

Verse: 12515    sîn êre zôch in doch dervan.
Verse: 12516    sîn triuwe lac im allez an,

Verse: 12517    daz er ir wol gedaehte
Verse: 12518    und Marke sîn wîp braehte.

Verse: 12519    die beide, triuwe und êre,
Verse: 12520    die twungen im sêre

Verse: 12521    sîn herze und sîne sinne.
Verse: 12522    die dâ vor an der minne

Verse: 12523    wâren worden sigelôs,
Verse: 12524    dô er die minne vür si kôs.

Verse: 12525    die selben sigelôsen zwô
Verse: 12526    die gesigeten an der minne dô.

Verse: 12527    Tristan der sante boten zehant
Verse: 12528    in zwein batêlen wider lant

Verse: 12529    und enbôt Marke maere,
Verse: 12530    wie ez ergangen waere

Verse: 12531    umbe die schoenen von Îlant.
Verse: 12532    Marke besande zehant,

Verse: 12533    swen er besenden kunde.
Verse: 12534    dâ randen an der stunde

Verse: 12535    tûsent boten nâch ritterschaft.
Verse: 12536    man enpfienc mit micheler craft

Verse: 12537    die kunden und die geste.
Verse: 12538    daz ergest und daz beste,

Verse: 12539    daz Marke an disen zwein enpfie,
Verse: 12540    mit den sîn leben ouch hine gie,

Verse: 12541    daz selbe enpfienc er alse wol,
Verse: 12542    als ein man daz enpfâhen sol,

Verse: 12543    daz ime vor allen dingen ist.
Verse: 12544    Marke der hiez an der vrist

Verse: 12545    den lantbarûnen allen sagen,
Verse: 12546    daz s' inner ahzehen tagen

Verse: 12547    alle ze hove kaemen,
Verse: 12548    als sî im wol gezaemen

Verse: 12549    ze sîner brûtleite.
Verse: 12550    diz allez was bereite.

Verse: 12551    si kâmen rîlîche dar.
Verse: 12552    dar kam manc wunneclîchiu schar

Verse: 12553    von rittern und von vrouwen
Verse: 12554    ir ougen wunne schouwen,

Verse: 12555    die liehten Îsôte.
Verse: 12556    diu wart vil unde genôte

Verse: 12557    und ze wunder an gesehen
Verse: 12558    und niwan des einen gejehen:

Verse: 12559    'Îsôt, Îsôt la blunde
Verse: 12560    marveil de tû le munde.

Verse: 12561    Îsôt diu ist besunder
Verse: 12562    über al die werlt ein wunder.

Verse: 12563    ez ist wâr, daz man dâ saget
Verse: 12564    von dirre saeligen maget.

Verse: 12565    si gît der werlde wunne
Verse: 12566    gelîche alsam diu sunne.

Verse: 12567    ezn gewunnen elliu rîche
Verse: 12568    nie maget sô wunneclîche.'

Verse: 12569    Nu sî z' ir ê bestatet wart
Verse: 12570    und an ir rehte bewart,

Verse: 12571    daz Curnewal und Engelant
Verse: 12572    sô wart besetzet in ir hant,

Verse: 12573    ob sî niht erben baere,
Verse: 12574    daz Tristan erbe waere,

Verse: 12575    unde ir hulde wart getân.
Verse: 12576    des nahtes dô si solte gân

Verse: 12577    slâfen z' ir hêrren Marke,
Verse: 12578    nu haeten sî sich starke

Verse: 12579    sî und Brangaene und Tristan
Verse: 12580    vor hin gevlizzen dar an,

Verse: 12581    daz sî ir state unde ir stat
Verse: 12582    wîslîchen haeten besat

Verse: 12583    und wol vor hin berâten.
Verse: 12584    in Markes kemenâten

Verse: 12585    was nieman wan si vieriu,
Verse: 12586    der künic selbe und si driu.

