TITUS
Gottfried von Strassburg, Tristan
Part No. 19
Previous part

Chapter: 19 
19: Rotte und Harfe


Verse: 13097    Nu Tristan was gemuothaft.
Verse: 13098    ze erneste und ze ritterschaft

Verse: 13099    vertete er sîner stunde vil.
Verse: 13100    er dienete mit vederspil

Verse: 13101    sînen müezegen tagen.
Verse: 13102    er reit birsen unde jagen,

Verse: 13103    so 'z an der zît alsô geviel.
Verse: 13104    in den zîten kam ein kiel

Verse: 13105    ze Curnewâle in Markes habe.
Verse: 13106    dâ reit ein ritter ûz und abe,

Verse: 13107    ein edel barûn von Îlant,
Verse: 13108    der was Gandîn genant

Verse: 13109    und was höfsch, schoene unde rîch,
Verse: 13110    des lîbes alsô menlîch,

Verse: 13111    daz allez Îlant seite
Verse: 13112    von sîner manheite.

Verse: 13113    der kam schône gecleit
Verse: 13114    mit ritterlîcher schônheit

Verse: 13115    und mit hêrlîchen siten
Verse: 13116    al eine ûf Markes hof geriten

Verse: 13117    âne schilt und âne sper.
Verse: 13118    über sînen rucke vuorte er

Verse: 13119    eine rotten, diu was cleine,
Verse: 13120    mit golde und mit gesteine

Verse: 13121    geschoenet unde gezieret,
Verse: 13122    ze wunsche gecordieret.

Verse: 13123    unde als er erbeizet was,
Verse: 13124    er gienc in den palas

Verse: 13125    und gruozte, alse er solde,
Verse: 13126    Marken unde Îsolde.

Verse: 13127    der ritter unde der amîs
Verse: 13128    was er gewesen manege wîs

Verse: 13129    und ouch ze manegem mâle
Verse: 13130    und kam ze Curnewâle

Verse: 13131    durch ir willen von Îlant.
Verse: 13132    nu bekande ouch sî 'n zehant:

Verse: 13133    'dêu sal, messire Gandîn!'
Verse: 13134    sprach diu gevüege künigîn.

Verse: 13135    'merzî' sprach Gandîn 'bêle Îsolt,
Verse: 13136    schoene und schoener danne golt

Verse: 13137    in Gandînes ougen!'
Verse: 13138    nu seite ouch Îsôt tougen

Verse: 13139    dem künege, wer er waere.
Verse: 13140    den dûhte ez alwaere

Verse: 13141    unde wundert in genuoc,
Verse: 13142    daz er die rotten ûf im truoc.

Verse: 13143    und nam si 's alle wunder.
Verse: 13144    samet unde sunder

Verse: 13145    bemarcten sî ez starke.
Verse: 13146    iedoch sô vleiz sich Marke

Verse: 13147    ze sînen êren sêre
Verse: 13148    sô durch sîn selbes êre

Verse: 13149    sô durch die bete Îsôte.
Verse: 13150    diu bat in ie genôte,

Verse: 13151    daz er im êre baere,
Verse: 13152    wan er ir lantman waere.

Verse: 13153    des was er gerne gemant.
Verse: 13154    er sazte in bî sich zehant

Verse: 13155    und vrâgete in aller hande
Verse: 13156    von liute und von lande,

Verse: 13157    von vrouwen und von höfscheit.
Verse: 13158    nu daz daz ezzen was bereit

Verse: 13159    und daz gesinde wazzer nam
Verse: 13160    und daz wazzer hin z' im kam,

Verse: 13161    dô wart er vil unde vil
Verse: 13162    gebeten, daz er sîn rottenspil

Verse: 13163    von im haete getân.
Verse: 13164    des enkunde in nieman über gân.

Verse: 13165    künic unde künigîn
Verse: 13166    die liezen ez mit guote sîn.

Verse: 13167    sô dûhte ez aber genuoge
Verse: 13168    unhöfscheit unde unvuoge.