Verse: 12587    nu was ouch Marke nider komen.
Verse: 12588    Brangaene haete an sich genomen

Verse: 12589    der küniginne cleider.
Verse: 12590    diu cleider ir beider

Verse: 12591    wâren verwandelt under in.
Verse: 12592    Tristan vuorte Brangaenen hin

Verse: 12593    die marter lîden und die nôt.
Verse: 12594    diu lieht diu laschte ir vrouwe Îsôt.

Verse: 12595    Marke Brangaenen zuo z' im twanc.
Verse: 12596    ine weiz, wie ir der anevanc

Verse: 12597    geviele dirre sache.
Verse: 12598    si dolte sô gemache,

Verse: 12599    daz ez gâr âne braht beleip.
Verse: 12600    swaz ir gespil mit ir getreip,

Verse: 12601    si leiste unde werte,
Verse: 12602    swes er hin z' ir gegerte,

Verse: 12603    mit messing und mit golde,
Verse: 12604    als wol alse er wolde.

Verse: 12605    ich wil mich ouch des wol versehen,
Verse: 12606    daz ez ê selten sî geschehen,

Verse: 12607    daz ie sô schoene messinc
Verse: 12608    vür guldîniu teidinc

Verse: 12609    ze bettegelte würde gegeben.
Verse: 12610    deiswâr ich sazte ez wol mîn leben,

Verse: 12611    daz sît Adâmes tagen
Verse: 12612    als edel valsch nie wart geslagen

Verse: 12613    noch nie sô gaebiu trügeheit
Verse: 12614    an mannes sîten wart geleit.

Verse: 12615    Die wîle ouch sî zwei lâgen,
Verse: 12616    ir bettespiles pflâgen,

Verse: 12617    al die wîle haete Îsôt
Verse: 12618    michel angest unde nôt.

Verse: 12619    si dâhte allez wider sich:
Verse: 12620    'got hêrre, nû beware mich

Verse: 12621    und hilf mir, daz mîn niftelîn
Verse: 12622    wider mich getriuwe müeze sîn!

Verse: 12623    trîbet sî diz bettespil
Verse: 12624    iht ze lange und iht ze vil,

Verse: 12625    ich vürhte ez ir sô wol behage,
Verse: 12626    daz sî vil lîhte dâ betage.

Verse: 12627    sô werde wir alle
Verse: 12628    ze spotte und ze schalle.'

Verse: 12629    nein, ir gedanke unde ir muot
Verse: 12630    die wâren lûter unde guot.

Verse: 12631    dô si vür Îsolde
Verse: 12632    geleiste, daz si solde,

Verse: 12633    unde ir teidinc ergie,
Verse: 12634    von dem bette sî sich lie.

Verse: 12635    nû was ouch Îsôt hantgar.
Verse: 12636    vür daz bette saz si dar,

Verse: 12637    als ez diu selbe solte sîn.
Verse: 12638    zehant iesch ouch der künec den wîn.

Verse: 12639    dâ volgete er dem site mite,
Verse: 12640    wan ez was in den zîten site,

Verse: 12641    daz man des ellîche pflac,
Verse: 12642    swer sô bî einer megede lac

Verse: 12643    und ir den bluomen abe genam,
Verse: 12644    daz eteswer mit wîne kam

Verse: 12645    und lie si trinken beide
Verse: 12646    samet âne underscheide.

Verse: 12647    der selbe site ergieng ouch dâ.
Verse: 12648    Tristan sîn neve der brâhte iesâ

Verse: 12649    beidiu lieht unde wîn.
Verse: 12650    der künec tranc und diu künigîn.

Verse: 12651    ouch sagent genuoge maere,
Verse: 12652    daz ez des trankes waere,

Verse: 12653    von dem Tristan unde Îsôt
Verse: 12654    gevielen in ir herzenôt.

Verse: 12655    nein des trankes was nimê.
Verse: 12656    Brangaene warf in in den sê.