Verse: 13169    ouch engieng ez sô niht hin,
Verse: 13170    sine begunden 's under in

Verse: 13171    vil lachen unde spotten.
Verse: 13172    der ritter mit der rotten,

Verse: 13173    der hêrre mit der harnschar
Verse: 13174    der nam es alles keine war.

Verse: 13175    er was nider gesezzen
Verse: 13176    ze Markes sîten ezzen.

Verse: 13177    er tranc und az, als in gezam.
Verse: 13178    Nu man die tische dan genam,

Verse: 13179    er stuont ûf und gie dannen
Verse: 13180    sitzen ze Markes mannen.

Verse: 13181    die gâben ime geselleschaft,
Verse: 13182    die wâren mit im kumberhaft

Verse: 13183    mit manegem hovemaere.
Verse: 13184    der künec der hovebaere,

Verse: 13185    Marke der tugende rîche
Verse: 13186    der bat in offenlîche,

Verse: 13187    ob er iht rotten kunde,
Verse: 13188    daz er in allen gunde,

Verse: 13189    daz sî vernaemen sîn spil.
Verse: 13190    der gast sprach: 'hêrre, ine wil,

Verse: 13191    ine wizze danne umbe waz.'
Verse: 13192    'hêrre, wie meinet ir daz?

Verse: 13193    welt ir iht, des ich hân,
Verse: 13194    daz ist allez getân.

Verse: 13195    lât uns vernemen iuwern list,
Verse: 13196    ich gib iu, swaz iu liep ist.'

Verse: 13197    'diz sî!' sprach der von Îlant.
Verse: 13198    er tete in einen leich zehant,

Verse: 13199    der in allen sanfte tete.
Verse: 13200    der künec der bat in sâ ze stete,

Verse: 13201    daz er aber einen machete.
Verse: 13202    der trügenaere erlachete

Verse: 13203    vil inneclîche wider sich;
Verse: 13204    'diu miete' sprach er 'lêret mich,

Verse: 13205    daz ich iu rotte, swaz ich sol.'
Verse: 13206    und tete den zwirnt alse wol.

Verse: 13207    nu daz der ander was getân,
Verse: 13208    Gandîn gie vür den künic stân,

Verse: 13209    die rotten truog er an der hant.
Verse: 13210    'nu hêrre' sprach er 'sît gemant,

Verse: 13211    des ir gelobetet wider mich.'
Verse: 13212    der künec sprach: 'gerne, daz tuon ich.

Verse: 13213    saget mir, waz wellet ir?'
Verse: 13214    'Îsolde' sprach er 'gebet mir!'

Verse: 13215    'vriunt' sprach er 'swaz ir âne die
Verse: 13216    gebietet, daz ist allez hie.

Verse: 13217    diz mag noch sus noch sô gesîn.'
Verse: 13218    'entriuwen hêrre' sprach Gandîn

Verse: 13219    'ine wil grôz noch cleine
Verse: 13220    niwan Îsôte al eine.'

Verse: 13221    der künec sprach: 'triuwen, dazn geschiht.'
Verse: 13222    'hêrre, sô enwelt ir niht

Verse: 13223    behalten iuwer wârheit?
Verse: 13224    werdet ir des überseit,

Verse: 13225    daz ir urwaere sît,
Verse: 13226    so ensult ir nâch der selben zît

Verse: 13227    dekeines landes künic wesen.
Verse: 13228    heizet küneges reht lesen.

Verse: 13229    vindet ir ez niht dâ,
Verse: 13230    ich gân von mînem rehte sâ.

Verse: 13231    ouch jehet ir oder swer es giht,
Verse: 13232    ir gelobetet mir niht,

Verse: 13233    dâ volge ich mînem rehte hin
Verse: 13234    wider iuch und wider in,

Verse: 13235    swie mir der hof erteilet.
Verse: 13236    mîn lîp der ist geveilet

Verse: 13237    mit kampfe und mit vehte,
Verse: 13238    ine kome ze mînem rehte.

Verse: 13239    swer sô ir wellet oder ir,
Verse: 13240    der rîte in einen rinc mit mir.