Verse: 12657    Nu sî dem site gegiengen mite,
Verse: 12658    beidiu getrunken nâch dem site,

Verse: 12659    diu junge künigîn Îsôt
Verse: 12660    diu leite sich mit maneger nôt,

Verse: 12661    mit tougenlîchem smerzen
Verse: 12662    ir muotes unde ir herzen

Verse: 12663    zuo dem künege ir hêrren nider.
Verse: 12664    der greif an sîne vröude wider;

Verse: 12665    er twanc si nâhe an sînen lîp.
Verse: 12666    in dûhte wîp alse wîp.

Verse: 12667    er vant ouch die vil schiere
Verse: 12668    von guoter maniere.

Verse: 12669    ime was ein als ander.
Verse: 12670    an ietwederre vander

Verse: 12671    golt unde messinc.
Verse: 12672    ouch leisten s' ime ir teidinc

Verse: 12673    alsô dan und alsô dar,
Verse: 12674    daz er nie nihtes wart gewar.

Verse: 12675    Îsôt diu was dô starke
Verse: 12676    von ir hêrren Marke

Verse: 12677    geminnet unde gehêret,
Verse: 12678    geprîset unde g' êret

Verse: 12679    von liute und von lande.
Verse: 12680    wan man sô maneger hande

Verse: 12681    vuoge unde saelde an ir gesach,
Verse: 12682    ir lop unde ir êre sprach,

Verse: 12683    swaz lop gesprechen kunde.
Verse: 12684    under dirre stunde

Verse: 12685    haete sî und ir amîs
Verse: 12686    ir kurzewîle manege wîs,

Verse: 12687    ir wunne spâte unde vruo,
Verse: 12688    wan nieman wânde niht dar zuo.

Verse: 12689    dane dâhte weder wîp noch man
Verse: 12690    dekeiner slahte undinges an.

Verse: 12691    wan si was in sîner pflege
Verse: 12692    alle stunde und alle wege

Verse: 12693    und lebete, swie si dûhte guot.
Verse: 12694    Hie mite sô nam si in ir muot

Verse: 12695    und bedâhte allez ir dinc.
Verse: 12696    sît nieman ir haelinc

Verse: 12697    unde ir trügeliste
Verse: 12698    niwan Brangaene wiste,

Verse: 12699    enwaere sî danne eine,
Verse: 12700    sô dörfte s' iemer cleine

Verse: 12701    gesorgen umbe ir êre.
Verse: 12702    si sorgete sêre

Verse: 12703    und vorhte harte starke,
Verse: 12704    Brangaene ob sî ze Marke

Verse: 12705    dekeine liebe haete,
Verse: 12706    daz sî im kunt taete

Verse: 12707    ir laster unde ir maere,
Verse: 12708    als ez ergangen waere.

Verse: 12709    diu sorchafte künigîn
Verse: 12710    diu tete an disen dingen schîn,

Verse: 12711    daz man laster unde spot
Verse: 12712    mêre vürhtet danne got.

Verse: 12713    zwêne knehte sî besande
Verse: 12714    vremede von Engelande.

Verse: 12715    die selben hiez si beide
Verse: 12716    swern eide und eide,

Verse: 12717    triuwe über triuwe geben.
Verse: 12718    dâ zuo gebôt s' in an ir leben,

Verse: 12719    swaz sî si hieze ane gân,
Verse: 12720    daz daz beidiu getân

Verse: 12721    und ouch verholn waere.
Verse: 12722    sus seite s' in ir maere.

Verse: 12723    diu mortraete sprach zuo z' in:
Verse: 12724    'nu merket beide mînen sin.

Verse: 12725    ich sende eine maget mit iu,
Verse: 12726    die nemet und rîtet ir driu

Verse: 12727    heinlîchen unde balde
Verse: 12728    eteswar z' einem walde,

Verse: 12729    er sî verre oder bî,
Verse: 12730    der iu dar zuo gevellec sî,

Verse: 12731    dâ nieman heinlîche habe,
Verse: 12732    und slahet ir daz houbet abe.

Verse: 12733    und alle ir rede die merket ir,
Verse: 12734    und swaz si sage, daz saget mir.