Verse: 13241    ich wil bereden an dirre vrist,
Verse: 13242    daz diu schoene Îsôt mîn ist.'

Verse: 13243    Der künec der sach her unde dar
Verse: 13244    und nam allenthalben war,

Verse: 13245    obe er ieman möhte hân,
Verse: 13246    der in getörste bestân.

Verse: 13247    nune was dâ nieman, der sîn leben
Verse: 13248    an eine wâge wolte geben,

Verse: 13249    noch Marke selbe enwolde
Verse: 13250    niht vehten umbe Îsolde,

Verse: 13251    wan Gandîn was von solher craft,
Verse: 13252    sô menlîch und sô herzehaft:

Verse: 13253    ir keiner kêrte sich dar an.
Verse: 13254    Nu was ouch mîn hêr Tristan

Verse: 13255    birsen geriten ze walde.
Verse: 13256    der enwas ouch nie sô balde

Verse: 13257    von walde wider ze hove komen,
Verse: 13258    ern haete ûf dem wege vernomen

Verse: 13259    diu leiden niuwen maere,
Verse: 13260    daz s' ime g' antwürtet waere.

Verse: 13261    ez was ouch wâr, si was alsô.
Verse: 13262    Gandin haete die schoenen dô

Verse: 13263    vil inneclîche weinende
Verse: 13264    und manege clage erscheinende

Verse: 13265    von hove gevüeret an den stat
Verse: 13266    und an den stat was ime gesat

Verse: 13267    ein pavilûne, diu was rîch,
Verse: 13268    wol schoene unde hêrlîch.

Verse: 13269    dâ gieng er und diu künigîn
Verse: 13270    al die wîle sitzen în,

Verse: 13271    biz daz mer wider kaeme
Verse: 13272    unde der kiel genaeme

Verse: 13273    den vluz und die vlieze,
Verse: 13274    wan er lac an dem grieze.

Verse: 13275    Nu Tristan wider heim kam
Verse: 13276    und von der rotten vernam

Verse: 13277    diu maere baz unde baz,
Verse: 13278    zehant er ûf sîn ors saz,

Verse: 13279    sîne harpfen nam er an die hant,
Verse: 13280    er kam wol balde gerant

Verse: 13281    bî unde nâhe zuo der habe
Verse: 13282    und kêrte dô mit listen abe

Verse: 13283    ze einem busche und bant dâ vaste
Verse: 13284    sîn ors zuo z' einem aste.

Verse: 13285    sîn swert daz hancte er dar an.
Verse: 13286    mit sîner harpfen lief er dan

Verse: 13287    und kam zer pavelûne
Verse: 13288    und vant ouch dem barûne

Verse: 13289    sitzende under armen
Verse: 13290    die vröudelôsen armen,

Verse: 13291    die weinenden Îsôte.
Verse: 13292    die trôste er ie genôte.

Verse: 13293    nu half ez aber cleine,
Verse: 13294    biz daz si den al eine

Verse: 13295    mit der harpfen gesach.
Verse: 13296    den gruozte Gandîn unde sprach:

Verse: 13297    'dê te saut, bêâs harpiers!'
Verse: 13298    'merzî, gentil schevaliers!

Verse: 13299    hêrre, ich hân' sprach aber er
Verse: 13300    'gegâhet harte sêre her.

Verse: 13301    man sagete mir an dirre zît,
Verse: 13302    daz ir von Îlande sît.

Verse: 13303    hêrre, dannen bin ouch ich.
Verse: 13304    durch iuwer êre, vüeret mich

Verse: 13305    hin wider heim in Îlant!'
Verse: 13306    der von Îlande sprach zehant:

Verse: 13307    'geselle, daz gelobe ich dir.
Verse: 13308    nu sitze nider, harphe mir.

Verse: 13309    getroestest dû die vrouwen mîn,
Verse: 13310    daz sî ir weinen lâzet sîn,

Verse: 13311    ich gibe dir die aller besten wât,
Verse: 13312    die disiu pavilûne hât.'