Verse: 12735    ir zungen bringet mir her dan.
Verse: 12736    und sît ouch des gewis dar an,

Verse: 12737    swie sô ich ez in ein getrage,
Verse: 12738    daz ich iuch morgen an dem tage

Verse: 12739    mit rîlîcher sache
Verse: 12740    beide ritter mache

Verse: 12741    und wil iu lîhen unde geben,
Verse: 12742    die wîle ich iemer sol geleben.'

Verse: 12743    Diu rede diu wart gewisset dâ.
Verse: 12744    Îsôt diu nam Brangaenen sâ

Verse: 12745    'Brangaene' sprach si 'nim hie war:
Verse: 12746    bin ich iht sêre missevar?

Verse: 12747    ine weiz, wie mir mîn dinc stê.
Verse: 12748    mîn houbet tuot mir sêre wê.

Verse: 12749    du muost uns wurze bringen.
Verse: 12750    wir müezen disen dingen

Verse: 12751    eteslîchen rât geben
Verse: 12752    oder ez gât mir an daz leben.'

Verse: 12753    diu getriuwe Brangaene sprach:
Verse: 12754    'vrouwe, iuwer ungemach

Verse: 12755    daz müet mich harte sêre.
Verse: 12756    nune bîtet ouch niemêre.

Verse: 12757    heizet mich wîsen eteswar,
Verse: 12758    dâ ich eteswaz ervar,

Verse: 12759    daz z' iuwern dingen guot sî.'
Verse: 12760    'sich, zwêne knappen sint hie bî.

Verse: 12761    mit den rît, die wîsent dich.'
Verse: 12762    'gerne vrouwe, daz tuon ich.'

Verse: 12763    si saz ûf unde reit mit in.
Verse: 12764    nu sî zem walde kâmen hin,

Verse: 12765    dâ wurze, crût unde gras
Verse: 12766    der volle nâch ir willen was,

Verse: 12767    Brangaene wolte erbeizet sîn.
Verse: 12768    nu vuorten sî si baz hin în

Verse: 12769    in die wüeste und in die wilde.
Verse: 12770    nu sî von dem gevilde

Verse: 12771    verre hin în kâmen,
Verse: 12772    die höfschen si nâmen,

Verse: 12773    die getriuwen, die werden,
Verse: 12774    und sazten sî zer erden

Verse: 12775    mit triure und mit leide
Verse: 12776    und zucten swert beide.

Verse: 12777    Brangaene dô sô sêre erschrac,
Verse: 12778    daz si an der erden gelac

Verse: 12779    und lac alsô lange nider.
Verse: 12780    ir herze erbibete und alle ir lider.

Verse: 12781    erschrockenlîche sî ûf sach.
Verse: 12782    'hêrre genâde!' si sprach

Verse: 12783    'durch got waz welt ir ane gân?'
Verse: 12784    'dâ sult ir iuwer leben lân.'

Verse: 12785    'ôwê, war umbe? saget mir!'
Verse: 12786    ir einer sprach: 'waz habet ir

Verse: 12787    begangen wider die künigîn?
Verse: 12788    diu hiez iuch slahen. nu muoz ez sîn.

Verse: 12789    iuwer und unser vrouwe Îsôt
Verse: 12790    diu hât geschaffet iuwern tôt.'

Verse: 12791    Brangaene vielt ir hende in ein;
Verse: 12792    weinende sprach si: 'hêrre nein,

Verse: 12793    durch iuwer güete und durch got,
Verse: 12794    sô vristet beide diz gebot

Verse: 12795    und lât mich alsô lange leben,
Verse: 12796    daz ich iu antwürte müge geben.

Verse: 12797    dâ nâch habt ir mich schiere erslagen.
Verse: 12798    ir sult mîner vrouwen sagen

Verse: 12799    und wizzet selbe, daz ich nie
Verse: 12800    wider ir hulden niht begie,

Verse: 12801    dar an ich mich versaehe,
Verse: 12802    daz ir leit geschaehe,

Verse: 12803    ezn waere danne alse vil,
Verse: 12804    des ich doch niht getrûwen wil:

Verse: 12805    dô wir zwô vuoren von Îlant,
Verse: 12806    dô haeten wir zwô zwei gewant.