Verse: 13313    'diz lobe ich, hêrre' sprach Tristan
Verse: 13314    'ouch hân ich guoten trôst dar an,

Verse: 13315    ez ensî dan alse vil,
Verse: 13316    daz sî durch kein mannes spil

Verse: 13317    ir weinen welle lâzen,
Verse: 13318    sô muoz si sich es mâzen.'

Verse: 13319    sînes werkes er begunde,
Verse: 13320    er harphete an der stunde

Verse: 13321    sô rehte süezen einen leich,
Verse: 13322    der Îsôte in ir herze sleich

Verse: 13323    und ir gedanken alle ergie
Verse: 13324    sô verre, daz s' ir weinen lie

Verse: 13325    und an ir amîs was verdâht.
Verse: 13326    Nu daz der leich was vollebrâht,

Verse: 13327    dô was dem kiele wazzer komen
Verse: 13328    und haete sînen vluz genomen.

Verse: 13329    hie mite sô sprâchen jene her abe
Verse: 13330    von dem kiele in die habe:

Verse: 13331    'hêrre, hêrre, gât her an!
Verse: 13332    und kumet mîn hêr Tristan,

Verse: 13333    die wîle ir an dem lande sît,
Verse: 13334    uns begât ein übel zît.

Verse: 13335    ez stât gâr in sîner hant
Verse: 13336    beidiu liut unde lant.

Verse: 13337    ouch ist er selbe, sô man seit,
Verse: 13338    von alsô grôzer vrecheit,

Verse: 13339    sô geherze und sô gemuot,
Verse: 13340    daz er iu lîhte schaden tuot.'

Verse: 13341    diu rede was Gandîne ungemach.
Verse: 13342    ûz grôzem unwerde er sprach:

Verse: 13343    'nu müeze ich haben gotes haz,
Verse: 13344    ob ich von hinnen umbe daz

Verse: 13345    tâlanc deste ê ze schiffe gê!
Verse: 13346    geselle, mache dû mir ê

Verse: 13347    den leich von Dîdône.
Verse: 13348    du harpfest alsô schône,

Verse: 13349    daz ich ez an dich minnen sol.
Verse: 13350    nu harpfe mîner vrouwen wol!

Verse: 13351    ich vüere dich ze minnen
Verse: 13352    mit mir und mit ir hinnen

Verse: 13353    und gibe dir ouch alhie zehant
Verse: 13354    dînen geheiz und dîn gewant,

Verse: 13355    daz aller beste, daz ich hân.'
Verse: 13356    Tristan sprach: 'hêrre, deist getân.'

Verse: 13357    Der spilman huob aber an.
Verse: 13358    sîn harpfenspil er aber began

Verse: 13359    sô rehte suoze bringen,
Verse: 13360    daz Gandîn sînen dingen

Verse: 13361    vil vlîzeclîchen ôre bôt
Verse: 13362    und sach ouch wol, daz Îsôt

Verse: 13363    sêre an die harpfen was verdâht.
Verse: 13364    nu daz der leich was vollebrâht,

Verse: 13365    Gandîn der nam die künigîn
Verse: 13366    und wolte hin ze schiffe sîn.

Verse: 13367    nu was diu vlieze unde der vlôz
Verse: 13368    vor der schifbrucken alsô grôz,

Verse: 13369    daz nieman an der stunde
Verse: 13370    âne ein vil hôch ors kunde

Verse: 13371    zer schifbrucken komen în.
Verse: 13372    'waz getuon wir nû?' sprach Gandîn

Verse: 13373    'wie kumet mîn vrouwe dar an?'
Verse: 13374    'seht, hêrre' sprach der spilman

Verse: 13375    'sît daz ich des gewis bin,
Verse: 13376    daz ir mich mit iu vüeret hin,

Verse: 13377    swes ich ze Curnewâle hân,
Verse: 13378    des sol hie lützel bestân.

Verse: 13379    ich hân ein hôhez ors hie bî,
Verse: 13380    ich waene ez ouch wol sô hôch sî,

Verse: 13381    mîne vrouwen, iuwer vriundîn,
Verse: 13382    daz ich si wol zer brucken în

Verse: 13383    sô schône gevüere,
Verse: 13384    daz sî daz mer iht rüere.'