Verse: 12807    diu haeten wir uns beiden
Verse: 12808    erwelt und ûz gescheiden

Verse: 12809    von anderm gewande.
Verse: 12810    diu vuorten wir von lande:

Verse: 12811    zwei hemede wîz alsam ein snê.
Verse: 12812    dô wir dô kâmen ûf den sê

Verse: 12813    her wider lant ûf unser vart,
Verse: 12814    sô heiz ir von der sunnen wart,

Verse: 12815    daz sî vil selten in den tagen
Verse: 12816    an ir iht kunde vertragen

Verse: 12817    niwan ir hemede al eine,
Verse: 12818    daz wîze, daz reine.

Verse: 12819    sus liebete ir daz hemede an.
Verse: 12820    dô sî ez üeben began,

Verse: 12821    biz daz si 'z über üebete,
Verse: 12822    sîne wîze gar betrüebete,

Verse: 12823    dô haete aber ich daz mîne
Verse: 12824    heinlîche in mînem schrîne

Verse: 12825    in reinen wîzen valten
Verse: 12826    verborgen unde behalten.

Verse: 12827    und als mîn vrouwe her kam,
Verse: 12828    den künec ir hêrren genam

Verse: 12829    und zuo z' im slâfen solte gân,
Verse: 12830    nune was ir hemede niht getân

Verse: 12831    sô schône, alse ez solte
Verse: 12832    und als sî gerne wolte.

Verse: 12833    daz ich ir dô daz mîne lêch
Verse: 12834    und ir 's et eines verzêch

Verse: 12835    und mich sô vil an ir vergaz,
Verse: 12836    ir enwerre danne daz,

Verse: 12837    sô wizze got wol, daz ich nie
Verse: 12838    ze keinen zîten übergie

Verse: 12839    weder ir bete noch ir gebot.
Verse: 12840    nu tuot ez beide samet durch got,

Verse: 12841    grüezet si von mir alsô wol,
Verse: 12842    als ein juncvrouwe ir vrouwen sol.

Verse: 12843    und got durch sîne güete
Verse: 12844    der bewar ir unde behüete

Verse: 12845    ir êre und ir lîp unde ir leben!
Verse: 12846    und mîn tôt der sî ir vergeben.

Verse: 12847    die sêle die bevilhe ich gote,
Verse: 12848    den lîp hin z' iuwerem gebote.'

Verse: 12849    Nu sâhen dise zwêne man
Verse: 12850    erbermeclîche ein ander an

Verse: 12851    und erbarmete s' an der reinen
Verse: 12852    ir inneclîchez weinen.

Verse: 12853    si gerou vil sêre beide
Verse: 12854    und nâmen 'z in ze leide,

Verse: 12855    daz sî gelobet haeten,
Verse: 12856    daz sî den mort taeten.

Verse: 12857    dô sî an ir niht vunden
Verse: 12858    noch niht ervinden kunden,

Verse: 12859    daz morde gebaere
Verse: 12860    und tôtbaere waere,

Verse: 12861    si giengen râten under in zwein
Verse: 12862    unde gerieten in ein:

Verse: 12863    ez ergienge in, swie ez in möhte ergân,
Verse: 12864    si wolten si leben lân.

Verse: 12865    die getriuwen bunden si sâ
Verse: 12866    hôhe ûf einen boum dâ,

Verse: 12867    daz sî die wolve iht naemen,
Verse: 12868    biz daz si wider kaemen,

Verse: 12869    und sniten an der stunde
Verse: 12870    eime ir vogelhunde

Verse: 12871    die zungen ûz und riten dan.
Verse: 12872    sus seiten dise zwêne man

Verse: 12873    Îsôte der mortraeten,
Verse: 12874    daz sî s' ermordet haeten

Verse: 12875    mit jâmer und mit leide.
Verse: 12876    si sageten ir beide,

Verse: 12877    diu selbe zunge diu waere ir.
Verse: 12878    Îsôt diu sprach: 'nu saget mir,

Verse: 12879    waz maeres sagete iu diu maget?'
Verse: 12880    si sageten, alse in was gesaget,

Verse: 12881    al von ende ir rede her dan
Verse: 12882    und verswigen nie niht dar an.

Verse: 12883    'Jâ' sprach si 'seite s' iu nimê?'
Verse: 12884    'nein vrouwe.' Îsôt diu rief: 'ôwê

Verse: 12885    und wâfen dirre maere!
Verse: 12886    unsaeligen mordaere,

Verse: 12887    waz habet ir an gegangen?
Verse: 12888    ir müezet beide hangen!'

Verse: 12889    'hêrre' sprâchen jene dô
Verse: 12890    'wie lûtent disiu maere sô?

Verse: 12891    vil wunderlîchiu vrouwe Îsôt,
Verse: 12892    ir habet uns doch mit maneger nôt

Verse: 12893    ervlêhet unde benoetet,
Verse: 12894    daz wir si haben ertoetet.'

Verse: 12895    'ine weiz, waz ir von vlêhe saget.
Verse: 12896    ich bevalch iu mîne maget

Verse: 12897    in iuwer huote und iuwer pflege,
Verse: 12898    daz ir ir pflaeget ûf dem wege,

Verse: 12899    dâ sî mir solte bringen
Verse: 12900    ein teil ze mînen dingen.

Verse: 12901    die müezet ir mir wider geben
Verse: 12902    oder ez gât iu an daz leben.

Verse: 12903    ir veigen mortslangen
Verse: 12904    ir werdet beide erhangen

Verse: 12905    oder ûf einer hurt verbrant!'
Verse: 12906    'Entriuwen' sprâchen jene zehant

Verse: 12907    'vrouwe, iuwer herze und iuwer muot
Verse: 12908    diun sint niht lûter unde guot,

Verse: 12909    iuwer zunge ist harte manicvalt.
Verse: 12910    nu vrouwe, vristet disen gewalt.

Verse: 12911    ê wir verliesen unser leben,
Verse: 12912    wir wellen s' iu ê wider geben

Verse: 12913    schoene unde wol gesunde.'
Verse: 12914    Îsôt sprach an der stunde

Verse: 12915    weinende harte sêre:
Verse: 12916    'nune lieget mir niht mêre.

Verse: 12917    lebet Brangaene ald ist si tôt?'
Verse: 12918    'si lebet noch, wunderlîche Îsôt.'

Verse: 12919    'ôwê, sô bringet mir si her
Verse: 12920    den worten, daz ich iuch gewer,

Verse: 12921    swes ich iu gelobet hân.'
Verse: 12922    'vrouwe Îsôt, daz sî getân.'

Verse: 12923    Îsôt behabete ir einen dâ.
Verse: 12924    der ander reit dannen sâ

Verse: 12925    hin wider, dâ er Brangaenen lie.
Verse: 12926    Îsôte ir vrouwen brâhte er die.

Verse: 12927    und dô si vür Îsôte kam,
Verse: 12928    Îsôt si zwischen arme nam

Verse: 12929    und kuste ir wange unde ir munt
Verse: 12930    ze einer und ze maneger stunt.

Verse: 12931    den zwein gab sî ze solde
Verse: 12932    zweinzec marc von golde

Verse: 12933    den worten, daz diz maere
Verse: 12934    von in verholen waere.

Verse: 12935    Nu daz diu küniginne Îsôt
Verse: 12936    Brangaenen in der endenôt

Verse: 12937    getriuwe unde staete
Verse: 12938    und an ir muote haete

Verse: 12939    durnehte in alle wîs bekant
Verse: 12940    und in dem tegele gebrant

Verse: 12941    unde geliutert alse ein golt,
Verse: 12942    sît des was Brangaene unde Îsolt

Verse: 12943    von herzen und von sinne
Verse: 12944    sô getriuwe und sô geminne,

Verse: 12945    daz nie niht under in beiden
Verse: 12946    ir dinges wart gescheiden.