Verse: 13385    Gandîn sprach: 'lieber spilman.
Verse: 13386    balde île, brinc dîn ors her dan

Verse: 13387    und nim ouch iesâ dîn gewant!'
Verse: 13388    Tristan der brâhte daz ors zehant,

Verse: 13389    und iesâ dô er wider kam,
Verse: 13390    sîne harpfen er ze rucke nam.

Verse: 13391    'nu hêrre von Îlant' sprach er
Verse: 13392    'bietet mir mîne vrouwen her,

Verse: 13393    ich vüere sî vor mir dar în.'
Verse: 13394    'nein spilman' sprach Gandîn

Verse: 13395    'dune solt sî niht rüeren,
Verse: 13396    ich wil si selbe vüeren.'

Verse: 13397    'wê hêrre!' sprach diu schoene Îsôt
Verse: 13398    'diz maere ist allez âne nôt,

Verse: 13399    daz er mich niht rüeren sol.
Verse: 13400    nu wizzet endelîche wol,

Verse: 13401    daz ich niemêre kume dar an,
Verse: 13402    mich envüere der spilman.'

Verse: 13403    Gandîn bôt ime Îsôte dar.
Verse: 13404    'geselle' sprach er 'nim ir war

Verse: 13405    und vüere s' alsô schône,
Verse: 13406    daz ich dir 's iemer lône.'

Verse: 13407    nu er Îsolde z' ime gewan,
Verse: 13408    er sprancte ein lützel her dan.

Verse: 13409    und alse ez Gandîn gesach,
Verse: 13410    unwertlîche er im nâch sprach:

Verse: 13411    'inâ gouch! waz sol diz sîn?'
Verse: 13412    'nein nein' sprach Tristan 'gouch Gandîn!

Verse: 13413    vriunt, ir stât an des gouches zil.
Verse: 13414    wan daz ir mit dem rottenspil

Verse: 13415    dem künege Marke ertruget an,
Verse: 13416    daz vüere ich mit der harpfen dan.

Verse: 13417    ir truget, nu sît ouch ir betrogen.
Verse: 13418    Tristan der hât iu nâch gezogen,

Verse: 13419    biz daz er iuch beswichen hât.
Verse: 13420    vriunt, ir gebt rîlîche wât.

Verse: 13421    ich hân daz beste gewant,
Verse: 13422    daz ich in dem gezelte vant!'

Verse: 13423    Tristan reit sîne strâze.
Verse: 13424    Gandîn was âne mâze

Verse: 13425    trûric unde trûresam.
Verse: 13426    im tete schade unde scham

Verse: 13427    vil sêre und inneclîche wê.
Verse: 13428    er kêrte wider über sê

Verse: 13429    mit schame und mit leide.
Verse: 13430    jene geverten beide,

Verse: 13431    Tristan und Îsôt kêrten hin.
Verse: 13432    ob s' under wegen under in

Verse: 13433    iender ze vröuden kaemen,
Verse: 13434    ruowe in den bluomen naemen,

Verse: 13435    daz wil ich âne waenen lân.
Verse: 13436    ich sol waenen unde wân

Verse: 13437    mînenthalben legen nider.
Verse: 13438    Tristan der brâhte Îsôte wider

Verse: 13439    sînem oeheime Marke
Verse: 13440    und strâfete in starke:

Verse: 13441    'hêrre' sprach er 'wizze crist,
Verse: 13442    sô lieb als iu diu künegîn ist,

Verse: 13443    sô ist ez ein michel unsin,
Verse: 13444    daz ir si gebet sô lîhte hin

Verse: 13445    durch harpfen oder durch rotten.
Verse: 13446    ez mac diu werlt wol spotten.

Verse: 13447    wer gesach ie mêre künigîn
Verse: 13448    durch rottenspil gemeine sîn?

Verse: 13449    her nâch sô bewâret daz
Verse: 13450    und hüetet mîner vrouwen baz!'




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.