Verse: 12947    si wâren mit ein ander dô
Verse: 12948    ir muotes unde ir herzen vrô.

Verse: 12949    Brangaene was des hoves dô wol,
Verse: 12950    der hof der was ir lobes vol.

Verse: 12951    si was geminne in allen.
Verse: 12952    sine truoc niemanne gallen

Verse: 12953    ûzen noch innerhalp der wât.
Verse: 12954    si was râtgebe unde rât

Verse: 12955    des küneges unde der künigîn.
Verse: 12956    ze kamere kunde niht gesîn,

Verse: 12957    Brangaene enmüese ez wizzen.
Verse: 12958    ouch was sî vervlizzen

Verse: 12959    ze dieneste Îsolde.
Verse: 12960    si diende ir, swie si wolde,

Verse: 12961    an Tristande ir amîse.
Verse: 12962    daz triben s' alse lîse,

Verse: 12963    daz nie nieman dervan
Verse: 12964    dekeinen arcwan gewan.

Verse: 12965    ir gebaerde, ir rede, ir maere
Verse: 12966    oder swaz ir dinges waere,

Verse: 12967    des nam in lützel ieman war.
Verse: 12968    nieman haete wân dar.

Verse: 12969    in was sanfte und alsô wol,
Verse: 12970    alse zwein gelieben sol,

Verse: 12971    den ir state unde ir zît
Verse: 12972    ze staten und ze willen lît.

Verse: 12973    dâ was amîe unde amîs
Verse: 12974    alle zît und alle wîs

Verse: 12975    in der minnen bejage.
Verse: 12976    si begunden dicke in dem tage

Verse: 12977    ir ougen understricken
Verse: 12978    mit inneclîchen blicken

Verse: 12979    in der menege und under liuten,
Verse: 12980    dâ blicke sulen tiuten

Verse: 12981    und wehselmaere meinen,
Verse: 12982    mit den man sich vereinen

Verse: 12983    aller gelieben liebe mac.
Verse: 12984    daz triben sî naht unde tac

Verse: 12985    und was daz âne vâre.
Verse: 12986    an rede und an gebâre

Verse: 12987    wâren si beidiu gênde,
Verse: 12988    sitzende unde stênde

Verse: 12989    vrîlîch und offenbaere.
Verse: 12990    ir offenlîchiu maere,

Verse: 12991    mit den si wunder kunden,
Verse: 12992    diu begunden s' under stunden

Verse: 12993    mit clebeworten underweben.
Verse: 12994    man sach dicke in ir maeren cleben

Verse: 12995    der minnen werc von worten
Verse: 12996    als golt in dem borten.

Verse: 12997    es gedâhte aber nieman niht,
Verse: 12998    daz ir wort und ir geschiht

Verse: 12999    an liebe haeten keine craft
Verse: 13000    wan eine von der mâcschaft,

Verse: 13001    die man sô grôze erkande
Verse: 13002    under Marke und Tristande.

Verse: 13003    mit der verkouften si vil,
Verse: 13004    mit der ertrugen s' ir minnenspil.

Verse: 13005    mit der verspilte Minne
Verse: 13006    vil maneges herzen sinne,

Verse: 13007    der sich nie keinez kunde enstân,
Verse: 13008    wie ez umbe ir liebe was getân.

Verse: 13009    diu was an in reine unde guot.
Verse: 13010    ir beider sin, ir beider muot,

Verse: 13011    daz was allez ein und ein,
Verse: 13012    jâ unde jâ, nein unde nein.

Verse: 13013    jâ unde nein, nein unde jâ
Verse: 13014    entriuwen daz was niender dâ.

Verse: 13015    an in was niht gescheiden.
Verse: 13016    dâ wâren beide an beiden.

Verse: 13017    sus triben sî zwei under in
Verse: 13018    die stunde lieplîche hin

Verse: 13019    wîlent sus und wîlent sô.
Verse: 13020    si wâren underwîlen vrô

Verse: 13021    und underwîlen ungemuot,
Verse: 13022    als liebe under gelieben tuot.

Verse: 13023    diu briuwet in ir herzen
Verse: 13024    die senfte bî dem smerzen,

Verse: 13025    bî vröude kumber unde nôt.
Verse: 13026    Sô Tristan und sîn vrouwe Îsôt

Verse: 13027    ir state zuo z' ir dingen
Verse: 13028    niht kunden vollebringen,

Verse: 13029    daz was ir nôt. sus unde sô
Verse: 13030    wâren si trûrec unde vrô.

Verse: 13031    ouch enwart niht under in verborn,
Verse: 13032    dane waere ouch underwîlen zorn.

Verse: 13033    ich meine zorn âne haz.
Verse: 13034    und sprichet aber ieman daz,

Verse: 13035    daz zorn ungebaere
Verse: 13036    under sô gelieben waere,

Verse: 13037    binamen dâ bin ich sicher an,
Verse: 13038    daz der nie rehte liep gewan.

Verse: 13039    wan diz daz ist der Minnen site,
Verse: 13040    hie en zündet sî gelieben mite,

Verse: 13041    hie mite sô viuret sî den muot.
Verse: 13042    wan alse in zorn vil wê getuot,

Verse: 13043    sô süenet sî diu triuwe,
Verse: 13044    so ist aber diu liebe niuwe

Verse: 13045    und aber der triuwen mê dan ê.
Verse: 13046    wie aber ir zorn ûf erstê,

Verse: 13047    wie s' âne rât ze suone komen,
Verse: 13048    daz habet ir dicke vernomen.

Verse: 13049    gelieben dunket lîhte,
Verse: 13050    die dicke und ie gedîhte

Verse: 13051    ein ander mugen gewesen bî,
Verse: 13052    daz eteswer dâ lieber sî

Verse: 13053    und nâher gênde dan si sîn,
Verse: 13054    und machent umbe ein dunkelîn

Verse: 13055    ein michel zornmaere,
Verse: 13056    ûz einer cleinen swaere

Verse: 13057    eine rîlîche suone.
Verse: 13058    und ist ouch daz ze tuone;

Verse: 13059    daz sol man in billîchen.
Verse: 13060    hie von sol liebe rîchen,

Verse: 13061    jungen unde niuwen
Verse: 13062    und viuren an den triuwen.

Verse: 13063    liebe armet unde altet,
Verse: 13064    si kuolet unde kaltet,

Verse: 13065    swâ sî ir viures niene hât.
Verse: 13066    sô der zorn an ir zegât,

Verse: 13067    zehant engruonet si niht.
Verse: 13068    swenne under vriunden geschiht

Verse: 13069    dekeiner slahte zornelîn,
Verse: 13070    so ist triuwe ie dâ diu süenaerîn,

Verse: 13071    vrisch und iteniuwe.
Verse: 13072    diz niuwet die triuwe,

Verse: 13073    diz liutert liebe alse golt.
Verse: 13074    Alsus treip Tristan unde Îsolt

Verse: 13075    mit liebe und leide ir stunde hin.
Verse: 13076    liep unde leit was under in

Verse: 13077    in micheler unmüezekeit;
Verse: 13078    liep meine ich âne herzeleit.

Verse: 13079    sine haeten dannoch beide
Verse: 13080    dekeine herzeleide

Verse: 13081    noch niht solher ungeschiht,
Verse: 13082    diu hin in daz herze siht.

Verse: 13083    sî verswigen ouch ir dinc
Verse: 13084    und hâlen ir haelinc

Verse: 13085    vil anclîch und vil ange
Verse: 13086    und triben ouch daz lange.

Verse: 13087    si wâren beide hôchgemuot,
Verse: 13088    ir muotes vrî unde vruot.

Verse: 13089    Îsôt diu küniginne
Verse: 13090    diu was dô geminne

Verse: 13091    mit liute und mit lande.
Verse: 13092    ouch sagete von Tristande

Verse: 13093    beidiu liut unde lant.
Verse: 13094    er was genenne unde erkant,

Verse: 13095    ervorhten wunderlîche
Verse: 13096    in al dem künicrîche.





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.